EM ungmenna - pistill 4. umferðar

Ágæt umferð í dag.  Við vorum einungis stigalægri í sjö skákum af tíu, stigahærri í tveimur og u.þ.b. jöfn stig í einni.  Uppskeran í dag reyndist vera fimm vinningar eða 50%.  Rennum yfir skákirnar í dag.

U-12 drengir:

Jan Machan, CZE (1608) - Friðrik Þjálfi Stefánsson (0)  ½-½

Stutt skák hjá yngsta keppandanum í dag.  Frönsk vörn, steindrepið á d5 og jafntefli fljótlega.  Það má svo sem búast við svona skákum í frönsku vörninni.  Það er samt mjög athyglivert að Friðrik er greinilega ekki metinn sem skyldusigur þó að hann sé stigalaus.  Menn sjá greinilega styrkleika hans í skákunum sem hann er búinn að tefla.

U-14 stúlkur:

Anna Strzelczyk, POL (1823) - Geirþrúður Anna Guðmundsdóttir (0)  ½-½

Annað stutt jafntefli í franskri vörn.  Hér var þó talsvert eftir af skákinni en jafntefli með svörtu gegn þokkalega stigaháum keppanda er vel ásættanlegt.

U-14 drengir:

Radmilo Dimitrijevic, SRB (2186) - Dagur Andri Friðgeirsson (1812)  1-0

Hversu óheppinn getur maður orðið?  Með hálfan vinning af þremur og fær tæplega 2200 stiga mann.  Þá er ekkert annað að gera en að tefla vel.  Dagur tefldi mjög vel framan af í dag og var gjörsamlega að ganga frá sterkum andstæðingi sínum.  Því miður valdi hann ekki rétta framhaldið (sem hann var þó búinn að sjá) og tapaði.  Dagur getur greinilega unnið hvern sem er í þessum flokki og það er aðeins tímaspursmál að vinningarnir fari að skila sér.

U-16 stúlkur:

Gabriella Hitter, HUN (2075) - Hallgerður Helga Þorsteinsdóttir (1907)  ½-½

Hallgerður er búin að vera að tefla vel á mótinu.  Þessi skák var engin undantekning á því.  Segja má að andstæðingur hennar hafi rétt hangið á jafntefli í þessari skák.

Lateefah Messam, ENG (1890) - Jóhanna Björg Jóhannsdóttir (1655)  0-1

Tími til kominn að við fengjum að njóta smá heppni.  Jóhanna fékk mjög slæma stöðu fljótlega eftir byrjunina, tapaði peði og fékk raunverulega koltapað tafl.  Maður vinnur hins vegar ekki með því að gefast upp og að lokum hafði Jóhanna sigur í skrautlegri skák.

U-16 drengir:

Haik G. Vardanian, ARM (2177) - Hjörvar Steinn Grétarsson (2299)  ½-½

Í þessari skák gerðist aldrei neitt merkilegt.  Staðan lokaðist og niðurstaðan því jafntefli.

Patrekur Maron Magnússon (1872) - Nikola Potpara, MNE (1883)  1-0

Fljótlega eftir byrjunina fékk Patrekur heldur verri stöðu.  Hann tefldi vörnina vel í framhaldinu og eftir mikla baráttu hafði hann loks sigur.  Tími til kominn að barátta hans og dugnaður skili sigri.

U-18 stúlkur:

Tinna Kristín Finnbogadóttir (1655) - Melodi Dincel, TUR (1845)  0-1

Ekki góð skák hjá Tinnu.  Hún tefldi þó byrjunina ágætlega en brenndi sig á því að sækja of skart fram með peðum í stað þess að koma öllum mönnunum út.  Fyrirvaralaust vafði mát í borði yfir og skákin tapaðist í framhaldinu.  Tinna hefur samt verið að tefla vel á mótinu og á eftir að uppskera samkvæmt því.

U-18 drengir:

Sverrir Þorgeirsson (2102) - Aydin Acarbay, TUR (1825)  0-1

Sverrir hefur verið frekar lánlaus á þessu móti og var það enn í dag.  Hann tefldi mjög athyglisverða skák (slavi með skiptum litum) og fékk fína stöðu.  Hann teygði sig þó of langt í að vinna peð áður en kóngurinn var kominn í skjól og kóngstaðan gaf eftir.  Slæmt tap í skák sem ekki hefði þurft að fara svona illa.  Sverrir kemst vonandi á skrið í næstu umferðum.

