Þorvarður efstur á öðlingamóti

Þorvarður Fannar Ólafsson (2225) er efstur á Skákmóti öðlinga að lokinni fimmtu umferð sem fram fór í gærkveldi en þá vann hann Hrafn Loftsson (2204). Sævar Bjarnason (2132) er annar með 4 vinninga en hann gerði jafntefli við Sigurð Daða Sigfússon (2324). Fimm skákmenn koma næstir með 3,5 vinning. s Ó. Vigfússon (1988).

Öll úrslit fimmtu umferðar má nálgast hér.

Stöðu mótsins má nálgast hér.

Sjötta og næstsíðasta umferð fer fram nk. miðvikudagskvöld. Þá mætast meðal annars Sævar og Þorvarður.

Pörun sjöttu umferðar má í heild nálgast hér. 

• Heimasíða TR
• Chess-Results

Vor í lofti á Selfossi - Björgvin sigurvegari Vormótsins

Þegar fækka tekur á skákæfingum hjá SSON liggur fyrir að vorið er komið og sumarið bankar á dyrnar, eigi að síður mættu 5 höfðingjar til skákiðkunar í gærkvöldi og tefldu 7 mínútna skákir, tvöfalda umferð.

Björgvin Smári og Magnús áttu ágætis spretti, að minnsta kosti betri en aðrir og voru efstir og jafnir fyrir síðustu umferð þar sem þær mættust og Björgvin hafði góðan sigur og sigur á mótinu þar með.

Lokastaðan:

1. Björgvin     7
2. Magnús      6
3. Páll Leó      4
4. Ingimundur 3
5. Þorsteinn   0

Í ljósi ofangreinds fer nú að draga úr skákæfingum þannig að menn geti sinnt vorverkum á bújörðum sínum eins og vera ber.  Að sjálfsögðu verður tilkynnt á heimasíðu SSON þegar meiriháttar skákviðburðir eru á dagskrá en þeir eru nokkrir áður en skáksettum verður pakkað niður fram að hausti.

Heimasíða SSON

Hraðskákmót Víkings fer fram í kvöld

Hraðskákmót Víkings verður haldið 18. apríl (fimmtudagur) kl 20.00 í Víkinni.  Tefldar verða 11. umferðir með 5. mínútna umhugsunartíma.  Allir skákmenn velkomnir og þátttaka er ókeypis.  Boðið verður upp á léttar veitingar.  

Víkingaklúbburinn er núna að enda vetrarstarf sitt, en klúbburinn skrifaði sig inn í skáksöguna í vetur þegar liðið var Íslandsmeistari í 1. deild.  Starfið hefur gengið vel í vetur, en mánaðarlegar æfingar hafa verið í skák og Víkingaskák annan hvern miðvikudag í vetur.  Einnig voru vikulegar barnaskákæfingar í Víkinni á miðvikudögum frá 17.00-18.30.  Síðasti viðburður vetrarins er liðakeppni í Víkingaskák miðvikudaginn 15. maí.

Dagskrá fram á vor:

18. apríl (fimmtudagur). Hraðskákmót Víkings. Víkin kl 20.00

1. maí. frí (heimamót í Víkingaskák)

15. maí. Ìslandsmeistaramótið í Víkingaskák (liðakeppni). Víkin kl 20.00

Sumarfrí 

Pistill: Gríðarlega góð heimsókn á Skagaströnd

Gunnar Björnsson, forseti Skáksambands Íslands, og Stefán Bergsson, framkvæmdastjóri Skákakademíunnar eru nú í heimsókn á Norðvesturlandi.  Gunnar hefur skrifað stuttan pistil um fyrstu tvo daga heimsóknarinnar sem er samstarfsverkefni Skáksambandsins, Skákakademíunnar og Skákskóla Íslands.

---------------------------

Í gær lögðum við af stað frá Reykjavíkurflugvelli og flugum í átta manna vél frá Eyjaflugi, sem styrkir á myndarlegan hátt við heimsóknina, til Sauðárkróks. Með í för voru ríflega 100 kg. af farangri, töfl, kennsluefni o.þ.h. Eftir 45 mínútna flug lentum við á flugvellinum á Króknum þar sem okkar beið stór bílaleigubíll frá Hertz bílaleigu sem einnig styrkir myndarlega við heimsókn okkar. Við gistum á Hótel Tindastóli þar sem vel fer um okkur.

