Landsliðsflokkur Íslandsmótsins hefst á föstudag á Eiðum - sá sterkasti í mörg ár

Landsliðsflokkur Íslandsmótsins í skák fer fram um páskana á Eiðum á Fljótsdalshéraði.  Mótið hefst föstudaginn, 15. apríl, kl. 14 og mun Björn Ingimarsson, bæjarstjóri Fljótsdalshéraðs, setja mótið og leika fyrsta leik þess.  Tíu af sterkustu skákmönnum landsins taka þátt.  Íslandsmótið nú er það sterkasta í mörg herrans ár en 3 stórmeistarar taka nú þátt.  Mótið er það fyrsta sem haldið er á Austurlandi í 21 ár en síðast var það haldið á Höfn í Hornafirði árið 1990.  Það mót var sögulegt en þá sigraði Héðinn Steingrímsson á mótinu, yngstur allra, 15 ára, og það met stendur enn en fyrsta Íslandsmótið var haldið fyrir tæpri öld síðan 1913. 

Auk Héðins, teflir einn annar fyrrverandi Íslandsmeistari, Henrik Danielsen, en hann sigraði á Íslandsmótinu sem fram fór 2009 á Bolungarvík.  Hannes Hlífar Stefánsson, ellefufaldur Íslandsmeistari  tekur ekki þátt í ár og ver því ekki titilinn.   Mótið er haldið í samvinnu Skáksambands Íslands og Skáksambands Austurlands.  Í aðdraganda mótsins fóru kennarar á vegum Skákskóla Íslands í heimsókn í rúman tug skóla á Austurlandi og boðuðu fagnaðarerindið.  

Meðal annarra keppenda má nefna stórmeistarann Þröst Þórhallsson, alþjóðlegu meistaranna Stefán Kristjánsson, Braga Þorfinnsson og Guðmund Kjartansson.   Aðrir þátttakendur eru Ingvar Þór Jóhannesson, Róbert Lagerman, Guðmundur Gíslason og Jón Árni Halldórsson.

Teflt er alla daga á Eiðum og hefst taflmennska ávallt kl. 14 að síðustu umferðinni undanskyldri sem hefst kl. 9, laugardaginn 23. apríl.

Skákáhugamenn, að Austan, eru hjartanlega velkomnir á skákstað.  Fyrir þá sem koma lengra að er bent á að allar skákirnar eru sýndar beint á vefsíðu SÍ, www.skaksamband.is auk þess daglegar fréttir af mótinu verða á www.skak.is.      

Meðfylgjandi sem viðhengi er umfjöllun um mótið í héraðsblaðinu Austurglugganum og mótsblaði Skáksambands Austurlands.

• Heimasíða mótsins 
• Chess-Results

Skrár tengdar þessari bloggfærslu:

• Umfjöllun Austurgluggans
• Fréttablað Skáksamband Austurlands

Athugasemdir

[Gunnar Th. Gunnarsson, 13.4.2011 kl. 01:06]

Héðinn rúllar þessu upp