Jón Kristinn Þorgeirsson er Íslandsmeistari í netskák

Akureyringurinn knái, Jón Kristinn Þorgeirsson (Jokksi99) sigraði af fádæma öryggi á Íslandsmótinu í netskák sem fram fór í fyrradag, sunnudag. Fullyrða má að Jón, sem um árabil hefur borið höfuð og herðar yfir aðra norðlenska skákmenn, hafi verið í algjörum sérflokki á mótinu. Jón fékk alls 10,5 vinninga í 11 skákum, 1,5 vinningum meira en næsti maður, og leyfði aðeins eitt jafntefli, gegn fráfarandi sexföldum Íslandsmeistara, Davíð Kjartanssyni (Yuwono).

FIDE-meistarinn Magnús Örn Úlafsson (AC130-Ghostrider) endaði í 2. sæti með 9 vinninga og FM Davíð Kjartansson (Yuwono) var í þriðja sæti með 8 vinninga.

Mótið í ár var nokkuð óhefðbundið, skipt var um vettvang fyrir mótið sem hefur átt lögheimili og varnarþing á skákþjóninum ICC um langt árabil, og teflt á Chess.com. Vistaskiptin reyndust vandasöm, en allt gekk upp á endanum og verður vart annað séð en að keppendur hafi tekið breytingunni vel.

57 keppendur tóku þátt í ár, flestir Íslendingar en einnig var nokkur fjöldi Grænlendinga sem ákveðið var að bjóða til þátttöku í ár. Tefldu þeir um óformlegan titil Grænlandsmeistara í netskák, en sæmdarheitið í þetta sinn hlaut meistarinn Ral Fleischer (SuperRal) frá Nuuk, en hann hlaut 5,5 vinninga úr skákunum 11. Brian Sørensen (privatbss) varð í 2. sæti, en hann hlaut alls 5 vinninga. Grænlendingar eru þegar farnir að undirbúa næsta mót og ætla sér enn stærri hluti árið 2017.

Keppendum eru færðar þakkir fyrir þátttökuna og vonumst við til að sjá sem flesta að ári.

• Skoða má öll úrslit og allar skákir mótsins hér.
• Lokastöðuna og úrslit í flokkum má svo skoða hér.

Aukaverðlaun

Aukaverðlaun eru í formi Demants áskriftaraðgangs á Chess.com

Demantsaðgangur veitir fullan aðgang að allri þjónustu vefsins. Sem dæmi má nefna byrjanagagnagrunn, skákþrautir, ýmiskonar skákkennsla, myndbönd og fleira.

Fimm mánuðir eru veittir fyrir 1. sæti og þrír fyrir 2. sæti í öllum flokkum.

 

U/2100

Tvíburarnir efnilegu, Björn Hólm (Bjorn_Holm) og Bárður Örn Birkissynir (Bardur_Orn), fengu einnig 8 vinninga líkt og Davíð, en voru með heldur lakari niðurstöðu eftir stigaútreikning. Þeir bræður vinna hins vegar U/2100 stiga flokkinn nokkuð örugglega, 1,5 vinningi á undan næsta manni. Björn reyndist vera með örlítið betri stöðu eftir stigaútreikning, eða 51 stig gegn 50,5 stigum Bárðar, og vinnur því 1. verðlaun í þeim flokki. Þess má til gamans geta að þeir bræður fengu einnig jafn marga vinninga á mótinu í fyrra og stigaútreikning þurfti til að skera úr um hvor væri ofar. 

U/1800

Ingvar Örn Birgisson (Harry_Kane) sigraði í flokki skákmanna með minna en 1800 skákstig, en hann endaði með 6,5 vinninga (36.25 stig). Aðalsteinn Thorarensen (adlthor23) var í 2. sæti í U/1800 stiga flokki, einnig með 6,5 vinninga (31.25) en örlítið lakari stig. 

