Stórmeistaramót CCP og MP banka markar upphaf 110 ára merkisafmælis Taflfélags Reykjavíkur

Sem kunnugt er hefur tölvuleikjafyrirtækið CCP valið að beina öllum bankaviðskiptum sínum til  MP banka á nýju ári og hafa þessi tvö fyrirtæki við þau tímamót sammælst um að standa jafnt að höfðinglegri gjöf til Taflfélags Reykjavíkur á 110 ára afmæli félagsins. Gjöfin er þrískipt. Í fyrsta lagi eru gefnar þrjátíu tölvuskákklukkur af bestu gerð. Í öðru lagi efna þau til þessa  Stórmeistaramóts CCP og MP banka með veglegum verðlaunum og þátttöku sex af fremstu stórmeisturum í sögu Taflfélagsins auk tveggja af sterkustu alþjóðlegu meisturum félagsins. Síðast en ekki síst veita CCP og MP banki Taflfélaginu myndarlegan rekstrarstyrk til barna- og unglingastarfs félagsins sem hefur verið ein af grunnstoðum félagsstarfsins.

Það er lofsvert að CCP og MP banki sýni á erfiðum tímum sterka samfélagsvitund og styrki áhugafélagsskap með þessum hætti. Það fer vel á því að Taflfélag Reykjavíkur verði fyrir valinu. Taflfélagið hefur starfað í hundrað og tíu ár og lifað tvenn aldamót. Félagsstarfið hefur farið í gegnum brotsjó efnahagskreppna og óárans en einnig tíma velgengni og glæstra sigra. Eins og í tölvuleikjum nútímans, þar sem CCP stendur í fararbroddi þróunar, er taflið íþrótt hugans þar sem snerpa og skjótleiki í hugsun sker oftast úr um hvar sigurinn lendir. Samhliða því þarf í taflíþróttinni,  eins og MP banki leggur áherslu á,  að sýna varfærni og byggja upp trausta stöðu, slíkt er vænlegast til árangurs jafnt í starfi sem og leik.

Keppendur og fyrirkomulag

Keppendur:

Arnar E. Gunnarsson TR (f. 1978) , alþjóðlegur meistari. Arnar er núverandi Atskák- og Hraðskákmeistari Íslands. Tífaldur Norðurlandameistari í skólaskák. Arnar hefur teflt í ólympíuliði Íslands og náð eftirminnilegum árangri á alþjóðlegum mótum.

Friðrik Ólafsson TR (f. 1935),  alþjóðlegur stórmeistari. Friðrik Ólafsson er stærsta nafn íslenskrar skáksögu. Sló í gegn á alþjóðavísu með sigri í Hastingsmótinu 1955 ásamt Viktor Kortsnoj. Náði frábærum árangri á millisvæðamótinu í Portoroz 1958 og var með í Áskorendamótinu um heimsmeistaratitilinn 1959. Í fremstu röð stórmeistara heimsins um árabil. Forseti alþjóðaskáksambandins 1978 - 1982.

Guðmundur Kjartansson TR (f. 1988),  alþjóðlegur meistari. Guðmundur er yngstur keppenda. Hann varð skákmeistari Taflfélags Reykjavíkur 2006 og náði alþjóðlega meistartitlinum sumarið 2009 á opnu móti í Tékklandi. Guðmundur er í fremstu röð ungra skákmanna á Íslandi um þessar mundir.

Helgi Áss Grétarsson TR (f. 1977),  alþjóðlegur stórmeistari. Helgi Áss náði þeim frábæra árangri að verða Heimsmeistari unglinga 20 ára og yngri í Matinhos í Brasilíu árið 1994 og hlaut í kjölfarið alþjóðlegan stórmeistaratitil í skák. Tvöfaldur Atskákmeistari Íslands.

Helgi Ólafsson TV (f. 1956),  alþjóðlegur stórmeistari. Unglingameistari Íslands 1970, kom frá Vestmannaeyjum,  sá og sigraði. Í fremstu röð íslenskra skákmanna allar götur síðan. Sexfaldur Íslandsmeistari í skák og fjórfaldur Atskákmeistari Íslands. Í ólympíuliði Íslands samfellt í þrjá áratugi. Landsliðsþjálfari og liðsstjóri skáklandsliðsins og skólastjóri Skákskóla Íslands.

