Hannes með jafntefli við Vitiugov - er í tíunda sæti

Stórmeistarinn Hannes Hlífar Stefánsson (2573) gerði jafntefli við rússneska ofurstórmeistarann Nikita Vitiugov (2735) í sjöundu umferð EM einstaklinga sem fram fór í Jerúsalem í dag. Hannes hefur 5 vinninga og er í tíunda sæti en 23 efstu sætin gefa keppnisrétt á Heimsbikarmótinu í skák sem fer í Bakú í Aserbaídsjan í haust. 

Guðmundur Kjartansson (2484) vann heimamanninn David Gorodetzky (2210) og er í 104. sæti með 4 vinninga.

Í áttundu umferð, sem fram fer á morgun, teflir Hannes við rússneska stórmeistarann Denis Khismatullin (2653) en Gummi teflir við moldavíska stórmeistarann Viorel Iordachescu (2659)

Alls taka 250 skákmenn frá 33 löndum þátt í mótinu. Þar af eru 113 stórmeistarar. Hannes er nr. 84 í stigaröð keppenda en Guðmundur er nr. 116. Alls er tefldar 11 umferðir.

• Heimasíða mótsins
• Beinar útsendingar (hefjast almennt kl. 13)
• Chess-Results

Fyrirlestur Arturs Jussupow á sunnudag

Skáksamband Íslands og Skákskóli Íslands standa fyrir fyrirlestri frá Artur Jussupow sunnudagskvöldið 8. mars.

Jussupow sem var um árabil einn sterkasti skákmaður heims mun tefla á Reykjavíkurskákmótinu í ár. Í þrígang komst hann í undanúrslit áskorendaeinvígjanna og var fastur gestur á sterkustu skákmótum hvers ár. Jussupow naut á sínum ferli þjálfunar Mark Dvoretsky sem er talinn einn besti þjálfari sögunnar og höfundur þekktra bóka. Saman stóðu þeir að stofnun skákskóla þar sem m.a. Svidler og Movsesian námu.

Jussupow er höfundur bókaflokkanna "Build up your chess" og "Boost up your chess" sem hafa verið fáanlegir hjá Sigurbirni Björnssyni skákbókasala síðustu árin og eru talsvert notaðir hér á landi við þjálfun og kennslu.

Fyrirlestur Jussupow hefst klukkan 20:00 á sal Skákskólans að Faxafeni 12.

Fyrirlesturinn er ekki opinn en þjálfarar með FIDE-réttindi eru sérstaklega boðnir velkomnir en auk þeirra hafa rétt til mætingu tveir frá hverju skákfélagi. Æskilegt er að þeir sem hafi ekki FIDE-réttindi skrái sig í gegnum stjórnir sinna félaga.

Skráning á [e-mail] fyrir föstudagshádegi.

Skákþing Hugins á Húsavík - Fjórir enn efstir

Staða efstu manna á skákþingi Hugins á Húsavík breyttist ekkert eftir skákir 4. umferðar sem fram fór í gær. Fjórir efstu menn áttust við og enduðu báðar skákirnar með jafntefli. Í hinum tveimur viðureignunum áttust Ármann Olgeirsson og Sigurbjörn Ásmundsson við og Hlynur Snær Viðarsson tefldi við Sam Rees. Ármann og Hlynur höfðu betur.

Skák Jóns Aðalsteins Hermannssonar og Ásgeirs Inga Unnsteinnssonar var tefld á laugardag og lauk henni með sigri Jóns. Skák Ævars Ákasonar og Hermanns Aðalsteinssonar fer fram í kvöld. Úrslit í þeirri skák hefur ekki áhrif á stöðu efstu manna. Að henni lokinni verður pörun 5. umferðar birt.

Smári Sigurðsson, Rúnar Ísleifsson, Hjörleifur Halldórsson og Jakob Sævar Sigurðsson eru efstir á mótinu með 3 vinninga hver.

