Carlsen efstur ásamt Naiditsch í Baden-Baden

Heimsmeistarinn í skák, Magnus Carlsen (2866), vann Þjóðverjann David Baramidze (2594) í fimmtu umferð GRENKE-mótsins í Baden-Baden í dag. Aronian (2777) vann Anand (2797) en öðrum skákum lauk með jafntefli. Carlsen er efstur ásamt Arkadij Naiditsch (2706), sem gerði jafntefli við Caruana (2811). Carlsen og Naiditsch eru efstir með 3,5 vinning. 

Í sjöttu og næstsíðustu umferð, sem fram fer á morgun, teflir heimsmeistarinn við Caruana en Naiditsch mætir Bacrot (2711)

 

• Heimasíða mótsins
• Beinar útsendingar (Chess24)

 

Skákþáttur Morgunblaðsins: Þrír efstir fyrir lokaumferð Skákþings Reykjavíkur

Þrír skákmenn eru efstir og jafnir fyrir lokaumferð Skákþings Reykjavíkur sem fram fer á sunnudaginn. Stefán Kristjánsson, Björn Þorfinnsson og Jón Viktor Gunnarsson hafa allir hlotið 6½ vinning úr átta skákum en í 4.-6. sæti koma ungu mennirnir Dagur Ragnasson, Mikael Jóhann Karlsson og Jón Trausti Harðarson með 6 vinninga. Í síðustu umferð mætast Björn og Jón Viktor og Stefán hefur svart gegn Mikhael Jóhanni. Mikið hefur verið um óvænt úrslit en þrír efstu, sem jafnfamt eru stigahæstu þátttakendur mótsins, hafa allir náð vopnum sínum þrátt fyrir smávegis ágjöf á köflum. 

Magnús Carlsen einn efstur í Wijk aan Zee

Þrátt fyrir jafntefli í fjórum síðustu skákum sínum tókst heimsmeistaranum Magnúsi Carlsen að sigra á skákmótinu í Wijk aan Zee sem lauk um síðustu helgi. Eftir slaka byrjun kom magnaður sprettur er hann vann sex skákir í röð. Það dugði til sigurs en í næstu sætum komu nokkrir ungir skákmenn sem tefldu mun betur en Caruana og Aronjan sem álitnir voru helstu keppinautar Norðmannsins. 

Lokastaðan: 1. Magnús Carlsen 9 v. 2.-5. Vachier-Lagrave, Giri, Liren Ding og So 8½ v. 6. Ivantsjúk 7½ v. 7. Caruana 7 v. 8. Radjabov 6 v. 9. – 10. Wojtazek og Aronjan 5½ v. 11. Hou Yifan 5 v. 12. Saric 4½ v. 13. Van Wely 4 v. 14. Jobava 3 v.

Í B-flokknum sem einnig var gríðarlega sterkur vann kínverska ungstirnið Wei með 10½ vinning af 13 möglegum. 

Guðmundur og Hannes byrja vel á Gíbraltar

Hannes Hlífar Stefánssson og Guðmundur Kjartansson hafa byrjað vel á einu sterkasta opna móti ársins sem fram fer á Gíbraltar. „Kletturinn“ dregur til sín marga nafntogaða meistara á borð við Topalov, Nakamura og Svidler. Hannes er nr. 40 á stigalistanum og Guðmundur nr. 82 en keppendur í efsta flokknum eru 256 talsins og tefla 10 umferðir. 

Guðmundi tókst að leggja Pólverjann Bartel í 2. umferð eftir miklar sviptingar

Mateusz Bartel – Guðmundur Kjartansson

Spænskur leikur

1. e4 e5 2. Rf3 Rc6 3. Bb5 a6 4. Ba4 Rf6 5. O-O Be7 6. De2 b5 7. Bb3 d6 8. c3 O-O 9. d4 Bg4 10. Hd1 exd4 11. cxd4 d5 12. e5 Re4 13. a4 b4 14. a5 Bh4 15. Be3 Re7 16. h3 Bxf3?!

