Spennandi spurningakeppni á Skákmóti Árnamessu

Í skákhléi á fjölmennu Skákmóti Árnamessu fór fram spurningakeppni skákfélaga og keppt um fallegan verðlaunagrip sem gefinn var til eignar.

Það voru sex lið sem tóku þátt í spurningakeppninni og varð keppnin mjög jöfn og spennandi frá upphafi til enda. Keppt var í tveimur riðlum og í hverju liði voru þrír liðsmenn.

Í fyrri riðlinum sigraði Fjölnir með 6 stig eftir hnífjafna keppni við Snæfellsbæ sem hlaut 5 stig. Haukarnir ráku lestina með 3 stig. Í seinni riðlinum reyndist Hellisliðið sterkast með Dawid Kolka í fararbroddi og fékk 7 stig, TR hlaut 5 stig og heimamenn í Stykkishólmi 2 stig. Til úrslita í spurningakeppninni kepptu lið Fjölnis og Hellis. Þar æstust leikar ennþá frekar og úrslit réðust þegar Fjölnismenn náðu að svara rétt til með Íslandsmeistarann í skák Þröst Þórhallsson eftir að Hellisliðið hafði giskað á Braga Þorfinnsson. Fjölnir vann því úrslitaleikinn 9 - 8 . Í sigurliði Fjölnis voru þeir Oliver Aron Jóhannesson, Mikolaj Oskar Chojecki og Jóhann Arnar Finnsson. Helmingur spurninganna snerist um skák en einnig var spurt úr landafræði, íþróttum , bókmenntum  og erlendum þjóðarleiðtogum.

Hilmir Freyr Kjördæmismeistari Vestfjarða.

Kjördæmismót Vestfjarða fór fram núna um helgina undir stjórn Ingibjargar Eddu Birgisdóttur og Henriks Danielsen stórmeistara. Þar sigruðu Hilmir Freyr Heimisson með fullt hús stiga og Halldór Jökull Ólafsson var í 2. sæti. Eftir lokaumferðina voru Halldór Jökull og Kristján Kári Ágústsson jafnir í 2. - 3. sæti og þurftu því að tefla úrslitaskák um sæti á Landsmótinu. Þar fór svo að Halldór Jökull lagði Kristján Kára. Geysilega góð þátttaka var í yngri flokki.

Það eru svo þau Guðrún Ýr Grétarsdóttir og Róbert Orri Leifsson keppa fyrir hönd eldri flokks á Landsmótinu.

Myndaalbúm (ÁHS)

KR-kapp: Vignir Vatnar vann aftur glæstan sigur

Óheft ímyndunarafl og djúpur sköpunarkraftur einkennir jafnan taflmennskuna á mánudagsmótum KR í Frostaskjólinu þar sem fjölskrúðugur hópur öflugra skákkappa af  höfuðborgarsvæðinu mætist til keppni allan ársins hring. Eins konar "Skálkaskjól" þar sem mætast stálin stinn og er jakki er ekki frakki - nema síður sé.  Þar láta menn ekki gott mát sér úr greipum ganga, né betri stöðu forgörðum fara, né vesælt peð úr hendi sleppa - nema baneitrað sé.  Og þar er enginn engin er annars bróðir í leik  - nema samvaxnir Síams tvíburar séu - sem ekki er til að dreifa.

Í raun má segja að mótin jafngildi tveimur hraðmótum í TR eða Helli því umferðirnar eru þrettán en ekki sjö eins og þar tíðkast.  Því er ekki úr vegi að birta hér til gamans og tilbreytingar stöðuna í hálfleik að loknum sjö umferðum til samanburðar. Eins og sjá má voru sumir í blússandi stuði í byrjun móts meðan aðrir máttu muna sinn fífil fegri. En í seinni hálfleik náðu ýmsir valinkunnir kappar vopnum sínum á ný, en þó ekki allir, sem sýnir hvað dagsformið hefur mikið að segja og væntanlega úthaldið líka.    

 

 

Nýr kafli var skrifaður í sögu kappmótanna í KR-heimilinu í þessum mánuði þegar hinn ungi sveinn Vignir Vatnar Stefánsson, aðeins 10 ára að aldri, birtist þar til tafls ásamt föður sínum og fylgdarmanni Stefáni Péturssyni skipstjóra fyrir hálfum mánuði. Sá stutti gerði sér lítið fyrir og vann mótið með 10.5 vinningi af þrettán mögulegum. 