Tilgangur heimsóknarinnar er að kynna skák fyrir nemendum, hitta forsvarsmenn bæjarfélaga og finna út leiðir til að útbreiða skákina í viðkomandi sveitarfélögum. Hannes Hlífar Stefánsson, stórmeistari og kennari við Skákskóla Íslands, kemur til liðs við okkur á morgun.

Í gær fórum við í heimsókn á skákæfingu hjá Skákfélagi Sauðárkróks. Æfingarnar þar eru afslappaðar. Ekki er sett upp formlegt skákmót heldur geta menn mætt og teflt. Fyrir utan okkur Stefán voru átta skákmenn mættir. Þar á meðal var Haraldur Hermannsson, sem verður níræður um helgina þegar Skákþing Norðlendinga fer fram á Króknum. Haraldur er grjótharður skákmaður og gerði sér lítið fyrir og lagði Stefán að velli í fórnarskák! Norðurlandsmótið er jafnframt afmælismót Haraldar.

Nú eru 20 skákmenn skráðir til leiks á Skákþingi Norðlendinga og þar á meðal eru Hannes Hlífar Stefánsson, Rúnar Sigurpálsson, Þorvarður F. Ólafsson, Áskell Örn Kárason, Stefán Bergsson og Sverrir Örn Björnsson. Fleiri skákmenn eiga eftir að bætast í hópinn á næstum dögum. Áhugasömum um þátttöku er bent á heimasíðu Skákfélags Sauðárkróks.

Í morgun vöknuðum við félagarnir við hvíta jörð hér á Króknum. Haldið var til Skagastrandar og stefnan tekin á Höfðaskóla. Þar mættum þar Hildi Ingólfsdóttur, skólastjóra. Kennsla eða eiginlega kynning á skákinni hófst kl. 9, þar sem Stefán kynnti skáklistina fyrir öllum nemendum skólans en nemendum var skipt í fjóra mismunandi aldurshópa. Tókst kennslan afar vel og nemendur ákaflega áhugasamir og móttækilegir. Nokkur nýyrði komu fram og kallaði ein stúlkan hrókinn, „pelíkanann", og önnur kallaði biskupinn, „pabba hans Góa"!

Að lokinni kennslu var haldið í Kántrýbæ þar sem okkur var boðið í mat. Þar gáfum við taflsett en einnig var tafl gefið á kennarastofuna og í félagsmiðstöðina. Stefán vígði taflið þegar hann tefldi við Magnús Sólberg, einn nemenda skólans, sem sýndi mikinn skákskilning. Skákinni lauk með jafntefli.

Við Stefán tókum svo fund með oddvitum bæjarfélagsins, bæjarstjóra og skólastjóra. Þar  var farið yfir hvernig best væri að fylgja eftir heimsókninni en á því er mikill áhugi innan sveitarfélagsins að auka þar skákáhuga og hefja reglubundna skákkennslu í héraðinu.

Á morgun höldum við Stefán til Blönduóss, þar sem Skáksambandið var stofnað árið 1925. Þar verður farið yfir skákina með nemendum Blönduskóla, sundlaugarsett í Blönduóslaug afhent auk fundar með bæjarstjóra. Um kvöldið tökum við þátt í móti á Króknum til heiðurs Haraldi.

Myndaalbúm (GB)

Gunnar Björnsson

Spurningakeppni skákfélaga verður á Skákmóti Árnamessu

Í skákhléi á Skákmóti Árnamessu næsta laugardag munu spurningalið skákfélaganna keppa um þennan veglega verðlaunagrip.

Hvert spurningalið verður skipað þremur krökkum á grunnskólaaldri. Um helmingur spurninga tengist skák en landafræði, íþróttir og bókmenntir eru meðal annarra flokka sem spurt er um.

Skákfélögin eru hvött til að mynda spurningalið og freista þess að vinna verðlaunagripinn sem sigurfélagið fær til eignar.

Skráning á Skákmót Árnamessu er á www.skak.is. Skráningin hefur farið hægt af stað en þar sem reiknað er með um 50 krökkum í rútu frá Reykjavík er öruggast fyrir þá sem ætla að taka þátt í Árnamessu að skrá sig sem fyrst.

