„Náðum betri árangri sem lið en einstaklingar“

Jón L. Árnason var 11 ára gamall þegar Fischer og Spasskí tefldu í Reykjavík. „Einvígi þeirra hafði úrslitaáhrif á að ég fór að tefla af fullum krafti. Það er einfalt að svara því. Ég fór að tefla fyrir alvöru á þessum tíma. Þjóðin fór á hliðina í skákæði og ég fylgdist vel með. Ég fór og horfði á fyrstu skákina. Hún var tíðindalítil framan af en svo fór kliður um salinn þegar Fischer drap á H2 eins og frægt varð," sagði Jón þegar Morgunblaðið bað hann að rifja upp upplifun sína af einvíginu. Að loknu ólympíumótinu í Dubai árið 1986 skrifaði Jón um mótið í bókinni Skákstríð við Persaflóa. „Árangurinn í Dubai er eftirminnilegastur í mínum huga. Við höfnuðum í 5. sæti og það var langbesti árangur Íslands á ólympíuskákmóti og vakti mikla athygli. Menn hafa leitt að því líkur að árangurinn í Manila hafi jafnvel verið betri svona stigalega séð enda höfðu Sovétríkin liðast í sundur. Nokkrar þjóðir spruttu upp úr því og því var um sterkara mót að ræða en í Dubai. Líklega hefur árangur okkar í Manila því verið betri en í endurminningunni var hann betri í Dubai," sagði Jón og hló við. Hann bendir á að íslenska liðið hafi oft á tíðum náð betri árangri í ólympíumótunum heldur en Elo-stig liðsmanna hafi gefið tilefni til. „Við náðum betri árangri sem lið heldur en einstaklingar. Við þekktumst mjög vel og náðum upp ákveðinni liðsheild. Við höfðum það umfram margar aðrar þjóðir."

Spurður um aðkomu Gunnars Eyjólfssonar að landsliðinu í Manila sagði Jón mikinn feng hafa verið í Gunnari. „Hann var ekki eiginlegur liðsstjóri heldur meira eins og andlegur leiðtogi. Engar sérstakar sögur fóru af honum hvað skákstyrkleika snerti og þetta vakti því nokkra athygli á sínum tíma. Það var mjög gott að hafa hann með. Hann býr yfir mikilli reynslu en ýmislegt er hægt að heimfæra frá leikhúsinu og yfir á skákina varðandi einbeitingu og ýmislegt þess háttar. Hann átti þátt í því að búa til liðsheild og ná upp krafti hjá keppendum." Jón getur ekki neitað því að árangur Íslendinga á þessum árum hafi vakið mikla athygli í hinum alþjóðlega skákheimi. „Íslendingar voru og eru nokkuð þekktir sem skákþjóð en það þótti merkilegt að svo fámenn þjóð skyldi eignast fjóra stórmeistara á svo skömmum tíma. Við komum mörgum mjög á óvart í Dubai en komum kannski minna á óvart eftir það, því þá var litið á okkur sem alvörulið," sagði Jón ennfremur.

Viðtalið við Jón L. Árnason er eftir Kristján Jónsson, blaðamann Morgunblaðsins, og birtist í sunnudagsmogganum, 25. júlí sl.  Viðtalið við Jón var hluti af greininni Íslenska skáksprengingunni.  Næstu daga verða viðtöl við Helga Ólafsson, Jóhann Hjartarson og Margeir Pétursson, sem einnig fylgdu greininni, birt hér á Skák.is

Skákþættir Morgunblaðsins