Skákæfingaferna skákdeildar Fjölnis

Í gær lauk síðustu sumarskákæfingu skákdeildar Fjölnis fyrir afrekshóp félagsins meðal barna og unglinga. Æfingarnar nefndust Skákferna Fjölnis því um var að ræða fjórar æfingar fjögur þriðjudagskvöld í röð. Á hverja æfingu mætti gestur sem sá um kennslustund í formi skákskýringa, heilræða eða kennslu í ákveðnum þáttum skákarinnar.

Það voru þeir Davíð Kjartansson, Helgi Ólafsson, Björn Þorfinnsson og Hjörvar Steinn Grétarsson sem heiðruðu krakkana með þessum heimsóknum. Í skákhléi voru bornar fram gómsætar veitingar, nammi, gos og pítsur. Hverri æfingu lauk með stuttu skákmóti. Tilgangur æfinganna var að bjóða upp á markvissa þjálfun á miðju sumri en ekki síður að efla góðan liðsanda meðal krakkanna.

Umsjón með skákæfingunum hafði Helgi Árnason formaður skákdeildar og að venju fóru æfingarnar fram í Rimaskóla við góðar aðstæður. Skákdeildin vill færa fyrirlesurunum fjórum fyrir frábæra kennslu og krökkunum fyrir góða og ánægjulega þátttöku.