Páskamót Riddarans

Í gær var teflt af ívið meiri hörku en vanalega í Vonarhöfn þar sem skákfundir Riddarans, skákklúbbs eldri borgara, eru haldnir alla miðvikudaga árið um kring. Enda til nokkurs meira að vinna en venjulegra vinninga. Þrjú meðalstór og myndarleg páskaegg frá NÓA-Síríus í verðlaun, til að mýkja bragðlaukana um páskahelgina.

Þrátt fyrir að 18 þátttakendur af Stór-Hafnarfjarðarsvæðinu elduðu þar grátt silfur á hvítum reitum og svörtum sveif himneskur friður yfir vötnumum í Safnaðarheimili Hafnarfjarðarkirkju sem endranær. Gott var með kaffinu sem Ottó staðarhaldari veitir teflendum af mikilli gestrisni og örlæti kirkjunnar manna, sem kemur í stað heilags sakramentis milli skáka.

Sigurvegari varð Friðgeir K. Hólm sem uppskar 9 vinninga af 11 mögulegum og hlaut  S5 Páskaegg í verðlaun.  Jafnir í 2. og 3. sæti urðu þeir Egill Þórðarson og Stefán Þormar Guðmundsson með 7.5 vinn. og fengu sitt hvort páskaeggið af stærðinni S4 með sér heim. Páll G. Jónsson og Össur Kristinsson komu svo næstir með 7 vinninga en eftir það teygðist úr lestinni eins og gengur.

Nánari úrslit og fleiri myndir má finna á www.riddarinn.net.

Myndaalbúm