Heimsbikarmótið: Heine, Navara, Kamsky og Ivanchuk áfram

Þriðju umferð (32 manna úrslit) Heimsbikarmótsins (World Cup) lauk í dag í Khanty Mansiesk í Síberíu.  Í dag var teflt til þrautar með styttri umhugsunartíma   Tékkneski heiðursmaðurinn David Navara vann Úkraníumanninn Moiseenko.  Meðal annarra úrslita má nefna að Kamsky vann Nepomiachtchi, Ivanchuk lagði Sutovsky.  Eini Norðurlandabúinn Peter Heine Nielsen er einnig kominn áfram eftir sigur á Rúmenanum Mircea-Emilian Parligras. 

Í fjórðu umferð (16 manna úrslitum) mætast m.a.: Polgar-Dominguez Perez, Ivanchuk-Bu, Grischuk-Potkin, Kamsky-Vidler og Gashimov-Heine. Útsendingin hefst kl. 9 og er í háum gæðaflokki.  

Úrslit 3. umferðar:

Round 3 Match 01
Polgar, Judit (HUN)	1½
Karjakin, Sergey (RUS)	½
Round 3 Match 02
Ivanchuk, Vassily (UKR)	3
Sutovsky, Emil (ISR)	1
Round 3 Match 03
Zherebukh, Yaroslav (UKR)	2½
Mamedyarov, Shakhriyar (AZE)	1½
Round 3 Match 04
Ponomariov, Ruslan (UKR)	2½
Efimenko, Zahar (UKR)	1½
Round 3 Match 05
Tomashevsky, Evgeny (RUS)	½
Gashimov, Vugar (AZE)	1½
Round 3 Match 06
Grischuk, Alexander (RUS)	1½
Morozevich, Alexander (RUS)	½
Round 3 Match 07
Bacrot, Etienne (FRA)	½
Radjabov, Teimour (AZE)	1½
Round 3 Match 08
Kamsky, Gata (USA)	3
Nepomniachtchi, Ian (RUS)	1
Round 3 Match 09
Caruana, Fabiano (ITA)	1
Svidler, Peter (RUS)	3
Round 3 Match 10
Jakovenko, Dmitry (RUS)	2
Jobava, Baadur (GEO)	0
Round 3 Match 11
Potkin, Vladimir (RUS)	2½
Vitiugov, Nikita (RUS)	1½
Round 3 Match 12
Parligras, Mircea-Emilian (ROU)	1
Nielsen, Peter Heine (DEN)	3
Round 3 Match 13
Le, Quang Liem (VIE)	1½
Bruzon Batista, Lazaro (CUB)	2½
Round 3 Match 14
Navara, David (CZE)	4
Moiseenko, Alexander (UKR)	2
Round 3 Match 15
Gupta, Abhijeet (IND)	½
Bu, Xiangzhi (CHN)	1½
Round 3 Match 16
Dominguez Perez, Leinier (CUB)	5
Lysyj, Igor (RUS)	4

 

 

• Heimasíða mótsins
• Beinar útsendingar með tölvuskýringum (hefjast kl. 9)

 

Ráðast úrslitin á Meistaramóti Hellis í kvöld?

 

 

 

 

 

 

 

Hjörvar Steinn Grétarsson (2437) og Björn Þorfinnsson (2412) mætast í kvöld á Meistaramóti Hellis.  Skákin gæti hæglega ráðið úrslitum en félagarnir eru jafnir og efstir með fullt hús.  Hjörvar stjórnar hvítu mönnunum.  Fimm skákmenn, Páll Sigurðsson (1957), Guðmundur Kjartansson (2310), Bragi Halldórsson (2198), Þorvarður F. Ólafsson (2174) og Einar Hjalti Jensson (2227) koma vinningi á eftir efstu mönnum og og treysta á að efstu menn misstigi í lokaumferðinni. 

Í öðrum toppskákum mætast Guðmundur-Páll, Einar-Bragi og Þorvarður-Oliver Aron.

Umferðin hefst kl. 19:30. 

Henrik býður upp á skákkennslu

Frá Henrik Danielsen:

Dear chess friend

Are you interested in Systematical chess training via videos send to your inbox.