Jakob Sævar hérðasmeistari HSÞ

Jakob Sævar Sigurðsson vann sigur á héraðsmóti HSÞ í skák sem fram fór á Húsavík sl. laugardagskvöld. Smári bróðir hans veitti Jakobi harða keppni og háðu þeir hraðskákeinvígi um titilinn því þeir komu jafnir í mark á mótinu og gerðu jafntefli sín á milli. Jakob vann báðar skákirnar og mótið um leið. Smári varð í öðru sæti og Ármann Olgeirsson varð í þriðja sæti. Tímamörk voru 10 mín á mann +5 sek á leik.

Lokastaðan:

1.  Jakob Sævar Sigurðsson       6 af 7 (+2)
2.  Smári Sigurðsson                 6
3.  Hlynur Snær Viðarsson         5
4.  Ármann Olgeirsson               4,5
5.  Sigurbjörn Ásmundsson         3
6.  Hermann Aðalsteinsson         2,5
7.  Bjarni Jón Kristjánsson          1
8.  Jón Aðalsteinn Hermannsson  0

Hlynur Snær varð hærri að vinningum en Ármann en héraðsmótið fyrir 16 ára og yngri fór fram fyrr í vetur og þar sem þetta var fullorðinsflokkur fékk Hlynur ekki verðlaun í þessu móti.

Heimasíða Goðans Máta

Stigamót Hellis fer fram 24.-26. apríl

Stigamót Taflfélagsins Hellis verður haldið í ellefta sinn sinn dagana 24.-26. apríl. Fyrirkomulag mótsins hefur verið mismunandi í gegnum tíðina en að þessu sinni er mótið haldið í kringum sumardaginn fyrsta þannig að keppendur munu eiga frí helgina á eftir.

Góð verðlaun eru í boði á mótinu og mótið er opið öllum. Teflt verður í húsnæði Skáksambands Íslands í Faxafeni 12. Skráning á mótið er á heimasíðu Hellis: http://www.hellir.blog.is. Upplýsingar um þegar skráða keppendur má finna hér.

Þátttökugjöld eru kr. 3.000 fyrir fullorðna og 2.000 kr. fyrir 15 ára og yngri og rennur óskipt í verðlaunasjóð mótsins.  

Núverandi Stigameistari Hellis er Davíð Kjartansson.

Umferðatafla:

• 1.-4. umferð, miðvikudaginn 24. apríl (19:30-23:30)
• 5. umferð, fimmtudaginn 25. apríl (11-15)
• 6. umferð, fimmtudaginn 25. apríl (17-21)
• 7. umferð, föstudaginn 26. apríl (19:30-23:30)

Verðlaun:

• 1. 50% af þátttökugjöldum
• 2. 30% af þátttökugjöldum
• 3. 20% af þátttökugjöldum

Skráning: 

• Vefsíða: http://www.hellir.blog.is
• Sími: 866 0116 (Vigfús eða símsvari)

Tímamörk:

• 1.-4. umferð: 20 mínútur + 5 sekúndur á leik
• 5.-7. umferð: 1½ klst. + 30 sekúndur á leik

Skákmót Vals haldið á þriðjudag

Skákmót Vals verður endurvakið í Lollastúku þriðjudaginn 23. apríl nk. og hefst kl. 18.00  Keppt verður um Hrókinn en það er gripur sem kom í leitirnar vegna starfa minjanefndar félagsins. Síðast áletrun á Hrókinn er nafn Björns Theodórssonar árið 1961.

Teflt verður eftir svissneska kerfinu, ellefu umferðir, tímamörk 3 2 (viðbótartími). Mótstjóri er Gunnar Björnsson forseti S.Í. Landsfrægir skákmenn hafa nú þegar tilkynnt þátttöku sína. Töfl og klukkur á staðnum.

Væntanlegir þátttakendur staðfesti þátttöku sína á [e-mail] fyrir kl.17 mánudaginn 22.apríl. Athugið að mótið er eingöngu opið stuðningsmönnum Vals.

Skákmót Árnamessu - Skráning hér á Skák.is

Hún byrjar rólega skráningin á Árnamessu 2013 en skráninguna er að finna hér á Skák.is. Miðað við viðbrögð á Íslandsmóti barnaskólasveita um síðustu helgi mætti ætla að okkar ungu og efnilegu skákmeistarar á barnaskólastigi ætli að fjölmenna á mótið sem hefst eftir þrjá daga, laugardaginn 20. apríl.

