Rótarýklúbburinn Reykjavík - Grafarvogur afhendir Skákdeild Fjölnis veglega gjöf

Á fundi Rótarýklúbbsins Reykjavík - Grafarvogur þann 11. maí var Helgi Árnason skólastjóri Rimaskóla og formaður Skákdeildar Fjölnis gestur Rótarýfélaga. Klúbburinn afhenti við það tilefni skákdeild Fjölnis tíu vönduð skáksett sem Rótarýfélagar höfðu safnað fyrir með aðstoð fyrirtækja í hverfinu; Arion banka, Landsbanka Íslands, Varðar og Svalþúfu ehf.

Það var forseti Rótarýklúbbsins Reykjavík Grafarvogur, Elísabet Gísladóttir, sem afhenti gjöfina formlega en Helga til aðstoðar mættu Íslandsmeistarar barnaskólasveita, skáksveit Rimaskóla, til að taka við þessari frábæru gjöf. Í skáksveitinni eru fimm krakkar á aldrinum 9 - 13 ára sem öll tefla fyrir Fjölni. Þau eru á leið til Danmerkur í haust á Norðurlandamót barnaskólasveita. 

Helgi Árnason formaður skákdeildar Fjölnis þakkaði Rótarýklúbbnum Reykjavík - Grafarvogur fyrir mikinn hlýhug til skákstarfsins og þessa höfðinglegu gjöf. Þetta er ekki í fyrsta sinn sem Rótarýklúbburinn Reykjavík - Grafarvogur styður við barna-og unglingastarf skákdeildarinnar því á hverju ári hefur klúbburinn gefið alla verðlaunagripi á hin vinsælu sumarskákmót Fjölnismanna.