Eftir óvenjulega byrjun gat Guðmundur leikið 16. ... Rf5! með hugmyndinni 17. hxg4 Rxe3 18. fxe3 Bf2+ 19. Kh2 Dd7! sem ætti að duga til jafnteflis.

17. Dxf3 f5 18. Rd2 Kh8 19. Dh5 Rg6 20. f4 Bg3 21. Hf1 c6 22. Hac1 Hc8 23. Rxe4 fxe4

Byrjunin lofar ekki góðu en til þess að vinna með svörtu þarf stundum smá aðstoð. Hér gat Bartel leikið 24. Dg4! og verður þá fátt um varnir t.d. 24. ... Dh4 25. f5 Dxg4 26. hxg4 Re7 27. Bg5! með vinningsstöðu. Næsti leikur lítur vel út en gefur svarti kosti á mannsfórn sem flækir taflið óþarflega mikið.

24. f5?! Rxe5 25. dxe5 Bxe5 26. De2 Dxa5 27. Bc5 Hfe8 28. Dd2 Dd8 29. Dxb4?

Pólverjinn byrjaði að missa þráðinn þegar í 24. leik og hér fer hann endanlega út af sporinu, eftir 29. Bd4 eða 29. Df2 er hvíta staðan betri.

29. ... Hb8 30. Da4 Dg5!

Kemur drottningunni í ógnandi aðstööu.

31. Hfe1 Dg3 32. He3 Dh2+ 33. Kf2 Hb5 34. Dxa6 Hxc5! 35. Hxc5 Bd4! 

Hvítur er hrók yfir en fær ekkert við ráðið.

36. Hcc3 Df4+ 37. Ke1

Eða 37. Ke2 Bxe3 38. Hxe3 d4 og vinnur.

37. ... Bxe3 38. De2 d4 39. Hxc6 d3

– og hvítur gafst upp.

 

Helgi Ólafsson [e-mail]

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Morgunblaðinu 31. janúar 2015.

Skákþættir Morgunblaðsins

[Event "Tradewise Gibraltar"] [Site "Caleta ENG"] [Date "2015.01.27"] [EventDate "2015.01.27"] [Round "2.19"] [Result "0-1"] [White "Mateusz Bartel"] [Black "Gudmundur Kjartansson"] [ECO "C86"] [WhiteElo "?"] [BlackElo "?"] [PlyCount "78"] 1. e4 e5 2. Nf3 Nc6 3. Bb5 a6 4. Ba4 Nf6 5. O-O Be7 6. Qe2 b5 7. Bb3 d6 8. c3 O-O 9. d4 Bg4 10. Rd1 exd4 11. cxd4 d5 12. e5 Ne4 13. a4 b4 14. a5 Bh4 15. Be3 Ne7 16. h3 Bxf3 17. Qxf3 f5 18. Nd2 Kh8 19. Qh5 Ng6 20. f4 Bg3 21. Rf1 c6 22. Rac1 Rc8 23. Nxe4 fxe4 24. f5 Nxe5 25. dxe5 Bxe5 26. Qe2 Qxa5 27. Bc5 Rfe8 28. Qd2 Qd8 29. Qxb4 Rb8 30. Qa4 Qg5 31. Rfe1 Qg3 32. Re3 Qh2+ 33. Kf2 Rb5 34. Qxa6 Rxc5 35. Rxc5 Bd4 36. Rc3 Qf4+ 37. Ke1 Bxe3 38. Qe2 d4 39. Rxc6 d3 0-1

Carlsen vann Anand - Naiditsch efstur

Heimsmeistarinn í skák, Magnus Carlsen (2866), vann Vishy Anand (2797) í fjórðu umferð GRENKE-mótsins sem fram fór í Baden Baden í Þýskalandi í dag. Fyrsta skák þeirra síðan Carlsen lagði Indverjann í heimsmeistaraeinvígi í nóvember sl. 

Þjóðverjinn geðþekki, Arkadij Naiditsch (2706), er efstur með 3 vinninga en hann vann landa sinn, David Baramidze (2594) í dag. Carlsen er í 2.-3. sæti, með 2,5 vinning, ásamt Caruana (2811).

