Við erum ein fjölskylda: Straumurinn er í Ráðhúsið!

Guðfríður Lilja Grétarsdóttir mætti fersk í Ráðhúsið og keypti skák fyrir tengdamóður sína. Hún réð Hrafn Jökulsson til að tefla við Nansý Davíðsdóttur fyrir 10 þúsund krónur, sem renna í söfnunina til bjargar börnunum í Sómalíu.

Lilja, sem hefur 11 sinnum orðið Íslandsmeistari kvenna, lék fyrsta leikinn fyrir Nansý. Úr varð mikil baráttuskák, með þungri undiröldu, en jafntefli urðu sanngjörn úrslit.

Jafn straumur fólks er í Ráðhúsið. Afi kom með þrjú barnabörn, sem öll spreyttu sig gegn skákkrökkunum, og borgaði 5000 krónur fyrir hverja skák.

Skákkrakkarnir í Ráðhúsinu senda skákmönnum kveðju og vonast til að sjá sem flesta í dag.

 Mikið er í húfi: Rauði krossinn berst upp á líf og dauða við hungursneyðina í Sómalíu.

Og eins og Donika Kolica sagði í fréttum Stöðvar 2 í gærkvöldi: Margt smátt gerir eitt stórt.

Ballið er byrjað í Ráðhúsinu: 10.000 krónur fyrir skák við Hjörvar Stein!

Skákmaraþonið í Ráðhúsinu hófst með látum þegar sjálfur Helgi Ólafsson stórmeistari mætti og tefldi æsispennandi klukkufjöltefli við krakkana. Helgi er skólastjóri Skákskóla Íslands, og einn aðalmaðurinn á bak við þá stórefnilegu kynslóð sem nú er að vaxa úr grasi.

Í morgun mættu Donika Kolica og Hrund Hauksdóttir hjá Sirrý á Rás 2, ásamt Stefáni Bergssyni og Hrafni Jökulssyni. Hlustendur voru hvattir til að leggja leið sína í Ráðhúsið í dag og styðja söfnun krakkanna fyrir sveltandi börn í Sómalíu.

Fleiri kunnir skákmenn eru mættir í morgunsárið, m.a. Jón Torfason, Páll Sigurðsson og Snorri Bergsson.

Yngsti áskorandinn, sem hefur sett peninga í baukinn í morgun er Alísa Helga Svansdóttir, sem hér sést á mynd.

Rétt í þessu var svo hinn góðkunni skákáhugamaður Csaba Daday að mæta og reiddi glaðbeittur fram 10.000 krónur til að tefla við Hjörvar Stein!

Færeyingar leiða í landskeppninni

Færeyingar hafa vinnings forskot á Íslendinga þegar fyrri umferð er lokið í landskeppni Íslands og Færeyja, sem fram fór á Húsavík í gær. Færeyingar fengu 6 vinninga en Íslendingar 5 vinninga.

Úrslit fyrri umferðar :

Sigurður Daði Sigfússon -          John Rødgaard           0 - 1
Sjúrður Thorsteinson     -          Áskell Örn Kárason  0,5 - 0,5
Halldór Brynjar Halldórsson -     Wille Olsen                  1 - 0
Herluf Hansen              -            Rúnar Sigurpálsson     0 - 1
Ólafur Kristjánsson                   Jákup á R. Andreasen 0 - 1
A Andreasen                           Sigurður Arnarson        0 - 1
Smári Ólafsson                         Arild Rimestad            0 - 1
W Højgaard                              Sigurður Eiríksson        1 - 0
Mikael J Karlsson                      Rógvi Olsen                  1 - 0
Einar Olsen                            Jakob Sævar Sigurðsson 0,5 - 0,5
Smári Sigurðsson                     Hanus I Hansen           0 - 1

Færeyingar hafa því nauma forystu þegar sest verður að tafli í Hofi á Akureyri kl. 14 í dag, en umferðin hefst með hátíðardagskrá hálftíma áður. Þessir tefla:

