Jón Trausti og Dagur efstir á fjölmennu skákmóti Rimaskóla 2011

Skákmót Rimaskóla var haldið í 18. sinn í hátíðarsal skólans og tóku 60 nemendur þátt í mótinu að þessu sinni. Allir sterkustu skákmenn skólans voru með í mótinu og því hart barist á efstu borðum frá upphafi til enda lokaumferðar. Þegar upp var staðið að loknum sex umferðum kom í ljós að þeir bekkjarfélagar og liðsmenn í Norðurlandameistarasveit Rimaskóla,  Jón Trausti Harðarson og Dagur Ragnarsson, urðu efstir með 5,5 vinninga eftir að hafa gert innbyrðis jafntefli og sigrað alla aðra andstæðinga sína.

Þeir munu tefla tveggja skáka einvígi um meistaratitilinn einhvern næstu daga. Í 3. sæti varð hin efnilega skákprinsessa Nansý Davíðsdóttir með 5 vinninga. Hún tapaði aðeins skák fyrir Jóni Trausta. Á eftir henni komu þau í hnapp Hrund Hauksdóttir, Kristófer Jóel Jóhannesson, Oliver Aron Jóhannesson, Viktór Ásbjörnsson, Svandís Rós Rikharðsdóttir, Jóhann Arnar Finnsson, Davíð Thor Morgan og Kristinn Andri Kristinsson með 4,5 og 4 vinninga. Þessir krakkar eru allir kunnir fyrir að skip sigursveitir Rimaskóla á Íslands-og Reykjavíkurmeistaramótum vetrarins nema Davíð Thor Morgan 8 ára gamall enn einn efnispilturinn í skákinni í Rimaskóla en hann vann fyrir stuttu skákmót frístundaheimilisins Tígrisbæjar í Rimaskóla örugglega.

Skákstjórar voru þeir Helgi Árnason skólastjóri og Stefán Bergsson framkvæmdarstjóri Skákakademíunnar. Alls voru veitt 28 verðlaun, pítsur, skákbækur og bíómiðar. Skákmót Rimaskóla hefur verið haldið allt frá stofnun skólans árið 1993. Sá sem oftast hefur sigrað á mótinu er Hjörvar Steinn Grétarsson en hann varð skákmeistari Rimaskóla  alls sjö sinnum.

• Úrslitin á Chess-Results
• Myndaalbúm mótsins