Róbert Lagerman tilnefndur til verðlauna Heimilis og skóla fyrir skákkennslu í leikskólum!

Róbert Lagerman skákmeistari er tilnefndur til Foreldraverðlauna Heimilis og skóla, fyrir kennslustarf sem hann hefur unnið í leikskólanum Njálsborg á vegum Skákakademíu Reykjavíkur. Katrín Jakobsdóttir menntamálaráðherra veitir verðlaunin við hátíðlega athöfn í Þjóðmenningarhúsinu á þriðjudag. 
 
Þetta er verðskulduð viðurkenning á starfi Róberts og Skákakademíunnar við að breiða út fagnaðarerindi skáklistarinnar meðal yngstu íbúa Reykjavíkur. Róbert hefur síðustu ár heimsótt reglulega leikskólana Njálsborg, Hlíðarborg, Barónsborg og Lindarborg, og er óhætt að segja að hann hafi slegið í gegn hjá börnunum.
 
Þá hefur Róbert staðið fyrir sýningum á skáklistaverkum barnanna, m.a. í Listasafni Reykjavíkur og Ráðhúsinu.
 
Skákakademía Reykjavíkur hefur sett sér það markmið að heimsækja alla leikskóla Reykjavíkur á næsta skólaári, auk þess sem Róbert mun áfram standa fyrir reglulegum heimsóknum í nokkra leikskóla.