Guðmundur G. Þórarinsson heiðraður

Á hátíðarskákkvöldi í Gallerý Skák í gærkvöldi var Guðmundur G. Þórarinsson, heiðraður fyrir mikið, heilladrjúgt og óeigingjarnt starf í þágu íslenskra skákmála og eflingu skáklistarinnar um árabil. Guðmundur gegndi starfi forseta Skáksambands Íslands í alls 10 ár, 1969-1973 og 1992-1997, næstlengst allra og var í forystu fyrir heimsmeistaraeinvíginu á skák 1972, sem kom Íslandi á heimskortið að margra mati.

Hann hefur nú sett fram athyglisverða kenningu um uppruna hinna fornu sögualdartaflmanna sem kenndir eru við eyjuna Lewis (Ljóshús) en æ fleiri fræðimenn hallast nú að tilgátu Guðmundar, í ljósi margvíslegra vísbendinga og raka, að þeir kunni að hafa verið gerðir í Skákholti í tíð Páls Jónssonar biskups um kring um árið 1200. Gripir þessir eru taldir meðal 5 mestur gersema í safni The British Museum og kennir þar þó margra grasa.  Verði það almennt viðurkennt muna þetta breyta Íslandssögunni.
 
Guðmundur hlaut  "Skákorðuna" fyrir árið 2011, sem Einar S. Einarsson, formaður Skákeflis vinafélags, sem stendur að baki Gallerý Skákar, afhenti honum með smá ávarpi í leikhléi á 11 umferða hvatskákmóti sem þar fór fram með 18 þátttakenduum, sem klöppuðu Guðmundi innilega lof í lófa.   Það var Guðfinnur R. Kjartansson sem vann mótið með nokkrum yfirburðum, 9 vinningum af 11 mögulegum, í öðru sæti varð hinn aldna skákkempa Kristinn Johnson ásamt Stefáni Þormar með 7. vinninga. Annars dreifðust vinningarnir nokkuð jafnt með örfáum undantekningum.
 
Þetta er í fjórða sinn sem Skákorðan er veitt, en hana í fyrra Magnús V. Pétursson, þar áður Guðfinnur R. Kjartansson og fyrstur Birgir Sigurðsson árið 2008.

Texti ritaður af Einari S. Einarssyni.

Myndaalbúm (ESE)