Stigalausir

Knútur A Óskarsson (krummmi) sigraði nokkuð örugglega í flokki stigalausra, hlaut alls 6 vinninga, og Sveinbjörn Jón Ásgrímsson (SveinbjornJon) er í 2. sæti með 5 vinninga. 

Kvennaflokkur

Elsa María Kristínardóttir (EMK89) sigraði af miklu öryggi í kvennaflokki, hlaut alls sjö vinninga og endar í 8. sæti af 57 og Freyja Birkisdóttir (freyjab) var í 2. sæti. 

60 ára og eldri

FIDE-meistarinn Áskell Örn Kárason (Flatus) stóð sig best í flokki eldri og heldri skákmanna, en hann fékk alls sjö vinninga og endar í sjöunda sæti. Ögmundur Kristinsson (oddigulli) er í 2. sæti, hálfum vinningi á eftir Áskatli. 

15 ára og yngri

Ungstirnið Óskar Víkingur Davíðsson (Davidsson) sigraði af miklu öryggi í flokki yngri skákmanna, en hann fékk alls 6,5 vinninga. Halldór Atli Kristjánsson (CAustin9) er í 2. sæti með 4,5 vinninga.

Sjá nánar á heimasíðu Hugins.

Skákæfingar og kennsla að hefjast fyrir börn og unglinga í Þingeyjarsýslu

Sérstakar skákæfingar og kennsla fyrir börn á grunnskólaaldri í Þingeyjarsýslu hefjast miðvikudaginn 18. janúar. Skákæfingarnar verða ókeypis og fara þær fram í Seiglu – miðstöð sköpunar (áður Litlaulaugaskóli) í Reykjadal.

Frá síðasta skákmóti

Æfingarnar fara fram annan hvern miðvikudag til að byrja með og einn sunnudag í hverjum mánuði. Reiknað er með að hver æfing standi yfir í um einn og hálfan klukkutíma. Hluti af æfingatímanum verður nýttur til kennslu.

Æfingaáætlun í janúar og febrúar. (áætlun fyrir mars, apríl og maí birt síðar)

Miðvikudagur 18. jan      kl: 16:00
Sunnudagur 22. jan        kl: 13:30
Miðvikudagur 1. feb         kl: 16:00
Miðvikudagur 15. feb       kl: 16:00
Sunnudagur 26. feb         kl 13:30

Hermann Aðalsteinsson, Rúnar Ísleifsson, Smári Sigurðsson og Sigurbjörn Ásmundsson munu skiptast á um að sjá um skákæfingarnar í vetur. Einnig er stefnt að því að fá vanan skákkennara að sunnan í heimsókn eina helgi í vetur, en dagsetning liggur ekki fyrir.

Þar sem æfingarnar verða ókeypis er ekki nauðsynlegt að forskrá þátttakendur. Allur skákbúnaður verður til staðar.

Miklar líkur eru á því að hefðbundin skákmót fyrir börn og unglinga sem fara venjulega fram í mars og apríl í sýslunni verði haldin þegar einn af skákæfingartínumum er á áætlun í mars eða apríl. Eins er líklegt að samstarf verði við Skákfélag Akureyrar um barna og unglingamót með vorinu.

Allar nánari upplýsingar um fyrirkomulag skákæfinganna verða birtar á facebooksíðu skákfélagsins Hugins í Þingeyjarsýslu og eru foreldrar barna á svæðinu sem ekki eru nú þegar skráð þar hvött til að óska eftir aðgangi þar.

 

Allt "bók" nema Sveinbjörn!

