Gunnar sigraði á kappteflinu um Patagóníusteininn

Hart hefur verið barist fyrir hverjum punkti, sem gaf stig í mótaröðinni og keppninni um "Patagóníusteininn" í Gallerý Skák sl. vetur, sem lauk nýlega með verðlaunaafhendingu og lokahófi í Skákseli við Selvatn.   

Steinninn er einstakt listaverk úr skauti náttúrunnar suður þar, yfir 30 milljón ára gamall, barst hingað til lands með íslenskum ferðalangi sem þangað fór í kvikmyndaleiðangur.

Stigagjöf í keppninni var þannig háttað, líkt og í Formúlu 1, að efsta sæti í hverju móti gaf 10 stig, annað sætið 8 stig, síðan  6, 5, 4, 3, 2 og 1 eftir sætaröð.

Alls voru tefld 11 mót og þátttakendur yfir 30 talsins. Af þeim náðu 24 skákmenn að skora stig, en langefstur og bestur var Gunnar Kr. Gunnarsson, með 79 stig í 9 mótum, næstbestur var Gunnar Skarphéðinsson með 39 stig í aðeins 6 mótum og þriðji bestur Guðfinnur R. Kjartansson, staðarhaldari, með 38 stig í 11 mótum.  Fast á hæla honum fylgdi Kristján Stefánsson með 34 (11) og Stefán Þormar Guðmundsson með 31 (9).  Mótsstjóri var Einar S. Einarsson.   Fyrirhugað er að tefla hálfsmánaðarlega í Gallerýinu í sumar, annað hvert fimmtudagskvöld kl.18-22, frá og með 1. júlí. Mótin eru einkum ætluð eldri áhuga- og ástríðuskákmönnum og öðrum þeim sem haldnir eru skákóþoli.

Myndaalbúm (ESE)

Nánari upplýsingar og úrslit má finna á slóðinni:

http://sites.google.com/site/galeryskak/fimmtudagskvoeld-urslit