Halldór, Guðlaug, Þorvarður, Eiríkur og Einar efst á öðlingamóti

Halldór Pálsson (2030), Guðlaug Þorsteinsdóttir (1943), Þorvarður F. Ólafsson (2222) , Eiríkur K. Björnsson (1959) og Einar Valdirsson (1945) eru efst og jöfn með fullt húsað lokinni annarri umferð Skákmóts öðlinga sem fram fór í gærkveldi. Ekki var mikið um óvænt úrslit enda er massi keppenda (18 af 26) á sama 300 skákstiga bili. Því má búast við jöfnu og spennandi móti. 

Þriðja umferð fer fram nk. miðvikudagskvöld og hefst kl. 19:30. Þá mætast meðal annars: Eiríkur - Þorvarður, Einar - Halldór Pálsson og Guðlaug - Halldór Garðarsson. 

• Heimasíða TR
• Chess-Results

 

Íslandsmót barnaskólasveita fer fram 25. og 26. apríl

Íslandsmót barnaskólasveita 2015 fer fram í Rimaskóla dagana 25. og 26. apríl nk. 

Tefldar verða níu umferðir eftir svissneska kerfinu. Fimm á laugardegi,og fjórar á sunnudegi Umhugsunartími 15 mínútur á skák fyrir hvern keppenda. Taflið hefst kl. 13 á laugardeginum en kl. 11 á sunnudeginum.

Hver skóli getur sent fleiri en eina sveit - en hver sveit er skipuð fjórum nemendum 1.-7. bekkjar (auk 4 varamanna)

Þátttökugjöld kr. 7.500.- á sveit.  Þó ekki hærri en kr. 15.000.- fyrir hvern skóla.

Veitt verða verðlaun fyrir efstu b-e sveitir ásamt verðlaunum fyrir efstu sveitina sem er einungis skipuð nemendum í 1.-4. bekk.

Veitt verða borðaverðlaun fyrir bestan árangur á 1.-4. borði. 

Sigurvegari mótsins hlýtur rétt til þátttöku á Norðurlandamóti grunnskólasveita sem fram fer í Danmörku í september næstkomandi.  

Skráning fer fram á Skák.is (guli kassinn efst).

Skráningu skal lokið í í síðasta lagi 23. apríl

Hægt er að fylgjast með þegar skráðum sveitum hér.

Ath. Áríðandi er að sveitirnar séu skráðar fyrirfram.

 

Íslandsmót grunnskólasveita fer fram 18. og 19. apríl

Íslandsmót grunnskólasveita 2015 fer fram í Rimaskóla dagana 18. og 19. apríl nk. Tefldar verða níu umferðir eftir svissneska kerfinu. Fimm á laugardegi,og fjórar á sunnudegi Umhugsunartími 20 mínútur á skák fyrir hvern keppenda. Taflið hefst kl. 13 á laugardeginum en kl. 11 á sunnudeginum.

Hver skóli getur sent fleiri en eina sveit - en hver sveit er skipuð fjórum nemendum 1.-10. bekkjar grunnskóla (auk varamanna)

Þátttökugjöld kr. 7.500.- á sveit.  Þó ekki hærri en kr. 15.000.- fyrir hvern skóla.

Sigurvegari mótsins hlýtur rétt til þátttöku á Norðurlandamóti grunnskólasveita sem fram fer í Danmörku í september næstkomandi.  

Skráning fer fram á Skák.is (guli kassinn efst).

Skráningu skal lokið í í síðasta lagi 16. apríl.

Hægt er að fylgjast með þegar skráðum sveitum hér.

Ath. Áríðandi er að sveitirnar séu skráðar fyrirfram.

 

Landsmótið á Selfossi

Landsmótið í skólaskák fer fram á Selfossi um næstu mánaðarmót. Sýslu- og kjördæmismót eru framundan og er kjördæmisstjórar hvattir til að senda upplýsingar um mót sem og úrslit að loknum mótum á [e-mail] en Stefán Bergsson hefur tekið að sér landsmótsstjórnina fyrir árið 2015 í forföllum landsmótsstjórans Ingibjargar Eddu Birgisdóttur.

Hér má sjá hvað hvert kjördæmi á mörg sæti:

Yngri flokkur:

• Reykjavík 1
• Reykjanes 3
• Vesturland 1
• Vestfirðir 2
• Norðurland vestra 1
• Norðurland eystra 1
• Austurland 1
• Suðurland 2

Eldri flokkur:

• Reykjavík 2
• Reykjanes 1
• Vesturland 1
• Vestfirðir 1
• Norðurland vestra 1
• Norðurland eystra 3
• Austurland 1
• Suðurland 2

 

Meistaramót Kópavogs í skólaskák 2015

Þetta er einstaklingsmót og er keppt í hinum hefðbundnu aldurshólfum sem hafa gilt frá því að fyrirbærið „Skólaskák“  var sett á laggirnar árið 1980.

