60 manna áskorendaflokkur á Grænlandi!

Sverrir Unnarsson, sem í eina viku ber titilinn stórmeistari, tefldi fjöltefli við sextíu ungmenni í grunnskólanum í Ittoqqortoormiit, hinum magnaða bæ við Scoresbysund á austur Grænlandi  á fimmtudag.

Hann er þar staddur ásamt Arnari Valgeirssyni í tveggja manna sendinefnd Hróksins til að halda uppi skáklífi yfir páskana. Þetta er fjórða árið í röð sem  Hróksmenn ferðast til þessa magnaða staðar, sem er ótrúlega einangraður og nyrsta byggða ból austurstrandar Grænlands.

Tæplega fimmhundruð manns búa í bænum og skólinn hefur eignast ríflega 30 skáksett síðan 2007 auk þess sem krakkarnir er u með sett heima og margir greinilega nokkuð duglegir að æfa sig. Skákfélagið á staðnum heitir Tårnet eða Hrókurinn og Knud Eliassen, kennari við grunnskólann er formaður. Hann er hjálparhella leiðangursmanna, fórnar páskafríinu til að vera í skólanum og setja upp mót í gríð og erg. Enda eru  krakkarnir óðir í að tefla, bíða í ofvæni eftir að skólinn opni í páskafríinu og heimsækja leiðangursmenn til að taka eina bröndótta.

Þess má geta að Sverrir sá sig tilneyddan til að bjóða fimm ungmennum á aldrinum 8-22 ára jafntefli, þar sem þau stóðu heldur betur í meistaranum. Voru þau fljót að handsala samningnum, enda páskaegg í boði fyrir þau sem ekki töpuðu.

Annars er magnað að trítla um bæinn, veðrið ótrúlega fallegt inn á milli og frostið frá mínus fjórum upp í 27! Þó gerir almennilegan byl á milli svo þetta er alvöru. Leiðangurspiltarnir fengu gamalt og virðulegt hús til umráða svo það fer glimrandi vel um þá. Bangsar og moskuxar hanga hér á staurum og veggjum við hús og sá sem blasir við útum eldhúsgluggann er nefndur Bjössi Þorfinns.

Gærdagurinn var frábær. Þrátt fyrir leiðindaveður sem gerði einhverja túrista að strandaglópum í bænum, þá brutust yfir 40 ungmenni í skólann til að tefla. Eftir hálftíma kennslu þá var hópnum skipt í 7-8 manna aldursskipta hópa og sett upp mót. Einn leiðtogi var í hverri grúppu sem sá um að skrá inn úrslit sem gekk ótrúlega vel miðað við að þetta höfðu krakkarnir ekki lært. Voru þau frá sex ára og elsti hópurinn var 18 ára til þrítugs.

Ekki var dauður punktur í þessa klukkutíma sem skákin stóð yfir enda hart barist og sigrum fagnað með stríðsdansi. Gaman er líka að sjá hve margir krakkar eru orðin flinkir. ekki síst þær vinkonur  Pauline Anike og Sikkerninnguaq Lorentsen sem báðar unnu sína flokka og héldu utan um skráningu. Sverrir er reyndar alveg gáttaður á nokkrum talentum hér og fullyrðir að þau myndu ná langt ef þau fengju reglulega kennslu.

Allir þátttakendur fengu glaðninga frá Actavis og Eymundsson og sigurvegararnir páskaegg frá Bónus. Á morgun og þriðjudag verða mót þar sem vinningar koma frá þessum fyrirtækjum auk Arionbanka og Sandholt og Jói gullsmiður í Eyjum gefur verðlaunapeninga. Gaman er að sjá að foreldrar eru farnir að kíkja mikið við í skólann að fylgjast með og fólk er mjög hamingjusamt með framtak Hróksins. Þykir fólki mikið til koma að eitthvað skuli sett á fót sem er viðhaldið því satt að segja er ekki mikið um að vera hér fyrir krakkana. En þau er sko æst í skák...Nánar um leiðangurinn á www.godurgranni.blog.is