Útiskákmót á Lækjartorgi í dag

Skákakademía Reykjavíkur og Vinnuskóli Reykjavíkur standa að dag í að útiskákmóti við útitaflið á Lækjartorgi.  Mótið hefst kl. 13 og er öllum opið.  Ókeypis aðgangur.   Tefldar verða 6 umferðir með 7 mínútna umhugsunartíma og munu bragðgóð verðlaun (ís) vera í boði.

Slíkt útimót mun vera haldið alla miðvikudag út júlí.   

 

Björn og Davíð efstir í Rauðakrosshúsinu

Tíu manns mættu til leiks á hraðskákmót Skákfélags Vinjar og Hróksins sem haldið var í Rauðakrosshúsinu, Borgartúni 25, á mánudaginn. Á meðan Jóhann Thoroddsen, sálfræðingur hjá Rauða krossinum, var með fyrirlestur um sálrænan stuðning í einu horninu og hressar konur í prjónahóp voru á fullu í öðru, föndruðu skákmenn með fléttur og gambíta í miðjum sal og börðu klukkur.

Tefldar voru fimm umferðir með sjö mínútna umhugsunartíma og hart var tekist á. Þeir Björn Þorfinnsson og Davíð Kjartansson, sem eru ekki síður frægir fyrir takta á knattspyrnuvelli en við borðið, gerðu jafntefli en unnu annars andstæðinga sína og voru efstir með 4,5 vinninga. Hrannar Jónsson, Elsa María Kristínardóttir og Sigurjón Friðþjófsson fengu 3 og aðrir minna.  

Boðið var upp á heljarinnar súkkulaðikökur með kaffinu auk þess sem allir þátttakendur fengu bókavinning. Björn og Hrannar stýrðu mótinu af stakri snilld og allir fóru búttaðir og sáttir heim

Carlsen efstur í hálfleik í Dortmund eftir sigur á Naiditsch

Magnus Carlsen (2772) er einn efstur á Dortmund Sparkassen-mótinu eftir sigur á Þjóðverjanum Naiditsch (2697) í fimmtu umferð sem fram fór í dag.  Leko (2697) vann Bacrot (2721) og er í 2.-3. sæti ásamt Kramnik (2759) sem gerði jafntefli við Jakovenko (2760).  Frídagur er á morgun. 

Staðan:

• 1. Carlsen (2772) 3,5 v.
• 2.-3.Kramnik (2759) og Leko (2756) 3 v.
• 4. Jakovenko (2760) 2,5 v.
• 5. Bacrot (2721) 2 v.
• 6. Naiditsch (2697) 1 v.

Meðalstig á mótinu eru 2744 skákstig og tefld er tvöföld umferð.

Heimasíða mótsins

Vinjarskákmót í Rauðakrosshúsinu í dag

Mánudaginn 6. júlí, kl. 13:30 halda Skákfélag Vinjar og Hrókurinn skákmót í Rauðakrosshúsinu, Borgartúni 25.

Tefldar verða fimm umferðir eftir Monradkerfi þar sem umhugsunartími er sjö mínútur.

Vinningar fyrir efstu sætin auk þess sem dregnir verða út happadrættisvinningar.

Skákstjórar eru snillingarnir Björn Þorfinnsson og Hrannar Jónsson.

Allir hjartanlega velkomnir og auðvitað er heitt á könnunni.

Rauðakrosshúsið var opnað í byrjun mars sl. og þar er boðið upp á dagskrá alla daga: fyrirlestra, námskeið ýmiskonar auk þess sem sálfræðingar, prestar og ráðgjafar veita viðtöl. Tölvur eru á staðnum auk margskonar afþreyingar. Opnunartími er 12-17.

Kramnik sigraði Naiditsch í Dortmund - Carlsen og Kramnik efstir

Kramnik (2759) sigraði Naiditsch (2697) í fjórðu umferð Dortmund Sparkassen-mótsins, sem fram fór í dag í Dortmund.  Bacrot (2721) og Carlsen gerðu jafntefli sem og Jakovenko (2760) og Leko (2756).  Carlsen og Kramnik eru efstir með 2,5 vinning.