En þá er ekki öll sagan sögð því sl. mánudag birtust þeir feðgar aftur og ekki þurfti sökum að spyrja eða leikslokum - nú sigraði "ungstirnið undraverða" mótið með fáheyrðum yfirburðum - hlaut 12 vinninga af þrettán.  Aðeins hinum aldna meistara Gunnari Gunnarssyni tókst að halda velli gegn hinum unga og upprennandi snillingi. Voru þó flestir sigursælustu skákmenn klúbbsins meðal þátttakenda hoknir af reynslu. Svo sem Gunnar Birgisson, Ingimar Jónsson, Birgir Berndsen, Guðfinnur Kjartansson og Stefán Þormar Guðmundsson svo nokkrir séu nefndir auk formannsins og stórmeistarabanans Kristjáns Stefánssonar, sem er hverjum öðrum skeinuhættari sem hann lætur minna yfir sér.  

Nú er sveinninn ungi floginn yfir pollinn tvíefldur af sjálfstrausti til þátttöku í heimsmóti skákmanna undir 2000 stigum sem hefst í dag í borginni IASI í Rúmeníu nær Svartahafi.  Fylgja honum góðar óskir um gott gengi og ómælda keppnisreynslu, 

Nánari úrslit má sjá á meðf. mótstöflu og á www.kr.is /skák.

 

 

Það styttist óðum í næsta Kappmót í KR sem haldið verður í kvöld og hefst kl. 19.30 réttstundis að staðartíma. 

Vormót Vinjar í dag: Allir velkomnir

Skákfélag Vinjar býður skákáhugamönnum á öllum aldri á Vormót Vinjar, mánudaginn 22. apríl klukkan 13. Tefldar verða 6 umferðir með 7 mínútna umhugsunartíma, og í leikhléi verður boðið upp á kaffi og meðlæti.

Skákfélag Vinjar stendur fyrir vikulegum æfingum á mánudögum klukkan 13 og reglulega eru haldin stórmót. Þá náði A-sveit félagsins glæsilegum árangri í 3. deild Íslandsmóts skákfélaga, og mun keppa í 2. deild næsta vetur.

Í júní verður því fagnað að 10 ár eru liðin síðan reglulegt skákstarf hófst í Vin. Skákfélagið Hrókurinn stóð um árabil fyrir skáklífi í Vin, og studdi við bakið á Skákfélagi Vinjar sem nú er eitt af blómlegustu taflfélögum landsins. Skákakademían hefur í vetur lagt Skákfélagi Vinjar lið, og er Róbert Lagerman aðalþjálfari hinna harðsnúnu Vinjarpilta.

Allir eru velkomnir á Vormót Vinjar á mánudaginn. Veitt verða ýmis verðlaun. Þátttaka er ókeypis, eins og jafnan á viðburðum Skákfélags Vinjar.

NM stúlkur 2013 - Nansý Norðurlandameistari og Jóhanna með silfurverðlaun

Úrslit dagsins

 

A-flokkur

Jóhanna Björg Jóhannsdóttir - Hrund Hauksdóttir ½-½

 

B-flokkur

Sóley Lind Pálsdóttir - Alina Legkiy, Svíþjóð ½-½

Veronika Steinunn Magnúsdóttir - Mette Ellegaard  Christensen, Danmörku 1-0

 

C-flokkur

Nansý Davíðsdóttir - Sara Naess, Noregi ½-½

Kajsa Nilsson, Svíþjóð - Svandís Rós Ríkharðsdóttir 1-0

 

Við fengum 3,5 vinninga af 5 mögulegum í þessari umferð.

 

Svo óheppilega vildi til að þær stöllur í A-flokki lentu saman í dag.  Ljóst var að Jóhanna yrði helst að vinna og treysta á að  Jessica ynni ekki.  Jóhanna fékk ágætis stöðu gegn Hrund en missteig sig á krítísku augnabliki og Hrund snéri á hana og fékk þá unna stöðu.  Hrund yfirsást öflugur varnarleikur hjá Jóhönnu þar sem hún fórnaði hrók fyrir þráskák.  Nú var eina vonin að Jessica tapaði því ljóst var að Jóhanna myndi tapa í stigaútreikningi gegn henni en vinna allar hinar.  Jessica gerði síðan jafntefli  og voru þá Jóhanna, Jessica (Svíþjóð) og Erle (Noregur) efstar og jafnar með 3,5 vinninga af 5 mögulegum.  Jessica varð Norðurlandameistari á stigum, Jóhanna endaði í öðru sæti og Erle varð þriðja.  Hrund endaði í 5.-6. sæti með 2 vinninga.

