Hraðskákmót öðlinga fer fram á morgun

Hraðskákmót öðlinga fer fram á morgun 8. maí kl. 19.30 í félagsheimili T.R. að Faxafeni 12. Mótið er opið fyrir alla 40 ára og eldri (f. 1972 og síðar).Tefldar verða 7 umferðir með 7 mínútna umhugsunartíma.

Í lok mótsins fer fram verðlaunaafhending fyrir Hraðskákmótið sem og Skákmót öðlinga sem lauk s.l. miðvikudagskvöld. Þátttökugjald er kr. 500 og er í því innifalið kaffi og góðgæti. Skákmenn 40+ eru hvattir til að fjölmenna!

Vormót Skákakademíu Kópavogs og Skákskóla Íslands í Stúkunni á föstudag

Vormót Skákakademíu Kópavogs og Skákskóla Íslands fer fram næsta föstudag í Stúkunni á Kópavogsvelli og hefst kl 14.30. Tefldar verða sjö umferðir og er tímafyrirkomulagið 5 3 Bronstein. Með mótinu lýkur vorönn en undanfarin misseri hefur Helgi Ólafsson skólastjóri Skákskólans annast æfingar í Stúkunni fyrir unga skákmenn í Kópavogi.

Mótið fer fram allt í einum flokki en veitt verða glæsileg verðlaun fyrir efstu sætin meðal þeirra sem eru skákstig og fyrir þá sem stigalaus eru. Mótið er opið öllum þeim sem sótt hafa æfingar í Stúkunni eða hafa teflt fyrir grunnskóla Kópavogs í hinum ýmsu flokkakeppnum á þessu ári. 

EM: Bein útsending frá 3.umferð

Þá eru skákir þriðju umferðar á EM farnar af stað. Vopnabræðurnir Dagur og Guðmundur glíma við afar sterka stórmeistara í dag og því er rétt að íslenskir skákáhugamenn sendi þeim félögum góða strauma.

Hægt er að fylgjast með skákunum í beinni hér.

Félagarnir eru á borðum 37-72.

Fréttaritari skak.is getur ekki betur séð en að báðir drengirnir séu með ágætar stöður þegar rúmlega 2 klst. eru liðnar af baráttunni.

Ofurmótið í Noregi hefst í dag

Sterkasta skákmót í sögu Noregs (og mögulega Norðurlandanna) hefst í Stavangri í dag.

Þátttakendur eru 10 talsins:

- Magnus Carlsen (2868)

- Levon Aronian (2813)

- Veselin Topalov (2793)

- Vishy Anand (2783)

-  Hikaru Nakamura (2775)

- Peter Svidler (2769)

- Sergey Karjakin (2767)

- Teimour Radjabov (2745)

- Wang Hao (2743)

- Jon Ludvig Hammer (2608)

 Keppnisfyrirkomulagið er þannig að fyrst fer fram hraðskáksmót (4 min + 2 sek), allir við alla, og mun sigurvegarinn fá að velja sér stað í töfluröðinni og síðan koll af kolli.  Sjálft aðalskáksmótið hefst síðan á morgun, 8.maí.

Það er margt spennandi við þetta mót. Í fyrsta lagi að sjá hvernig Magnus Carlsen stendur sig á heimavelli og ekki síður að sjá áskorandann og heimsmeistarann takast á í mótinu. Í Noregi er mikil óánægja með að heimsmeistaraeinvígið fari fram í Chennai á Indlandi og því má búast við að andrúmsloftið verði lævi blandið.

Búlgarinn Veselin Topalov snýr nú aftur í alvöru elítumót en hann vann eftirtektarverðan sigur á Grand Prix móti í Zug á dögunum þar sem hann malaði B-elítu skákheimsins. Topalov á marga aðdáaendur og þeir munu eflaust fylgjast spenntir með framgangi hans. 

Vladimir Kramnik átti að vera meðal þátttakenda en hann dró sig út úr mótinu á dögunum og í hans stað kom Peter Svidler. Sá hefur afar gott skor á heimamanninn Carlsen og spennandi verður að sjá hvort að hann heldur uppteknum hætti. 

