Skáktilboð á tónlistarviðburð á morgun í Hörpu - skákmenn hvattir til að fjölmenna

Vakin er athygli á tónlistarviðburði, sem Skáksamband Íslands stendur fyrir í Norðurljósasal Hörpu, laugardaginn 16. júlí nk., en þar kemur fram píanistinn SoRyang Yoo, sem borin er og barnsfædd í Seoul í S-Kóreu. Henni var á unga aldri spáð miklum frama í tónlistinni og hafði þegar 11 ára að aldri unnið til fjölda tónlistarverðlauna í heimalandi sínu. 16 ára gömul yfirgaf hún heimabæ sinn og hélt til Evrópu til að afla sér frekari menntunar í tónlistinni.

Hún útskrifaðist frá Folkvang-Tónlistarháskólanum í Essen með prófgráðu sem konsert píanisti, innritaðist að því loknu í Tón-og sviðslistaskólann í Vínarborg og lauk þaðan prófi sem Master of Arts.  Síðan þá hefur SoRyang haldið tónleika víða um lönd, aðallega í Evrópu. Hún er vel þekkt fyrir túlkun sína á Mozart og heldur reglulega tónleika, þar sem verk hans eru flutt, í Mirabell-höllinni í Salzburg, Mozart-húsinu og í St. Péturskirkjunni í Vínarborg.  

Líklega er SoRyang kunnust fyrir að hafa flutt músíkina úr tónlistarsölunum út á „opin svæði“ borganna og þannig gefið almenningi kost að á njóta klassískra verka hinna miklu meistara. Hún hefur  haldið tónleika á ýmsum sögufrægum stöðum, m.a í Vínarborg og ýmsum öðrum borgum í Evrópu. Þetta hefur borið hróður SoRyang víða, langt út fyrir hið nýja heimaland hennar, Austurríki. 

Þeim sem hafa hug á að vita meira um SoRuyang er hægt að benda á vefsíðu hennar eða þá "gúgla" SoRyang Yoo, SoRyang pianiste, eða eitthvað í þá veru. Þar er að finna mikinn fróðleik um feril hennar auk fjölda hljóðdæma frá tónleikum hennar.

Tildrög þessara tónleika eru í stuttu máli þau að Friðrik Ólafsson, stórmeistari, kynntist SoRyang á skákhátíð í Dresden sem hann hefur sótt undanfarin ár, en það er sambýlismaður SoRyang, Dr. Rainer Maas, sem staðið hefur fyrir skákhátíðinni í samvinnu við borgaryfirvöld í Dresden og skákhreyfinguna þar í borg. Þess má geta að Dr.Maas, sem rekur öflug fyrirtæki í byggingariðnaðinum í Dresden og víðar, er einlægur aðdáandi skáklistarinnar og hefur látið gott af sér leiða í hennar þágu. Er nú Dresden talin sú borg í Þýskalandi þar sem skáklífið stendur með hvað mestum blóma og eru þó margar um hituna.

Til þess að gera langa sögu stutta þá hafði Dr. Maas samband við Friðrik fyrir nokkru og tjáði honum áhuga þeirra SoRyang á því að koma til Íslands í sumar og ferðast hér um. Hann gat þess í leiðinni að SoRyang gæti vel hugsað sér að halda hér einn konsert eða svo. Brást Skáksamband Íslands vel við óskinni og tók að sér skipulagningu tónleikanna.

Meiri upplýsingar um tónleikana er að finna á vefsíðu Hörpu.

Kaupa miða með 20% afslætti

Carlsen vann Wei Yi í Bilbaó - heimsmeistarinn og áskorandinn tefla saman í dag

Heimsmeistarinn Magnus Carlsen (2855) lét tapið gegn Hikaru Nakamura (2787) ekki sitja í sér lengi og vann kínverska undradrenginn Wei Yi (2696) í annarri umferð Bilbaó-mótsins í gær. Öðrum skákum lauk með jafntefli - þar á meðal hörkuskák Anish Giri (2785) og Sergey Karjakin (2773). Í dag mætast Karjakin og Carlsen og verður fróðlegt að fylgjast með þeirri skák - en þeir mætast einmitt í heimsmeistaraeinvígi í nóvember  í New York.

Nakamura (2787) er efstur með 4 stig en veitt er 3 stig fyrir sigur og 1 fyrir jafntefli. Carlsen er annar með 3 stig.

Lesa má lesa um gang mála í gær á Chess.com.

