Ingimundur hraðskákmeistari SSON

Það voru 14 keppendur sem settust að tafli á Selfossi í kvöld til að útkljá hver þeirra bæri höfuð og herðar yfir aðra skákmenn í Selfossumdæmi. 

Nokkrir komu um langan veg eða alla leið frá Reykjavík.

Hin valinkunni skákgúrú þeirra höfuðborgarbúa Arnar Valgeirsson fór fremstur í skipulagi ferðar þeirra Reykvíkinga og hafði þrjá til reiðar.  Samkvæmt frásögn Arnars var Hellisheiðin sérstaklega varhugaverð þetta kvöldið og mátti hann að sögn hafa sig allan við að halda fararskjótunum á veginum.  Til allrar lukku voru þau Arnar, Inga, Óskar og Björn Sölvi vel búinn vistum og útilegubúnaði og komust á tilsettum tíma á skákstað.  Ber að þakka þeim sérstaklega fyrir að heiðra okkur Selfyssinga og nærsveitunga með nærveru sinni.

Mótið fór fram með þeim hætti að tefldar voru 5 mín skákir, þar sem allir sem þátt tóku tefldu við alla hina sem þátt tóku.

Ljóst var að búast mátti við spennandi móti miðað við samsetningu, bakgrunn og skákstíl keppenda. 

Ingimundur fór mikinn í byrjun og vann fyrstu sjö skákir sínar, en tapaði síðan 3 í röð, fyrir Magnúsi Matt og systkinunum Ingvari og Ingu.  Voru þá leikar farnir að jafnast all verulega og Magnús kominn með forystuna, sem hann lét ekki af hendi fyrr en í síðustu umferð þegar hann gerði jafntefli við prýðispiltinn Björn Sölva, á sama tíma vann Ingimundur sína skák og stóðu þeir því á jöfnu að loknum umferðunum 13.

Þeir tefldu því bráðabana þar sem Ingimundur vann fyrri skákina, Magnús þá seinni.  Í þriðju skákinni hafði síðan Ingimundur sigur og tryggði sér þar með titilinn Hraðskákmeistari SSON 2010.

Ingvar Örn átti mjög gott mót og lenti í þriðja sæti með 9,5 vinninga.

Lokastaða efstu keppenda:

1-2   Ingimundur Sigurmundsson      10 v
1-2   Magnús Matthíasson                 10 v
3      Ingvar Örn Birgisson                  9,5
4      Úlfhéðinn Sigurmundsson           9
5      Inga Birgisdóttir                         8,5
6      Björn Sölvi Sigurjónsson            8
7      Þorvaldur Siggason                    7,5
8-9   Magnús Garðarsson                   7
8-9   Emil Sigurðarson                        7