 

Í B-flokki gerði Sóley jafntefli við Alinu Legkiy frá Svíþjóð.  Sóley stjórnaði ferðinni í skákinni allan tíman en náði ekki að nýta það til sigurs og jafntefli varð niðurstaðan.  Veronika vann hina dönsku Mette í góðri skák, þar sem sú danska varð að játa sig sigraða þrátt fyrir hetjulega vörn.  Veronika hlaut 2,5 vinninga í þessum flokki og Sóley 2 vinninga.  Veronika endaði í 6.-7. sæti og Sóley í 8.-9. sæti. 

 

Í C-flokki gerði Nansý jafntefli við Söru Naess sem dugði henni til að verða Norðurlandameistari eins og áður hefur komið fram.  Skákin var skemmtileg en Nansý hefði mátt tefla skákina lengur en það er mjög skiljanlegt að taka jafntefli með þandar taugar í lokaumferð þegar góðar líkur eru á því að jafnteflið dugi manni til sigurs í mótinu.  Svandís var lánlaus í dag og tapaði sinni skák gegn Kajsu frá Svíþjóð þrátt fyrir að tefla skákina ágætlega allan tímann.

 

Í heildina var árangurinn í mótinu ágætur.  Ég er bara orðinn svo góðu vanur á mótum með stelpunum að ég vill alltaf meira.  Þegar það er haft í huga að Ísland vann fyrsta Norðurlandameistaratitil stúlkna fyrir þremur árum (Hallgerður Helga) þá er greinilegt að kvennaskák á Íslandi er á uppleið.  Á síðustu þremur árum hefur Ísland unnið fjóra Norðurlandameistaratitla af níu mögulegum.  Árangur Nansýar stendur upp úr á mótinu og er með ólíkindum að svona ung stelpa sé með svona mikinn stöðuskilning.  Jóhanna tefldi einnig afar vel og var sérstaklega farsæl í byrjanavali sem kom svo sem ekki á óvart því hún hefur lagt mikið á sig upp á síðkastið í stúderingum.  Svona vinna skilar sér alltaf að lokum.  Aðrar áttu góða spretti á mótinu en náðu ekki  að halda dampi allan tímann.  Það verður þó að hafa það í huga að svona mót er afar erfitt.  Fimm kappskákir á þremur dögum þannig að lítill tími gefst til að anda á milli sem gerir það að verkum að mjög erfitt er að vinna sig í gegnum mótlæti ef maður lendir í því.  Svona mót eru samt afar góður skóli fyrir stelpurnar og sýnir þeim að það er nauðsynlegt að vera með nokkuð breiða byrjanaþekkingu sem nýtist sérstaklega vel þegar takmarkaður tími er til undirbúnings fyrir hverja umferð.

 

Næsta Norðurlandamót stúlkna verður haldið á Íslandi en ég hlakka mikið til þess því þá eigum við rétt á fleiri keppendum en fjöldi skákstelpna hefur aukist mikið á síðustu árum.  Að lokum vil ég þakka stelpunum kærlega fyrir afar skemmtilega ferð því leitun er að öðrum eins snillingum til að ferðast með enda eru þær alltaf jákvæðar og til í slaginn.

 

 

 

Davíð Ólafsson

Stefán Bergsson fór hamförum á Hraðskákmóti Norðlendinga

Stefán Bergsson fór mikinn í dag. Eins og áður hefur komið fram vann hann Hannes Hlífar Stefánsson í lokaumferð Skákþings Norðlendinga í dag. Í dag fór svo Hraðskákmót Norðlendinga fram. Stefán fór hreinilega hamförum og lagði alla andstæðinga sína 12 að tölu! Rúnar Sigurpálsson varða annar og Gunnar Björnsson varð þriðji.

Lokastöðu mótsins má finna á Chess-Results.

Skákþáttur Morgunblaðsins: Besti skákmaður allra tíma

Afrek Magnúsar Carlsens í áskorendamótinu, nýslegið stigamet og aldeilis stórkostleg framganga á skáksviðinu undanfarin misseri kallar á samanburð við annan risa skáksögunnar, Garrí Kasparov, sem í dag, 13. apríl, fagnar 50 ára afmæli sínu. Kasparov komst hæst í 2.851 elo-stig en met Magnúsar stendur í 2.872 elo. Lengra nær samanburðurinn ekki í huga margra.

