Skákpistill að Austan

Íslandsmótið í skák - landsliðsflokkur fer fram um páskana að Eiðum. Í tilefni af Íslandsmótinu hafa Skákskólinn, Skáksamband Íslands og Skáksamband Austurlands staðið fyrir skákkennslu í grunnskólum fjórðungsins.  Kennslan hófst í byrjun þessarar viku og munu þeir Þröstur Þórhallsson og Stefán Bergsson fara í nánast alla skóla á Austurlandi í heimsókn sinni sem stendur út vikuna.

Flugu þeir félagar til Egilsstaða með fyrstu vél á mánudegi. Við lendingu tóku þeir Skáksambandsmenn eystra á móti þeim. Þá þegar um morguninn hófst kennsla. Stefán fór ásamt bílstjóra sínum, Guðmundi Yngva Jóhannssyni formanni SSA, að Brúarási. Brúarás er lítill sveitaskóli með um 30 nemendur sem búa í sveitum Jökuldals. Skólastjórinn, Einar Ólafsson, er skákáhugamaður og tefldi á mótum í gamla daga. Var hann ekki alveg viss um hvaða ár hann vann 2. flokk á Skákþingi Íslands, en hitt mundi hann að Skákþingið fór þá fram í Glæsibæ. Krakkarnir í Brúarásskóla komu á óvart með skákkunnáttu sinni. Nokkur þeirra voru ansi spræk í skákinni og munu koma fjórir keppendur frá skólanum á Kjördæmismót Austurlands sem fer fram á Reyðarfirði á föstudaginn kemur.

Á meðan Stefán var að Brúarási fór Þröstur í Hallormsstaðarskóla. Skólinn telur um 40 nemendur og fór kennslan fram í tveimur hollum. Einn sterkasti skákmaður sem komið hefur frá Austurlandi, ef ekki sá allra sterkasti, kemur einmitt úr skólanum; Bjarni Jens Kristinsson sem hefur verið nemandi Skákskólans síðan hann flutti suður að loknu grunnskólaprófi.

Eftir hádegi fór Þröstur í Fellabæ þar sem sóknarskákmaðurinn og skólastjóri Fellaskóla; Sverrir Gestsson bauð honum í súpu. Að loknum hádegisverði kenndi Þröstur nemendum 4.-7. bekkjar heiti og helstu leiki nokkurra byrjana ásamt því að fara í einföld endataflsatriði. Að lokinni kennslustund  tefldi Þröstur fjöltefli við sterkustu skákmenn skólans. Þröstur vann allar sínar skákir en sigur hans gegn sjálfum skólastjóranum stóð tæpt.

Eftir heimsókn sína í Brúarás lagði Stefán af stað til Vopnafjarðar ásamt sínum trausta bílstjóra Guðmundi Yngva. Guðmundur hefur verið búsettur á Egilsstöðum frá árinu 1979 og til ársins 2007 starfaði hann fyrir bandaríska fyrirtækið Irritium. Guðmundur var meðal annars eftirlitsmaður með gervihnattakerfi fyrirtækisins en með því kerfi er kleift að hringja úr sérstökum síma tengdum kerfinu hvaðan af æva úr heiminum. Munu slíkir símir algengir meðal íslenska flotans. Ferðalagið á Vopnafjörð gekk vel, glerfínt veður og gott færi.

 Á Vopnafirði fór kennslan fram í þremur hollum. Fyrst kom yngsta stigið, svo miðstig og að lokum nemendur unglingadeildar. Eins og allir þeir skólar sem heimsóttir hafa verið í ferðinni hingað til áttu Vopnfirðingar yfir tíu skáksett og bókasafn þeirra státaði af flestum klassísku skákbókunum sem Skák gaf út á sínum tíma. Kennslan gekk vel og nemendurnir sérstaklega prúðir og áhugasamir um skák.

Á þriðjudagsmorgni sameinuðu Stefán og Þröstur krafta sína í Egilsstaðaskóla. Móttökur í skólanum voru afar góðir og er Egilsstaðaskóli einn alglæsilegasti skóli landsins en hann var byggður fyrir 2 árum. Kennt var frá níu og fram að hádegi, nemendum frá þriðja og upp í tíunda bekk. Í 10. bekk Egilsstaðaskóla eru þeir skákmenn sem  vakið hafa hvað mesta athygli í ferðinni. Hafa þeir piltar verið í læri hjá Sverri Gestssyni og einn þeirra komist á Landsmót í skólaskák síðustu 2 árin. Má búast við þeim sterkum á Kjördæmamótinu.

Eftir hádegi var lagt á Fjarðarheiðina rakleiðis til Seyðisfjarðar undir akstri Magnúsar Ingólfssonar. Fjarðarheiðin er hæst 650 metrar og í raun aðeins upp brekkuna og svo niður hana. Á Seyðisfirði var kennt í tveimur hópum; 1.-6. bekk og svo 7.-10. bekk. Stefán sá um fyrirlestur fyrir yngri hópinn og Þröstur þann eldri. Að loknum fyrirlestrum tefldu nemendurnir sín á milli og sýndi yngri hópurinn góða takta.

Framundan er kennsla á Reyðarfirði, Fáskrúðsfirði og Eskifirði. Sérstakt námskeið fyrir bestu ungu skákmenn fjórðungsins verður svo á Reyðarfirði á föstudagsmorgun og í framhaldinu Kjördæmismót Austurlands.

Sérstaklega ber að þakka Sverri Gestssyni fyrir skipulagningu og Magnúsi Ingólfssyni og Guðmundi Yngva fyrir akstur.

Fréttir á heimsíðum skólanna um skákkennsluna:

• Brúarásskóli
• Egilsstaðskóli
• Fellaskóli

Ofangreindur texti er skrifaður af Stefán Bergssyni.

Athugasemdir

[Gunnar Th. Gunnarsson, 6.4.2011 kl. 00:50]

Frábært framtak!

Smá leiðrétting úr upphafi pistilsins; sveitin heitir Jökuldalur en ekki Jökulfjörður

[Skák.is, 6.4.2011 kl. 01:00]

Takk fyrir það nafni.  Leiðrétt!

[Jón Þorvaldsson (IP-tala skráð) 6.4.2011 kl. 07:33]

Mjög skemmtilegur pistill!

Ánægjulegt að vor göfuga íþrótt á sér hljómgrunn hjá æsku Austurlands.