Skákþing Akureyrar hefst á mánudag.

Skákþing Akureyrar 2010 í opna flokki hefst á mánudag 1. febrúar kl. 19.30 í Íþróttahöllinni. Tefldar verða sjö umferðir eftir Monrad-kerfi. Umhugsunartími er 90 mínútur á keppenda + 30 sekúndur bættist við hvern leik. Tefld verður á sunnudögum og fimmtudögum. Mótinu lýkur 21. febrúar. Keppt verður um nýjan farandbikar og auk þess verða veitt verðlaun fyrir þrjú efstu sætin. Skráning í netfangið [e-mail] eigi síðar en á sunnudag. Keppnisgjald er kr. 2000,-. Mótið verður reiknað til stiga bæði íslensk og alþjóðleg stig. Mótið er opið öllum og skákstjóri verður Ari Friðfinnsson.

Keppni í yngri flokkum hefst mánudag 8. febrúar kl. 16.30. 

Níutíu ár eru síðan að fyrsta opinbert skákmót var haldið á Akureyri og Norðurlandi og var haldið árlega kappskákmót hjá Skákfélagi Akureyrar sem vitað er um fram til 1928.  Skákþing Akureyrar hefur farið fram árlega frá árinu 1938 og hefur Júlíus Bogason oftast unnið titillinn eða alls nítján sinnum. Gylfi Þórhallsson hefur unnið fjórtán sinnum og Jón Viðar Björgvinsson sex sinnum. Núverandi skákmeistari Akureyrar er Gylfi Þórhallsson.

Yngsti keppandinn sem hefur orðið skákmeistari Akureyrar frá 1938 er Ingimar Jónsson 16 ára en hann var efstur ásamt Júlíusi Bogasyni 1954 og voru þeir báðir  titlaðir skákmeistarar Akureyrar það ár og er það í eina skipti sem tveir keppendur hafa borið titilinn sama ár. . Rúnar Sigurpálsson varð 17 ára rétt áður þegar hann verður meistari 1990 og Halldór Brynjar Halldórsson  varð einnig 17 ára þegar hann vinnur mótið 2002.

Júlíus Bogason er hins vegar sá elsti sem hefur orðið skákmeistari Akureyrar 62 ára, vann mótið 1975.  Þór Valtýsson varð tæplega sextugur þegar hann varð Akureyrarmeistari 2003. Þriðji elsti er Ólafur Kristjánsson 55 ára, meistari 1998.