After 3 months you will have a better calculation, a better endgame technique and a bigger openings knowledge. Some students have improved a lot since they started in the spring 2011.

If interested then you need to sign up and pay for 3 periods. 1 period is 30 lectures and cost 6.000 kr. 3 periods is then 18.000kr.

As soon as you have paid I will start sending you daily videos from Monday to Friday.

Netfang Henriks er:  [e-mail]

Bolvíkingar unnu TR-inga

Guðmundur Daðason skrifar: Taflfélög Bolungarvíkur og Reykjavíkur áttust við í undanúrslitum hraðskákkeppni taflfélaga í gærkvöldi (sunnudaginn 4. sept.). Ætlun okkar var að mæta með okkar sterkasta lið en á síðustu stundu forfölluðust Jón L og Stefán Kristjáns, auk þess sem Dagur og Elvar áttu ekki heimangengt. Arsenal tvíeykið og eðal Bolvíkingarnir Magnús Pálmi og Halldór Grétar komu í þeirra stað. Hjá TR vantaði einna helst Snorra Bergsson, sem einnig er Arsenal maður. Ég hef svo sem enga hugmynd af hverju hann komst ekki en mér finnst vel skiljanlegt að Nallarar séu hikandi við að láta sjá sig á mannamótum þessa dagana.

En hættum þessari stríðni og snúum okkar að skákinni. Við vorum með aðeins sterkara lið á pappírunum en þó var ljóst að brugðið gat til beggja vona. Eftir 3 umferðir höfðu sveitirnar unnið sitt hvora viðureignina og gert eitt jafntefli. Staðan 9-9. Þá náðum við hins vegar að síga framúr og í 6. umferð unnum við stórsigur 4,5-1,5 sem þýddi að við leiddum 21-15 í hálfleik. Við byrjuðum seinni hálfleikinn af krafti og eftir 9 umferðir höfðum við náð 11 vinninga forskoti og ljóst að mikið þyrfti að ganga á til að við myndum tapa viðureigninni. TR náði einum vinningi til baka í síðustu umferðinni og lokatölur 41-31 fyrir Íslandsmeistarana frá Bolungarvík.

Þröstur, Bragi og Jón Viktor fóru fyrir okkar mönnum en einnig átti Magnús Pálmi sterka innkomu. Hjá TR fór Daði Ómars á kostum og var t.d. ekki nema 3 mínútur að pakka mér saman í lokaumferðinni. Helgi Áss var sterkur framan af en gaf aðeins eftir í seinni umferðinni. Við þökkum TR kærlega fyrir skemmtilega viðureign og góðar móttökur. Nú bíðum við bara spenntir eftir hverjir verða andstæðingar okkar í úrslitunum.

Guðmundur Daðason, liðsstjóri.

Árangur Bolvíkinga:
Þröstur Þórhallsson 9 af 11
Bragi Þorfinnsson 9 af 12
Jón Viktor Gunnarsson 9 af 12
Jóhann Hjartarson 7 af 12
Magnús Pálmi Örnólfsson 5 af 12
Halldór Grétar Einarsson 2 af 12
Guðmundur Daðason 0 af 1

Árangur TR inga:
Daði Ómarsson 9 af 12
Helgi Áss Grétarsson 8 af 12
Arnar Gunnarsson 5 af 11
Guðmundur Kjartansson 5 af 12
Torfi Leósson 3 af 12
Júlíus Friðjónsson 1 af 5
Björn Jónsson 0 af 1
Eiríkur Björnsson 0 af 1
Ríkharður Sveinsson 0 af 6

Afmælismót Ingibjargar Eddu fer fram í dag

Mánudaginn 5. september, klukkan 13:00, heldur Skákfélag Vinjar mót til heiðurs afmælisbarni dagsins, henni Ingibjörgu Eddu Birgisdóttur, sem verður tuttugu og sjö vetra. Inga var rétt búin að taka upp fermingargjafirnar þegar hún varð Íslandsmeistari kvenna, í fyrra skiptið, en tók svo langa pásu frá skákinni. Hún hefur nú komið til baka með offorsi og teflir með Skákfélagi Selfoss og nágrennis í vetur. Auk þess var hún kjörin í stjórn Skáksambandsins nú í vor.