John Rødgaard-Sigurður Daði
Áskell-Sjúrður Thorsteinson     
Wille Olsen-Halldór Brynjar 
Rúnar-Herluf Hansen              
Jákup á Rógvi Andreasen-Þór Valtýsson
Viðar Jónsson-Andreas Andreasen         
Arild Rimestad-Sigurður Arnarson
Mikael Jóhann-Wensel Højgaard                              
Rógvi Olsen-Hjörleifur Halldórsson                 
Jakob Sævar-Einar Olsen                             
Hanus Ingi Hansen-Jón Kristinn Þorgeirsson

• Heimasíða Goðans
• Heimasíða SA

Mætum í Ráðhúsið!

Í dag hófst skákmaraþon í Ráðhúsinu eins og margoft fram hefur komið fram.  Það tókst frábærlega og framkoma og frammistaða íslensku krakkanna til mikillar fyrirmyndar!  Krakkarnir voru einu orði, frábærir!

Á morgun, sunnudag, kl. 10-18 heldur maraþonið áfram í Ráðhúsinu.  Skáksamband Íslands og Skákakademía Reykjavíkur hvetja alla til að fjölmenna og tefla við þessa frábæru krakka.   Hægt er að fá fulltrúa til að tefla fyrir sig, ef menn kjósa svo.

Þeir sem ekki hafa tök á því að mæta í Ráðhúsið á morgun er bent á reikning, fyrir söfnunina, 0301-13-300, kt. 580269-5409.

Gens Una Sumus - Við erum ein fjölskylda.

Gunnar Björnsson,
forseti Skáksambands Íslands

 

 

,,Við erum bara að reyna að hjálpa börnum, sem eru að deyja úr hungri"

Skákbörnin sem safna fyrir sveltandi börn í Sómalíu skora á Íslendinga, meistara sem byrjendur, stráka og stelpur, afa og ömmur, að mæta í Ráðhús Reykjavíkur á sólríkum sunnudegi. 

Þar tefla börnin við gesti sem leggja sitt af mörkum í söfnunina ,,Við erum ein fjölskylda" á vegum Skákakademíu Reykjavíkur og Skáksambands Íslands.

Öll framlög fara í baráttu Rauða krossins við hungursneyðina í Sómalíu, en þar eru 350 þúsund börn í lífshættu vegna hungurs.

Íslensku börnin byrjuðu maraþonið í Ráðhúsinu á laugardagsmorgun, þegar Donika Kolica, 14 ára, sigraði Jón Gnarr borgarstjóra. 

Í viðtali við fjölmiðla eftir skákina sagði Donika, sem kom til Íslands frá Kosovo fyrir fjórum árum: ,,Það skiptir engu máli hvort þú vinnur eða tapar. Við erum bara að reyna að hjálpa börnum, sem eru að deyja úr hungri. Margt smátt gerir eitt stórt."

Börnin söfnuðu næstum hálfri milljón á fyrri degi maraþonsins, enda lögðu margir leið sína í Ráðhúsið til að spreyta sig gegn börnunum í skák, og láta um leið gott af sér leiða.

 Maraþonið heldur áfram á sunnudag frá klukkan til 10 til 18. Börnin hafa unnið hug og hjörtu gesta og áhorfenda, og vona að sem flestir mæti í Ráðhúsið í dag.

Henrik vann Romanishin - hálfum vinningi fyrir neðan efstu menn fyrir lokaumferðina

Henrik Danielsen (2535) vann úkraínska stórmeistarannn og goðsögnina Oleg Romanishin (2526) í níundu og næstsíðustu umferð Politiken Cup sem fram fór í dag.  Henrik hefur 7 vinninga og er í 6.-13. sæti, hálfum vinningi á eftir efstu mönnum.  Í lokaumferðinni, sem fram fer í fyrramálið, teflir Henrik við kínverska stórmeistarann Hua Ni (2662), þriðja stigahæsta keppenda mótsins, og hefur þá teflt við 3 af 4 stigahæstu keppendunum, og alltaf með svart.  Skák Henriks hefst kl. 8 og verður sýnd beint.

