EM: Jafntefli hjá Héðni - tap hjá Hannesi

Héðinn Steingrímsson gerði jafntefli við bosníska alþjóðlega meistarann Dalibor Stojanovic (2471) í sjöttu umferð EM einstaklinga sem fór í dag í Plovdid í Búlgaríu.  Hannes Hlífar Stefánsson (2531) tapaði hins vegar fyrir hollenska stórmeistaranum Jan Smeets (2610).  Báðir hafa þeir 3 vinninga.  

Frétt um pörun og pistill kemur síðar í kvöld eða í fyrramálið.  

Frídagur er á morgun.   Sjöunda umferð fer fram á þriðjudag og hefst kl. 12.  

• Heimasíða mótsins 
• Beinar útsendingar (borð 1-47)
  
• Chess-Results
• Myndaalbúm (GB)

Sögulegur sigur Rimaskóla á Íslandsmóti grunnskólasveita

 

 

Allir bestu skákmenn landsins á unglingastigi voru mættir um helgina í Rimaskóla til að keppa á Íslandsmóti grunnskólasveita í skák. Það má segja að heimavöllurinn hafi reynst sveitum Rimaskóla sterkur. Þannig sigraði a-sveit skólans með fáheyrðum yfirburðum en sveitin hlaut 34,5 vinning af 36 mögulegum.

Aðeins ein skák tapaðist þegar Nansý Davíðsdóttir fyrirliði b-sveitarinnar lagði Dag Ragnarsson að velli í fyrstu umferð. B-sveit skólans skipuð nemendum sem enn eru á barnaskólastigi hlaut silfrið eftir mikla spennu í lokin en margar sveitir áttu möguleika á verðlaunasæti fyrir lokaumferðina.

 

Er þetta sögulegur sigur hjá Rimaskóla en í langri sögu mótsins hafa tvær sveitir frá sama skólanum aldrei áður lent í tveimur efstu sætunum. A-sveit Salaskóla frá Kópavogi hlaut bronsið, en Landsliðsflokkurinn í skák hefst í Kópavogi 13. apríl.

 

 

 

Borðaverðlaun hlutu:

• 1. Birkir Karl Sigurðarson Salaskóla 8v/9
• 2. Oliver Aron Jóhannesson Rimaskóla 9v/9
• 3. Jón Trausti Harðarson Rimaskóla 9v/9
• 4. Hrund Hauksdóttir Rimaskóla 9v/9

 

Sannarlega glæsilegur árangur, öll ungmennin sem hlutu borðaverðlaun hafa teflt með unglingalandsliðum Íslands.

 

Salaskóla sigraði í keppni e, d og c sveita en Rimaskóli vitanlega í keppni b sveita.

Íslandsmeistarar Rimaskóla:

• 1. Dagur Ragnarsson
• 2. Oliver Aron Jóhannesson
• 3. Jón Trausti Harðarson
• 4. Hrund Hauksdóttir

 

Silfurlið b-sveitar Rimaskóla:

• 1. Nansý Davíðsdóttir
• 2. Jóhann Arnar Finnsson
• 3. Svandís Rós Ríkharðsdóttir
• 4. Joshúa Davíðsson

Liðsstjórar sveitanna voru Helgi Árnason og Hjörvar Steinn Grétarsson.

Bronslið Salaskóla:

• 1. Birkir Karl Sigurðarson
• 2. Hilmir Freyr Heimisson
• 3. Þormar Leví Magnússon
• 4. Hildur Berglind Jóhannsdóttir
• v. Jón Smári Ólafsson

Liðsstjóri sveita Salaskóla var Tómas Rasmus.

Yfirskákstjóri var Omar Salama.

Liðsstjórum er sérstaklega þakkað fyrir helgina, en við mótshald sem þetta munar mikið um að hafa reynda liðsstjóra enda gekk mótshaldið vel fyrir sig og ekki eitt deilumál kom upp.

Lokastaðan:

 

Rk.	Team	TB1	TB2
1	Rimaskóli A	34,5	18
2	Rimaskóli B	24	13
3	Salaskóli A	23,5	13
4	Hólabrekkuskóli	23	13
5	Álfhólsskóli A	22	12
6	Hagaskóli	20	10
7	Smáraskóli A	19,5	8
8	Glerárskóli	19	11
9	Ölduselsskóli	19	9
10	Árbæjarskóli	19	9
11	Vatnsendaskóli	18,5	11
12	Salaskóli B	18,5	10
13	Salaskóli C	18,5	10
14	Álfhólsskóli B	18,5	10
15	Laugalækjarskóli A	18,5	8
16	Vættaskóli	17,5	8
17	Melaskóli	17,5	8
18	Sæmundarskóli	17,5	8
19	Rimaskóli C	17	7
20	Hofsstaðaskóli	16,5	10
21	Snælandsskóli	16	8
22	Salaskóli D	13,5	6
23	Rimaskóli D	12,5	5
24	Salaskóli E	11	5
25	Smáraskóli B	8	3
26	Álfhólsskóli C	5	1

Myndaalbúm frá síðari degi (HJ)

Spennan magnast í Skák-bikarsyrpu OB.LA.DI. OB.LA.DA.