• Heimasíða mótsins
• Beinar útsendingar (Chess24)

 

Jón efstur á Norðurorkumótinu - Skákþingi Akureyrar

Í gær lauk 4. umferð Norðurorkumótsins, Skákþings Akureyrar.

Í fyrradag voru tefldar þrjár skákir. Smári vann Sigurð Eiríksson með svörtu eftir grófan afleik þess síðarnefnda. Þá var staða Smára töluvert betri en vel teflanleg á hvítt. Í viðureign ungu mannanna Gabríels og Benedikts sigraði Bensi nokkuð örugglega. Þriðju skákinni, skák Jakobs og Ulker varð fremur stutt jafntefli.

Í gær tefldu ungir menn gegn reynsluboltum á fyrstu þremur borðunum. Viðureignirnar gengu fyrir sig sem hér segir.

Á fyrsta borði atti Áskell Örn kappi við Símon. Báðir höfðu þeir unnið allar sínar viðureignir fram að þessari. Staðan var lengi flókin en í jafnvægi. Í 23 leik fórnaði Símon manni fyrir 2 peð og sóknarfæri. Staða hans var nokkuð álitleg en endaði með jafntefli eftir þráleik.

Í skák Jóns og Haraldar lenti hvítur í beyglu og svartur vann skiptamun og sótti stíft. Jón varðist vel og eftir að hann náði drottningaruppskiptum fjaraði sóknin út hjá Haraldi. Jón náði þá að bæta stöðu sína jafnt og þétt þrátt fyrir að vera aðeins með peð upp í skiptamuninn. Hann fékk tvö samstæð frípeð og gat rekið svarta kónginn á undan sér eins og fé í rétt. Í réttinni flæktist hvíti kóngurinn í mátnet. Þar með komst Jón upp fyrir Áskel og Símon.

Andri Freyr stýrði hvítu mönnunum gegn Ólafi. Hann tefldi vel og var lengst af með heldur betra. Hann fékk góðan og virkan riddara gegn slæmum biskupi. Það dugði honum til að vinna peð en því fylgdi nokkurt tímahrak. Í tímahrakinu tókst Ólafi að snúa á Andra og vann að lokum eftir að Andra tókst ekki að finna réttu varnarleikina.

Karl lék af sér peði með hvítu gegn Hreini og fékk töluvert verra. Smám saman tókst honum þó að bæta stöðu sína og náði mótspili. Hrein greip til þess bragðs að fórna skiptamun og úr varð jafntefli.

Kristján tefldi kröftuglega á móti Haka. Haki þurfti að finna kóngi sínum skjól á miðborðinu og tókst það. Hann hafði sitt hvorn hrókinn á hálfopnum b- og g-línum en Kristján sótti á miðborðinu. Eftir 26 leiki hafði hvítur heldur vænlegra tafl en lék þá slæmum fingurbrjót og fékk vonlitla stöðu. Kristján barðist þó áfram og gafst ekki upp fyrr en í fulla hnefana. Þá hafði leikjafjöldinn verið tvöfaldaður frá afleiknum.

Logi fékk heldur betri peðastöðu með hvítu mönnunum út úr byrjuninni gegn Hjörleifi. Hjörleifur fór þá í sóknaraðgerðir á kóngsvæng en Logi hratt þeim öllum og bætti stöðu sína smám saman. Loga tókst að vinna tvö peð af Hjörleifi sem dugði honum til sigurs þótt hann hafi ekki valið einföldustu leiðina í tímahrakinu.

Í skák hins reynslumikla Sveinbjarnar gegn hinum unga Oliver fékk svartur ágæta stöðu upp úr byrjuninni. Sveinbjörn tefldi kóngsbragð en Oliver lét f4 peðið eiga sig í nokkra leiki. Þegar á leið skákina hélst ungmenninu illa á peðum svo þeim fækkaði óeðlilega hratt í hans herbúðum. Reynslan hafði sigur að lokum. Því miður náði fréttaritari ekki að ráða að fullu í rúnirnar á skorblaði þeirra félaga og vantar því nokkra leiki í fylgiskjalið. Úr því verður vonandi bætt hið fyrsta.