Staðan:

• 1.-2 Carlsen (2772) og Kramnik (2759) 2,5 v.
• 3.-5.Leko (2756), Bacrot (2721) og Jakovenko (2760) 2 v.
• 6. Naiditsch (2697) 1 v.

Meðalstig á mótinu eru 2744 skákstig og tefld er tvöföld umferð.

Heimasíða mótsins

Guðmundur gerði ekki jafntefli í síðustu umferð

FIDE-meistarinn Guðmundur Kjartansson (2388) tapaði fyrir enska skákmanninum Peter S Poobalasingam (2240) í níundu og síðustu umferð Big Slicks-mótsins sem fram fór í dag í Lundúnum.  Guðmundur hafði þar áður gert fimm jafntefli í röð.  Guðmundur hlaut 2,5 vinning og hafnaði í níunda sæti.  

Árangur Guðmundar samsvarar 2222 skákstigum og lækkar hann væntanlega um 30 stig fyrir frammistöðu sína. Guðmundur heldur nú  til Edinburgh í Skotlandi en hann tekur þar þátt í skoska meistaramótinu í skák sem fram fer 11.-19. júlí. 

Stórmeistararnir Keith Arkell (2517), Englandi, og Alexander Cherniav (2423), Rússlandi, urðu efstir og jafnir með 6,5 vinning.  Þriðji varð, Rússinn, Alexei Slavin (2308) með 5,5 vinning og náði þar með áfanga að alþjóðlegum meistaratitli.

Alls tóku 10 skákmenn þátt í efsta flokki og tefldu þeir allir við alla.  Til að ná áfanga að stórmeistaraáfanga þurfti 7 vinninga en til að ná áfanga að alþjóðlegum meistaratitli þurfti 5,5 vinning.

Heimasíða mótsins

Guðmundur með fimmta jafnteflið í röð

FIDE-meistarinn Guðmundur Kjartansson (2388) gerði jafntefli við portúgalska stórmeistarann Luis Galego (2454) í áttundu og næstsíðustu umferð Big Slicks-mótsins, sem fram fór í Lundúnum í dag.  Guðmundur hefur 2,5 vinning og er níundi.  

Rússneski stórmeistarinn Alexander Cherniav (2423) er efstur með 6 vinninga.  Annar er enski stórmeistarinn Keith Arkell (2517) með 5,5 vinning.  Í 3.-4. sæti með 5 vinninga, eru Galego og Rússinn Alexei Slavin (2308).

Í lokaumferðinni, sem fram fer á morgun, teflir Guðmundur við enska skákmanninn og stigalægsta keppanda mótsins, Peter S Poobalasingam (2240).

Alls taka 10 skákmenn þátt í efsta flokki og tefla þeir allir við alla.  Til að ná áfanga að stórmeistaraáfanga þarf 7 vinninga en til að ná áfanga að alþjóðlegum meistaratitli þarf 5,5 vinning.

Heimasíða mótsins

Öllum skákunum í Dortmund lauk með jafntefli - Carlsen efstur

Öllum skákum þriðju umferðar Dortmund Sparkassen-mótsins lauk með jafntefli.  Þar á meðal skák Carlsen og Kramnik sem lauk með jafntefli eftir aðeins 19 leiki.  Carlsen (2772) er því sem fyrr efstur.  

Staðan:

• 1. Carlsen (2772) 2 v. af 3
• 2.-5. Leko (2756), Kramnik (2759), Bacrot (2721) og Jakovenko (2760) 1,5 v.
• 6. Naiditsch (2697) 1 v.

Meðalstig á mótinu eru 2744 skákstig og tefld er tvöföld umferð.