Þegar Kasparov hætti opinberlega að tefla eftir sigur á Linares-mótinu árið 2005 hafði hann verið stigahæsti maður heims í 20 ár, teflt átta heimsmeistaraeinvígi, átti að baki óslitna sigurgöngu á alþjóðlegum mótum og skildi eftir sig frábært verk á sviði skákbókmennta.

Afskipti af framkvæmdahlið skákarinnar eru hins vegar umdeild; á pólitíska sviðinu rússneska hefur fullvissa hans um eigið ágæti ekki náð yfir til háttvirtra kjósenda og tveir hjónaskilnaðir gætu bent til þess að hann sé ekki mjög auðveldur í sambúð; fyrsta eiginkonan var „sett út á stétt" í miðju heimsmeistaraeinvígi í London haustið 1993. Hvað varðar snilldarverk hans við skákborðið þá blikna bestu skákir Magnúsar Carlsens í samburði við snilldarverk Kasparovs. Núverandi heimsmeistari, Anand, var Kasparov aldrei mikil hindrun, staðan í viðureignum þeirra er 29:16.

Norðmaðurinn á þó vinninginn á einu sviði; líkt og Fischer teflir hann allar skákir í botn og hann er líka heiðarlegri við skákborðið. Á vettvangi einvígja er hann auðvitað óskrifað blað og hann verður ekki „gerður upp" með sama hætti og hinn fimmtugi Kasparov, sem greinarhöfundur telur þrátt fyrir allt mesta skákmann allra tíma. Ef bera á fram mögnuðustu skák Kasparovs stendur valið á milli skáka nr. 16 í HM-einvígjum nr. 2 og 3. árin 1985 og '86 og skákar sem hann tefldi undir lok aldarinnar. Kannski kvaddi „klassíska skákin" 20. öldina með þessari viðureign:

Wijk aan Zee 1999:

Garrí Kasparov - Veselin Topalov

Pirc-vörn

1. e4 d6 2. d4 Rf6 3. Rc3 g6 4. Be3 Bg7 5. Dd2 c6 6. f3 b5 7. Rge2 Rbd7 8. Bh6 Bxh6 9. Dxh6 Bb7 10. a3 e5 11. 0-0-0 De7 12. Kb1 a6 13. Rc1 0-0-0 14. Rb3 exd4 15. Hxd4 c5 16. Hd1 Rb6 17. g3 Kb8 18. Ra5 Ba8 19. Bh3 d5 20. Df4+ Ka7 21. Hhe1

Ólíkt því sem menn áttu að venjast hafði Kasparov í raun ekki margt fram að færa í byrjun þessarar skákar. Staðan má heita í jafnvægi.

21.... d4 22. Rd5 Rbxd5 23. exd5 Dd6 24. Hxd4!

Fyrsta sprengjan fellur. Topalov sá atburðarásina fyrir, gat valið 24.... Kb6! sem heldur öllu í horfinu og sennilega gott betur en vildi láta reyna á réttmæti fórnarinnar.

24....cxd4

25. He7+!

Byggir á hugmyndinni 25.... Dxe7 26. Db6+ Bb7 27. Rc6+ Ka8 28. Da7 mát.

25.... Kb6 26. Dxd4 Kxa5 27. b4+ Ka4 28. Dc3! Dxd5 29. Ha7! Bb7

Þvingað þar sem 29.... Hd6 er svarað með 30. Kb1 sem hótar 31. Db3+ og mátar.

30. Hxb7 Dc4 31. Dxf6 Kxa3 32. Dxa6 Kxb4 33. c3+! Kxc3 34. Da1+ Kd2 35. Db2+ Kd1 36. Bf1! Hd2

37. Hd7!!

„Hann er skrímsli með þúsund augu og þau sjá öll." - Tony Miles. Kasparov mun að eigin sögn hafa séð þessa stöðu og þennan leik fyrir er hann lék 24. Hxd4.

37.... Hxd7 38. Bxc4 bxc4 39. Dxh8 Hd3 40. Da8 c3 41. Da4 Ke1 42. f4 f5 43. Kc1 Hd2 44. Da7

- og svartur gafst upp.

Helgi Ólafsson [e-mail]

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Sunnudagsmogganum, 7. apríl 2013.