Önnur umferð Skákþings Akureyrar var tefld í gær, sunnudag. Úrslit urðu þessi:

• Jón Kristinn-Tómas Veigar 1-0
• Andri-Hreinn              1-0
• Fannar-Karl               0-1
• Sveinbjörn-Haraldur       1-0
• Heiðar-Alex               0-1
• Gabríel-Ulker             0-1

Hér voru flest úrslit eins og við mátti búast skv. stigum, að undanskilinn skák Sveinbjörns og Haraldar. Þar spennti sá síðarnefndi bogann fullmikið í vinningstilraunum og var refsað grimmilega, enda Sveinbjörn miskunnarlaus við slíkar aðstæður. Skák Jóns Kristins og Tómasar virtist tvísýn í upphafi miðtafls, en eftir mistök hins síðarnefnda náði Akureyrarmeistarinn slíku taki á stöðunni að ekki varð rönd við reist. Andri vann og öruggan sigur; þjarmaði hægt og bítandi að Hreini sem missti endanlega tökin í tímahraki í lokin. Fannar Breki byggði upp mjög vænlega stöðu gegn Karli, en sást yfir taktískar brellur andstæðingsins og fékk þá á sig óstöðvandi sókn. Hér hafði reynslan sitt að segja, en Karl hefur sextíu ára forskot í því efni. Í skák Heiðars og Alex var staðan lengi tvísýn með jöfnum möguleikum; Alex fórnaði svo manni fyrir óljós færi og nokkur peð. Eftir því sem peðum Heiðars fór fækkandi jukust sigurvonir andstæðingsins, og þegar umframpeðin voru orðin fimm og eitt þeirra stefndi ljóslega upp í borð, lagði Heiðar niður vopnin.  Loka var það skák Gabríels og Ulker; þar sem svartur (svört?) jafnaði taflið auðveldlega og fékk betri stöðu, en nafni erkiengilsins hóf þá stórhættulegar sóknaraðgerðir. Svört brást við með gagnsókn sem ekki fékkst við ráðið og endaði sú glíma með máti. 

Að loknum tveimur umferðum eru fjórir keppendur nú með fullt hús, Jón Kristinn, Andri, Sveinbjörn og Karl. Þriðja umferð verður tefld nk. sunnudag og þá eigast við:

• Sveinbjörn og Jón Kristinn
• Karl og Andri
• Haraldur og Ulker
• Tómas og Alex
• Gabríel og Fannar
• Hreinn og Ágúst Ívar
• Heiðar situr hjá

Heimasíða SA

Chess-Results

Eljanov með fullt hús í Sjávarvík - Carlsen vann Wojtaszek

Pavel Eljanov (2755) er efstur með fullt hús á Tata Steel-mótinu að lokinni annarri umferð mótsins sem fram fór í gær. Úkraínubúinn viðkunnanlegi vann heimamanninn Loek Van Wely (2695). Heimsmeistarinn Magnus Carlsen (2840) vann Pólverjann Radoslaw Wojtaszek (2750) og er annar með 1,5 vinninga ásamt Indverjanum Harikrishna (2766) sem vann landa sinni Adhibian (2653). Öðrum skákum lauk með jafntefli. 

Þriðja umferð fer fram í dag. Þá teflir við nýjasta keppenda Reykjavíkurskákmótsins og Eljanov teflir við Herikrishna. Umferðin hefst kl. 12:30.

Austurríkismaðurinn Markus Ragger (2697) er efstur í b-flokki með fullt hús. Í 2.-4. sæti eru Ilia Smirin (2667), Gawain Jones (2665) og Benjamin Bok (2608).

Ítarlega umfjöllun um gang mála í gær má finna á Chess.com og á Chess24.

• Heimasíða mótsins
• Beinar útsendingar (heimasíða mótsins)
• Beinar útsendingar (Chess24)

Ólafur Guðmarsson sigraði á atkvöldi

Ólafur Guðmarsson sigraði á atkvöldi Hugins sem sem haldið var 9. janúar sl. Ólafur tefli vel á atkvöldinu og þjarmaði jafnt og að andstæðingum sínum, þannig að þegar upp var staðið lágu þeir allir í valnum og  7 vinningar komu í hús hjá honum í jafn mörgum skákum. Annar var Kristján Halldórsson með 6 vinninga og þriðji Vigfús Ó. Vigfússon með 5 vinninga. Ólafur dró Björgvin Kristbergsson í happdrættinu sem líkaði það vel. Báðir völdu þeir úttektarmiða frá American Style sem ekki hafa áður verið í boði á þessum skákkvöldum. Næsta skákkvöld verður mánudaginn 30. janúar og þá verður hraðkvöld.

