Ævintýraferð Hróksins fyrir norðnorðwestan.

Fimmta páskaferð Hróksins til hins einangraða bæjar Ittoqqortoormiit (staður hinna stóru húsa) við Scoresbysund á austurströnd Grænlands var vel heppnuð. Frá árinu 2003 hefur Hrókurinn, leiddur af Hrafni Jökulssyni, staðið fyrir fjölda ferða og heimsótt öll þorp austurstrandarinnar hjá okkar góðu grönnum hér hinummegin við sundið.

Að þessu sinni héldu í „skáktrúboð" þau Ingibjörg Edda Birgisdóttir, Arnar Valgeirsson, Tim Vollmer og Hrund Þórsdóttir. Slegið var upp skákveislu fyrir börn og unglinga og fengu fullorðnir að sjálfsögðu að vera með enda skákáhugi bæjarbúa verulegur. Þó eru ekki nema fimm ár síðan að flestir lærðu mannganginn.

Á 70° breiddargráðu geta veturnir verið býsna harðir og fengu leiðangursmenn að finna fyrir því þó veðrið hafi verið með besta móti flesta dagana. Allskyns ævintýri biðu ferðalanganna, enda gaddfreðið Scoresbysundið það breiðasta í heimi og ísbirnir trilla þar um nánast daglega.

Um næstu helgi mun Morgunblaðið gera ferðinni skil í máli og myndum, sem eru hver annarri glæsilegri, enda Tim Vollmer klárlega í fremstu röð. Skipuleggur hann ferðir erlendra  ljósmyndara, bæði hér á landi sem og annarsstaðar.

Eymundsson, Actavis, Bónus, Ís-spor og Sölufélag Garðyrkjumanna styrktu Hrókinn með vinningum og Cintamani sá til þess að frostið biti ekki illa í bossana á leiðangursmönnum sem voru himinlifandi með frábæra ferð til þessa magnaða þorps, þar sem styttra er til Íslands en næsta bæjar.

En eins og sjá má var skákin allsráðandi og aðalatriðið...

Greinar og glæstar myndir munu birtast á Skák.is á næstunni.

Þessar myndir tók Hrund Þórsdóttir og Sverrir þyrluflugmaður smellti einni af spenntum hópnum.

Myndaalbúm