Stöðu og pörun næstu umferðar má finna á Chess-Results.

Skákir mótsins má nálgast á heimasíðu SA

• Heimasíða SA
• Chess-Results

Á döfinni hjá T.R.

Starf Taflfélags Reykjavíkur blómstrar sem aldrei fyrr nú þegar sól hækkar á lofti. Hér gefur að líta nokkra þá viðburði sem eru framundan hjá félaginu í febrúar.

Laugardaginn 7. febrúar Barna- og unglingaæfingar

• Nánar

Sunnudaginn 8. febrúar Hraðskákmót Reykjavíkur

• Nánar

Mánudaginn 9. febrúar Reykjavíkurmót grunnskólasveita

• Nánar

Miðvikudaginn 11. febrúar Skákkeppni vinnustaða

• Nánar

• Skráningarform 

Fimmtudaginn 12. febrúar Afreksæfing barna og unglinga

Föstudaginn 13. febrúar til sunnudagsins 15. febrúar Bikarsyrpa #3

• Nánar
• Skráningarform

Fimmtudaginn 19. febrúar Afreksæfing barna og unglinga

Laugardaginn 21. febrúar Barna- og unglingaæfingar

Sunnudaginn 22. febrúar Barna- unglinga- og stúlknameistaramót Reykjavíkur

• Mótið 2014

Fimmtudaginn 26. febrúar Afreksæfing barna og unglinga

Föstudaginn 27. febrúar Skemmtikvöld

• Skemmtikvöld janúars - Frikkinn 2015

Laugardaginn 28. febrúar Barna- og unglingaæfingar

Dagskrá Taflfélags Reykjavíkur

Nói Síríus: Jón Viktor efstur - Dagur Ragnarsson blandar sér í hóp efstu manna

Sjötta umferð Nóa Siríusmótsins – Gestamóts Hugins og Skákdeildar Breiðablis var tefld sl. fimmtudag.

Það var sannkölluð risaviðureign á 1. borði, en þar mættust IM Jón Viktor Gunnarsson og GMÞröstur Þórhallsson sem báðir voru skráðir með 2433 Elo-stig við upphaf móts.

Jón Viktor var einn efstur með 4,5 vinninga eftir 5. umferð og Þröstur kom fast á hæla hans með 4 vinninga. Var því tekist á um efsta sætið af fullri hörku.

Viðureigninni lauk með því að Jón Viktor Gunnarsson hafði betur og hefur því 5,5 vinninga af 6 mögulegum og heldur hálfs vinnings forystu sem hann náði í 5. umferð.

Vestfirðingurinn knái, FM Guðmundur Stefán Gíslason kemur í humátt á eftir og er með 5 vinninga eftir sigur gegn hinum unga Degi Ragnarssyni.

Jón Viktor og Guðmundur Gíslason eru báðir taplausir eftir 6 umferðir!, en þeir mætast einmitt í 7. og næst síðustu umferð í kvöld — Ekki missa af því.

Af óvæntum úrslitum er þetta helst að frétta:

• Örn Leó Jóhannsson (2048) – Guðmundur Halldórsson (2219) 1 – 0
• Hallgerður Helga Þorsteinsdóttir (1992) – Magnús Teitsson (2205) 1/2 – 1/2
• Gauti Páll Jónsson (1871) – Oliver Aron Jóhannesson (2170) 1/2 – 1/2
• Tinna Kristín Finnbogadóttir (1938) – Sverrir Örn Björnsson (2117) 1/2 – 1/2

Nokkrir keppendur hafa mokað inn skákstigum það sem af er móti, má þar m.a. nefna:

• Dagur Ragnarsson (2059) hefur unnið 82,8 stig! Hann vann einnig 81,6 stig á nýafstöðnu Skákþingi Reykjavíkur og mælist því með 2223 stig – Sannarlega glæsileg frammistaða!
• Gauti Páll Jónsson (1871) hefur unnið 74,4
• Agnar Tómas Möller (1749) hefur unnið 52,4

 

• Heimasíða mótsins
• Mótið á Chess-Results
• Myndagallerí (GB)

Árbótarmóti frestað

Árbótarmótinu sem átti fara fram um helgina í Árbót í Þingeyjarsýslu hefur verið frestað um óákveðin tíma vegna veðurs. 

