Skákþáttur Morgunblaðsins: Meistarar framtíðarinnar

Hjörvar Steinn Grétarsson vann öruggan sigur á Meistaramóti Skákskóla Íslands sem lauk um síðustu helgi. Hann missti aðeins niður ½ vinning en gamli skólafélagi hans úr Rimaskóla, Ingvar Ásbjörnsson, átti þó unnið tafl lengst af gegn Hjörvari sem tókst að bjarga sér í hróksendatafli tveim peðum undir. Mót þetta er án efa sterkasta unglingaskákmót sem haldið er á hverju ári og dregur jafnan til sín flesta þá pilta og stúlkur sem fremst standa í aldursflokknum 20 ára og yngri. Lokastaðan í mótinu varð þessi:

 

1. Hjörvar Steinn Grétarsson 6 ½ v. (af 7) 2. Ingvar Ásbjörnsson 5 ½ v. 3. - 4. Mikael Jóhann Karlsson og Örn Leó Jóhannsson 5 v. 5. - 9. Hallgerður Helga Þorsteinsdóttir, Helgi Brynjarsson, Guðmundur Kristinn Lee, Jóhanna Björg Jóhannsdóttir og Dagur Ragnarsson. Keppendur voru 32 talsins.

Veitt voru sérstök verðlaun í flokki keppenda sem eru 14 ára og yngri og hlaut þau Dagur Ragnarsson en í flokki 12 ára og yngri varð hlutskarpastur Jón Trausti Harðarson. Sérstök stúlknaverðlaun komu í hlut Hallgerðar Helgu Þorsteinsdóttur. Ýmsir ungir skákmenn eru greinilega að bæta sig verulega þessa dagana og má þar t.d. nefna hinn 16 ára gamla Örn Leó Jóhannsson sem hefur hækkað gríðarlega í stigum undanfarið. Hann hefur til að bera aðdáunarverða hugarró sem er sennilega einhver besti kostur sem prýtt getur nokkurn skákmann. Mikil tilþrif voru hjá ýmsum öðrum og hugmyndaflugið óbeislað. Dagur Ragnarsson kemur úr vaskri sveit Rimaskóla og náði bestum árangri í flokki 14 ára og yngri þó hann sé aðeins 12 ára. Faðir hans Ragnar Hermannsson tefldi mikið á sínum yngri árum áður en hann sneri sér að handknattleik, bæði sem leikmaður og þjálfari. Afinn Hermann Ragnarsson var allt í öllu hjá Taflfélagi Reykjavíkur í byrjun sjöunda áratugarins auk þess að vera sterkur skákmaður. Það er ekki ónýtt að hafa slíka menn til að tefla við.

Í eftirfarandi skák mætir Dagur Páli Andrasyni, einum öflugasta liðsmanni Salaskóla og vinnur með tilþrifum:

Meistaramót Skákskóla Íslands 2010; 6. umferð:

Páll Andrason - Dagur Ragnarsson

Drottningarbragð

1. d4 d5 2. c4 e6 3. Rc3 Rf6 4. Rf3 Be7 5. cxd5 exd5 6. Bg5 O-O 7. e3 h6 8. Bxf6 Bxf6 9. h3 He8 10. Bd3 c6 11. O-O Be6 12. Hc1 Rd7 13. Re2 Rb6 14. b3 Be7 15. Rf4 Bd6 16. Rxe6 Hxe6 17. Dc2 De7 18. He1 He8 19. a4 g6 20. He2 a5 21. Hce1 Bb4 22. Rd2 Df6 23. g3 Rd7 24. Kg2 Rf8 25. f4 H6e7 26. f5 gxf5 27. Kf2 f4! 28. gxf4

Eftir klassískt drottningarbragð þar sem svartur má vel við una eygir hann möguleika á magnaðri hróksfórn.

28. ... Hxe3?!

Það er erfitt að standast slíkar freistingar en lausleg athugun á stöðunni leiðir í ljós að nákvæmara var 28. ... Kh8.

29. Hxe3?

Páll varð að gefa sér aðeins meiri tíma því hér átti hann 29. Hg1+! t.d. 29. ... Rg6 30. Hxe3! Dxf4+ 31. Hf3! og hvítur vinnur.

29. ... Dxf4+ 30. Rf3

30. Hf3 er ekkert betra því svartur á 30. ... Dh2+! 31. Kf1 Dh1+ og vinnur.

30. ... Bxe1+ 31. Hxe1 Hxe1 32. Kxe1 Dxf3 33. Be2 Dxh3 34. Dd2 Dg3+ 35. Kf1 Rg6 36. Dxh6 Df4+ 37. Dxf4 Rxf4

Eftirleikurinn er auðveldur og Dagur innbyrðir vinninginn af miklu öryggi.

38. Bg4 Re6 39. Ke1 Kf8 40. Kd2 Rxd4 41. Bc8 Rxb3+ 42. Kc3 Rc5 43. Kd4 b6

- og hvítur gafst upp.

Helgi Ólafsson | [e-mail]

Skákþættir Morgunblaðsins eru birtir á Skák.is u.þ.b. viku síðar en í blaðinu sjálfu.  

Grein þessi birtist í sunnudagsmogganum, 7. júní 2010.

Skákþættir Morgunblaðsins