Efstir með 7½ vinning eru stórmeistararnir Igor Kurnosov (2633) og Boris Savcheno (2615), Rússlandi, Jon Ludvig Hammer (2610), Noregi, Peter Heine Nielsen (2681), Danmörku, og Richard Rapport (2545), Ungverjalandi. 

Gunnar Finnlaugsson (2079) gerði jafntefli, hefur 5 vinninga, og er í 89.-132. sæti.

Skákir Henriks á mótinu má nálgast hér. 

311 skákmenn taka þátt í þessu móti, sem fram fer í 30. júlí - 7. ágúst, og þar af eru 26 stórmeistarar.  Henrik er nr. 19 í styrkleikaröð keppenda en Gunnar er nr. 126.  Tefldar eru 10 umferðir.

• Heimasíða mótsins
• Beinar útsendingar (hefjast kl. 11 nema síðasta umferðin kl. 8)

Adams breskur meistari

Í dag var ekki bara teflt fyrir börn í Sómalíu en í dag lauk breska meistaramótinu í skák.  Michael Adams (2715) er breskur meistari.  Adams fékk 8½ vinning í 11 skákum á meistaramótinu og var jafn Nigel Short (2687) að vinningum.  Í bráðabana þeirra á millum hafði hins Mickey betur 1½-½ og heldur Tony Miles-bikarnum en hann var jafnframt breskur meistari í fyrra.

Í 3.-4. sæti með 8 vinninga urðu Gawain Jones (2606) og alþjóðlegi meistarinn Jonathan Hawkins (2457) sem sló við allmörgum stórmeisturum.

Alls tefldu 48 skákmenn í efsta flokki og þar á meðal 12 stórmeistarar.

Heimasíða mótsins

Skákbörnin fara á kostum í Ráðhúsinu!

Skákmaraþon íslenskra barna hófst í Ráðhúsi Reykjavíkur í morgun þegar Jón Gnarr borgarstjóri varð að játa sig sigraðan gegn Doniku Kolica, 15 ára. Börnin er að safna fyrir sveltandi börn í Sómalíu, og rennur allt söfnunarfé til Rauða krossins. Þórir Guðmundsson hjá Rauða krossinum segir að allir peningarnir verði notaðir til að kaupa vítmínbætt hnetusmjör, sem er kraftaverkalyf þegar kemur að því að bjarga sveltandi börnum. Fjöldi fólks hefur lagt leið sína í Ráðhúsið í morgun. Teflt verður óslitið til klukkan sex í dag og frá 10 til sex á morgun, sunnudag.
 
Meðal þeirra sem lagt hafa leið sína í Ráðhúsið í morgun eru Ísgerður Elfa Gunnarsdóttir leikkona, Össur Skarphéðinsson utanríkisráðherra,  Þorgrímur Þráinsson rithöfundur, Steingrímur J. Sigfússon fjármálaráðherra, Ólafur Jóhannesson landsliðsþjálfari, Jón Ólafsson tónlistarmaður, Ragnhildur Sigurðardóttir fréttamaður, Gunnleifur Gunnleifsson markvörður, Andri (á flandri) Freyr og skákáhugamenn á öllum aldri. Þeir sem ekki treysta sér til að tefla sjálfir geta keypt skákmeistara á staðnum, til að tefla fyrir sig.
 
Fólki er í sjálfsvald sett hvað það borgar fyrir skákina. Hæsta framlagið hingað til frá einstaklingi er 25.000 þúsund krónur, en börn hafa líka komið og tæmt sparibauka sína í söfnunarbaukinn.
 