Daði Ómarsson (2029) - Daniel Izso, HUN (2233)  1-0

Flott skák hjá Daða.  Raunverulega voru u.þ.b. 20 fyrstu leikirnir tefldir heima!  Við vorum með nákvæmlega sömu stöðuna á eldhúsborðinu í morgun og kom upp í skákinni.  Daði sýndi góðan skilning á stöðunni og vann þarna góðan sigur.

Davíð Ólafsson

Nýr pistill frá Eddu

Nýjan pistil frá Eddu Sveinsdóttir fararstjóra á EM ungmenna má nú finna á bloggsíðu hennar. 

Úrslitaviðureign Bola og TR fer fram á morgun

Úrslitaviðureign Taflfélags Bolungarvíkur og Taflfélags Reykjavíkur fer fram á morgun föstudag á Bolungarvík.  Lið félaganna skipa:

TR

• 1. Stefán Krisjánsson
• 2. Arnar Gunnarsson
• 3. Guðmundur Kjartansson
• 4. Bergsteinn Einarsson
• 5. Júlíus Friðjónsso
• 6. Kristján Örn Elíasson
• Liðsstjóri og varamaður:  Óttar Felix Hauksson

 

TB

• 1. Jón L Árnason
• 2. Jón Viktor Gunnarsson
• 3. Bragi Þorfinnsson
• 4. Dagur Arngrímsson
• 5. Guðmundur Gíslason
• 6. Magnús Pálmi Örnólfsson
• 7. Halldór Grétar Einarsson
• 8. Árni Ármann Árnason
• 9. Unnsteinn Sigurjónsson
• 10. Magnús Sigurjónsson
• Liðsstjóri:  Guðmundur Daðason

 

EM ungmenna - Pistill 3. umferða

 

Í þriðju umferð, líkt og fyrri tveimur umferðunum, vorum við stigalægri á flestum borðum.  Við vorum þó stigahærri á tveimur borðum og jöfn stig voru á einu borði en á sjö borðum vorum við öllu stigalægri.  Stelpurnar héldu uppi heiðri okkar og skiluðu þremur af fjórum vinningum í hús.

U-12 drengir:

Friðrik Þjálfi Stefánsson (0) -  Nassim Azizi, GER (0)  ½-½

Friðrik Þjálfi fékk fína stöðu út úr byrjuninni og vann mjög fljótlega peð.  Skömmu síðar yfirsást honum gervi-mannsfórn andstæðingsins sem kostaði hann tvö peð og var þá orðinn peði undir.  Friðrik tefldi framhaldið vel og var aldrei í taphættu.  Ágæt skák sem endaði með jafntefli.

U-14 stúlkur:

Geirþrúður Anna Guðmundsdóttir (0) - Svetlana Mirzabekyan, ARM (1847)  1-0

Góð skák hjá Geirþrúði í dag.  Hún tefldi byrjunina vel, fékk heldur betri stöðu og var með áætlunina á hreinu alla skákina.  Virkilega vel teflt og öruggur sigur.

 

U-14 drengir:

Dagur Andri Friðgeirsson (1812) - Ivaylo Stoyanov, BUL (1978)  0-1

Dagur fór í röng uppskipti í byrjuninni og fékk heldur verri stöðu.  Andstæðingur hans tefldi framhaldið mjög vel og sigraði örugglega í þessari skák.  Dagur var með á hreinu hvað fór úrskeiðis hjá honum og mun ekki lenda í svona aftur.

U-16 stúlkur:

Hallgerður Helga Þorsteinsdóttir (1907) - Maryann McDonald, SCO (0)  1-0

Hallgerður heldur áfram að tefla vel.  Sú skoska reyndist ekki mikil fyrirstaða og vann Hallgerður þessa skák örugglega.

 

Jóhanna Björg Jóhannsdóttir (1655) - Ebru Kaplan, TUR (1878)  1-0

Góð skák hjá Jóhönnu.  Tyrkneska stúlkan var lögð að velli í skemmtilegri skák.  Hér nýtti Jóhanna styrkleika sinn í taktík vel og vann laglegan sigur.  Þessu vil ég sjá meira af!

U-16 drengir:

Hjörvar Steinn Grétarsson (2299) - Pawel Kowalczyk, POL (2138)  ½-½

Mikil baráttuskák þar sem Hjörvar var með heldur betra alla skákina.  Pólverjinn varðist vel og niðurstaðan því jafntefli.