 

 

Kappteflið um Friðrikskónginn IV. - Gunnar Freyr sigraði

Mótaröðinni sem nú var haldin í fjórða sinn í samstarfi Gallerý Skákar og Sd. KR lauk sl. mánudag eftir fjögurra vikna harða baráttu þar sem þrjú bestu mót hvers og eins keppanda töldu til stiga og vinnings. Áunnin stig þeirra sem tefldu aðeins í einu móti féllu niður.

Lokaúrslitin urðu þau að það var enginn annar en
víkingurinn frækni Gunnar Freyr Rúnarsson, hinn rammi, sem stóð uppi sem sigurvegari með sælubros á vör.  Sigur hans var einkar glæsilegur því hann hlaut 28 stig af 30 mögulegum og varð jafnframt fjórði Gunnarinn í röð til að vinna þetta árlega kapptefli um skákkónginn til heiðurs Friðriki Ólafssyni og  ber nafn hins ástsæla meistara.  Því má segja að Gunnar Freyr hafi jafnframt haldið uppi nafni Gunnara þess lands. Hann fær að launum nafn sitt skráð gullnu letri á stall styttunnar, jafnframt því að fá fagran verðlaunagrip til eignar með lágmynd af meistaranum, nafni hans og sínu ágreyptu.

Það eru hinir valinkunnu nafnar hans, Skarphéðinsson; Birgisson og Gunnarsson, sem hafa leikið þetta á undan honum.  Allir tóku þeir þátt i einhverju mótanna nú ásamt nærri 30 öðrum og aldursforsetinn Gunni Gunni gerði sér lítið fyrir og vann síðasta mótið á stigum og varð annar í kappteflinu með 15 stig eftir tvo mót.

Til stendur að halda sérstakt mót innan tíðar "Gunnarsslag" þar sem þátttakendur geta freistað gæfu sinnar gegn þeim og öðrum öflugum meisturum. Þar  er vænst þátttöku þeirra allra, forseta SÍ og fleiri liðtækra skákmanna með bera þetta garplega nafn með rentu. Keppikeflið verður að leggja sem flesta Gunnara af velli og vinna til veglegra verðlauna. /ESE

Myndaalabúm (ESE)

 

Þriðja mót Bikarsyrpu TR

Bikarsyrpa Taflfélags Reykjavíkur er nýjung í mótahaldi á Íslandi. Syrpan samanstendur af nokkrum kappskákmótum og er ætluð börnum á grunnskólaaldri (fædd 1999 og síðar) sem ekki hafa náð 1600 skákstigum. Þar með gefst þeim tækifæri til að næla sér í alþjóðleg skákstig á skákmótum sem sérhönnuð eru fyrir þau.

Þriðja mótið í syrpunni hefst föstudaginn 13. febrúar og stendur til mánudagsins 16. febrúar. Tefldar eru 5 umferðir eftir svissnesku kerfi. Tímamörk eru 30 mínútur + 30 sekúndur á hvern leik og geta skákirnar því varað í allt að tvær klukkustundir. Þó svo við leggjum ætíð áherslu á að krakkarnir vandi sig og noti tímann vel, þá má gera ráð fyrir að margar skákir taki mun styttri tíma.

Mótið er sérstaklega hugsað fyrir krakka sem hafa sótt skákæfingar Taflfélagsins (og/eða annarra taflfélaga) reglulega síðastliðinn vetur eða lengur. Það er gott að byrja sem fyrst að keppa á kappskákmótum, en hingað til hefur þeim krökkum sem vilja tefla á “alvöru mótum” mestmegnis staðið til boða að taka þátt í opnum mótum. Þar er styrkleikamunurinn oft mikill, mótin taka langan tíma, auk þess sem marga krakka óar við tilhugsuninni um að tefla við fullorðna á sínum fyrstu kappskákmótum. Bikarsyrpan er svarið við því.