• Heimasíða mótsins
• Beinar útsendingar (hefjast kl. 14)

Nakamura vann Carlsen í Bilbaó - MVL efstur í Dortmund

Hikaru Nakamura (2787) vann heimsmeistarann Magnus Carlsen (2855) í fyrstu umferð ofurmótsins í Bilbaó. Söguleg tíðindi enda hafði Nakamura aldrei unnið Carlsen fyrr en í gær en tapað fyrir honum 12 sinnum! Öðrum skákum lauk með jafntefli. Önnur umferð er nýhafin en þar teflir Carlsen við Wei Yi (2696), Nakamura við landa sinn Wesley So (2770) og áskorandinn Karjakin (2773) við Anish Giri (2785). 

Lesa má um skák Carlsen og Nakamura á Chess.com.

• Heimasíða mótsins
• Beinar útsendingar (hefjast kl. 14)

Frídagur er í dag í Dortmund. Þegar fjórum umferðum af sjö er lokið er Maxime Vachier-Lagrave (2798) efstur með 3 vinninga. Taflmennska Kramniks (2812) gegn Buhmann (2653) hefur vakið mikla athygli en þar fórnaði næststigahæsti skákmaður heims tveimur mönnum og síðar drottningunni. Honum tókst þó ekki að vinna. Hægt er að lesa um skákina á Chess.com.

Mótinu er framhaldið á morgun. Þá mætast meðal annars Kramnik og Caruana (2810). 

 

• Heimasíða mótsins
• Beinar útsendingar (Chess24) - hefjast kl. 13:15

Ólympíumót 16ára og yngri framundan: hitað upp gegn fyrrum Ólympíumeisturum

Ólympíumót 16ára og yngri fer fram síðar í mánuðinum í Slóvakíu. Skáksamband Íslands sendir lið til keppni. Liðið skipa Vignir Vatnar Stefánsson, Hilmir Freyr Heimisson, Björn Hólm Birkisson, Bárður Örn Birkisson og Svava Þorsteinsdóttir en eitt stúlknasæti er í hverri sveit. Krakkarnir hafa verið dugleg við æfingar undanfarið sem hafa verið í umsjón og skipulagningu Skákskóla Íslands. Liðsstjóri sveitarinnar verður Kjartan Maack varaforseti Skáksambandsins.

Á þriðjudaginn kemur mun sveitin fá góða upphitun. Þá munu sjálfir Ólympíumeistararnir 16ára og yngri frá árinu 1995 etja kappi við sveitina. Sú sveit eins og flestir muna vann afar merkilegan sigur á þessu móti fyrir röskum tuttugu árum og lifir setning liðsstjórans Haralds Baldurssonar góðu lífi þegar hann sagði; "ekki má vanmeta Rússana".

Viðureignin fer fram á þriðjudaginn klukkan 12:00. Tefldar verða fjórar hraðskákir allir við alla og fer viðureignin fram á útitaflinu við Lækjargötu. Áhorfendur hvattir til að mæta!

Hér má lesa gamalt viðtal við Braga og Björn Þorfinnssyni sem voru meðal liðsmanna 1995; http://www.mbl.is/greinasafn/grein/203459/

Sveitirnar á Ól má sjá hér; http://www.chess-results.com/tnr229224.aspx?lan=1&art=32&turdet=YES&flag=30&wi=984

Hjörvar sigurvegari alþjóðlegs móts í Cardiff í Wales

Stórmeistarinn Hjörvar Steinn Grétarsson (2550) sigraði á alþjóðlegu móti sem lauk í dag í Cardiff í Wales. Hjörvar gerði jafntefli við ensku stórmeistarana Peter Wells (2419) og Keith Arkell (2455) í lokaumferðunum tveimur. Hjörvar hlaut 8 vinninga og varð hálfum vinningi fyrir ofan næsta mann, búlgarska stórmeistarann, Marian Petrov (2461).

Hjörvar hækkar um 6 stig fyrir frammistöðuna á mótinu. Birkir Karl Sigurðsson (1883) hlaut 5 vinninga. Frammistaðan hans samsvaraði 1988 skákstigum og hækkaði hann um 30 stig fyrir hana. 

• Heimasíða mótsins
• Chess-Results
• Beinar útsendingar

Georgískir stórmeistarar reyndust Gumma erfiðir - góð niðurstaða engu að síður

Georgískir stórmeistarar reyndust Guðmundi Kjartanssyni erfiðir í lokaumferðunum tveimur á alþjóðlegu móti í Ankara í Tyrklandi. Í næstsíðustu umferð tapaði hann fyrir Konstanine Shanava (2526) og þeirri síðustu fyrir Girogi Bagaturov (2407). Niðurstaðan engu að síður góð hjá Gumma. Hann hlaut 6½ vinning og endaði í 8.-11. sæti.