Uppfært: Beina útsendingu frá hraðskáksmótinu má nálgast hér.  Carlsen og Anand mættust í fyrstu umferð hraðskáksmótins og gerðu jafntefli í hundleiðinlegri skák!

Magnús er brjálaður!

Sú ákvörðun FIDE, alþjóða skáksambandsins, að skrifa undir samning við indverska framtaksmenn um skipulagningu heimsmeistaraeinvígisins milli Carlsens og Anand í Chennai í Indlandi, hefur vakið hörð viðbrögð víða. Forseti norska skáksambandins hefur fordæmt ákvörðunina í opnu bréfi til FIDE og nú stígur áskorandinn sjálfur fram og lýsir yfir miklum vonbrigðum sínum í fréttatilkynningu.

Sjá nánar hér.

Carlsen segist ekki skilja þessa einhliða ákvörðun FIDE enda hafi verið mikill áhugi fyrir því að bjóða í einvígishaldið víða um heim. Aðilar í Frakklandi hafi viljað bjóða 3,5 milljónir evra og óstaðfestar fregnir herma að önnur tilboð hafi verið í bígerð. 

Þrátt fyrir óánægjuna þá ætlar Carlsen ekki að "púlla Bobbý" á þetta heldur að bíta í skjaldarrendur og glíma við heimsmeistarann á heimavelli.

Sálfræðistríðið fyrir heimsmeistaraeinvígið er hafið!

 

Skákhátíð á Ströndum 21.-23. júní: Þrír stórmeistarar skráðir til leiks á Afmælismót Jóhanns Hjartarsonar

Skákhátíð á Ströndum verður haldin dagana 21. til 23. júní og sem fyrr verður boðið upp á fjölda skemmtilegra viðburða fyrir áhugamenn úr öllum áttum. Þetta er sjötta skákhátíðin á Ströndum, sem hefur unnið sér sess sem fastur liður í skákdagatalinu.

 Að þessu sinni verða skákviðburðir á fjórum stöðum: Hólmavík, Djúpavík, Trékyllisvík og í Norðurfirði.

 Föstudaginn 21. júní klukkan 16 verður fjöltefli í Hólmavík og um kvöldið verður hið vinsæla tvískákarmót haldið í síldarverksmiðjunn í Djúpavík. Staðarhaldarar í Djúpavík bjóða gestum hátíðarinnar upp á sérstakt tilboð á gistingu og eru áhugasamir hvattir til að hafa samband sem fyrst. 

Laugardaginn 22. júní verður svo efnt til Afmælismóts Jóhanns Hjartarsonar stórmeistara, sem varð fimmtugur fyrr á árinu, í samkomuhúsinu í Trékyllisvík. Meðal keppenda verða Jóhann, Helgi Ólafsson og Jón L. Árnason, auk þess sem von er á fleiri sterkum skákmönnum. Heildarverðlaun á mótinu verða 100 þúsund krónur, auk fjölda veglegra aukavinninga.

Um kvöldið verður svo efnt til  hins árlega ,,landsleiks" heimamanna og aðkomumanna og að leik loknum verður hátíðarkvöldverður í samkomuhúsinu.

Sunnudaginn 23. júní lýkur hátíðinni í Norðurfirði með Afmælismóti Böðvars Böðvarssonar, hinnar gamalreyndu skákkempu, sem verður 77 ára þennan dag. Böðvar þarf vart að kynna fyrir skákáhugamönnum, en vegleg peningaverðlaun verða á mótinu.

Gisting er í boði á Hótel Djúpavík, auk þess sem mótshaldarar hafa yfir að ráða fyrsta flokks svefnpokagistingu í Norðurfirði. Þá eru góð tjaldstæði í Árneshreppi svo allir ættu að finna eitthvað við sitt hæfi.

Áhugasamir eru hvattir til að hafa samband sem fyrst við Hrafn Jökulsson í [e-mail] eða Róbert Lagerman í [e-mail]. 

Árneshreppur á Ströndum er afskektasta en að margra mati landsins fegursta sveit. Skákfélagið Hrókurinn stendur að hátíðinni, og mótshaldarar hlakka til að hitta gamla vini og nýja á skemmtilegri hátíð! 

