Skák.is

16.3.2010 | 02:07

Birkir Karl sigraði á sterku skákmóti Árnamessu

Alls tefldu 90 grunnskólakrakkar á velheppnuðu skákmóti Árnamessu sem haldið var öðru sinni í Stykkishólmi á afmælisdegi Árna Helgasonar sem var heiðursborgari Stykkishólms. Erla Friðriksdóttir bæjarstjóri setti mótið og lék fyrsta leikinn fyrir Eyjamanninn Kristófer Gautason. Eftir æsispennandi sex umferða keppni stóð Birkir Karl Sigurðsson Salaskóla uppi sem sigurvegari og náði þeim frábæra árangri að vinna allar sínar sex skákir.

Mótið var mjög sterkt og hver umferð því úrslitaumferð. Fyrir síðustu umferð voru þrír keppendur efstir og jafnir. Auk Birkis Karls voru það Örn Leó Jóhannsson Laugalækjarskóla og Páll Andrason Salaskóla. Þeir gerðu jafntefli í lokaumferðinni og deildu með sér 2. - 3. sæti.

Í yngri flokki f. 1998 og síðar varð Oliver Aron Jóhannesson Rimaskóla einn efstur með 5 vinninga en næst á eftir honum urðu þau Sóley Lind Pálsdóttir og Gauti Páll Jónsson með 4,5 vinninga. Sóley Lind varð efst stúlkna en í 2. - 3. sæti urðu þær Hrund Hauksdóttir og Ásta Sóley Júlíusdóttir með 4 vinninga.

Aðrir í efstu sætum mótsins voru þeir Daði Steinn Jónsson Vestmannaeyjum, Jón Trausti Harðarson Rimaskóla, Emil Sigurðarson Laugalækjarskóla, Guðmundur Kr. Lee Salaskóla, Dagur Kjartansson Hólabrekkuskóla, Dagur Ragnarsson Rimaskóla, Arnar Ingi Njarðarson. Þrír efstu í hvorum aldursflokki fengu eignarbikara frá Lýðheilsustöð.

Um 30 verðlaun dreifðust á efstu menn mótsins, efstu stúlkur og efstu krakka f. 2001 - 2003. Síðustu vinningarnir voru dregnir út í happadrætti m.a þeir verðmætustu frá KFUM, feðga eða mæðgnahelgi í sumarbúðunum Vatnaskógi.

Mótstjórar og starfsmenn voru þeir Páll Sigurðsson, Helgi Árnason, Gunnlaugur Egilsson og aðalgestur mótsins Helgi Ólafsson skólastjóri Skákskólans.