Skák-bikarsyrpa Obladí Oblada, Frakkastíg 28, heldur áfram mánudagskveldið 26. mars, og hefst klukkan 19.00 Teflt er eftir sérstöku forgjafarkerfi á skákklukkunni, þar sem 12 mínútur eru í pottinum. Þannig eiga stigalægri keppendur góða möguleika á sigri gegn sterkari mönnum.
Í kvöld telja vinningarnir tvöfalt, svo mikið er í húfi. Heildarstöðuna má sjá hér, http://www.facebook.com/pages/Obladi-Oblada/139540706057159

Í tilkynningu frá mótshaldara er sérstaklega tekið fram að allir séu velkomnir og aldrei of seint að vera með. Góð verðlaun eru veitt í einstökum mótum og enn glæsilegri verðlaun í úrslitum, sem verða um páskana. Þátttaka er ókeypis.

Mótstjóri er Róbert Lagerman, sími 6965858.

EM: Pistill nr. 5 - gengur bara betur næst!

Fyrsti dagurinn í EM þar sem ekkert gekk upp hjá íslenskum skákmönnunum.  Héðinn Steingrímsson tapaði með með hvítu í fjörlegri skák þar Héðinn tefldi hvasst, fórnaði manni, en andstæðingurinn varðist mjög vel, fórnaði manninum til baka á réttum tíma og hafði þá unnið tafl.   

En það var skák Hannesar sem hélt íslenskum skákákhugamönnum heldur betur við efnið á Skákhorninu.  Ótrúlega spennandi skák þar sem Hannes fórnaði peði strax í fimmta leik og eftir það lék allt bókstaflega á reiðiskjálfi.  Hannes tefldi hratt og pressaði andstæðinginn í mikið tímahrak og um tíma lét staðan mjög vel út. 

Hannes tók áhættur en andstæðingnum tókst að finna hvað eftir annað besta leikinn með um 1-2 sekúndur eftir á klukkunni og hafði sigur að lokum eftir æsispennandi skák.  Svekkjandi tap, það mest svekkjandi hingað til á mótinu.  

Það er gaman að fylgjast með Horninu þar sem allir hafa tölvuforrit fyrir framan sig.  Það hafa skákmennirnir ekki og geta engan veginn reiknað út sömu leikjaraðir og Houdini og Hornverjar þ.a.l. líka á Nanó-sekúndu!

Mótið er hins vegar ekki enn hálfnað og nógur tími fyrir Hannes og Héðinn að snúa mótinu sér í vil.  

Þrír keppendur eru efstir og jafnir eins og fram kemur í eldri frétt.  Ivan vini vorum tókst ekki að sigra georíska alþjóðlega meistarann Shota Azaladze (2419) þrátt fyrir stór orð þess efnis í gær.  Og mátti í þokkabót teljast heppinn því hann hafði tapað tafl.  Þar fann tölvan á sama hátt leikjaröð á örskotsstund sem Ivan fann ekki yfir borðinu en Ivan hélt að 25. Bxg4 væri eini leikurinn til að verða ekki mát en átti 25. Ha3 sem Houdini sá á örskotsstundu!

Ýmsum gengur mun betur en fyrirfram mátti gera ráð fyrir.  Má þar sérstaklega nefna ofangreindan Azaladze sem hefur heldur betur slegið í gegn.  Mátinn Jones er líka að brillera en eins og áður hefur komið fram greiðir hann allan sinn kostnað sjálfur og gistir t.d. ekki hótelinu heldur leigir sér herbergi í um 10 mínútna göngufjarlægð frá skákstað.   

Svo gengur sumum illa.  Til dæmis er Íslandsvinurinn David Navara fastagestur í "gúanóinu" og hefur aðeins 2 vinninga og er eins og er eins og er með 21 stig í mínus.  

Bendi svo á fína umfjöllun Vassily Papin á heimasíðu hans:  http://rostovchess.ru/news/1049/ sem gerði einnig N1 Reykjavíkurskákmótinu góð skil.