Inga hefur haldið utan um skákina í Vin að miklu leyti í sumar og á skilið almennilegt mót. Hinn geðþekki borgarfulltrúi og formaður hverfisráðs miðborgar, fulltrúi í menntaráði og varamaður annarra ráða, Óttarr Ó. Proppé, mun heiðra keppendur og Vinjarfólk með heimsókn í athvarfið. Óttarr mun setja mótið auk þess að leika fyrsta leikinn.

Cross fit meistarinn og framkvæmdastjóri Skákakademíunnar, Stefán S. Bergsson, ætlar að halda utan um stjórn og dómgæslu og að venju fer allt vel fram enda deilir enginn við Stefán. Ekki oftar en einu sinni. Tefldar verða sex umferðir með sjö mínútna umhugsunartíma og bókaforlagið Bjartur hefur gefið vinninga á mótið, bæði íslenskar og erlendar bækur. Fimm efstu fá vinning og auk þess verður happadrætti. Í hálfleik verður afmæliskaffi.

Vinir og velunnarar bæði Ingibjargar Eddu og Vinjar eru hvattir til að láta sjá sig. Skráning á staðnum og kostar ekkert.

Á myndunum má sjá Ingibjörgu einbeitta fylgja sporum ísbjarnar, sem hún vildi finna og klappa, við Ittoqqortoormiit á Grænlandi í vor þar sem hún hafði umsjón með skákkennslu og mótahaldi fyrir börn og unglinga á vegum Hróksins. Hún fann bangsa. Myndirnar tók Tim Vollmer.

Vin er athvarf Rauða kross Íslands fyrir fólk með geðraskanir að Hverfisgötu 47. Teflt er á mánudögum klukkan 13 og allir alltaf velkomnir.

Barna- og unglingaæfingar Hellis hefjast í dag

Barna- og unglingaæfingar Hellis hefjast aftur eftir sumarhlé mánudaginn 5. september 2011. Taflið byrjar kl. 17:15 og fyrirkomulagið verður það sama og síðasta vetur.  Æfingarnar eru opnar öllum 15 ára og yngri. Engin þátttökugjöld.

Æfingarnar verða haldnar í félagsheimili Hellis í Álfabakka 14a, Mjódd. Inngangur er milli Subway og Fröken Júlíu en salur félagsins er á þriðju hæð hússins. Á æfingunum verða 5 eða 6 umferðir með umhugsunartíma 10 eða 7 mínútur. Einnig verður farið í skákdæmi og endatöfl eins og tíma vinnst til. Umsjón með æfingunum hefur Vigfús Ó. Vigfússon.

Íslandsmót skákfélaga 2011-2012

Fyrri hluti Íslandsmóts skákfélaga 2011-2012 fer fram dagana 7. - 9. október nk.  Mótið fer fram í Rimaskóla í Reykjavík.  1. umferð mun hefjast kl. 20.00 föstudaginn 7. október, 2. umferð kl. 11.00 laugardaginn 8. október og 3. umferð kl. 17.00 sama dag.  4. umferð verður síðan teflt kl. 11.00 sunnudaginn 9.október.

Umhugsunartími er 90 mín. á skákina + 30 sek. viðbótartími bætist við eftir hvern leik.

Þátttökugjöld: 

• 1. deild, kr. 50.000.-
• 2. deild, kr. 45.000.-
• 3. deild, kr. 10.000.-
• 4. deild, kr. 10.000.-

Skáksamband Íslands mun greiða fargjöld utan stór-Reykjavíkursvæðisins samkvæmt reikningum fyrir sveitir í 1. og 2. deild.  Miða skal við einn brottfararstað á hverju svæði, t.d. Akureyri, Egilsstaði, Ísafjörð.  Sami háttur verður hafður í 3. og 4. deild og áður, þ.e. þátttökugjöld höfð lág en sveitirnar verða sjálfar að sjá um ferðakostnað á skákstað.

Bent er á reglugerð um Íslandsmót skákfélaga og 3. kafli skáklaga Skáksambands Íslands sem varða Íslandsmót skákfélaga.