Lokastaðan á atkvöldinu:

1. Ólafur Guðmarsson, 7v/7
2. Kristján Halldórsson, 6v
3. Vigfús Ó. Vigfússon, 5v
4. Hjálmar Sigurvaldason, 2v
5. Finnur Kr. Finnsson, 2v
6. Björgvin Kristbergsson, 1v
7. Hörður Jónasson, 1v

Úrslitin í chess-results

Eljanov byrjar best í Sjávarvík

Pavel Eljanov (2755) byrjar best allra á Tata Steel-mótinu í Sjávarvík (Wijk aan Zee) sem hófst í gær. Eljanov vann Richard Rapport (2702). Öllum öðrum skákum umferðinnar leuk með jafntefli. Þar með talið skák Wesley So (2808) og Magnúsar Carlsen (2840).

Önnur umferð hefst núna kl. 12:30 og þá teflir heimsmeistarinn við Radoslaw Wojtaszek (2750).Í b-flokknum byrjuðu Benjamin Bok (2608), Markus Ragger (2697) og Jorden Van Foreest (2612) best allra. 

Ítarlega umfjöllun um gang mála í gær má finna á Chess.com og á Chess24.

• Heimasíða mótsins
• Beinar útsendingar (heimasíða mótsins)
• Beinar útsendingar (Chess24)

Íslandsmótið í netskák fer fram í kvöld

XXI. Íslandsmótið í netskák fer fram sunnudaginn 15. janúar Mótið fer fram á vefsíðunni Chess.com og hefst kl. 20:00. Mótið er öllum opið og er teflt er einum flokki.

 

Mótið var áður á dagskrá þann 30. desember s.l., en því miður þurfti að aflýsa mótinu vegna óviðráðanlegra aðstæðna.

Í fyrstu var talið að tæknibilun hefði orðið til þess að fjöldi þátttakenda gat ekki opnað mótið. Nú liggur fyrir að svo var ekki. Orsökin reyndist vera allt önnur og mannlegri, en í ljós kom að fjöldi keppenda misskildi kerfið og tókst ekki að opna mótið með réttum hætti.

Það er því afar mikilvægt að allir, sérstaklega þeir sem gátu ekki tekið þátt síðast, kynni sér vel leiðbeiningar sem bæði má finna hér og verða sendar í tölvupósti á skráð netfang þátttakenda.

Athugið að þeir sem eru með ókeypis aðgang að Chess.com geta aðeins teflt í þremur mótum í hverri viku. Gæta verður að því að sá kvóti hafi ekki klárast fyrir mótið.

 

Davíð Kjartansson er núverandi Íslandsmeistari í netskák, en hann hefur unnið mótið oftast allra eða sex sinnum!

Það er Skákfélagið Huginn sem stendur fyrir mótinu.

Spurningar eða athugasemdir er hægt að senda á netfangið [e-mail]

 

ATHUGIÐ

• ATH. Nauðsynlegt er að keppendur séu fyrirfram skráðir og búnir að opna mótið áður en það hefst. Beinn tengill á mótið verður auglýstur (hér) sólarhring fyrir mót.
• Mótið er tímastillt og fer sjálfkrafa af stað kl. 20, sunnudaginn 15. janúar. Ekki verður hægt að bæta keppendum í mótið eftir að það hefst, ekki einu sinni skráðum keppendum.
• Lokað verður fyrir skráningu kl. 18:00, sunnudaginn 15. desember – Ekki verður tekið við skráningum eftir þann tíma.
• Athugið að þeir sem eru með ókeypis aðgang að Chess.com geta aðeins teflt í þremur mótum í hverri viku. Gæta verður að því að sá kvóti hafi ekki klárast fyrir mótið.