Síðari hluti Íslandsmóts skákfélaga fer fram 19.-21. mars

Seinni hluti Íslandsmóts skákfélaga 2014-2015 fer fram dagana 19.-21 mars. nk. Mótið fer fram í Rimaskóla, Reykjavík.  Keppnin hefst (eingöngu í 1.deild) kl. 19.30 fimmtudaginn 19. mars. Aðrar deildir munu hefja taflmennsku föstudaginn 20. mars  kl. 20.00 og síðan  laugardaginn 21. mars. kl. 11.00 og kl. 17.00 sama dag. 

Þau félög sem enn skulda þátttökugjöld þurfa að gera upp áður en seinni hlutinn hefst.

Vakin er athygli á nýrri grein í reglugerð.  Taflfélög í 1. deild eru beðin að tilkynna til SÍ nöfn skákstjóra sinna. 

2. gr.

Framkvæmdanefnd Íslandsmóts skákfélaga, sem skipuð er af stjórn Skáksambands Íslands, ákveður töfluröð og skipar skákstjóra og umsjónarmenn Íslandsmóts skákfélaga.  Öllum taflfélögum, sem eiga sveitir í 1. deild, ber að útvega einn skákstjóra.  

Þeir sem geta lánað digital skákklukkur eru vinsamlega beðnir að svara og láta vita um fjölda.

Hannes með góðan sigur á EM - er í fimmta sæti!

Stórmeistarinn Hannes Hlífar Stefánsson (2573) vann góðan og sannfærandi sigur á spænska stórmeistaranum Ivan Salgado Lopez (2628) í sjöttu umferð EM einstaklinga í Jerúsalem í dag. Hannes hefur 4½ og er í 5.-25. sæti (fimmti á stigum). Hann er aðeins hálfum vinningi á eftir efstu mönnum. Hannes er aðeins annar tveimur skákmönnum úr Vestur-Evrópu meðal 35 efstu manna. Hinn er Englendingurinn David Howell sem er í 20. sæti.

Á morgun teflir Hannes við rússneska ofurstórmeistarann Nikita Vitiugov (2735) sem er næststigahæstur keppenda.

Guðmundur Kjartansson (2484) tapaði fyrir rússneska stórmeistarann Evgeny Romanov (2625) og hefur 3 vinninga og er í 110.-163. sæti (140. sæti á stigum).  Á morgun teflir hann við heimamanninn David Gorodetzky (2210).

Alls taka 250 skákmenn frá 33 löndum þátt í mótinu. Þar af eru 113 stórmeistarar. Hannes er nr. 84 í stigaröð keppenda en Guðmundur er nr. 116. Alls er tefldar 11 umferðir.

• Heimasíða mótsins
• Beinar útsendingar (hefjast almennt kl. 13)
• Chess-Results

Skákdeild Fjölnis stendur fyrir Sturlubúðum 7. og 8. mars

Áhugasömum skákkrökkum á grunnskólaaldri sem æfa skák reglulega er boðið að taka þátt í skákbúðum í Vatnaskógi helgina 7.–8. mars nk.

Það er skákdeild Fjölnis í samstarfi við Skákakademíu Reykjavíkur og Skákskóla Íslands sem stendur fyrir skákbúðunum í fjórða sinn. Fyrri þrjú  námskeiðin heppnuðust mjög vel bæði hvað varðar árangur og ánægju. Kennarar verða þau Helgi Ólafsson, Lenka Ptacnikova, Stefán Bergsson og Björn Ívar Karlsson. Í Vatnaskógi er frábær aðstaða fyrir starfsemi skákbúðanna, vistlegur svefnskáli sem rúmar alla undir einu þaki, íþróttahús, tómstundaaðstaða og góður matur í matar-og kaffihléum. Aðeins er reiknað með 40 þátttakendum og því rétt að áhugasamir skákkrakkar skrái sig sem fyrst á skrifstofu Skáksambands Íslands s. 568 9141 eða í tölvupósti á netfangið skaksamband@skáksamband.is. til að missa ekki af þessum einstæða viðburði. Helgi Árnason formaður skákdeildar Fjölnis og fararstjóri svarar upplýsingum í síma 664 8320.

