Skólaskákmót Reykjavíkur: Örn Leó og Dagur efstir í eldri og Breki og Gauti Páll í yngri

Örn Leó Jóhannsson og Dagur Kjartansson eru efstir í eldri flokki Skólskákmóts Reykjavíkur eftir fyrri dag mótsins.  Breki Jóelsson og Gauti Páll Jónsson eru hins vegar efstir í yngri flokki.  Mótinu lýkur í dag.

 

 

Eldri flokkur:

 

Níu þátttakendur taka þátt í eldri flokki Skólaskákmóts Reykjavíkur. Í ljósi þess var ákveðið að tefldar yrðu níu umferðir, allir við alla, með 10 mín. umhugsunartíma. Alls voru tefldar fimm umferðir fyrsta daginn og er staðan þessi:

 

1-2.sæti: Örn Leó Jóhannsson (Laugalækjarskóla) og Dagur Kjartansson (Hólabrekkuskóla) - 4,5 v.

3-4.sæti: Emil Sigurðarson (Laugalækjarskóla) og Brynjar Steingrímsson (Hólabrekkuskóla) - 4 v.

5-6.sæti: Jóhann Bernhard Jóhannsson (Hlíðaskóla) og Alexander Már Brynjarsson (Laugalækjarskóla) - 2,5 v.

7.sæti: Franco Soto (Laugalækjarskóla) - 2 v.

8.sæti: Jóhann Karl Hallsson (Laugalækjarskóla) - 1 v.

9.sæti: Elín N. Viggósdóttir (Engjaskóla) - 0 v.

 

Örn og Dagur gerðu innibyrðis jafntefli í fimmtu umferð mótsins og hafa teflt af miklu öryggi hingað til. Dagur sigraði Emil snemma móts og Örn Leó knésetti Brynjar. Þessi fjórir virðast vera í nokkrum sérflokki og ljóst að hart verður barist þar sem aðeins eru þrjú sæti í boði á Landsmótinu í skólaskák.

 

Síðustu fjórar umferðirnar fara fram frá kl.17-19 á morgun í Skákhöllinni Faxafeni 12.

 

Pörun 6.umferðar:

 

Jóhann Karl - Elín

Örn Leó - Emil

Jóhann Bernhard - Dagur

Alexander - Brynjar

Franco situr yfir.

 

Yngri flokkur:

 

Skólaskákmót Reykjavíkur hófst í dag með fjórum umferðum. Vesturbæingarnir Breki Jóelsson og Gauti Páll Jónsson eru efstir í yngri flokki með fullt hús eða fjóra vinninga. Árangur þeirra kemur nokkuð á óvart enda reyndir skákmenn meðal þátttakenda. Gauti Páll hefur stundað laugardagsæfingar TR af miklu kappi í allan vetur og sýnt töluverðar framfarir. Breki er í Melaskóla og sækir skákæfingar í Frostaskjólinu sem eru haldnar af Skákakademíu Reykjavíkur og KR. Fleiri Vesturbæingar hafa staðið sig vel í mótinu og er það til marks um það góða skákstarf sem unnið er vestur í bæ. Mótið heldur áfram á morgun þegar þrjár síðustu umferðirnar verða tefldar. Tvö efstu sætin gefa þátttökurétt á landsmót og verður spennandi að sjá hvort Vesturbæingarnir halda sinni forustu á morgun en án efa verður sótt að þeim úr öllum áttum.

 

Staða efstu manna:

1.-2. Gauti Páll Jónsson og Breki Jóelsson 4 v.

3.-4. Leifur Þorsteinsson og Rafnar Friðriksson 3,5 v.

5.-11. Kristófer Jóel Jóhannesson, Jóhannes Kári Sólmundarson, Heimir Páll Ragnarsson, Garðar Sigurðarson, Donika Kolica, Dagur Logi Jónsson og Dagur Ragnarsson 3 v.

 

Þátttakendur er 34 og skákstjórar eru Stefán Bergsson og Björn Þorfinnsson.

 

Athugasemdir

[8888 (IP-tala skráð) 29.4.2010 kl. 01:33]

Hvernig fór svo þetta mót? Engin úrslit komin?

kv.