 

1. Skráning. Athugið að ljúka verður báðum skrefum til að vera skráður í mótið.

Allir verða að fara á síðu mótsins á Chess.com og smella á „Join“ þar. Athugið að síða mótsins er EKKI mótið sjálft.

Vinsamlegast athugið að ljúka þarf báðum skrefum hér að neðan til að vera fullskráður í mótið.

1.1. Annars vegar er nauðsynlegt að fylla út skráningarformið, en öðruvísi er ekki hægt að bera kennsl á keppendur vegna verðlauna.

1.2. Hins vegar þurfa keppendur að skrá sig í hóp mótsins á Chess.com, en öðruvísi sjá þeir ekki mótið á vefnum. Athugið að hópur mótsins á Chess.com er ekki mótið sjálft.

 

Þeir sem skráðu sig til leiks fyrir mótið þann 30. desember, þurfa ekki að skrá sig aftur. Hægt er að skoða keppendalistann hér og athuga hvort notandanafn sé ekki örugglega litað grænt, þá er skráningin í gildi og í lagi.

Þeir sem ekki ljúka báðum skrefunum, eru ekki skráðir í mótið og geta ekki tekið þátt. Hægt er að skoða keppendalistann hér og athuga hvort notandanafn sé ekki örugglega litað grænt, þá er skráningin í lagi.

 

2. Tímamörk og leiðbeiningar til að opna mótið

Svona lítur mótsglugginn út – Nauðsynlegt er að smella á „Join“ þarna og það verður að gerast FYRIR upphaf móts.

Tímamörk eru 3 + 2 (3 mínútur + 2 viðbótarsekúndur á hvern leik). Tefldar eru 11 umferðir.

2.1. Einfaldast er að nota beinan tengil á mótið (verður auglýstur sólarhring fyrir mót) og smella á „Join“ takkann (eins og á myndinni hér til hliðar). Join takkinn birtist kl. 19, sunnudaginn 15. janúar.

2.2. Mikilvægt er að það sé gert áður en mótið hefst, en ekki verður hægt að bæta við keppendum eftir að mótið er hafið, ekki einu sinni skráðum keppendum.

 

Öruggast er að opna mótið með beina tenglinum (auglýstur sólarhring fyrir mót) strax kl. 19, sunnudaginn 15. janúar og smella á „join“.

Athugið að þeir sem eru með ókeypis aðgang að Chess.com geta aðeins teflt í þremur mótum í hverri viku. Gæta verður að því að sá kvóti hafi ekki klárast fyrir mótið.

Lendi keppendur í vandræðum með að opna mótið, er nauðsynlegt að láta vita af því strax (kl. 19) svo mögulegt sé að leysa úr því. Senda skal póst á netfangið [e-mail].

Vefstjóri Chess.com verður á svæðinu til að fylgjast með, og leðibeina, ef eitthvað er að.

 

Ókeypis að skrá notanda

Þeir sem ekki eru skráðir á Chess.com geta skráð sig á vef þeirra en það er ókeypis.

Bent er á að einfalt er að endurnýja lykilorð, hafi það tapast, með því að fara á þessa slóð – https://www.chess.com/forgot – og skrá þar inn netfang.

Athugið að þeir sem eru með ókeypis aðgang að Chess.com geta aðeins teflt í þremur mótum í hverri viku. Gæta verður að því að sá kvóti hafi ekki klárast fyrir mótið.

Skákþáttur Morgunblaðsins: Leikurinn sem birtist ekki á tölvuskjánum

Greinarhöfundur var að fylgjast með Guðmundi Kjartanssyni í beinni útsendingu frá lokaumferð Hastings-mótsins sl. fimmtudag. Hann var í baráttunni um efsta sætið, aðeins ½ vinningi á eftir efstu mönnum. Og taflmennska hans var skínandi góð. Indverskur andstæðingur hans reyndi að flækja taflið, fyrst með peðasókn á kóngsvæng og síðan einhverju sprikli á drottningarvæng. Guðmundur svaraði með því að gefa skiptamun og opna síðan á kóngsstöðu Indverjans. Gamalkunnir taktar Friðriks Ólafssonar frá Hastings á sjötta áratug síðustu aldar komu upp í hugann. Til þess að bæta um betur fórnaði Guðmundur manni. Hann var hrók undir en menn biðu eftir því að hann léki peði til f7. Fleira þurfti ekki til. En leikurinn sá birtist aldrei á tölvuskjánum; í staðinn lék hann biskup upp í borð og varð mát. Sorgleg endalok:

Hastings 2017; 9. umferð:

Guðmundur Kjartansson – Das Arghyadip

Enskur leikur

1. c4 Rf6 2. Rc3 e5 3. Rf3 Rc6 4. g3 d5 5. cxd5 Rxd5 6. Bg2 Rb6 7.

O-O Be7 8. Hb1 g5

Viktor Kortsnoj lék þessu fyrstur manna en Guðmundur lætur ekki slá sig út af laginu.

9. d3 g4 10. Rd2 Be6 11. b4 h5 12. b5 Ra5 13. Dc2 a6 14. Bb2 f6 15. a4 h4 16. Rce4 hxg3 17. hxg3 Rd5 18. Hfc1 axb5 19. axb5 b6 20. Rc3 Rb4 21. Dd1 Ra2 22. Rxa2 Bxa2

23. Da4!

Hann gat líka leikið 23. Bxa8 og siðan lokað með e2-e4.

23. ... Bxb1 24. Hxb1 Hg8 25. De4! Ha7 26. d4! Kf8 27. dxe5! Dxd2 28. exf6 Bc5

Og nú blasir vinningsleiðin við, 29. f7! t.d. 29. ... Kxf7 30. Df5+ Ke7 31. Bf6+ Ke8 32. De6+ Kf8 33. Bd5! og svartur er varnarlaus. 

29. Bc1??

Það er ekki hægt að skýra þennan afleik, sem eyðileggur frábæra skák, með því að Guðmundur hafi leikið of hratt. Það gerði hann ekki og hann átti nægan tíma á klukkunni. Eina skýringin hlýtur að vera sú að hann hafið talið hrókinn valda e1-reitinn.

29. .. De1+ 30. Kh2 Hh8+

– og hvítur gafst upp.

 

Skákþing Reykjavíkur og Nóa Síríus-mótið

Af skráningu keppenda að dæma má ætla að Skákþing Reykjavíkur sem hefst á morgun í húsakynnum TR við Faxafen verði vel skipað en meðal þátttakenda eru Guðmundur Kjartansson, bræðurnir Bragi og Björn Þorfinnssynir og Dagur Ragnarsson. Fleiri kunnir meistarar eiga eftir að bætast í hópinn en tefldar verða níu umferðir eftir svissneska kerfinu og fara þær fram á sunnudögum og miðvikudögum. Skákstjóri verður Ríkharður Sveinsson. 

Á þriðjudaginn kl. 19 hefst svo í Stúkunni á Kópavogsvelli Nóa Sírusmótið – Gestamót Hugins og Breiðabliks. Það er Jón Þorvaldsson skákmótafrömuður sem hefur haft veg og vanda af skipulagningunni undanfarin ár og hefur af mikilli fortölulist tekist að fá til keppni marga nafntogaða skákmeistara. Teflt er einu sinni í viku í tveim riðlum, alls sex umferðir. Dagsetningar mótsins rekast ekki á við Skákþing Reykjavíkur svo að sumir verða með í báðum mótunum. Mesta athygli vekur þátttaka Jóhanns Hjartarsonar og Jóns L. Árnasonar en aðrir kunnir kappar eru Helgi Áss Grétarsson, Þröstur Þórhallsson, Guðmundur Kjartansson, Jón Viktor Gunnarsson, Björn Þorfinnsson, Björgvin Jónsson og svo margir af sterkustu ungu skákmönnum okkar. Þá hefur Jóni tekist að laða til keppni á ný meistara sem ekki hafa teflt lengi, Jón Hálfdánarson og Björn Halldórsson.