Nóg í bili.  Minni enn á ný á það að umferðir hér eftir hefjast kl. 12.

Gunnar Björnsson

• Heimasíða mótsins 
• Beinar útsendingar (borð 1-47)
  
• Chess-Results
• Myndaalbúm (GB)

EM: Pörun sjöttu umferðar

Pörun 6. umferðar EM einstaklinga sem fram fer á morgun liggur nú fyrir.  Hannes Hlífar Stefánsson (2531) mætir hollenska stórmeistaranum og Íslandsvininum Jan Smeets (2610) en Héðinn mætir bosníska alþjóðlega meistaranum Dalibor Stojanovic (2471).   Hannes hefur 3 vinninga og er í 74.-149. sæti (91. sæti á stigum) en Héðinn hefur 2,5 vinning og er í 150.-211. sæti (165. sæti á stigum).  

Íslandsvinirnir Yuriy Kuzubov (2615), Úkraínu, og Gawain Jones (2635), Englandi, eru efstir ásamt Frakkanum Laurent Fressinet (2693) með 4,5 vinning.

26 skákmenn hafa 4 vinninga og þar á meðal Íslandsvinirnir Sergei Movsesian (2702), Vladimir Malakhov (2705), Ivan Cheparinov (2664) og Ivan Sokolov (2653).  

Hvorki Hannes né Héðin verða í beinni á morgun.  Meðal athyglisverða viðureigna má nefna Jones-Fressinet, Jobava-Kuzubov, Cheparinov-Malakhov, Ragger-Movsesian, Naiditsch-Sokolov og Caruana-Mamedov. 

Minnt er á sumartími er að skella á í Búlgaríu sem þýðir að framvegis byrja umferðirnar kl. 12 að íslenskum tíma.

• Heimasíða mótsins 
• Beinar útsendingar (borð 1-47)
  
• Chess-Results
• Myndaalbúm (GB)

EM: Töp hjá Hannesi og Héðni

Báðir íslensku stórmeistararnir Hannes Hlífar Stefánsson (2531) og Héðinn Steingrímsson (2556) töpuðu í 5. umferð EM einstaklinga sem fram fór í dag í Plovdid í Búlgaríu.  Báðir fyrir rússneskum stórmeisturum með 2656 skákstig.  Hannes tapaði fyrir Denis Khismatullin í mikilli hörkuskák og Héðinn fyrir  Igor Lysyj einnig í mjög fjörlegri skák.  Hannes hefur 3 vinninga en Héðinn hefur 2,5 vinning.

Frétt um pörun og smá pistill síðar í kvöld.  Hægt er að skoða skákirnar á heimasíðu mótsins sem og á Chessbomb.  

Vakin er athygli á því að í nótt byrjar sumartími í Búlgaríu.  Það þýðir að framvegis byrja skákirnar kl. 12 að íslenskum tíma.  

• Heimasíða mótsins 
• Beinar útsendingar (borð 1-47)
  
• Chess-Results
• Myndaalbúm (GB)

Rimaskóli efstur á Íslandsmóti grunnskólasveita

Íslandsmót grunnskólasveita hófst í dag. A-sveit Rimaskóla sem teflir á heimavelli leiðir mótið með 18.5 vinning. Eina tapið kom á móti b-sveitinni þegar Nansý Davíðsdóttir lagði að velli Dag Ragnarsson. Í fjórðu umferð mætti sveitin a-sveit Salaskóla en þessar tvær sveitir lentu í 1. og 2. sæti á mótinu í fyrra. Eftir spennandi viðureign féll nærri allt með Rimaskóla sem sigraði 3.5-0.5. Birkir Karl Sigurðarson náði jafntefli gegn Degi Ragnarssyni eftir gríðarlega baráttu, mikil seigla hjá Birki að halda jafntefli. Hilmir Freyr Heimisson stóð á tímabili til sigurs á öðru borði gegn Oliveri Aroni en tíminn var of naumur og féll hann á tíma.

Taflið heldur áfram á morgun klukkan 11:00 - en teflt er í Rimaskóla.

