Atskákmót Sauðárkróks hefst á laugardaginn

Í tilefni af íslenska skákdeginum verður Atskákmót Sauðárkróks haldið laugardaginn 26. janúar. Teflt verður í Safnahúsinu á Sauðárkróki og hefst mótið klukkan 13:00. Umhugsunartími er 25 mínútur pr mann á skák. Teflt verður til klukkan 18:00 á laugardaginn og fer eftir þátttöku hvort mótinu verður lokið síðar. Skráning á staðnum

Héraðsmót UMSB í hraðskák

Á skákdegi Íslands, þann 26. janúar stendur Ungmennasamband Borgarfjarðar fyrir héraðsmóti í hraðskák. Mótið hefst kl. 14.00 í félagsheimilinu Óðali í Borgarnesi.  

Keppt verður í þremur flokkum; unglingaflokki (16 ára og yngri), karla og kvennaflokki. Sá einstaklingur sem hlýtur flesta vinninga verður krýndur Héraðsmeistari í skák en sá titill er þó einskorðaður við félagsmenn í UMSB eða íbúa á félagssvæði sambandsins. Öllum er þó velkomið að taka þátt, óháð búsetu. Aðgangur er ókeypis og boðið verður upp á kaffi.

Gott væri að fá skráningar á netfangið [e-mail] en einnig verður hægt að skrá sig á staðnum.

Skákdagur Íslands var haldinn í fyrsta sinn árið 2012 og er því haldinn í annað sinn núna í ár en hann er haldinn á afmælisdegi stórmeistarans Friðriks Ólafssonar. Friðrik er talinn vera brautryðjandi í íslensku skáklífi og því viðeigandi að helga honum og framlagi hans til íslenskrar skáklistar þennan dag.

Á 100 ára afmæli Ungmennasambands Borgarfjarðar í apríl 2012 kom Ófeigur Gestsson fyrrum sambandsstjóri UMSB í pontu. Var erindi hans það að vekja athygli á ágæti skáklistarinnar, hvernig skák getur eflt andann og styrkt. Hvatti hann Ungmennasambandið til að blása lífi í iðkun skákíþróttarinnar og gaf sambandinu í þeim tilgangi farandbikar handa héraðsmeistara í Hraðskák. Skömmu eftir afmælishátíðina var því skipuð skáknefnd UMSB og er Héraðsmót UMSB í hraðskák undirbúið og skipulagt af þeirri nefnd.

Carlsen kominn með 1½ vinnings forskot

Magnus Carlsen (2861) heldur áfram stórkostlegri frammistöðu á Tata Steel-mótinu í Wijk aan Zee. Í 10. umferð sem fram fór í dag vann hann hollenska stórmeistarann Erwin L´Ami (2627. Carlsen hefur nú 8 vinninga og 1½ vinnings forskot á heimsmeistarann Anand (2772), Nakamura (2769) og Aronian (2802). Carlsen er því í afar vænlegri stöðu þegar aðeins 3 umferðir eru eftir.

Fimm skákum sjö lauk með hreinum úrslitum. Sigurvegarar dagsins auk Carlsens voru Nakamura, Aronian, Hou Yifan og Leko. 

Frídagur er á morgun.

Úrslit 10. umferðar:

van Wely, L. - Giri, A.	½-½
Caruana, F. - Nakamura, H.	0-1
Aronian, L. - Wang, H.	1-0
Carlsen, M. - L'Ami, E.	1-0
Harikrishna, P. - Hou, Y.	0-1
Anand, V. - Karjakin, S.	½-½
Sokolov, I. - Leko, P.	0-1

Staða efstu manna:

• 1. Carlsen (2861) 8 v.
• 2.-4. Anand (2772), Aronian (2802) og Nakamura 6½
• 5.-6. Karjakin (2780) og Leko (2735) 5½ v.
• 7.-8. Harikrishna (2698) og van Wely (2679) 5 v.

Í a-flokki eru meðalstigin 2732 skákstig en 14 skákmenn tefla þar allir við alla.

• Heimasíða mótsins
• Beinar útsendingar (hefjast almennt kl. 12:30)

KORNAX-mótið: Bein útsending frá næstsíðustu umferð

Áttunda og næstsíðasta umferð KORNAX-mótsins - Skákþings Reykjavíkur hefst í kvöld kl. 19:30.. Venju samkvæmt eru 6 skákir sýndar beint frá umferðinni. Útsendingu frá umferðinni má nálgast hér.