Mótið fer fram föstudaginn 10. apríl

Flokkarnir sem gefa rétt til þátttöku á kjördæmismóti eru annars vegar

7. bekkur og yngri og síðan unglingastig.
En við bætum við tveimur flokkum til gamans eða 1.bekk og 2. bekk.

Staðsetning:

Keppt verður í stúkunni á Kópavogsvelli í aðstöðu Skákakademíu Kópavogs. 

Dagskrá:

• Kópavogsmeistaramót unglingastigs kl: 8.30-11.30
• Kópavogsmeistaramót  7. bekk og yngri kl: 8.30-11.30
• Kópavogsmeistaramót 2. bekkur 12.00- 13.45
• Kópavogsmeistaramót  1. bekkur 14.00- 15.45

Þátttökurétt fá:

- aðeins nemendur í grunnskólum Kópavogs  í -  7. bekk og yngri og 8.-10. Bekk.

Frá hverjum skóla geta allir nemendur með skákstig fengið að keppa að auki 3 stigalausir í hvoru aldurshólfi sem hafa sýnt sérstaklega góðan árangur í vetur.

En í yngstu flokkunum - 1. og 2. bekk.  eru ekki nein takmörkun. Allir nemendur Kópavogs sem kunna skákreglur og mannganginn geta skráð sig til leiks í þeim flokkum.  Mikilvægt að skólar sendi fullorðinn ábyrgðarmann með sínum krökkum til að hjálpa til við eftirlit og til að halda uppi aga.

Veitt verða verðlaun bæði í drengja og stúlknaflokki þó að keppnin verði ekki kynskipt að öðru leiti.

Tímamörk:

Í flokkunum 7. bekkur og yngri og  8.-10. bekkur (unglingastig) : verða 7-10 mín á mann, 7-9 umferðir, fer eftir þátttökufjölda. 1. og 2. bekkur:  5 mín á mann 5 umferðir. 

Skráning

Skráning á Skák.is (guli kassinn efst) fyrir kl. 12.00 á fimmtudegi 9. apríl 2015.  Mikilvægt að umsjónarmenn með skákstarfi skrái sína nemendur til að tryggja að þeir sterkustu mæti til leiks. Skráning á yngstu flokkana er hins vegar opin og ætlast til að foreldrar skrái í þá hópa sjálf, því viðbúið er að þeir mun raska ýmsu félags og íþróttastarfi sem er í gangi eftir hádegi á föstudögum. 

Mótin fyrir 7. bekk og yngra og 8.-10. bekk gefa 2  sæti hvor flokkur  á kjördæmismóti Reykjaneskjördæmis hins forna.

Mótsstjóri verður Halldór Grétar Einarsson. Honum til aðstoðar Tómas Rasmus, Lenka Ptacnikova og Birkir Karl Sigurðsson.

Upplýsingar um þegar skráða keppendur má finna hér.

 

 

Björgvin efstur í Ásgarði í dag

Æsir þeir tefldu sínar hefðbundnu þriðjudagsskákir í dag. Það voru engin verðlaun í boði nema bara sú ánægja sem menn fá af því  að máta andstæðing sinn. Næsta þriðjudag höldum við minningarmót um Þorstein Guðlaugsson félaga okkar sem féll frá á síðasta ári.

Þá verður teflt um sérsmíðaðan farandgrip sem Jón Steinþórsson skákfélagi okkar smíðaði og gaf. Sævar Bjarnason varð sigurvegari á fyrsta minningarmótinu um Þorstein sem haldið var sl. vor.

Björgvin Víglundsson var aflahæstur í dag með 8,5 vinning af 10 mögulegum. Í öðru sæti varð Guðfinnur R Kjartansson  með 7,5 vinning. Jafnir í öðru til þriðja sæti urðu þeir Jóhann Örn Sigurjónsson og Þorsteinn Þorsteinsson báðir með 7 vinninga.

Það komu ágætir gestir til okkar í dag, það voru þeir Gunnar Björnsson forseti SÍ og Helgi Ólafsson stórmeistari. Þeir voru að kynna bókina Reykjavíkurskákmót í 50 ár fyrra bindi eftir Helga Ólafsson. Þetta er vönduð og falleg bók með mörgum myndum og góðum skákum. Helgi á heiður skilið fyrir fallega bók.

Sjá nánari úrslit dagsins í töflu og myndir frá ESE (hægt að stækka með því að tvíklikka).