Vakin er athygli á viðbót við 2. grein reglugerðar um Íslandsmót Skákfélaga:

2. gr.

Framkvæmdanefnd Íslandsmóts skákfélaga, sem skipuð er af stjórn Skáksambands Íslands, ákveður töfluröð og skipar skákstjóra og umsjónarmenn Íslandsmóts skákfélaga.  Öllum taflfélögum, sem eiga sveitir í 1. deild, ber að útvega einn skákstjóra. 

Athugið að tilkynningar v. Keppendaskrár Skáksambands Íslands skulu hafa borist SÍ í síðasta lagi 16. september nk. sbr. 18. gr. skáklaga.

Vakin er athygli á eftirfarandi texta í 19. grein skáklaga:  „Fyrir upphaf 1.umferðar fyrri hluta ÍS skulu félögin skila inn styrkleikaröðuðum lista allra þeirra keppenda sem þeir hyggjast nota í keppninni."

Þátttökutilkynningar þurfa að berast Skáksambandi Íslands fyrir 1. október með bréfi, tölvupósti ([e-mail]) eða símleiðis.  Að gefnu tilefni er minnt á að nauðsynlegt er að skrá sveitir í keppnina, ekki síst í 4. deild.

Stjórn SÍ mælist til - af gefnu tilefni - að félögin skrái ekki fleiri sveitir til keppni en þau treysta sér til að manna í báðum hlutum keppninnar. 

Ath.  Skákir í Íslandsmóti skákfélaga verða reiknaðar til alþjóðlegra skákstiga.

                                                           Með kveðju

                                                           SKÁKSAMBAND ÍSLANDS

Heiðarleiki við skákborðið borgar sig

Heiðarleiki við skákborðið er mikilvægur eiginleiki.   Skákmennirnir Navara og Moiseenko sýndu báðir mikla íþróttamannslega framkomu við skákborðið í dag.  Um miðja skák varð Navara það á að snerta rangan mann, sem hefði þýtt að hann hefði fengið tapað tafl, en Moiseenko ákvað að krefjast þess ekki á þeim forsendum að Navara hafi greinilega snert manninn fyrir mistök.  Navara fékk síðar unnið tafl, drottningu á móti hrók og þegar hrókurinn var að falla bauð Navara jafntefli sem Moiseenko þáði.   Þetta varð til þess að einvígið fer í bráðabana.

Þar sem geta að munurinn á því að komast í fjórðu umferð úr þeirri þriðju er a.m.k. $7.200 eða ríflegar 800.000 kr.

Báðum skákmönnum til mikils sóma og rímar vel við við einkennisorð skákhreyfingarinnar, Gens Una Sumus. 

Ítarlega frásögn frá þessu atviki má finna á heimasíðu mótsins.

Skákþáttur Morgunblaðsins: 100 árstíð Mikhails Botvinniks

Við vorum staddir þrír Íslendingar á útsláttarmótinu í Hollandi haustið 1994 þegar „skáksagan" gekk skyndilega fram á okkur. Mikhael Botvinnik var orðinn æði sjóndapur en þarna var hann leiddur áfram af vingjarnlegum risa, Vasilí Smyslov. Þeir voru heiðursgestir mótsins. Nú er þess víða minnst að hinn 17. ágúst sl. voru hundrað ár frá fæðingu Mikhails Botvinnik. Hann varð heimsmeistari árið 1948, tveim árum eftir fráfall Alexanders Aljékín. Eftir það tefldi hann átta heimsmeistaraeinvígi og hélt titlinum með stuttum hléum til ársins 1963. Botvinnik vakti fyrst athygli þegar hann lagði heimsmeistarann Capablanca í fjöltefli árið 1925. Frami hans varð skjótur eftir það og náði ákveðnum hátindi með sigri ásamt Capablanca á stórmótinu í Nottingham árið 1936. Árið 1939 hafði náðst samkomulag um einvígi Botvinniks við heimsmeistarann Aljékín en stríðið gerði út um þau áform. Árið 1946 skoraði Botvinnik Aljékín aftur á hólm en heimsmeistarinn, sem hafðist við í Portúgal heilsulaus, fjárvana og niðurlægður, fannst skömmu síðar látinn á hótelherbergi í smábænum Estoril.