Skákakademía Reykjavíkur og Skáksamband Íslands standa saman að söfnuninni, en það eru krakkarnir sem eru í aðalhlutverki. Donika Kolica, talsmaður krakkanna, benti á að nú eru 350 þúsund börn að deyja úr hungri í Sómalíu, fleiri en öll íslenska þjóðin.
 
Krakkarnir í Ráðhúsinu skora á Íslendinga að mæta og leggja sitt af mörkum í þágu málstaðarins.

Myndaalbúm

Við erum ein fjölskylda: Mætum í Ráðhúsið!

Íslensk börn skora á íslensku þjóðina í skák í Ráðhúsi Reykjavíkur um helgina. Tilgangurinn er að safna fé fyrir Rauða krossinn, sem berst nú upp á líf og dauða við hungursneyðina í Sómalíu.

Donika Kolica, 15 ára talsmaður skákkrakkanna, segir að nú séu 350 þúsund börn í bráðri lífshættu vegna hungurs. „Það eru fleiri en íslenska þjóðin," sagði Donika í kvöldfréttatíma Sjónvarps á föstudagskvöld.

Donika mun tefla vígsluskák maraþonsins við Jón Gnarr, borgarstjóra í Reykjavík.

Donika segist vona að sem allra flestir komi í Ráðhúsið, taki skák og láti gott af sér leiða. „Margt smátt gerir eitt stórt," sagði Donika, sem ættuð er frá Kosovo, talar sex tungumál og kvíðir ekki skákinni við borgarstjórann.

Mörg af efnilegustu ungmennum Íslands, á aldrinum 6-18 ára, tefla við gesti og gangandi.

Fyrir skákina má greiða upphæð að eigin vali. Allir peningar sem safnast fara í  að kaupa vítamínbætt hnetusmjör, til að hjúkra hungruðum börn.

Þórir Guðmundsson hjá Rauða krossinn sagði í viðtali á föstudag að hörmungarnar í Sómalíu væru ólýsanlegar. Hann sagði vítamínbætta hnetusmjörið sannkallað kraftaverkalyf, og fyrir litla upphæð mætti hjúkra barni til lífs.

Stefán Bergsson framkvæmdastjóri Skákakademíu Reykjavíkur minnti í Sjónvarpsfréttum á að kjörorð alþjóða skákhreyfingarinnar væri: Við erum ein fjölskylda. „Þeim orðum eigum við að fylgja í verki," sagði Stefán."Við getum ekki staðið hjá meðan börn deyja."

Allir eru velkomnir í Ráðhúsið, og ef einhver treystir sér engan veginn til að tefla við krakkana, getur viðkomandi valið um undirstöðukennslu í skák, eða fengið skákmeistara til að tefla fyrir sig. Þannig geta allir verið með.

Án efa munu margir vilja spreyta sig gegn íslensku krökkunum, sem eru engin lömb að leika sér við á taflborðinu. Meðal væntanlegra gesta má nefna Össur Skarphéðinsson, Egil Ólafsson, Ísgerði Elfu Gunnarsdóttur, Jóhönnu Kristjónsdóttur og Boga Ágústsson.

Gunnar Björnsson forseti Skáksambands Íslands mun ásamt mörgum sjálfboðaliðum aðstoða krakkana við framkvæmd maraþonsins. Hann mun ásamt Helga Árnasyni skólastjóra Rimaskóla manna posann, fyrir þá sem vilja greiða með korti.

Forseti Skáksambandsins hvatti fólk til að mæta í Ráðhúsið. „Ég er sammála þeim sem sagði, að maðurinn rísi aldrei hærra en þegar hann beygir sig niður til að bjarga barni."

Við erum ein fjölskylda: Umfjöllun í fjölmiðlum

Töluvert hefur verið um skákmaraþonið í fjölmiðlum.  Hér eru nokkur skemmtileg dæmi:

• Fréttir RÚV í gær (þorfa að skrolla ca. 80% áfram (ca. undir H í "Hjálp"))
• Frétt DV í gær 
• Pisill Illuga á Eyjunni í morgun