Skákþættir Morgunblaðsins

[Event "Hoogovens A Tournament"] [Site "Wijk aan Zee NED"] [Date "1999.01.20"] [EventDate "?"] [Round "4"] [Result "1-0"] [White "Garry Kasparov"] [Black "Veselin Topalov"] [ECO "B06"] [WhiteElo "2812"] [BlackElo "2700"] [PlyCount "87"] 1. e4 d6 2. d4 Nf6 3. Nc3 g6 4. Be3 Bg7 5. Qd2 c6 6. f3 b5 7. Nge2 Nbd7 8. Bh6 Bxh6 9. Qxh6 Bb7 10. a3 e5 11. O-O-O Qe7 12. Kb1 a6 13. Nc1 O-O-O 14. Nb3 exd4 15. Rxd4 c5 16. Rd1 Nb6 17. g3 Kb8 18. Na5 Ba8 19. Bh3 d5 20. Qf4+ Ka7 21. Rhe1 d4 22. Nd5 Nbxd5 23. exd5 Qd6 24. Rxd4 cxd4 25. Re7+ Kb6 26. Qxd4+ Kxa5 27. b4+ Ka4 28. Qc3 Qxd5 29. Ra7 Bb7 30. Rxb7 Qc4 31. Qxf6 Kxa3 32. Qxa6+ Kxb4 33. c3+ Kxc3 34. Qa1+ Kd2 35. Qb2+ Kd1 36. Bf1 Rd2 37. Rd7 Rxd7 38. Bxc4 bxc4 39. Qxh8 Rd3 40. Qa8 c3 41. Qa4+ Ke1 42. f4 f5 43. Kc1 Rd2 44. Qa7 1-0

Stefán Norðurlandsmeistari eftir sigur á Hannesi Hlífari

Stefán Bergsson (2139) tryggði sér Norðurlandsmeistaratitilinn eftir mjög góðan sigur á stórmeistaranum Hannesi Hlífari Stefánsson (2513) í sjöundu og síðustu umferð Skákþings Norðlendinga sem fram fór á Sauðárkróki um helgina. Hannes sigraði engu að síður á mótinu. Þorvarður F. Ólafsson (2237) varð annar með 5,5 vinning en Stefán og Sverrir Örn Björnsson (2135) urðu í 3.-4. sæti með 5 vinninga.

Vigfús Ó. Vigfússon fékk verðlaun skákmanna með minna en 2000 skákstig en Jón Arnljótsson, Sigurður Ægisson og Jakob Sævar Sigurðsson urðu eftir skákmanna með minna en 1800 skákstig.

Það var Skákfélag Sauðárkróks sem hélt mótið og bar Unnar Rafn Ingvarsson, formaður félagsins, hitann og þungann af mótshaldinu. Helstu styrktaraðilar þess voru Kaupfélag Skagafjarðar, FISK Seafood, Sparisjóður Sauðárkróks, Skáksamband Íslands og Sveitarfélagið Skagafjörður. 

Hertz bílaleiga og Eyja-flug studdu við heimsókn Hannesar Hlífars, Stefáns og Gunnar Björnssonar, skákstjóra sem komu á vegum Skáksambandsins, Skákskólans og Skákakademíunnar og heimsóttu meðal annars fjóra skóla á Norðvesturlandi.

Úrslit sjöundu umferðar má finna hér.

Lokastöðu mótsins má nálgast hér.

• Heimasíða Skákfélags Sauðárkróks
• Chess-Results
• Myndaalbúm (GB)

NM stúlkur 2013 - Nansý Norðurlandameistari

Nansý Davíðsdóttir var rétt í þessu að tryggja sér Norðurlandameistaratitilinn í C-flokki.  Nansý gerði jafntefli við Söru Naess frá Noregi í síðustu umferð og endaði jöfn Lisu Fredholm að vinningum.  Nansý vinnur hins vegar á stigum og er því Norðurlandameistari Stúlkna 2013 í yngsta flokki.  Til hamingju Nansý.

 Spennan í A-flokki er gríðarleg.  Jóhanna og Hrund gerðu jafntefli og mun það því ráðast á stigaútreikningi sem ræðst af lokum síðustu tveggja skákanna í flokknum.  Jóhanna nagar nú neglur og bíður.

NM Stúlkur 2013 - Pistill fjórðu umferðar

Úrslit morgunsins:

 

A-flokkur

Jóhanna Björg Jóhannsdóttir - Caroline Lindberg Hansen, Svíþjóð 1-0

Hrund Hauksdóttir - Kaberi Mitra, Svíþjóð 1-0

 

B-flokkur

Monika Machlik, Noregi  - Veronika Steinunn Magnúsdóttir  1-0

Mette Ellegaard  Christensen, Danmörku - Sóley Lind Pálsdóttir 0-1

 

C-flokkur

Nansý Davíðsdóttir - Regine Forsa, Noregi 1-0

Svandís Rós Ríkharðsdóttir - Saida Mamadova, Svíþjóð ½-½

 

Mun betri úrslit í dag, 4,5 vinningar af 6 mögulegum.

