Helgi og Davíð ráðnir landsliðsþjálfarar fram yfir Ól 2012

Skáksamband Íslands hefur ákveðið að endurnýja ráðningarsamninga við Helga Ólafsson sem landsliðsþjálfara karla og Davíð Ólafsson sem landsliðsþjálfara kvenna.  Bæði lið stóðu sig mjög vel á síðasta Ólympíuskákmóti sem fram fór í Síberíu í september-október.  Þeir eru ráðnir fram yfir Ólympíuskákmótið í Tyrklandi haustið 2012. Á næstunni munu landsliðsþjálfararnir kalla saman afrekshópa sem æfa undir þeirra handleiðslu næstu misseri.  

Byggt verður áfram á góðu starfi undangengins árs þar sem tókst að skapa fasta umgjörð um landsliðshópana með reglulegum æfingum. Með markvissum hætti er ætlunin að styrkja landslið Íslands í skák enn frekar og bæta árangur í mikilvægustu sveitakeppnum landsliða.

Athugasemdir

[Skákáhugamaður dauðans (IP-tala skráð) 10.11.2010 kl. 18:30]

Glæsilegt gæfuspor!