Sterkur landsliðsflokkur hefst 31. mars í Mosfellsbæ

Afar sterkur landsliðsflokkur Íslandsmótsins í skák fer fram í íþróttamiðstöðunni í Lágafelli í Mosfellsbæ 31. mars - 10. apríl nk.  Þátt taka flestir sterkustu skákmenn landsins og má þar nefna stórmeistarana Hannes Hlífar Stefánsson, tífaldan Íslandsmeistara og sigurvegara MP Reykjavíkurmótsins, Henrik Danielsen, núverandi Íslandsmeistara í skák og Þröst Þórhallsson.   Þátt taka einnig 6 alþjóðlegir meistarar en nánast allur landsliðshópurinn  fyrir Ólympíuskákmótið í haust tekur þátt í mótinu núna.  Meðalstig eru 2400 skákstig og til að ná áfanga að stórmeistaratitli þarf 8½ vinning en 6½ vinning þarf til að ná í áfanga að alþjóðlegum meistaratitli.

Umferðirnar hefjast kl. 17 á virkum dögum í landsliðsflokki (kl. 18 í áskorendaflokki).  Aðstæður á skákstað verða til fyrirmyndar bæði fyrir keppendur og ekki síður fyrir áhorfendur.   Þetta er í fyrsta sinn sem Íslandsmótið fer fram í Mosfellsbæ.

Dagana 6.-9. apríl verður skákvika í bænum í umsjón Skákskóla Íslands.  Þá verður kennd skák í stað íþrótta hjá öllum bekkjum beggja skóla bæjarins.   

Keppendalisti landsliðsflokks:

 

Nr.	Nafn	Titill	Félag	Stig
1	Hannes Hlífar Stefánsson	SM	Hellir	2574
2	Henrik Danielsen	SM	Haukar	2494
3	Stefán Kristjánsson	AM	Bolungarvík	2466
4	Jón Viktor Gunnarsson	AM	Bolungarvík	2429
5	Þröstur Þórhallsson	SM	Bolungarvík	2407
6	Bragi Þorfinnsson	AM	Bolungarvík	2396
7	Dagur Arngrímsson	AM	Bolungarvík	2383
8	Guðmundur Gíslason		Bolungarvík	2382
9	Björn Þorfinnsson	AM	Hellir	2376
10	Róbert Lagerman	FM	Hellir	2347
11	Ingvar Þór Jóhannesson		Hellir	2343
12	Þorvarður F. Ólafsson		Haukar	2206
			Meðalstig	2400

 

Skráning í áskorendaflokk stendur nú yfir og fer fram á www.skak.is.  Hægt er að fylgjast með skráningu hér.    Þar er teflt sömu daga í landsliðsflokki nema að frídagar eru 1. og 5. apríl.