Verð á hvern þátttakanda er 7500 kr fyrir þessa tvo daga. Innifalið í gjaldinu er allur matur, kennsla, skálaleiga, þátttaka í Góu páskaeggjaskákmótinu og viðurkenningar. Rútuferð fram og til baka kostar 2500 kr til viðbótar. Kostnaður því alls 10.000 kr. Í síðustu skákbúðum sem haldnar voru að Úlfljótsvatni í febrúar 2014 greiddu nokkur skákfélög hluta gjaldsins fyrir sína félaga.

Sturlubúðir eru kenndar við Sturlu Pétursson skákfrömuð sem þjálfaði unga og efnilega skákkrakka um og eftir miðja síðustu öld og er alnafni hans styrktaraðili Fjölnis við framkvæmd skákbúðanna. Lagt er af stað frá BSÍ / N1 kl. 10 á laugardagsmorgni og komið til baka kl. 15:45 á sunnudegi.

Sjá nánar PDF-viðhengi.

 

Skrár tengdar þessari bloggfærslu:

• Skákbúðir í Vatnaskólig

Áskorendaflokkur Íslandsmótsins í skák

Áskorendaflokkur Íslandsmótsins í skák fer fram um páskanna. Mótið fer fram á höfuðborgarsvæðinu og verður nánari staðsetning mótsins tilkynnt síðar.

Dagskrá mótsins er sem hér segir:

• 1. umferð, Föstudagurinn, 27. mars 
• 2. umferð, Laugardagurinn, 28. mars
• 3. umferð, Laugardaginn, 28. mars
• 4. umferð, þriðjudaginn 31. mars
• 5. umferð, miðvikudaginn, 1. apríl
• 6. umferð, föstudagurinn (langi), 3. apríl
• 7. umferð, föstudagurinn (langi), 3. apríl
• 8. umferð, laugardagurinn, 4. apríl
• 9. umferð, sunnudagurinn, 5. apríl.

Nánara fyrirkomlagi mótsins verður tilkynnt á næstu dögum.

Landsliðsflokkur fer fram í maí nk. og verður nánara fyrirkomulag tilkynnt fljótlega.

 

 

Atkvöld hjá Hugin í kvöld - viltu tefla við Mamedyarov?

Mánudaginn  2. mars 2015 verður atkvöld hjá Skákfélaginu Huginn í Mjóddinni og hefst mótið kl. 20:00. Fyrst eru tefldar 3 hraðskákir þar sem hvor keppandi hefur 5 mínútur til að ljúka skákinni og síðan þrjár atskákir, með fimmtán mínútna umhugsun. Teflt er í félagsheimili Hugins í Álfabakka 14a í Mjóddinni.

Sigurvegarinn á atkvöldinu fær í verðlaun máltíð fyrir einn á Saffran eða pizzu frá Dominos. Einnig verður dreginn út af handahófi annar keppandi sem fær sama val. Þar eiga allir jafna möguleika, án tillits til árangurs á mótinu.  Auk þess gefur efsta sætið á atkvöldinu þátttökuréttt í fjöltefli Mamedyarovs sem fram fer um morguninn fimmtudaginn 12. mars í Gamma.

Þátttökugjöld eru kr. 300 fyrir félagsmenn (kr. 200 fyrir 15 ára og yngri) og kr. 500 fyrir aðra (kr. 300 fyrir 15 ára og yngri).

Skáksprengja í Grafarvogi. 115 grunnskólanemendur mættu á Skákhátíð Rótarý og Fjölnis

Það fór vel á því að efnilegustu skákmenn Íslands, þau Vignir Vatnar Stefánsson og Nansý Davíðsdóttir, kæmu hnífjöfn í mark með fullt hús á gífurlega fjölmennu barna-og unglingaskákmóti sem Rótarýklúbburinn Reykjavík Grafarvogur og Skákdeild Fjölnis héldu í Rimaskóla í gær.

Já slíkur var fjöldinn að þessi tvö efstu náðu ekki að tefla saman í þeim sex umferðum sem tefldar voru. Skákhátíðin í Rimaskóla togaði til sín 115 grunnskólakrakka á öllum aldri, drengi og stúlkur. Ábyggilega hafa glæsilegir vinningar og ekki síður pítsuveislan og ókeypis bíómiði haft sitt að segja því allt var þetta í boði Rótarýklúbbsins.