Botvinnik þótti afar skipulagður maður. Meðfram skákinni starfaði hann sem rafmagnsverkfræðingur og þróaði m.a. hugbúnað fyrir skáktölvu. Hann lagði upp æfingaáætlun fyrir skákmenn sem hafði mikil áhrif. Þar var m.a. gert ráð fyrir allt að 8 klst. skákrannsóknum á dag, mikilli líkamsrækt og algerri afneitun lífsins lystisemda. Skákþjálfara sína, Model og Ragozin, lét hann stundum hringsóla í kringum vinnuborð sitt eða spúa frá sér tóbaksreyk svo hann gæti vanist óvæntum truflunum.

Með sanni hefur Botvinnik verið talinn fulltrúi fyrir þá tortryggni sem gegnsýrði sovéskt þjóðlíf og hann var oft grunaður um að beita áhrifum sínum til að ná fram hagfelldri niðurstöðu. En stundum kom hann á óvart. Hann neitaði að skrifa upp á plagg til fordæmingar á því er Viktor Kortsnoj „tók stökkið yfir" sumarið 1976 og virtist fylgja sannfæringu sinni í flestum málum.

Skákir Botvinniks á 1. borði ólympíumóta vöktu alltaf mikla athygli. Þegar Botvinnik tefldi við Fischer í Varna 1962 tókst Bobby að finna glufu i gömlum Botvinnik-rannsóknum og fékk unnið tafl.

„Karlinn var orðinn svo lúpulegur," skrifaði Bobby til vinar síns, „að engum hefði komið á óvart þó hann hefði verið fluttur á sjúkrabörum af skákstað. Þegar jafnteflisstöðunni var hinsvegar náð spígsporaði hann bísperrtur um sviðið með reistan makkann," bætti hann við.

Miguel Najdorf reið sjaldnast feitum hesti frá viðureignum sínum við „Bóta",sbr. eftirfarandi skák sem tefld var á ólympíumótinu í Amsterdam 1954:

Mikhail Botvinnik - Miguel Najdorf

Kóngsindversk vörn

1. d4 Rf6 2. c4 g6 3. g3 Bg7 4. Bg2 O-O 5. Rc3 c5 6. Rf3 Rc6 7. O-O d6 8. e3 Bf5 9. b3 Dc8 10. Bb2 Re4 11. Hc1 Rxc3 12. Bxc3 Be4 13. d5 Bxc3 14. Hxc3 Rd8 15. Rd2 Bxg2 16. Kxg2 f5 17. f4 e6 18. e4 exd5 19. cxd5 Rf7 20. He1 He8 21. Hce3 Dd7 22. Df3 Had8 23. a4 b6 24. exf5 Hxe3 25. Hxe3 Dxf5 26. g4 Dc2 27. He2 Hf8 28. Re4 Dd1

( STÖÐUMYND )

29. Rf6+ Kg7 30. g5 Hc8 31. He3 Dxf3 32. Kxf3 h6 33. h4 hxg5 34. hxg5 a6 35. He7 Hb8 36. Ha7 b5 37. Hxa6 bxa4 38. bxa4 Hc8 39. a5 Kf8 40. Hc6 Ha8 41. a6

- og Najdorf gafst upp

Helgi Ólafsson | [e-mail]

-------------------------------

Skákþættir Morgunblaðsins eru birtir á Skák.is u.þ.b. viku síðar en í blaðinu sjálfu.  

Grein þessi birtist í Sunnudagsmogganum 28. ágúst 2011.