Sebastian Muheim, SVI (2104) - Patrekur Maron Magnússon (1872)  1-0

Patrekur víxlaði leikjum í byrjuninni og fékk ekki alveg stöðuna sem hann vildi.  Hann missti síðan af besta framhaldinu og tapaði í afar erfiðri skák.

U-18 stúlkur:

Maria Dvoranova, SVK (1891) - Tinna Kristín Finnbogadóttir (1655)  1-0

Ágæt skák lengi framan af hjá Tinnu.  Andstæðingur hennar hélt þó frumkvæðinu alla skákina og ónákvæmi í vörninni kostuðu þessa skák.

U-18 drengir:

Anastasios Pavlidis, GRE (2270) - Sverrir Þorgeirsson (2102)  1-0

Sérlega flókin og lífleg skák.  Stundum koma hinar furðulegustu stöður með háu flækjustigi upp hjá Sverri og var þetta ein af þeim.  Sverrir missti þráðinn við skemmtilega riddarafórn andstæðingsins á f7 og fann ekki best framhaldið og mátti því sætta sig við tap.

Nikolai Shukh, ARM (2370) - Daði Ómarsson (2029)  1-0

Mikil baráttuskák hjá Daða með svörtu gegn mjög sterkum andstæðingi.  Skákin var lengi vel í jafnvægi en andstæðingur Daða tefldi mjög vel og knúði fram sigur.  Daði var samt ekki langt frá því að ná punkti þarna.

Davíð Ólafsson

Fimmtudagsmót TR hefjast í kvöld kl. 19.30

Tefldar verða 7 umferðir með 7 mínútna umhugsunartíma og er teflt í Skákhöll TR, Faxafeni 12.  Húsið opnar kl. 19.10.

Þátttökugjald er kr 500 en ókeypis fyrir 15 ára og yngri og boðið verður upp á léttar veitingar án endurgjalds.  Mótin eru opin öllum.  Nánari upplýsingar um fyrirkomulag mótanna má finna á vef Taflfélags Reykjavíkur, http://taflfelag.is/?c=frettir&id=394&lid=&pid=

Stjórn Taflfélags Reykjavíkur hvetur alla skákáhugamenn til að mæta og upplifa stemninguna í Skákhöllinni.

Hallgerður, Jóhanna og Geirþrúður unnu í þriðju umferð

Kvenfólkinu gekk vel í þriðju umferð Evrópumóts ungmenna sem fram fór Herceg Novi í Svartfjallalandi í dag.  Hallgerður Helga Þorsteinsdóttir, Jóhanna Björg Jóhannsdóttir og Geirþrúður Anna Guðmundsson unnu allar.   Hjörvar Steinn Grétarsson og Friðrik Þjálfi Stefánsson gerðu jafntefli.  Hjörvar er í hópi efstu manna í sínum flokki með 2½ vinning, Hallgerður hefur 2 vinninga og Geirþrúður hefur 1½ vinning.

Daði Ómarsson, Friðrik Þjálfi, Jóhanna hafa 1 vinning, Sverrir Þorgeirsson, Dagur Andri Friðgeirsson og Tinna Kristín Finnbogadóttir hafa hálfan vinning en Patrekur Maron Magnússon er ekki kominn á blað.   

Ég vil sem fyrr mæla með tveimur góðum en gjörólíkum pistlum frá skákstað.  Davíð fjallar um sjálfa taflmennskuna í pistli hér á Skák.is en Edda Sveinsdóttir fararstjóri fjallar um allt annað á bloggsíðu sinni.

Úrslit 3. umferðar

 

Rd.		Name	Rtg	FED	Pts.	Re.	Group
Thorgeirsson Sverrir  2102 ISL Rp:2085 Pts. 0,5
3		Pavlidis Anastasios	2270	GRE	1,5	0	Boys U18
Omarsson Dadi  2029 ISL Rp:2203 Pts. 1,0
3	FM	Shukh Nikolai	2370	RUS	2,0	0	Boys U18
Gretarsson Hjorvar Steinn  2299 ISL Rp:2384 Pts. 2,5
3		Kowalczyk Pawel	2138	POL	2,5	½	Boys U16
Magnusson Patrekur Maron  1872 ISL Rp:1462 Pts. 0,0
3		Muheim Sebastian	2104	SUI	1,0	0	Boys U16
Fridgeirsson Dagur Andri  1812 ISL Rp:1754 Pts. 0,5
3		Stoyanov Ivaylo	1978	BUL	1,5	0	Boys U14
Stefansson Fridrik Thjalfi  0 ISL Pts. 1,0
3		Azizi Nassim	0	GER	1,0	½	Boys U12
Finnbogadottir Tinna Kristin  1655 ISL Rp:1681 Pts. 0,5
3		Dvoranova Maria	1891	SVK	1,5	0	Girls U18
Thorsteinsdottir Hallgerdur  1907 ISL Pts. 2,0
3		McDonald Maryann	0	SCO	1,0	1	Girls U16
Johannsdottir Johanna Bjorg  1655 ISL Rp:1790 Pts. 1,0
3		Kaplan Ebru	1878	TUR	0,0	1	Girls U16
Gudmundsdottir Geirthrudur Ann  0 ISL Rp:1961 Pts. 1,5
3		Mirzabekyan Svetlana	1847	ARM	0,5	1	Girls U14