Frammistaðan samsvaraði 2448 skákstigum og hækkar um hann 6 dýrmæt skákstig. 

 

• Heimasíða mótsins
• Beinar útsendingar

Stefán sigurvegari á Sólarmóti Skákakademíunnar

Sólarmót Skákakademíunnar fór fram í síðustu viku. Tefldar voru fimm umferðir á mótinu sem fór fram á útitaflinu við Lækjargötu. Sautján vaskir keppendur voru mættir til leiks. Í hópnum voru m.a. liðsmenn Ólympíusveitar Íslands 16ára og yngri sem mun síðar í mánuðinum tefla á Ólympíumótinu sem fer fram í Slóveníu. Einnig var gaman að þátttöku Hallgerðar Helgu Þorsteinsdóttur landsliðskonu sem er nú stödd hér á landi og undirbýr sig fyrir Ólympíumótið í Bakú.

Eins og jafnan í svo stuttum mótum þá ná ekki allir sterkustu skákmennirnir að tefla innbyrðis. Þeir félagar Björn Ívar Karlsson og Stefán Bergsson gerðu jafntefli í fyrstu umferð en gáfu svo öðrum keppendum engin grið og kom Stefán sjónarmun undan Birni í mark á hærri stigum.

Nánari úrslit hér:http://chess-results.com/tnr230408.aspx?lan=1&art=1&wi=821

 

 

 

Bilbao-mótið hefst í dag: Carlsen og Karjakin meðal keppenda - fjör í Dortmund

Ofurmótið í Bilbaó hefst í dag. Meðal keppenda eru Magnus Carlsen (2855) og áskorandinn Sergey Karjakin (2773) en þeir mætast í heimsmeistaraeinvígi í New York nóvember nk. Aðrir keppendur á mótinu eru Hikaru Nakamura (2787), Anish Giri (2785), Wesley So (2770) og Wei Yi (2696). Tefld er tvöföld umferð, alls 10 skákir.  

Í umferð dagsins teflir Carlsen við Nakamura, Karjakin við So og Giri við Wei Yi.

• Heimasíða mótsins
• Beinar útsendingar (hefjast kl. 14)

Bilbao-ofurmótið er ekki eina ofurmótið í gangi því sterkt mót er einnig haldið í Dortmund. Þar hefur taflmennskan verið kröftugleg. Eftir 3 umferðir eru Maxime Vachier-Lagrave (2798) og Kúbumaðurinn Lenier Dominguez (2713) efstir með 2 vinninga. Fjórða umferð hefst kl. 13:15.

• Heimasíða mótsins
• Beinar útsendingar (Chess24) - hefjast kl. 13:15

Sumarskákmót í Vin í dag

Vinaskákfélagið & Hrókurinn bjóða til skákmóts í Vin, miðvikudaginn 13. júlí klukkan 13. Sex umferðir, 7 mínútna umhugsunartími. Veitingar að hætti hússins. Allir hjartanlega velkomnir.

Sumarskákmót í Vin í dag klukkan 13 - Allir velkomnir

Vinaskákfélagið og Hrókurinn bjóða til Sumarskákmóts í Vin, Hverfisgötu 47, miðvikudaginn 13. júlí klukkan 13. Tefldar verða sex umferðir með 7 mínútna umhugsunartíma. Í leikhléi verða veitingar að hætti hússins og eru allir hjartanlega velkomnir.

Vinaskákfélagið var stofnað árið 2003 í kjölfar þess að Hróksmenn komu fyrsta skipti í heimsókn í Vin, sem rekið er af Rauða krossinum í Reykjavík. Síðan hefur skáklífið blómstrað og er Vinaskákfélagið eitthvert líflegasta og skemmtilegasta skákfélag landsins.

Á nýliðnu Íslandsmóti skákfélaga sigraði A-sveit Vinaskákfélagsins með miklum yfirburðum í 3. deild og B-sveitin hreppti brons í 4. deild.

Nýlega gengu hinir vösku skákkempur Áttavilltra til liðs við Vinaskákfélagið, sem mun tefla fram a.m.k. þremur sveitum á Íslandsmótinu í vetur.

Forseti Vinaskákfélagsins er Róbert Lagerman og varaforseti Hrafn Jökulsson. Burðarásar í starfi félagsins eru Hörður Jónasson og Hjálmar Hrafn Sigurvaldason sem undanfarið ár hafa m.a. staðið fyrir vikulegum skákæfingum í Hlutverkasetrinu.

Fastar æfingar eru í Vin á mánudögum kl. 13, en þar er teflt alla daga.