Einungis börn og unglingar á grunnskólaaldri sem ekki hafa náð 1600 alþjóðlegum skákstigum geta tekið þátt í mótum Bikarsyrpunnar. Þannig er styrkleikamunurinn minni en ella og krakkarnir njóta þess betur að tefla kappskákir. Tímamörkin eru líka styttri, og henta krökkunum betur en langar 90 mínútna skákir sem tíðkast á venjulegum kappskákmótum. Mótið uppfyllir öll skilyrði Alþjóða skáksambandsins FIDE og er reiknað til alþjóðlegra skákstiga sem gott er að byrja að safna snemma. Eins og á aðra viðburði félagsins þá er frítt í mótin fyrir krakka í Taflfélagi Reykjavíkur. Fyrir krakka í öðrum taflfélögum er þátttökugjaldið 1000 krónur fyrir hvert mót Bikarsyrpunnar.

Dagskrá:
1. umferð 17.30 á föstudegi (13. febrúar)
2. umferð 10.30 á laugardegi (14. febrúar)
3. umferð 14.00 á laugardegi (14. febrúar)
4. umferð 10.30 á sunnudegi (15. febrúar)
5. umferð 14.00 á sunnudegi  (15. febrúar). (Lokaumferð + verðlaunaafhending).

Sigurvegari fyrsta móts Bikarsyrpunnar var TR-ingurinn Mykhaylo Kravchuk og TR-ingurinn Aron Þór Mai sigraði á öðru mótinu.

Skráning fer fram á heimasíðu Taflfélags Reykjavíkur.
Vinsamlegast skráið þátttakendur sem fyrst, það hjálpar við undirbúning mótsins!  Skráðir keppendur.

Stefnt er að því að Bikarsyrpan samanstandi af fjórum mótum í vetur. Bikarar og medalíur eru í verðlaun fyrir efstu sætin í hverju
 móti, en auk þess verða veitt sérstök verðlaun fyrir samanlagðan árangur á mótunum.

Hlökkum til að sjá ykkur!

• Bikarsyrpa #1
• Bikarsyrpa #2

Guðmundur með góða frammistöðu í Gíbraltar - nálgast 2500 skákstig

Guðmundur Kjartansson (2484) stóð sig afar vel á Gíbraltar-mótinu sem lauk í dag. Guðmundur gerði tvö góð jafntefli í lokaumferðunum tveimur og endaði með 6 vinninga í 10 umferðum og hækkaði um sjö stig fyrir frammistöðuna. Hann vantar því aðeins 9 stig í 2500 skákstigin sem eru honum nauðsynleg til að verða stórmeistari. 

Í lokaumferðunum tveimur gerði Gummi jafntefli við Ju Wenjun (25479 eina sterkustu skákkonu heims og við rúmenska stórmeistarann Ioan-Cristian Chirila (2548).

Flott frammistaða hjá Gumma. Slæmur kafli um miðbiki mótsins en hann vann sig vel út úr því í lokaumferðunum.

Hannes Hlífar Stefánsson (2573) hlaut 5 vinninga. Hann átti góða byrjun en missti dampinn um miðbik mótsins, þ.e. eftir að hann tók sér yfirsetu (bye) í sjöttu umferð. Hann lækkar um 13 stig. 

Magnús Kristinsson (1744) hlaut 4 vinninga eftir frábæran endasprett. Hann hækkar um 26 stig fyrir frammistöðuna. Dóttir hans, Veronika Steinunn (1566), átti líka góðan endasprett og endaði með 2,5 vinning. Hún hækkar um 5 stig fyrir frammistöðuna.

Hikaru Nakamura (2776) sigraði á mótinu en hann hlaut 8,5 vinning. David Howell (2670) varð annar með 8 vinninga. 

Alls tóku 253 skákmenn þátt frá 46 löndum þátt í efsta flokki mótsins. Þar af voru 72 stórmeistarar. Hannes var nr. 40 í stigaröð keppenda en Guðmundur var nr. 82.

• Heimasíða mótsins
• Beinar útsendingar (hefjast kl. 14)
• Skákskýringar