Skákþáttur Morgunblaðsins: Mikil spenna á Íslandsmótinu – Guðmundur Gíslason og Hannes Hlífar efstir

Hannes Hlífar Stefánsson og Guðmundur Gíslason deila efsta sæti þegar tvær umferðir eru eftir í landsliðsflokki Skákþings Íslands. Þeir munu mætast í lokaumferð mótsins. Í níundu umferð sem tefld var á fimmtudaginn bar það til tíðinda að Björn Þorfinnsson vann bróður sinn Braga. Þá vann Hannes Hlífar Þröst Þórhallsson og Stefán vann Daða Ómarsson sem ekki gat teflt vegna veikinda.

Hannes Hlífar er eini keppandinn í mótinu sem orðið hefur Íslandsmeistari og var fyrir mótið álitinn sigurstranglegastur. Tap fyrir Stefáni Kristjánssyni í 4. umferð setti hinsvegar strik í reikninginn hjá honum. Björn Þorfinnsson, Stefán Kristjánsson og Bragi Þorfinnsson eiga allir nokkra möguleika á titlinum en þá verða úrslitin að falla með þeim. Bragi átti að tefla við Hannes i tíundu umferð á föstudagskvöldið og Guðmundur Gíslason við Björn.

Þetta mót sýnir vel þá miklu breidd sem er meðal fremstu skákmanna Íslands. Veikindi hafa haft nokkur áhrif á stöðuna og þarf að fara allt til landsliðskeppninnar árið 1972 til að finna sambærilegt ástand. Daginn fyrir fyrstu umferð forfallaðist Jón Viktor Gunnarsson og eftir fimm umferðir varð Dagur Arngrímsson að hætta keppni.

Mótið fer fram í Lágafellsskóla í Mosfellsbæ og hefur framkvæmdin verið með ágætum. Helst má finna að því að upplýsingar um stöðuna eftir hverja umferð hafa verið rangar. Reglur um brotthvarf keppenda eru afar skýrar, hætti skákmaður í móti áður en það er hálfnað er hann strikaður út. Rétt staða fyrir lokaumferðirnar tvær:

1. - 2. Hannes Hlífar Stefánsson og Guðmundur Gíslason 6 ½ v. 3. Stefán Kristjánsson 6 ½ v. (af 9) 4. Björn Þorfinnsson 6 v. 5. Bragi Þorfinnsson 5 ½ v. 6. - 7. Ingvar Þ. Jóhannesson og Þorvarður Ólafsson 3 v. 8. Sverrir Þorgeirsson 2 ½ v. 9. - 10. Þröstur Þórhallsson og Róbert Lagerman 2 v. 11. Daði Ómarsson 1 ½ v. ( af 9 ).

Stefán og Daði sitja yfir í lokaumferðunum.

Ísfirðinginn Guðmund Gíslason verður að telja mann mótsins. Hann hefur afar jákvætt hugarfar til skákarinnar og teflir af miklum krafti og minnir jafnvel á sjálfan Kasparov. Eina glæsilegustu skák mótsins tefldi hann í 2. umferð gegn Róbert Lagerman sem hér fer á eftir. Hann fékk góða stöðu í byrjun tafls og gat fylgt því eftir með öflugum leik, 30. ... Dd4. En möguleiki á drottningarfórn fangaði huga hans og hann lét slag standa með 30. ... e4 og síðan 31. ... Df2. Róbert hefði betur sleppt því að þiggja fórnina og leikið frekar 32. Dxf2! gxf2 33. Bxh4 Hxh4 34. Hxf2 og er þá með betri stöðu í endatafli. Eftir það lék Guðmundur hverjum þrumuleiknum á fætur öðrum og klykkti út með snyrtilegri mátfléttu:

Skákþing Íslands 2010; 2. umferð:

Róbert Harðarson - Guðmundur Gíslason

Sikileyjarvörn

1. e4 c5 2. Rf3 d6 3. Bb5+ Rd7 4. d4 cxd4 5. Dxd4 a6 6. Bxd7+ Bxd7 7. Rc3 e5 8. Dd3 h6 9. Rd2 Rf6 10. Rc4 Be6 11. Be3 Hc8 12. Rb6 Hc6 13. Rbd5 Dc8 14. O-O Rxd5 15. exd5 Bf5 16. Dd2 Hc4 17. f4 f6 18. fxe5 fxe5 19. De2 Bg6 20. Hf3 h5 21. Bg5 Hg4 22. Dd2 Dc4 23. Be3 h4 24. b3 Dc8 25. h3 Hg3 26. Hxg3 hxg3 27. Hf1 Be7 28. Hf3 Bh4 29. Bg3 Dc5+ 30. Kh1 e4 31. Hf1

31. ... Df2 32. Hxf2 gxf2 33. De2 Hf8 34. Df1 Bxg5 35. g3 Bd2 36. Re2 e3 37. Rf3 Be4+ 38. Kh2 Hxf4 39. gxf4 e2 40. Dxe2 Bxf4 mát.

Helgi Ólafsson | [e-mail]

Skákþættir Morgunblaðsins eru birtir á Skák.is u.þ.b. viku síðar en í blaðinu sjálfu.  

Grein þessi birtist í sunnudagsmogganum, 11. apríl  2010.

Skákþættir Morgunblaðsins