Staðan:

 

Rk.	Team	TB1	TB2	TB3
1	Rimaskóli A	18,5	10	0
2	Rimaskóli B	14,5	8	0
3	Salaskóli A	14	8	0
4	Hólabrekkuskóli	14	7	0
5	Árbæjarskóli	13	6	0
6	Glerárskóli	12,5	7	0
7	Hagaskóli	12	6	1
8	Melaskóli	12	6	1
9	Laugalækjarskóli A	11,5	5	1
10	Smáraskóli A	11,5	5	1
11	Vatnsendaskóli	11	7	0
12	Álfhólsskóli A	11	6	0
13	Salaskóli B	11	5	0
14	Hofsstaðaskóli	10	6	0
15	Salaskóli C	9,5	6	0
16	Álfhólsskóli B	9,5	5	0
17	Ölduselsskóli	9,5	4	1
18	Vættaskóli	9,5	4	1
19	Sæmundarskóli	8,5	4	0
20	Rimaskóli C	8,5	3	0
21	Salaskóli D	7	3	0
22	Rimaskóli D	6,5	3	0
23	Salaskóli E	6	3	0
24	Snælandsskóli	5,5	2	0
25	Álfhólsskóli C	2	1	0
26	Smáraskóli B	1,5	0	0

 

Myndaalbúm (HJ)

EM: Hannes og Héðinn í beinni

 

Báðir íslensku stórmeistararnir verða í beinni útsendingu frá fimmtu umferð EM einstaklinga sem hefst nú kl. 13.    Báðir tefla þeir við rússneska stórmeistara með 2656 skákstig.  Hannes teflir við Denis Khismatullin en Héðinn mætir Igor Lysyj. 

Meðal annarra athyglisverðra viðureigna má nefna: Jones (2645) - Vitiugov (2709), Kuzubov (2615) - Bologan (2687), Radulski (2552) - Cheparinov (2664), Sokolov (2653) - Azaladze (2419) og Zhigalko (2649) - Caruana (2767).  Andstæðingur Sokolov er sá sem mest hefur komið á óvart á mótinu hingað til.  

Hægt er að nálgast útsendingarnar á heimasíðu mótsins sem og á Chessbomb.  Hannes er á borði nr. 29 en Héðinn á borði nr. 40.  

• Heimasíða mótsins 
• Beinar útsendingar (borð 1-47)
  
• Chess-Results
• Myndaalbúm (GB)

Uppfærðar reglugerðir fyrir Íslandsmót barna- og grunnskólasveita.

Reglugerðir fyrir Íslandsmót barnaskóla- og grunnskólasveita hefur verið breytt.   Bætt hefur verið greinum 8 og 9.  Íslandsmót grunnskólasveita hefst kl. 13 í dag í Rimaskóla. 

Nýju greinarnar:

8. gr.

Eins og fram kemur í lögum FIDE þá er utanaðkomandi aðilum (aðrir keppendur, liðstjórar, foreldrar, áhorfendur ..) óheimilt að hafa áhrif á gang einstakra skáka á neinn hátt. Dæmi um slík óheimil inngrip eru: gefa vísbendingar um leiki, láta vita um fall á tíma, ráðleggingar um jafnteflisboð eða uppgjöf o.s.frv.  Undantekning frá þessu er að liðstjóri má ráðleggja um hvort taka eigi jafntefli eða bjóða jafntefli í keppni þar sem liðsstig (matchpoints) ráða úrslitum, sbr mótareglur FIDE.

9. gr.

Leitast skal við að sveitir frá sama skóla tefli innbyrðis í 1.umferð. Sveitir frá sama skóla geta ekki teflt innbyrðis í síðustu umferð.

Reglugerðina má nálgast hér.

Páskaeggjamót Góu og Hellis fram á mánudag

Páskaeggjamót Góu og Hellis verður haldið mánudaginn 26. mars 2012, og hefst taflið kl. 17, þ.e. nokkru fyrr heldur en venjulegar mánudagsæfingar. Páskaeggjamótið kemur í stað mánudagsæfingar. Tefldar verða 7 umferðir með 7 mínútna umhugsunartíma. Mótið er opið öllum krökkum á grunnskólaaldri. Skráning í mótið verður á heimasíðu Hellis: http://hellir.blog.is/  

Ókeypis er fyrir félagsmenn í Helli en fyrir aðra er þátttökugjald kr. 500. Allir þátttakendur keppa í einum flokki en verðlaun verða veitt í tveimur aðskildum flokkum. Páskaegg frá Góu verða í verðlaun fyrir þrjú efstu sætin, bæði í eldri flokki (fæddir 1996 - 1998) og yngri flokki (fæddir 1999 og síðar). Að auki verða tvö páskaegg dregin út og efsta stúlkan í mótinu fær páskaegg í verðlaun. Enginn fær þó fleiri en eitt páskaegg.

Páskaeggjamótið verður haldið í félagsheimili Hellis að Álfabakka 14a í Mjóddinni. Inngangurinn er milli Subway og Fröken Júlíu og salur félagsins er á þriðju hæð hússins.