Röðun 4. umferðar:

 

Rd.		Name	Rtg	FED	Pts.	Re.	Group
Thorgeirsson Sverrir  2102 ISL Rp:2085 Pts. 0,5
4		Acarbay Aydin	1825	TUR	0,5		Boys U18
Omarsson Dadi  2029 ISL Rp:2203 Pts. 1,0
4		Izso Daniel	2233	HUN	1,0		Boys U18
Gretarsson Hjorvar Steinn  2299 ISL Rp:2384 Pts. 2,5
4		Vardanian Haik G.	2177	ARM	2,5		Boys U16
Magnusson Patrekur Maron  1872 ISL Rp:1462 Pts. 0,0
4		Potpara Nikola	1833	MNE	0,0		Boys U16
Fridgeirsson Dagur Andri  1812 ISL Rp:1754 Pts. 0,5
4		Dimitrijevic Radmilo	2186	SRB	0,5		Boys U14
Stefansson Fridrik Thjalfi  0 ISL Pts. 1,0
4		Machan Jan	1608	CZE	1,0		Boys U12
Finnbogadottir Tinna Kristin  1655 ISL Rp:1681 Pts. 0,5
4		Dincel Melodi	1845	TUR	0,5		Girls U18
Thorsteinsdottir Hallgerdur  1907 ISL Pts. 2,0
4		Hitter Gabriella	2075	HUN	2,0		Girls U16
Johannsdottir Johanna Bjorg  1655 ISL Rp:1790 Pts. 1,0
4		Messam-Sparks Lateefah	1904	ENG	1,0		Girls U16
Gudmundsdottir Geirthrudur Ann  0 ISL Rp:1961 Pts. 1,5
4		Strzelczyk Anna	1823	POL	1,5		Girls U14

• Heimasíða mótsins
• Bloggsíða Eddu Sveinsdóttur (fararstjóra)
• Chess-Results

Kosteniuk heimsmeistari kvenna

Jafntefli varð í fjórðu og síðustu skák heimsmeistaraeinvígis kvenna sem nú er nýlokið.  Rússneska skákdrottningin Alexandra Kosteniuk (2510) er því heimsmeistari kvenna en samtals lagði hún hina 14 ára kínversku stúlku Hou Yifan (2557) 2½-1½.  

Heimasíða mótsins

 

Þór sigraði á 15 mínútna móti

Þór Valtýsson sigraði á 15 mínútna mótinu hjá Skákfélagi Akureyrar sem var háð sl. sunnudag. Þór hlaut 5,5 vinning af 7 mögulegum.

Næstu menn voru:

2. Sigurður Arnarson 5.

3.-5. Ari Friðfinnsson, Gylfi Þórhallsson og Tómas Veigar Sigurðarson 4,5 v.

Fimmtudagskvöldið 18. september verður skákfélagið með 7 mínútna mót og hefst kl. 20.00. Gefin verða þrjú stig fyrir sigur og eitt stig fyrir jafntefli.

 

Pistill frá Eddu

Skemmtilegan pistil frá Eddu fararstjóra á EM ungmenna má nú finna á bloggsíðu hennar. 

EM ungmenna - pistill annarar umferðar

 

Önnur umferð á EM ungmenna var tefld í gær.  Líkt og í fyrstu umferð, þá vorum við stigalægri á 9 borðum af 10.  Hjörvar Steinn var aftur sá eini sem var stigahærri en andstæðingur sinn.  Skorið í þessari umferð var örlítið betra en í umferðinni í gær, 3,5 vinningar úr 10 skákum, en aftur hefðum við auðveldlega getað fengið fleiri vinninga.

