Nökkvi og Kristófer kjördæmismeistarar Suðurlands

Lokið er Kjördæmismóti Suðurlands sem fram fór að Flúðum í dag.  19 keppendur voru skráðir til leiks og tóku þátt.  Mótið fór vel fram og aðstæður til skákiðkunar hinar bestu en í Flúðaskóla er mikill skákáhugi þessa daganna og til marks um það héldu þeir 90 manna skákmót í skólanum s.l miðvikudag.  Kjördæmismeistarar urðu Nökkvi Sverrisson, í eldri flokki, og Kristófer Gautason, yngri flokki.  Báðir eru þeir úr Barnaskóla Vestmannaeyja.

Páll Sigurðsson landsmótsstjóri heiðraði mótið með nærveru sinni en um skákstjórn sá Magnús Matthíasson kjördæmisstjóri.

Hart var barist á öllum borðum þó fljótt væri ljóst að Eyjamenn væru í nokkrum sérflokki enda þeir gælt við skákgyðjuna öllu lengur en jafnaldrar þeirra á fastalandinu sem þó hafa sýnt miklar framfarir og er sérstaklega eftirtektarvert hve Hvolsskóli og Flúðaskóli leggja mikla rækt við skákina.

Í yngri flokki voru það Eyjapeyjarnir þeir Kristófer Karls Gautason og Jörgen Freyr Ólafsson sem urðu jafnir og efstir á mótinu með 8,5 vinninga, gerðu jafntefli í innbyrðis skák, þeir tefldu tveggja skáka einvígi um sigurinn á mótinu þar sem Kristófer hafði öruggan sigur.  Í þriðja sæti með 6 vinninga urðu síðan þeir Axel Guðmundsson frá Hvolsskóla og samskólungur hans Eyþór Guðlaugsson, Axel tryggði sér þriðja sætið eftir 3 aukaskákir.

Í eldri flokki hafði Nökkvi Sverrisson frá Barnaskóla Vestmannaeyja öruggan sigur, vann alla andstæðinga sína og hlaut 8 vinninga.  Í öðru sæti varð síðan Daði Steinn Jónsson frá sama skóla með 7 vinninga.  Um þriðja sætið þurfi síðan einnig aukaskákir eins og í yngri flokki en þar urðu þeir Sigurður B.Ólafsson frá Hvolsskóla og Atli Sigurðsson frá Flúðaskóla  jafnir með 5 vinninga.  Atli hafði sigur í bráðabana og tryggði sér þar með 3.sætið.

Fulltrúar Suðurlands á Landsmóti liggja því fyrir (2 efstu í hvorum flokki) og óska Sunnlendingar hvar í heiminum sem er þeim góðs gengis.