Heimasíða mótsins

Jakovenko sigraði Naiditsch í Dortmund - Carlsen efstur

Rússinn Dmitry Jakovenko (2760) sigraði Þjóðverjann Arkadij Naiditsch (2697) í 2. umferð Dortmunds-mótsins sem fram fór í dag.  Leko (2756) og Carlsen (2772) gerðu jafntefli sem og Kramnik (2759) og Bacrot (2721).  Carlsen er efstur með 1,5 vinning.

Staðan:

• 1. Carlsen (2772) 1,5 v. af 2
• 2.-5. Leko (2756), Kramnik (2759), Bacrot (2721) og Jakovenko (2760) 1 v.
• 6. Naiditsch (2697) 0,5 v.

Meðalstig á mótinu eru 2744 skákstig og tefld er tvöföld umferð.

Heimasíða mótsins

Davíð Kjartansson sigraði á fyrsta sumarmóti Vinnuskólans og Akademíunnar

Fyrsta sumarmót Vinnuskóla Reykjavíkur og Skákakademíu Reykjavíkur fór fram miðvikudaginn 1.júlí síðastliðinn við útitaflið í Lækjargötu. Mótið hófst kl.13.00 og voru tefldar fimm umferðir með 7 mín. umhugsunartíma. Veðrið var afar milt og gott þótt að sólin hafi ekki látið á sér kræla að þessu sinni. Alls tóku 24 skákmenn þátt í mótinu og settu börn úr skák-og leikjanámskeiði Skákakademíu Reykjavíkur sem og unglingar úr Landnemahópi Vinnuskólans í Reykjavík mikinn svip á mótið.

Ívar Örn Sverrisson, leiðbeinandi Landnemahópsins, hóf fyrstu umferð með því að etja kappi við hinn átta ára gamla Sigurð Kjartansson, sem er mikið efni. Til að byrja með leit staða Ívars ekkert sérstaklega vel út en svo kom að því að hann náði að snúa á litla labbakútinn og tryggja sér unnið tafl. Þá tók að saxast allverulega á tíma keppenda sem endaði með því að Ívar pattaði Sigurð! Báðir stóðu sig vel í mótinu, Ívar endaði með 3,5 vinninga en Sigurður 2,5.

Það kom hinsvegar engum á óvart að FIDE-meistarinn Davíð Kjartansson bar sigur úr býtum með fullu húsi en næstir komu þeir Stefán Bergsson og Ólafur Kjaran með fjóra vinninga. Þar sem léttleikinn var svo sannarlega í fyrirrúmi á mótinu var ákveðið að Davíð myndi leggja sigurinn í mótinu að veði gegn Stefáni Bergssyni (sem var hærri á stigum en Ólafur) í einni úrslitaskák í lokin. Sú skák fór fram á sjálfu útitaflinu og var tefld með klukku. Tilgangurinn var sá að afsanna að skák væri ekki íþrótt en viðbúið að viðureignin yrði verulega athyglisverð ef keppendur kæmust í mikið tímahrak. Úrslitaskákin var spennandi og vel tefld af báðum keppendum en þegar þeir félagar voru farnir að herða verulega á gönguhraðanum þá varð Stefáni á fingurbrjótur sem Davíð nýtti sér til sigurs.

Báðir fengu þeir bragðgóð verðlaun frá ísbúðinni Dairy Queen á Ingólfstorgi. Það sama gilti um Odd Stefánsson, níu ára gamlan þátttakenda í skák-og leikjanámskeiði Skákakademíunnar, en hann var útnefndur „efnilegasti keppandinn" enda hlaut hann þrjá vinninga sem var afar vel gert. Smári Arnarson, jafnaldri Odds, fékk einnig þrjá vinninga en var lægri á stigum. Þá var brugðið á það ráð að veita sárabótarverðlaun sem var pakki af Match Attax fótboltamyndum. Mátti ekki á milli sjá hvor var sáttari með verðlaunin sín, Smári eða Oddur.

En fyrsta sumarmótið var afar velheppnað og er ráðlagt að slík mót verði haldin vikulega út júlí.