Dagur sigraði á Reykjavík Barnablitz

Keppni um Reykjavíkurmeistaratitil barna í hraðskák fór fram í gær. Sextán keppendur öttu kappi í tveimur 8 manna riðlum og tefldu sigurvegararnir í hvorum riðli fyrir sig til úrslita um titilinn en þeir sem urðu í öðru sæti í riðlunum tefldu einvígi um þriðja sætið.

Úrslit urðu þau að Dagur Ragnarsson, nemandi í Rimaskóla og liðsmaður Fjölnis bar sigur úr býtum eftir æsilegt einvígi við Jón Trausta Harðarson, sem einnig er nemandi í Rimaskóla sem og liðsmaður Fjölnis. Drengirnir gerðu sér lítið fyrir og sigruðu með fullu húsi í riðlunum og unnu síðan eina skák hver í úrslitaeinvíginu. Þá var gripið til þess ráðs að tefla eina „Armageddon" skák þar sem Jón Trausti dró hvítu mennina og fékk þá 6 mín. gegn 5 mín. Dags en Degi dugði jafntefli til að tryggja sér sigur. Skákin var mjög spennandi en Dagur var afar útsjónarsamur og einfaldaði taflið í hvert skipti sem færi gafst og að minnsta kosti tvisvar neyddi hann Jón Trausta til að taka á sig verra tafl með því að hóta að þvinga fram steindauðar jafnteflisstöður. Að lokum féll svo Jón Trausti á tíma þegar Dagur var kominn með unnið endatafl. Frábært einvígi og báðir keppendur geta borið höfuðið hátt eftir þessa frammistöðu.

Í einvíginu um þriðja sætið bar Kristófer Jóel Jóhannesson öruggan 2-0 sigur úr býtum gegn David Kolka. Kristófer er einnig nemandi í Rimaskóla og liðsmaður Fjölnis sem er vitnisburður um hið frábæra starf sem hefur verið unnið í Grafarvoginum.

Nánar um fyrirkomulag mótsins

Átta keppendur öðluðust þátttökurétt með því að ná öðru af tveimur efstu sætunum á barnaæfingum taflfélaganna í borginni. Þeir keppendur voru eftirfarandi:

TR: Róbert Leó Jónsson og David Kolka

Hellir: Veronika Steinunn Magnúsdóttir og Donika Kolica

KR: Kristinn Andri Kristinsson og Leifur Þorsteinsson

Fjölnir: Dagur Ragnarsson og Jóhann Arnar Finnsson

Að auki fengu átta keppendur boð á mótið. Þar komu sem betur fer margir krakkar til greina en reynt var að velja þátttakendur eftir ástundun og framförum í vetur.

Boðssæti:

Jón Trausti Harðarson, Kristófer Jóel Jóhannesson, Hildur Berglind Jóhannsdóttir, Friðrik Daði Smárason, Vignir Vatnar Stefánsson, Gauti Páll Jónsson, Dagur Logi Jónsson og Fannar Skúli Birgisson.

Móti fór fram í Tjarnarsalnum, þar sem Alþjóðlega Reykjavíkurskákmótið fór fram síðar um daginn. Þess ber að vænta að margir þeir sem nú spreyttu sig í hraðskákmótinu munu innan tíðar gera garðinn frægan á Reykjavíkurskákmótinu.

Úrslit í riðlunum urðu sem hér segir:

A-riðill:

• 1. Jón Trausti Harðarson 7 v. af 7
• 2.-4. Dawid Kola, Vignir Vatnar Stefánsson og Róbert Leó Jónsson 4 v.
• 5.-6. Friðrik Daði Smárason og Hildur Berglind Jóhannsdóttir 3 v.
• 7. Fannar Skúli Birgisson2 v.
• 8. Veronika Steinunn Magnúsdóttir 1 v.

B-riðill:

• 1. Dagur Ragnarsson 7 v. af 7
• 2. Kristófer Jóel Jóhannesson 6 v.
• 3. Kristinn Andri Kristinsson 5 v.
• 4. Gauti Páll Jónsson 3½ v.
• 5.-7. Donika Kolica, Leifur Þorsteinsson og Jóhann Arnar Finnsson 2 v.
• 8. Dagur Logi Jónsson ½ v.

Skákakademía Reykjavíkur þakkar öllum þeim fjölmörgu krökkunum sem tóku þátt í mótinu og undanrásum þess fyrir auðsýndan áhuga.

Myndir væntanlegar síðar.   

Athugasemdir

[Geir (IP-tala skráð) 1.3.2010 kl. 15:41]

Fannar Skúli var ekki í báðum riðlunum ? Vantar Doniku.

[Skák.is, 1.3.2010 kl. 16:05]

Takk fyrir þetta.   Leiðrétt!