EM: Pörun 3.umferðar

Þá liggur pörun þriðju umferðar fyrir á Evrópumótinu. Dagur Arngrímsson, sem byrjað hefur mótið afar vel, stýrir svörtu mönnunum gegn hvítrússneska stórmeistaranum Andrey Zhigalko (2603). Bróðir hans er ofurstórmeistarinn Sergey Zhigalko (2660) og því má segja að Zhigalko-fjölskyldan beri höfuð og herðar yfir aðrar hvítrússneskar skákfjölskyldur, ekki ósvipað og Þorfinnsson-fjölskyldan dómínerar íslenskt skáklíf svo að landar vorir geti sett hlutina í samhengi. Yfirburðirnir eru slíkir að næstu bræður sem eitthvað geta í Hvíta-Rússlandi eru Elkin-bræðurnir, Leonid (2181) og Maxim (2201), eru þeir bræður því einskonar Ássar Hvíta-Rússlands!

Guðmundur Kjartansson, sem fyrirfram hefði eflaust sætti sig við 1 vinning af 2 gegn tveimur 2600+ stórmeisturum, stýrir hvítu mönnunum gegn Íslandsvininum Illya Nyzhnyk (2635). Sá kom fyrst til landsins árið 2008, þá sem efnilegasta krútt í heimi og heillaði landsmenn alla. Núna er pilturinn ekkert krútt lengur heldur einfaldlega þaulreyndur atvinnumaður sem eirir aungvu, nema e.t.v. enska stórmeistaranum Stephen Gordon sem gerði sér lítið fyrir og lagði maskínuna í 2.umferð. Sá úkraínski hefur eflaust orðið fyrir miklum vonbrigðum með þá niðurstöðu og því treystum við því að Guðmundur stígi fast til jarðar á morgun.

Fréttaritari Skák.is óskar Degi og Guðmundi alls hins besta á morgun og hvetur íslenska skákáhugamenn til að nýta tækifærið og fylgjast með þeim í beinni útsendingu.

 *Myndin sem fylgir fréttinni er af tveimur krúttböngsum á Reykjavíkurmótinu 2008.

 

 

 

EM: 2.umferð í gangi

Önnur umferð Evrópumóts einstaklinga í Legnica í Póllandi fer fram í dag. Þegar þessi orð eru skrifuð hefur alþjóðlegi meistarinn Guðmundur Kjartansson (2446) mátt lúta í gras gegn sterkum rússneskum stórmeistara A.Rakhmanov (2616). Guðmundur lenti í talsverðri beyglu eftir byrjunina og náði ekki að rétta úr kútnum þrátt fyrir hetjulega baráttu sem ætíð einkennir okkar mann. Þrátt fyrir að fréttaritari skak.is hafi skákþekkingu á borð við orangútan þá virkaði 9. - dxc4 sem einkennileg ákvörðun og ekki síður Rf6-e8-d6 manúveringin sem var fylgt eftir með þrekskiptu peðaþrammi e7-e6-e5 og allt í steik í kjölfarið.

Ef að einhver hefur manndóm í sér til að rífa sig upp eftir slæma flengingu á hinum sextíu og fjórum reitum þá er það Guðmundur okkar Kjartansson og því bið ég lesendur um að örvænta eigi.

 Talandi um manndóm þá situr Dagur Arngrímsson (2390) enn að tafli gegn verðandi ofurstórmeistara Robert Hovhannisyan (fullt rassgat af stigum, nenni ekki að fletta því upp).  Dagur tefldi afar agressíft, fórnaði tveimur peðum fyrir virka stöðu og undirritaður var orðinn bjartsýnn. Síðan fór hinsvegar allt í steik, jafnt og þétt, og þegar Hovi var kominn með valdað frípeð á d3 þá töldu eflaust flestir daga Dags talda.

 Með djöfulegri baráttu náði hinsvegar okkar maður að einfalda taflið jafnt og þétt og rétt áður en ég ýti á "vista og birta" þá virðist allt stefna í skiptan hlut sem að væri mikið afrek.

 Uppfært: Dagur landaði jafnteflinu! Glæsilega gert.

Sumarskákmót Fjölnis hefst kl. 17.00 á miðvikudaginn

Skákdeild Fjölnis lýkur starfsárinu með árlegu sumarskákmóti sem öllum áhugasömum skákkrökkum á grunnskólaaldri er heimilt að taka þátt í.