 

Jón L. Árnason stórmeistari og heimsmeistari unglinga árið 1977 og rótarýfélagi var heiðursgestur mótsins og lék fyrsta leikinn fyrir Óskar Hákonarson í skák hans við Vigni Vatnar. Í framhaldinu hófst taflmennskan út um allan sal og inn um ganga Rimaskóla. Mótið gekk einstaklega vel fyrir sig þrátt fyrir hálftíma seinkun við innritun þegar löng röð myndaðist við skráningarborðið.

Eftir fjórar umferðir var öllum keppendum boðið upp á pítsur og safa sem runnu ljúft niður í skákmeistarana. Strax að móti loknu fór fram glæsileg verðlaunahátíð. Tíu efstu skákmenn mótsins og þrjár efstu stúlkurnar fengu gjafabréf upp á 4000 - 5000 kr. Auk þess voru dregnir út sjö happadrættisvinningar frá nammibar Hagkaups. Allir 115 keppendurnir luku keppni með glæsibrag og fengu ókeypis bíómiða í Laugarásbíó að launum.

Rótarýklúbburinn Reykjavík Grafarvogur á heiður skilið fyrir frábæran stuðning við unga og áhugasama skákkrakka. Þeir voru fjölmennir á mótsstað, röðuðu upp, bættu endalaust við borðum, stóðu vel að pítsuafgreiðslunni og aðstoðuðu yngstu skákmennina þegar þörf var á. Rótarýklúbburinn var með þessari skákhátíð að halda upp á Rótarýdaginn og vöktu um leið athygli á fyrirmyndar félagsstarfi í hverfinu. Þar völdu þeir Skákdeild Fjölnis og undirbjuggu hátíðarhöldin í samstarfi við Helga Árnason formann skákdeildarinnar sem var skákstjóri ásamt Páli Sigurðssyni. 

Í verðlaunasætum auk þeirra Vignis Vatnars og Nansýjar voru þeir Dawid Kolka Álfhólsskóla, bræðurnir Óskar Víkingur og Stefán Orri Davíðssynir Ölduselsskóla, Jóhann Arnar Finnsson og Joshua Davíðsson úr Rimaskóla, Alexander Mai Laugarnesskóla, Benedikt Þórisson og Arnar M. Heiðarsson Hörðuvallaskóla. Þær Andrea Rut Friðriksdóttir Rimaskóla og Elsa Kristín Arnaldardóttir Hofsstaðaskóla hlutu 2. og 3. verðlaun stúlkna og er frammistaða þeirrar fyrrnefndu athyglisverð því að hún var að taka þátt í sínu fyrsta skákmóti. 

Sjá Chess-Results og myndaalbúm (HÁ)

Gummi með sigur - Hannes með jafntefli

Guðmundur Kjartansson (2484) vann Ísraelsmanninn Sam Drori (2173) í sjöttu umferð EM einstaklinga sem fram fór í Jerúsalem í dag. Hannes Hlífar Stefánsson (2573) gerði hins vegar öruggt jafntefli við rússneska stórmeistarann Ivan Popov (2629). Hannes hefur 3,5 vinning og er í 17.-59. sæti (17. á stigum) en Gummi hefur 3 vinninga og er í 60.-117. sæti (110. á stigum). 

Úkraínski stórmeistarinn Anton Korobov (2687) er einn efstur með 4,5 vinning.

Í sjöundu umferð, sem fram fer á morgun, teflir Hannes við spænska stórmeistarann Ivan Salgado Lopez (2628) en Gummi við rússneska stórmeistarann Evgeny Romanov (2625).

Alls taka 250 skákmenn frá 33 löndum þátt í mótinu. Þar af eru 113 stórmeistarar. Hannes er nr. 84 í stigaröð keppenda en Guðmundur er nr. 116. Alls er tefldar 11 umferðir.

• Heimasíða mótsins
• Beinar útsendingar (hefjast almennt kl. 13)
• Chess-Results