------------------

Skákþættir Morgunblaðsins eftir Helga Ólafsson birtast u.þ.b. viku síðar á Skák.is.

Grein þessi birtist í Morgunblaðinu 7. janúar 2017

Skákþættir Morgunblaðsins

[Event "Hastings Masters (2016/17)"] [Site "Hastings ENG"] [Date "2017.01.04"] [EventDate "2016.12.28"] [Round "9.4"] [Result "0-1"] [White "Gudmundur Kjartansson"] [Black "Arghyadip Das"] [ECO "A29"] [WhiteElo "?"] [BlackElo "?"] [PlyCount "60"] 1. c4 Nf6 2. Nc3 e5 3. Nf3 Nc6 4. g3 d5 5. cxd5 Nxd5 6. Bg2 Nb6 7. O-O Be7 8. Rb1 g5 9. d3 g4 10. Nd2 Be6 11. b4 h5 12. b5 Na5 13. Qc2 a6 14. Bb2 f6 15. a4 h4 16. Nce4 hxg3 17. hxg3 Nd5 18. Rfc1 axb5 19. axb5 b6 20. Nc3 Nb4 21. Qd1 Na2 22. Nxa2 Bxa2 23. Qa4 Bxb1 24. Rxb1 Rg8 25. Qe4 Ra7 26. d4 Kf8 27. dxe5 Qxd2 28. exf6 Bc5 29. Bc1 Qe1+ 30. Kh2 Rh8+ 0-1

Tata Steel mótið hafið í Sjávarvík - Magnus Carlsen tekur þátt.

Tata Steel-mótið hófst fyrr í dag í Sjávarvík (Wijk aan Zee) í Hollandi. Meðal keppenda er Magnus Carlsen (2840), Wesley So (2808) og Sergey Karjakin (2785). Í fyrstu umferð mætir Magnus Wesley So. 

Keppendalista a-flokksins má finna hér. Heimildir ritstjóra að tveir keppenda a-flokksins kunni tveir að taka þátt í GAMMA Reykjavíkurskákmótsins í apríl nk. Meðalstigin eru 2751 skákstig.

B-flokkurinn er einnig óárennilegur. Þeir herma heimildir rtistjóra að a.m.k. fjórir keppendanna verði með á GAMMA Reykjavíkurskákmótinu. Keppendalistann má finna hér. Meðalstigin eru 2593 skákstig.

• Heimasíða mótsins
• Beinar útsendingar (heimasíða mótsins)
• Beinar útsendingar (Chess24)

Hart barist á Skákþingi Reykjavíkur

Önnur umferð Skákþings Reykjavíkur fór fram í fyrradag og hart barist á öllum borðum. Flestar viðureignir fóru eins og vænta mátti en þó skellti Sigurjón Haraldsson (1784) í lága drifið, tefldi traust og uppskar jafntefli gegn skákmeistara TR 2014, Þorvarði Fannari Ólafssyni (2188). Svipað varð upp á teningnum hjá Halldóri Garðarssyni (1837) og Júlíusi Friðjónssyni (2145). Þá urðu næstum stórtíðindi þegar Alexander Oliver Mai (1837) var kominn með gerunnið tafl gegn Benedikt Jónassyni (2208). Benni er hins vegar ekki fæddur í gær og gefst ekki upp fyrr en í fulla hnefana. Augnabliks aðgæsluleysi Alexanders kostaði hann skákina þegar hann lenti í mátneti.

Næsta umferð verður tefld n.k. sunnudag, 15. janúar, kl. 13:00 og þá fara viðureignir að jafnast aðeins og mætast m.a. á efstu borðum Guðmundur Kjartansson og Lenka Ptacnikova, Benedikt Jónasson og Björn Þorfinnsson og Guðmundur Gíslason og Daði Ómarsson.

Nánar á heimasíðu TR

• Heimasíða TR
• Chess-Results