 

U-12 drengir:

Stefan Manole, ROU (1865) - Friðrik Þjálfi Stefánsson (0)  1-0

Friðrik Þjálfi fékk ágæta stöðu út úr byrjuninni en missti þráðinn í skákinni og brást ekki rétt við undarlegum leikjum andstæðingsins og því fór sem fór.  Friðrik átti að geta betur hér og sýnir það vonandi í næstu umferðum

 

U-14 stúlkur:

Irina Baraeva, RUS (2083) - Geirþrúður Anna Guðmundsdóttir (0)  1-0

Geirþrúður átti hér í höggi við sterka rússneska stelpu.  Byrjunin lofaði mjög góðu og fékk hún fínustu stöðu úr byrjuninni en slæmur afleikur kostaði mikið liðstap og skákina þar með.  Það er samt gaman að sjá að Geirþrúður hefur í fullt erindi í sterkustu stelpurnar í þessum flokki og teflir ótrauð til vinnings gegn þeim.

 

U-14 drengir:

David Wertanz, AUT (2010) - Dagur Andri Friðgeirsson (1812)  ½-½

Góð úrslit hjá Degi í dag.  Eftir erfiða byrjun og heldur verri stöðu rétti Dagur úr kútnum og fékk ágætis færi á að vinna skákina.  Andstæðingurinn varðist vel og niðurstaðan varð á endanum jafntefli.

 

U-16 stúlkur:

Julia Gorozhankina, RUS (2094) - Hallgerður Helga Þorsteinsdóttir (1907)  ½-½

Annað jafnteflið í röð hjá Hallgerði gegn mun stigahærri stelpu.  Hallgerður tefldi mjög traust í dag og var skákin í járnum allan tímann.  Sérlega glæsileg byrjun hjá Hallgerði í þessu móti.

 

Spela Kolaric, SLO (1890) - Jóhanna Björg Jóhannsdóttir (1655)  1-0

Jóhanna fékk fína stöðu úr byrjuninni en missti aðeins þráðinn í viðleitni sinni til að leggja gildrur fyrir andstæðinginn.  Oftast er betra að tefla stöðuna á heilbrigðan hátt frekar en að einbeita sér að því að búa til gildrur.

 

U-16 drengir:

Haik Tamazyan, ARM (2139) - Hjörvar Steinn Grétarsson (2399)  0-1

Önnur góð skák hjá Hjörvari sem vann andstæðing sinn mjög sannfærandi.  Hann hefur nú unnið báðar skákir sínar örugglega.

 

Patrekur Maron Magnússon (1872) - Dani Freitzon, ISR (2115)  0-1

Patrekur lék ónákvæmt í miðtaflinu og fékk verri stöðu.  Hann barðist þó hetjulega og eftir um 5 klukkustunda taflmennsku hafði hann náð jafnteflisstöðu en lék þá illa af sér og tapaði.  Gremjulegt tap þar sem baráttan var við það að tryggja Patreki jafntefli.

 

U-18 stúlkur:

Tinna Kristín Finnbogadóttir (1655) - Marieke Dirksen, NED (1933)  ½-½

Tinna sýndi að taflmennskan hjá henni gær var engin tilviljun.  Hún tefldi aftur mjög vel í dag og hafði frumkvæðið í skákinni lengi vel.  Að lokum leystist skákin þó upp í jafntefli.  Góður punktur hjá Tinnu gegn andstæðingi sem er u.þ.b. 300 stigum hærri en hún.

 

U-18 drengir:

Sverrir Þorgeirsson (2102) - Marian Bojchev, BUL (2406) 0-1

Sverrir tefldi mjög vel framan af og fékk ljómandi góða stöðu.  Andstæðingur hans náði hins vegar að rugla hann í ríminu með nauðvarnarfórn og fann Sverrir ekki rétta framhaldið og því fór sem fór.  Sverrir sýndi hér hversu sterkur skákmaður hann er orðinn og var með mikið stigahærri andstæðing sinn í köðlunum í þessari skák.

 

Daði Ómarsson (2029) - Matej Hrabusa, SVK (2246)  1-0

Ég reyndist sannspár um það að skákin í gær endurspeglaði engan vegin skákstyrkleika Daða.  Daði tefldi í dag eins og sá sem valdið hefur og valtaði yfir andstæðing sinn Najdorf afbrigði Sikileyjarvarnar.  Glæsilegur sigur.

Davíð Ólafsson