 

Skákir frá áskorendaflokki

Kjartan Maack hefur slegið inn skákir áskorendaflokks Íslandsmótsins í skák. Þær má nálgast á heimasíðu Skáksambandsins.

Rétt er að minna á landsliðsflokks sem fram fer 14.-24. maí í Háuloftum í Hörpu en keppendalistinn verður kynntur á næstu mjög fljótlega.

Skákir frá Íslandsmóti skákfélaga

Kjartan Maack hefur slegið inn skákir frá síðari hluta Íslandsmóts skákfélaga (1. og 2. deild).

Reyndar vantar þarna inn skák Ægis Páls Friðbertssonar (TV) og Sæbjörns Guðfinnssonar(TB) en skorblöðin skiluðu sér ekki. Sömuleiðis tókst ekki Kjartani að ljúka skák Cornette (TV) og Jóhanns Hjartarson (TB) þar sem annað skorblaðið vantaði.

Skákirnar má nálgast á heimasíðu mótsins.

Hjörvar sigurvegari áskorendaflokks - Lenka Íslandsmeistari kvenna

Hjörvar Steinn Grétarsson (2554) sigraði í áskorendaflokki Íslandsmótsins í skák sem lauk í gær. Hann vann Dag Ragnarssonar (2347) í lokaumferðinni. Guðmundur Gíslason (2311), sem vann Oliver Aron Jóhannesson (2212), varð annar og fær því keppnisrétt í landsliðsflokki að ári ásamt Hjörvari. Lenka Ptácníková (2242) varð Íslandsmeistari kvenna.

Það verður að teljast með nokkrum ólíkindum að á níu umferða móti mætust ekki tveir efstu menn mótsins, Hjörvar og Guðmundur. Guðmundur tefldi heldur ekki við Davíð Kjartansson (2364) sem varð þriðji á mótinu 6,5 vinning. Það var góður endasprettur Guðmundar sem lagði grunn af silfrinu og sæti í landsliðsflokki en hann vann þrjár síðustu skákirnar. Toppaði á hárréttum tíma!

Elsa María Kristínardóttir (1875), sem átti afar gott mót, varð önnur á Íslandsmóti kvenna með 5,5 vinning. Tinna Kristín Finnbogadóttir (1950) og Veronika Steinunn Magnúsdóttir (1571) urðu jafnar í 3.-4. sæti með 5 vinninga. Frammistaða Veroniku var afar góð. 

Lokastaða efstu manna:

• 1. Hjörvar Steinn Grétarsson (2554) 7,5 v.
• 2. Guðmundur Gíslason (2321) 7 v.
• 3. Davíð Kjartansson (2364) 6,5 v.
• 4.-8. Lenka Ptácníková (2242), Jón Trausti Harðarson (2170), Dagur Ragnarsson (2347), Haraldur Baldursson (1971) og Stefán Bergsson (2063) 6 v.
• 9.-11. Oliver Aron Jóhannesson (2212), Björn Hólm Birkisson (1845) og Elsa María Kristínardóttir (1875) 5,5 v.

Staðan á Íslandsmóti kvenna:

• 1. Lenka Ptácníková (2242) 6 v.
• 2. Elsa María Kristínardóttir (1875) 5,5 v.
• 3.-4. Tinna Kristín Finnbogadóttir (1950) og Veronika Steinunn Magnúsdóttir (1571) og  4 v. 

Að lokum skulum við skoða hverjir hækka mest á stigum á mótinu. 

1. Aron Þór Mai (+81)
2. Björn Hólm Birkisson (+64)
3. Andri Freyr Björgvinsson (+45)
4. Óskar Víkingur Davíðsson (+36)
5. Héðinn Briem (+32)
6. Óskar Long Einarsson (+29)
7. Stefán Bergsson (+20)
8. Veronika Steinunn Magnúsdóttir (+17)
9. Hjálmar Sigurvaldason (+16)
10. Vignir Vatnar Stefánsson (+16)

 

• Heimasíða Skáksambands Íslands
• Chess-Results
• Myndaalbúm (GB)

Mariya Muzychuk heimsmeistari kvenna

Úkraínska skákkonan Mariya Muzychuk varð í gær 15. heimsmeistari kvenna. Hún vann rússnesku skákkonuna Natalia Pogonina í úrslitaeinvígi þeirra á milli 2,5-1,5 í Sochi í Rússlandi.

Hou Yifan, fráfarandi heimsmeistari kvenna, var ekki meðal keppenda á heimsbikarmótinu þar sem 64 skákkonur tóku þátt. Hún á hins vegar rétt á einvígi við Muzychuk þar sem hún sigraði á Grand Prix-mótaröðinni. 

Heimasíða einvígisins