KR-ingar töpuðu í Berlínarslag

KR-ingar töpuðu naumlega fyrir fyrna sterku liði öflugasta og virtasta skáklúbbs Berlinar, Kreuzberg, á laugardaginn var. Keppnin fór fram á 21 borði og var tefld tvöföld umferð með skiptum litum, atskákir með 20 mín. umhugsunartíma + 5 sek. á leik.  KR vann fyrri umferðina með 11-10, en tapaði þeirri síðari með  8 1/2 v. gegn 12 1/2, heildarúrslit því 22 1/2 gegn 19 1/2 Þjóðverjunum í vil.  Slagurinn var einkar spennandi en tvær skákir skiptu um eigendur á síðustu metrunum sem riðu baggamuninn.

Skák(her)deildin hefur áður herjað á Færeyjar, Skotland, Danmörk og jafnan haft sigur en menn geta samt komið heim hnarreistir enda við ramman reip að draga í þetta sinn og ekki ráðist á garðinn þar sem hann er lægstur.  Eftir tvo ár er fyrirhuguð herför New York eða Hollands  til að lemja á þarlendum. Þessar ferðir hafa verið farnar ásamt mökum og öflugu fylgdarliði en alls voru 45 manns með í för. Eftirtaldir valinkunnir skákmenn öttu kappi:    Andri V. Hrólfsson, Daði Guðmundsson, Einar S. Einarsson (liðstj.), Finnbogi Guðmundsson, Guðmundur Ingason, Gunnar Finnsson, Jónas Elíasson, Jón G. Friðjónsson, Jón Steinn Elíasson, Hálfdán Hermannsson, Kristinn Bjarnason, Kristján Stefánsson (form.), Leifur Eiríksson, Ólafur Gísli Jónsson, Páll G. Jónsson, Sæbjörn G. Larsen, Össur Kristinsson. Stefán Þormar Guðmundsson, Sigurður E. Kristjánsson, Sverrir Gunnarsson, þá hinn gamalkunni meistari   Andrés Fjeldsted, sem býr ytra, með liðinu.

Bestum árangri náðu:  Ólafur Gísli Jónsson, Sigurður E. Kristjánsson, Jón Steinn Elíasson, Guðmundur Ingason sem unnu báðar sínar skákir.  Næstir komu með 1 1/2 vinning þeir:   Andri Hrólfsson; Kristinn Bjarnason; Sæbjörn G. Larsen,og Össur Kristinsson,   Vel var tekið á móti hópnum af þeim Brigitte Grosse-Honebrink sem sá um skipulagninguna og Werner Ott, varaformanni og aldursforseta klúbbsins. Kristján Stefánsson flutti gott ávarp í leikslok og fór með gamanmál að sínum hætti, sem Andrés Fjeldsted túlkaði, og afhenti verðlaun og gjafir frá KR og silfurdrengjunum.

Myndaalbúm frá ESE