 

Skákirnar sem sýndar eru beint eru:

• Davíð Kjartansson (6,5) - Daði Ómarsson (5,5)
• Halldór Pálsson (5,5) - Omar Salama (6,5)
• Einar Hjalti Jensson (5) - Jóhann H. Ragnarsson (5)
• Mikael Jóhann Karlsson (5) - Lenka Ptácníková (5)
• Páll Sigurðsson (4,5) - Júlíus Friðjónsson (4,5)
• Dagur Ragnarsson (4,5) - Þór Már Valtýsson (4,5)

 

• Heimasíða TR (beinar útsendingar)
• Myndaablúm (GB)
• Chess-Results

Vilborgarmótið - Gunnar Birgisson hrósaði sigri

Það lá mikil spenna í lofti þá er gengið var til ats í Gallerý Skák-listasmiðju í vikunni sem leið.  Myndi afrekskonan Vilborg Arna Gissurardóttir ná að klára síðasta spölinn af hennar 2ja mánaða þrautagöngu og sigrast á Suðurpólnum einsömul á tveimur jafnfljótum meðan menn sætu að tafli.  Það þarf mikla þrautseigu, ofurþrótt og einbeittan sigurvilja til að vinna slíkt afrek.  Samþykkt var samhljóða að tileinka göngugarpnum frækna mót kvöldsins í heiðurskyni fyrir framlag hennar og framgöngu fyrir gott málefni  og senda henni heillakveðjur og óska henni velfarnaðar.

Það verður að teljast talsvert minna mál  þó það reyni töluvert á engu að síður að tefla skák sitjandi á rassinum og rembast við að (þegja) sjá við andstæðingnum og  landa sigri áður en klukkan fellur.  Síðustu leikirnir og mínúturnar geta verið afdrifaríkar í allri keppni.  Hversu margir hafa ekki  sprungið  limminu á síðasta sprettinum þegar hvað mest á reynir og  glæstur sigur gengið þeim úr greipum. Svo ekki sé nú talað um íslenska landsliðið í handbolta.

Gæfa og gjörvuleiki, skin og skúrir skiptast á jafnt í skák sem í öðrum greinum.  Nú snerust lukkuhjólin á ný með sveininum þunga á kostnað sveinsins unga, sem sigraði svo glæsilega síðast.  Gunnar Birgisson vann mótið með talsverðum yfirburðum hlaut 10 vinninga af 11 mögulegum, Gunnar Gunnarsson var næstbestur með 8.5 v og ungmennið undraverða Vignir Vatnar í 3.-4. sæti af 16 keppendum með 7.5v. ásamt Stefáni Þormar, hellisheiðarséníi. 

Sérstaka athygli vakti frækileg sóknarskák Sigurðar Einars gegn Gunna Gunn sem náði að máta meistarann með 2 drottningum um leið og hann féll á tíma.  Einar Sigurður mátaði hins vegar nafna sinn téðan Sigurð Einar án teljandi fyrirhafnar,  svo því sé rétt svona til haga haldið eins og títt er nú til orða tekið á hinu háa Alþingi.  Óvænt úrslit eins og fyrri daginn í öllum umferðum sem gleður og grætir menn eftir atvikum. 

 Um nánari úrslit  vísast til meðf. mótstöflu og  nokkrar myndir af vettvangi má sjá í myndaalbúmi.

Fimmtudaginn 24. janúar kl. 18 hefst svo Kappteflið um Taflkóng Friðriks í aðdraganda skákdagsins í vikunni.  Um er að ræða 4 kvölda mótaröð þar sem þrjú bestu mót hvers keppenda telja til GrandPrix stiga . Sjálfstæð frétt þar um fylgir í kjölfarið.

 ESE- skákþankar 22.01.13

Fjöltefi í Eyjum í dag

Í tilefni af 40 ára afmæli gossins á Heimaey, stendur Taflfélag Vestmanneyja ásamt, grunnskólanum og Vestmannaeyjabæ fyrir fjöltefli í Akóges n.k. miðvikudag 23 janúar og hefst fjölteflið kl. 13:00.

Sá sem mun etja þar kappi við gesti og gangandi er stórmeistarinn og fyrrum Eyjamaðurinn Helgi Ólafsson.