-          Rútan leggur af stað frá BSÍ (neðan við Landsspítala) kl. 9:30. Fararstjórar verða til staðar, þær Þóra og Dóra. Heimferð áætluð kl. 16.45 frá Stykkishólmi

-          Rútan kemur við á N1 í Ártúni kl. 9.40 og tekur þar upp þátttakendur

-          Foreldrar geta komið með og eru þeir sem áhuga hafa á því beðnir um að hafa samband við Helga í síma 664 8320

-          Boðið verður upp á pylsur og drykk við komuna í Stykkishólm

-          Skákmót Árnamessu hefst kl. 13:00

-          Skákstjórar verða Páll Sigurðsson og Helgi Árnason

-          Í skákhléi verður boðið upp á veitingar frá Góu, Nettó, Rolf Johansen og Bónus

-          Í skákhléi verður keppt í spurningkeppni skákfélaga um glæsilegan eignarbikar

-          Verðlaun og happadrættisvinningar verða 30 - 40 talsins. Gjafabréf frá ELKÓ, Laugarásbíó, PÍZZAN, Ljósmyndavörum, Sæferðum og ekki síðast en ekki síst myndarleg páskaegg frá GÓU (alveg satt)

-          Eignabikarar fyrir sigurvegara í eldri flokk, yngri flokk og flokki Snæfellinga

-          Verð fyrir þá sem koma með rútu er 2000 kr. Aðrir greiða 500 kr. Boðsgestir eru skákmeistarar Álfhólsskóla, Rimaskóla og Hraunvallaskóla sem urðu í 1. - 3. sæti á Íslandsmóti barnaskólasveita 2013

Áhugasamir skákkrakkar eru hvattir til að skrá sig sem fyrst á www.skak.is og missa ekki af einu skákmóti með öllu.

Skákþing Norðlendinga - afmælismót Haralds Hermannsonar - Hannes Hlífar meðal skráðra keppenda

Skákþing Norðlendinga verður haldið á Sauðárkróki helgina 19-21. apríl n.k.  Samkvæmt venju verða tefldar 7 umferðir. Fjórar atskákir með 25 mín. umhugsunartíma á föstudagskvöldi. Tvær umferðir með umhugsunartímanum 90 mín + 30 sek á leik og lokaumferðin á sunnudegi með sama umhugsunartíma. Á lokinni 7. umferð á sunnudeginum verður  haldið Hraðskákmót Norðlendinga. Kappskákirnar verða reiknaðar til alþjóðlegra stiga.

Allir skákmenn eru velkomnir á Skákþing Norðlendinga, en einungis þeir sem eru með lögheimili á Norðurlandi geta öðlast nafnbótina Skákmeistari Norðlendinga. Heildar verðlaunafé á mótinu verður a.m.k. 160.000 krónur, en fjöldi þátttakenda hefur áhrif á verðlaunafé. Fyrstu verðlaun eru áætluð 65.000 krónur, önnur verðlaun 35.000 og þriðju verðlaun 25.000. Einnig verða veitt peningaverðlaun fyrir þá sem hafa undir 2000 íslensk Elo stig 20.000 krónur og þá sem hafa undir 1800 íslensk Elo Stig 20.000 krónur. Keppendur geta aðeins unnið til aukaverðlauna í einum flokki.  

Hótel Tindastóll, Gistiheimilið Mikligarður og Gistiheimilið Sólarborg gefa þátttakendum í mótinu 10% afslátt af gistingu. Til viðmiðunar er verð fyrir gistingu með morgunverði um 16.000 krónur á mann í gistiheimilunum og er þá miðað við tvo í herbergi í tvær nætur.  Nánari upplýsingar um tilboðið verða sendar í tölvupósti til áhugasamra.

Mótsgjöld eru kr. 2000 en ekkert kostar að taka þátt í hraðskákmótinu. Innifalið í verði er kaffi og meðlæti á stundum.

Skráning fer fram í netfanginu: [e-mail] og er þar hægt að fá nánari upplýsingar um framkvæmd mótsins.

Teflt verður í Safnahúsi Skagfirðinga. Nánari upplýsingar um tímasetningu umferða, þátttakendur o.fl. verða birtar fljótlega hér á heimasíðunni.

Mótsstjóri verður Gunnar Björnsson forseti Skáksambands Íslands.

Nánari upplýsingar um mótsfyrirkomulag o.fl. má finna á heimasíðu Skákfélags Sauðárkróks.

Upplýsingar um þegar skráða keppendur má finna á Chess-Results en meðal þegar skráðra keppenda er stórmeistarinn Hannes Hlífar Stefánsson.