Skákþættir Morgunblaðsins

[Event "Netherlands"] [Site "Olympiad, Amsterdam"] [Date "1954.??.??"] [EventDate "?"] [Round "?"] [Result "1-0"] [White "Mikhail Botvinnik"] [Black "Miguel Najdorf"] [ECO "A39"] [WhiteElo "?"] [BlackElo "?"] [PlyCount "81"] 1.d4 Nf6 2.c4 g6 3.g3 Bg7 4.Bg2 O-O 5.Nc3 c5 6.Nf3 Nc6 7.O-O d6 8.e3 Bf5 9.b3 Qc8 10.Bb2 Ne4 11.Rc1 Nxc3 12.Bxc3 Be4 13.d5 Bxc3 14.Rxc3 Nd8 15.Nd2 Bxg2 16.Kxg2 f5 17.f4 e6 18.e4 exd5 19.cxd5 Nf7 20.Re1 Re8 21.Rce3 Qd7 22.Qf3 Rad8 23.a4 b6 24.exf5 Rxe3 25.Rxe3 Qxf5 26.g4 Qc2 27.Re2 Rf8 28.Ne4 Qd1 29.Nf6+ Kg7 30.g5 Rc8 31.Re3 Qxf3+ 32.Kxf3 h6 33.h4 hxg5 34.hxg5 a6 35.Re7 Rb8 36.Ra7 b5 37.Rxa6 bxa4 38.bxa4 Rc8 39.a5 Kf8 40.Rc6 Ra8 41.a6 1-0

Sunnudagsmogginn: Máta sig við þá allra bestu

Taflfélagið Mátar var stofnað í Garðabæ í sumarlok 2008, „í upptakti hrunadansins", eins og Pálmi Ragnar Pétursson, formaður félagsins, kemst sposkur að orði. Félagar eru tuttugu talsins og kjarninn eru Akureyringar búsettir á höfuðborgarsvæðinu en fleiri hafa smám saman bæst í hópinn. „Við erum flestir aldir upp í Skákfélagi Akureyrar og héldum lengi tryggð við það félag en létum síðan verða af því að stofna nýtt. Nafngiftin er skemmtileg og viðeigandi. Allir erum við mátar þó svo við mátum stundum hver annan enda enginn annars máti í leik."

Mátar þreyta frumraun sína í fyrstu deild Íslandsmótsins í vetur og Pálmi viðurkennir að aðeins fari um þá. „Við erum að leita hófanna um liðstyrk en þurfum að hafa snör handtök því að Íslandsmót taflfélaga hefst í byrjun október," segir Pálmi en teflt er á átta borðum í efstu deild.

Rúnar Sigurpálsson og Arnar Þorsteinsson hafa leitt hópinn til þessa og hefur Pálmi áhuga á fleiri skákmönnum í þeim gæðaflokki.

Mátar ætla ekki að láta sér nægja að tefla meðal hinna bestu heldur er einnig stefnt að því að senda lið til keppni í 4. deild. Að óbreyttu munu nokkrir gamalkunnir stjórnmálamenn tefla þar fyrir hönd Máta, svo sem Halldór Blöndal, Guðni Ágústsson, Guðjón Guðmundsson og Gunnar I. Birgisson. Einnig er ekki útilokað að rithöfundurinn Huldar Breiðfjörð setjist við taflborðið. Pálmi segir Máta hittast vikulega yfir vetrartímann og tefla og hlakkar til að takast á við nýja félaga í vetur. Milli skáka er svo vitaskuld rætt fjálglega um landsins gagn og nauðsynjar.

Mátar munu ekki aðeins tefla í vetur því félagið hefur að beiðni Skáksambands Íslands tekið að sér að endurreisa Tímaritið Skák. Það hefur legið í láginni um nokkurt skeið og segir Pálmi það verðuga áskorun að taka upp þráðinn.

Fyrirhugað er að tímaritið komi út einu sinni á ári, í tengslum við Reykjavík Open í byrjun mars. Pálmi segir menn þegar farna að safna efni en auk hefðbundinna þátta, svo sem umfjöllunar um helstu mót, verkefni landsliðsins, æskulýðsstarf og fleira, er meiningin að leita líka fanga á óhefðbundinn hátt. „Þá er ég að tala um að rýna í skáksöguna, miðla reynslusögum og fleira," segir Pálmi og bætir við að hægt sé að skrá sig í áskrift á skak.is.

------------------------------

Grein þessi birtist í Sunnudagsmogganum, 28. ágúst sl.  Morgunblaðið, og Orri Páll Ormarsson, sem skrifaði greinina, fá þakkir fyrir að leyfa birtingu.  Mynd eftir Sigurgeir S.