Arnar Þorsteinsson sigurvegari á hraðskákmóti á Garðatorgi

Það var töluvert um dýrðir við Garðatorg laugardaginn 16. október síðastliðinn. Ný fataverslun Rauða krossins var opnuð með tilheyrandi hátíðarhöldum og blésu Mátar til hraðskákmóts af því tilefni. Þátttaka hefði að ósekju mátt vera meiri en í staðinn var óvenju góðmennt, enda málefnið gott og mannbætandi. Fjöldi manns fylgdist með baráttunni á svörtum reitum og hvítum og töluvert var um að gestir og gangandi gripu í skák og fengu tilsögn hjá sér vanari.

Í skákmótinu sjálfu tóku 8 manns þátt. Skákstjóri var Páll Sigurðsson. Efstu þrír urðu eftirtaldir:

  1   Arnar Þorsteinsson 7 vinninga
  2   Pálmi Ragnar Pétursson 5,5 vinninga
  3   Gísli Gunnlaugsson 4,5 vinninga

Á myndinni sjást þátttakendur við rauða dregilinn. Sigurvegarinn, Arnar Þorsteinsson, er þriðji frá vinstri með verðlaunin, forláta skákkortakassa.