Allir eru velkomnir á fjölteflið meðan húsrúm leyfir og munu félagar í Taflfélaginu sjá um framkvæmd fjölteflisins, en Helgi hefur um langt árabil verið félagsmaður í Taflfélagi Vestmannaeyja.

Toyotaskákmót eldri borgara fer fram á föstudag

Nú er hafin íslenska skákvikan, sem er til heiðurs okkar fyrsta stórmeistara í skák Friðriki Ólafssyni og ætla heldri borgarar að tefla honum til heiðurs alla vikuna.

Toyota á Íslandi býður eldri skákmönnum til skákmóts á næsta föstudag 25. janúar (fyrsta dag Þorra) í höfuðstöðvum sínum í Kauptúni í Garðabæ. Þetta er sjötta Toyotaskákmótið sem haldið er. Æsir skákfélag FEB í Reykjavík sjá um framkvæmd mótsins. Allir skákmenn sem verða sextugir á árinu velkomnir meðan pláss leyfir. Það eru margir búnir að skrá sig í þetta mót, stefnir í metþátttöku.

Skákin byrjar á mínútunni kl. 13.00 þannig að menn þurfa að mæta vel tímanlega á staðinn til að staðfesta þátttöku sína. Gunnar K Gunnarsson vann þetta mót 2012 hann stefnir að því að mæta aftur núna.

Forskráning er hjá Þorsteini Guðlaugssyni í síma 822 2403 og netfangi [e-mail] og hjá Finni Kr Finnssyni í síma 893 1238 og í netfangi [e-mail].

Skákmenn munið að að mæta tímanlega, í síðasta lagi korter fyrir eitt.

Guðmundur vann í fyrstu umferð í Gíbraltar - mikið um óvænt úrslit

Alþjóðlegi meistarinn, Guðmundur Kjartansson (2408) lætur lítinn bilbug á sér finna og heldur áfram að tefla á hverju mótinu á eftir öðru. Í dag hófst alþjóðlega mótið í Gibraltar og þar er Guðmundur einmitt meðal keppenda. Í fyrstu umferð, sem fram fór í dag vann hann stigalágan Englending (2015). Á morgun mætir hins franska stórmeistaranum Maxime Vachier-Lagrave (2711) sem er einmitt stigahæstur keppenda á N1 Reykjavíkurskákmótinu. Skák Guðmundar verður sýnd þráðbeint á morgun og hefst kl. 14.

Afar mikið var um óvænt úrslit og gerðu bæði Ivanchuk (2758) og Kamsky (2740) jafntefli við mun stigalægri andstæðinga (2206-2218). 

246 skákmenn taka þátt í mótinu og þar af 48 stórmeistarar. Guðmundur er nr. 66 í stigaröð keppenda.

• Heimasíða mótsins
• Chess-Results

Össur efstur í Ásgarði í dag.

Það var vel mætt í Ásgarði í dag. Tuttugugátta heiðursmenn mættu til leiks og skemmtu sér á hvítum reitum og svörtum í þrjá og hálfan tíma. Allir reyndum við að tefla í anda okkar fyrsta stórmeistara Friðriks Ólafssonar og til heiðurs honum, eins og við ætlum að gera alla þessa viku.

Össur Kristinsson var í mestu stuði og sigraði með níu og hálfan vinning af tíu mögulegum.Þór Valtýsson varð í öðru sæti með níu vinninga.Stefán Þormar varð síðan í þriðja sæti með 7 vinninga.

Á föstudaginn 25 jan. býður Toyota okkur eldri skákmönnum í höfuðstöðvar sínar þar sem sjötta stórmót Toyota verður haldið. Teflt er um svokallaðan Toyotabikar og mörg önnur verðlaun,sem öll eru gefin af Toyota á Íslandi. Það stefnir í metþátttöku og margir sterkir meistarar búnir að tilkynna þátttöku sína. Æsir skákfélag F E B í Reykjavík sjá um framkvæmd mótsins. Allir skákmenn sem verða sextugir á árinu velkomnir til leiks meðan pláss leyfir. Tefldar verða 9 umferðir með 10 mín. umhugsunartíma.