Teflt verður í hátíðarsal Rimaskóla. Rótarýklúbbur Grafarvogs gefur þrjá eignarbikara fyrir sigur í þremur flokkum, eldri, yngri og stúlknaflokki.

Þátttaka er ókeypis. Pítsa og gos kostar 300 kr í skákhléi. Vegleg verðlaun, mörg verðlaun og boðið upp á skemmtilegt skákmót sem lokið er á tveimur tímum.

Foreldrum velkomið að fylgjast með og þiggja kaffisopa. Endum skákárið með skemmtilegu skákmóti og mætum tímanlega. Skráning á staðnum.

Tefldar sex umferðir. Umhugsunartími er sjö mínútur. Skákstjórar verða þeir Helgi Árnason og Stefán Bergsson.

 

Gallerý Skák - lokamótið: Friðgeir Hólm fór með sigur af hólmi

Það var vel mætt og góðmennt í Gallerý Skák - hugverkasmiðju - sl. fimmtudag þegar þar var att kappi í þrítugasta og síðasta sinn á þessari skáktíð og keppendur iðkuðu eins konar  „hugræna atferlismeðferð" með það að markmiði að máta hvern annan í sem fæstum leikjum.  Ekki gekk þó hugverkasmíðin ævinlega upp sem skyldi -  glæstar og álitlegar vinningsstöður gengu mönnum úr greipum, snerust upp í andhverfur sínar svo menn máttu þola óvænt og „óverðskulduð" mát  eða töp á tíma.  Oftar en ekki réði einn skakkur leikur eða snilldarleikur úrslitum, meira þarf að jafnaði ekki til í þessum hópi og skilur á milli feigs og ófeigs.  

Segja má að friðsöm átakataflmennska í góðum anda  hafi ráðið ríkjum á keppnisstað og óvenju létt yfir mönnum enda umgjörð mótsins með hátíðarsniði. Boðið var upp á ljúffengan veislukost í leikhléi, myndskreytta marsipantertu, þar sem kostur gafst á að hakka sigursælustu keppendur vetrarins í sig, t.d. þá Gunna Gunn og Gunna Birgis. Var þetta þáttur í „áfallastreytugeðröskunarhjálparferli", fyrir þá sem voru enn með böggum hildar, höfðu einhverja sárra harma að hefna eða óuppgerðar sakir við suma,  til að losa þá þannig við innibyrgða „sálrænapersónuleikahugröskunarhefndarþörf".  

Úrslit mótsins komu svolítið á óvart og þó ekki. Það var enginn annar en hinn harðsnúni skákbolti Friðgeir K. Hólm, sem fór að lokum með sigur af hólmi, þó með 2½ niður, með 8½ vinning af 11 mögulegum.  Friðgeir er afar slunginn skákmaður, teflir mikið örskákir á Netinu og hefur verið á mikilli sigurbraut undanfarið. Afrekað það ma. að verða efstur á mótum bæði í KR, Riddaranum og eins í Ásum á stuttum tíma.   Jon Olav Fivelstad, hinn norskættaði frá Fífilbrekku gróinni grund sem á það til að tefla í anda Tals og Stefán Þormar Guðmundsson, hið eitilharða Hellisheiðarséni, urðu síðan jafnir í 2.-3. sæti með 7½, Guðfinnur staðarhaldari varð fjórði með 7 vinninga. Var konu hans sérstaklega þakkað í mótslok með orkideuvendi fyrir ítarleg afnot annarra af honum í þágu skáklistarinnar.  

Mikið var um óvænt úrslit og máttu margir þekktir meistarar reitaða borðsins muna sinn fífill fegri  og sætta sig sárgramir við að komast ekki ofar á mótstöfluna að þessu sinni eins og sjá má á meðf. úrslitatöflu.  

 

 

XXX

Miðsumarmót Gallerý Skákar verður haldið í Skákseli við Selvatn þegar sól skín hvað hæst í heiði í júlí. Um er að ræða boðsmót með allt að 40 þátttakendum með veislu- og viðhafnarsniði. Áhugasamir listhafendur geta þó sótt að vera boðin þátttaka á netfanginu: [e-mail]

ESE-skákþankar 06.05.13