Vignir Vatnar var í banastuði á Sumarskákmóti Fjölnis

Rúmlega 30 keppendur tóku þátt í sumarskákmóti Fjölnis sem haldið var við hinar bestu aðstæður í Rimaskóla. "Fjölnisvinurinn" Vignir Vatnar Stefánsson heiðraði Grafarvogsbúa með þátttöku og frábærri frammistöðu. Hann stóð uppi sem sigurvegari með 5,5 vinninga af 6 mögulegum. Í 2., 3. og 4. sæti sæti urðu hástökkvarar skákstigans síðustu mánuði og meistarar úr Rimaskóla, Jón Trausti, Dagur og Oliver Aron sem Vignir Vatnar þurfti að kljást alla við.

Sigur Vignis Vatnars er því athyglisverður og hann hefur teflt eins og engill á öllum Fjölnismótum undanfarin tvö ár. Í stúlknaflokki var það Sóley Lind Pálsdóttir sem stóð uppi sem sigurvegari og í flokki skákmanna f. 2000 og yngri fékk Davíð Kolka bikarinn þar sem Vignir Vatnar hafði þegar unnið veglegasta bikarinn sem sigurvegari skákmótsins. Mótið var vel mannað og mikil barátta á fyrstu átta borðunum í hverri umferð. Góður árangur yngri keppenda var athyglisverður og oftar en ekki reyndist knappur tími þeirra versti óvinur. 

Í lok mótsins afhenti Elísabet Gísladóttir forseti Rótarýklúbbsins í Grafarvogi sigurvegurunum þremur fallega einabikara sem klúbburinn gaf líkt og undanfarin ár. Helgi Árnason formaður skákdeildar Fjölnis afhenti 25 efstu keppendum mótsins áhugaverða vinninga, pítsugjafabréf, bíómiða í Laugarásbíó og gagnlegar skákbækur. Hann þakkaði Fjölniskrökkunum fyrir ánægjulegt og einstaklega árangursríkt starf í vetur en með sumarskákmótinu lauk 7. starfsári skákdeildar Fjölnis. Skákstjórn var í öruggum höndum Páls Sigurðssonar og þeir fjölmörgu foreldrar sem mættu með krökkunum sínum voru afar hjálplegir við að raða upp og taka saman skáksettin.

• Myndaalbúm mótsins
• Chess-Results