Skáklistahátíð leikskólabarna

Skáklistahátíð leikskólabarna verður haldin í Ráðhúsi Reykjavíkur 13. til 25. apríl. Þar verða sýnd skáklistaverk sem börn í leikskólum Reykjavíkur sköpuðu, auk þess sem gestum sýningarinnar gefst kostur á að tefla og búa til sín eigin verk.

Hátíðin er haldin á vegum Skákakademíu Reykjavíkur, sem síðastliðin 2 ár hefur staðið fyrir skákkennslu meðal barna á Barónsborg, Hlíðaborg, Lindaborg og Njálsborg undir handleiðslu Róberts Lagerman skákmeistara. Leikskólabörnin hafa sýnt frábæra takta á skákborðinu, og þau sýndu svo sannarlega hugvitssemi þegar kom að því að skapa listaverk þar sem skákin er í aðalhlutverki.

Þá verður einnig til sýnis skáklistaverk sem unnið var á leikstofu Barnaspítala Hringsins, en þangað hefur Hrókurinn farið í ótal heimsóknir síðan sumarið 2003.

Listaverkin í Ráðhúsinu eru líkleg til að vekja skákþorsta sýningargesta og verður hægt að grípa í tafl meðan á sýningunni stendur. Þá verður líka aðstaða fyrir gesti til að búa til sín eigin skáklistaverk, sem hægt er að hengja upp á staðnum eða taka með heim.

Skáklistahátíðin verður opnuð klukkan 16, þriðjudaginn 13. apríl og eru gestir á öllum aldri hjartanlega velkomnir.