 

Í A-flokki vann Jóhanna Karólínu frá Svíþjóð mjög örugglega.  Sú sænska tapaði tíma í byrjuninni og það dugði Jóhönnu sem gjörsamlega yfirspilaði andstæðinginn og vann mjög fljótt.  Hrund tefldi langa og stranga skák gegn Kaberi frá Svíþjóð.  Hrund fékk betri stöðu eftir byrjunina en þurfti að gefa mann fyrir tvö peð en var áfram með betri stöðu og að tefla til vinnings.  Andstæðingurinn féll að lokum á tíma þegar við henn blasti erfitt endatafl með tveimur riddurum og peði gegn riddara og fjórum peðum Hrundar.  Verulega góð úrslit í A-flokki í dag.  Staðan í A-flokki er sú að Jóhanna og Jessica frá Svíþjóð eru efstar og jafnar með 3 vinninga.  Hrund hefur 1,5 vinning eftir sigur í morgun.  Svo óheppilega vill til að Jóhanna og Hrund mætast í síðustu umferð.

 

Í B-flokki tapaði Veronika fyrir Moniku öðrum norska tvíburanum í flokknum.  Veronika fékk fína stöðu úr byrjuninni en tefldi ónákvæmt og tapaði manni.  Þá fór hún að tefla fyrir alvöru, vann peð og var örugglega nánast búin að jafna taflið þegar hún lék af sér í tímahraki og tapaði.  Engu að síður ágætis skák hjá henni í dag.  Við Sóley ræddum það í gær að vonda skákin í mótinu væri búin og nú væri bara að ná inn góðu skákunum.  Sóley tefldi afar vel í dag og afgreiddi andstæðinginn snaggaralega í 20 leikjum.  Verulega góð skák hjá henni.  Staðan í flokknum er nú þannig að Freja frá Danmörku og Rina frá Svíþjóð eru efstar og jafnar með 3,5 vinninga.  Á eftir þeim koma norsku tvíburarnir með 3 vinninga.  Þær efstu mæta norsku tvíburunum í síðustu umferð þannig að ef tvíburarnir vinna báðir þá eru þær efstar og jafnar.  Veronika og Sóley geta rétt sinn hlut í flokknum með sigri í dag.

 

Í C-flokki hélt Nansý uppteknum hætti og vann Reginu frá Noregi örugglega.  Sigur eða jafntefli hjá henni í síðustu umferð tryggir henni Norðurlandameistaratitilinn.  Svandís tefldi langa og stranga skák gegn Saidu frá Svíþjóð.  Svandís var allan tíman að reyna að vinna en sú sænska varðist vel og náði að lokum þráskák með drottningu og peð á móti tveimur hrókum og peði.  Ágætis skák hjá Svandísi sem var afar nærri því að innbyrða sigur í morgun.  Staðan í flokknum er nú þannig að Nansý er ein efst með 3,5 vinninga.  Næstar koma Sara frá Noregi og Lisa frá Svíþjóð með 3 vinninga.  Nansý mætir Söru í síðustu umferð og dugir jafntefli til að sigra flokkinn.

 

Skákir Íslensku keppendanna (hófust klukkan 13:30):

 

A-flokkur

Jóhanna Björg Jóhannsdóttir - Hrund Hauksdóttir

 

B-flokkur

Sóley Lind Pálsdóttir - Alina Legkiy, Svíþjóð

Veronika Steinunn Magnúsdóttir - Mette Ellegaard  Christensen, Danmörku

 

C-flokkur

Nansý Davíðsdóttir - Sara Naess, Noregi

Kajsa Nilsson, Svíþjóð - Svandís Rós Ríkharðsdóttir

 

Skák Jóhönnu og Hrundar og skák Nansýar eru í beinni útsendingu.

 

Beinar útsendingar:

http://www.limhamnssk.se/live/ (flash)

http://www.limhamnssk.se/live/jslive.php 

 

Myndir:

http://www.flickr.com/photos/limhamnssk/sets/72157633191277159/

 

Úrslit og röðun:

A flokkur

B flokkur

C flokkur

 

Skákir (pgn):

Fyrsta umferð

Önnur umferð

Þriðja umferð

Fjórða umferð

 

Davíð Ólafsson