Fyrsta umferð verður sett á rétt um kl.13.00 þannig að menn þurfa að mæta vel tímanlega til þess að staðfesta þátttöku sína.Forskráning er hjá Þorsteini Guðlaugssyni í síma 8222403 [e-mail] og hjá Finni Kr Finnssyni í síma 8931238 og netf. [e-mail]

Skákmenn vinsamlega mætið tímanlega, í síðasta lagi korter fyrir eitt.

Úrslit dagsins: sjá meðfylgjandi töflu.

 

 

Helgi Ólafsson sigraði á Friðriksmótinu í Vin

Helgi Ólafsson stórmeistari sigraði á Friðriksmótinu í Vin, sem fram fór á mánudaginn og heppnaðist í alla staði frábærlega. Mótið markaði upphaf mikillar skákviku, og var haldið til heiðurs Friðriki Ólafssyni, fyrsta stórmeistara Íslands og fv. forseta FIDE. Friðrik var sjálfur meðal keppenda og sýndi leiftrandi takta. Róbert Lagerman forseti Skákfélags Vinjar náði silfrinu af miklu öryggi.

Tuttugu og fjórir skákmenn settust að tafli í Vin og komu sumir um langan veg. Helgi vann skák eftir skák og sigraði m.a. í uppgjöri stórmeistarana í 4. umferð. Aðeins Róbert Lagerman náði jafntefli við Helga, sem tefldi af fyrirhafnarlausri snilld.

Friðrik tefldi vel, en tapaði slysalega á móti Helga og gerði jafntefli við Hauk Halldórsson. Haukur var tvímælalaust stjarna mótsins, tapaði aðeins einni skák og var meðal efstu manna. Haukur er mjög virkur í Skákfélagi Vinjar, æfir oft í viku og teflir með félaginu á Íslandsmóti skákfélaga.

Gestir á skákmótinu glöddust líka yfir tilþrifum Vignis Vatnars Stefánssonar, sem á dögunum varð Íslandsmeistari barna. Vignir varð í 5.-7. sæti ásamt Hauki og Inga Tandra Traustasyni, hinum dygga liðsmanni Skákfélags Vinjar. Ólafur B. Þórsson varð í 3.-4. sæti ásamt Friðriki, en lægri á stigum.

Leikgleðin var í fyrirrúmi, einsog jafnan í Vin. Í hálfleik var boðið upp á kaffi og kræsingar að hitta Vinjar.

Skákæfingar eru alla mánudaga klukkan 13 í Vin. Þangað eru allir hjartanlega velkomnir.

 Myndaalbúm frá Friðriksmótinu í Vin (HJ)

LOKASTAÐAN Á FRIÐRIKSMÓTINU Í VIN, 21. JANÚAR 2013

1   Helgi Ólafsson                         5.5      16.0  24.0   20.0
  2   Róbert Lagerman                        5        14.5  21.0   18.0
3-4  Friðrik Ólafsson                       4.5      13.5  21.5   16.0
      Ólafur B. Þórsson                      4.5      13.5  20.5   18.0
5-7  Haukur Halldórsson                     4        13.0  19.5   14.5
      Vignir Vatnar Stefánsson               4        12.0  19.5   15.0
      Ingi Tandri Traustason                 4        12.0  18.0   11.0
8-10  Gunnar Björnsson                       3.5      14.5  21.5   12.0
      Hrannar Jónsson                        3.5      13.5  19.0   14.5
      Oliver Aron Jóhannesson                3.5      12.5  20.5   11.0
11-13 Jon Olav Fivelstad                     3        13.0  20.5    8.0
      Friðgeir Hólm                          3        12.0  16.0    9.0
      Hjálmar Sigurvaldason                  3         9.0  14.0    6.0
14-18 Birgir Berndsen                        2.5      14.5  21.5   11.5
      Gunnar Nikulásson                      2.5      12.5  19.0   11.5
      Stefán Pétursson                       2.5      11.5  17.0   12.0
      Einar S. Einarsson                     2.5      10.5  16.0    8.0
      Finnur Kr. Finnsson                    2.5      10.5  16.0    6.0
19-21 Ásgeir Mogensen                        2        12.0  17.5    9.0
      Hörður Jónasson                        2        10.5  15.0    8.0
      Jón Gauti Magnússon                    2         9.0  12.0    5.0
22   Albert Geirsson                        1.5      10.0  14.5    5.0
23   Björn Agnarsson                        1        10.0  15.0    3.0
24   Hylur Hörður Þórusuon                  0         8.5  13.0    0.0