Jóhann Hjartarson TB (f. 1963),  alþjóðlegur stórmeistari. Jóhann vann hug og hjörtu íslensku þjóðarinnar með frábærri frammistöðu sinni við skákborðið á níunda áratug síðustu aldar. Hann sigraði ásamt Valery Salov á millisvæðamótinu í Szirak í Ungverjalandi 1987 aðeins 24 ára að aldri og tryggði sér rétt á að tefla áskorendaeinvígi um heimsmeistaratitilinn í kjölfarið. Þar vann hann glæsilegan sigur á Viktor Kortsnoj 1988 en varð að láta í minni pokann fyrir Anatoly Karpov í einvígi í  átta manna úrslitum. Hann hefur verið stigahæstur íslenskra skákmanna síðan þá.

Jón L. Árnason TB (f. 1960), alþjóðlegur stórmeistari. Árið 1977 var ár  Jóns L. Árnasonar í íslenskri skáksögu. Hann varð Íslandsmeistari í skák um vorið og seinna á  árinu Heimsmeistari sveina 17 ára og yngri í Cagnes-Sur-Mer í  Frakklandi þar sem sjálfur Gary Kasparov, seinna heimsmeistari og  stigahæsti skákmaður frá upphafi varð að láta sér lynda þriðja sætið!  Jón L. Árnason tilheyrði "fjórmenningaklíkunni" svokölluðu ásamt þeim  Helga Ólafssyni, Jóhanni Hjartarsyni og Margeiri Péturssyni, en þeir fjórir skipuðu kjarnann í sterkasta skáklandsliði sem Ísland hefur átt til þessa .

Þröstur Þórhallsson TB (f. 1969) , alþjóðlegur stórmeistari. Margfaldur Íslandsmeistari í Atskák. Valin í ólympíulið Íslands í skák fyrst 1988 og hefur keppt á níu ólympíumótum fyrir Íslands hönd síðan þá. Skákmeistari Reykjavíkur oftar en flestir eða sex sinnum alls. Var um skeið formaður Taflfélagsins.


Fyrirkomulag:

Stórmeistarmót CCP og MP banka í tilefni 110 ára afmælis Taflfélags Reykjavíkur.

Verður haldið í salarkynnum CCP að Grandagarði 8, laugardaginn 9. janúar og hefst kl. 13:00.

Að lokinni stuttri setningarræðu verður dregið um töfluröð keppenda og hefst þá mótið.

Tefldar verða sjö umferðir, allir við alla. Umhugsunartíminn á hverja skák er 15 mínútur á mann.

Að lokinnu fjórðu umferð verður gert tíu mínútna hlé og geta keppendur þá aðeins teygt úr sér.

Áætluð mótslok eu kl.17:30 og fer fram verðlaunaafhending strax og úrslit eru kunn.

Aðgangur er ókeypis og eru allir skákunnendur velkomnir á mótið. Veitingar verða í boði CCP.

Til sýnis verður original Staunton skáksett frá 1864 framleitt af Jaques of London í eigu Björns Jónssonar.  Staunton skákmenn hafa verið staðallinn í heimsmeistaraeinvígjum og helstu alþjóðlegum mótum frá fyrsta Alþjóðlega skákmótinu  sem fór fram í London 1851.  Staunton menn voru notaðir í einvíginu Spassky - Fischer í Reykjavík 1972 

ÖLLUM SKÁKUNUM VERÐUR VARPAÐ Á STÓRT SÝNINGARTJALD OG JANFRAMT STREYMT Á INTERNETINU UM ALLAN HEIM Á MEÐAN Á MÓTINU STENDUR. SJÁ NÁNAR Á  CCP.IS,  MP.IS,  TAFLFELAG.IS OG SKAK.IS

Alþjóðlegt unglingamót Hellis fer fram næstu helgi

Alþjóðlegt unglingamót Hellis hefst nk. fimmtudag 7. janúar 2010. Teflt verður í Nýju stúkunni á Kópavogsvelli. Mótið verður 6 umferðir með tímamörkin 90 mínútur á skákina + 30 sekúndur á hvern leik. Dagskráin er sem hér segir:

Dagskrá:

• Fimmtudagur  7/1   Umferð 1: 19.30-24
• Föstudagur 8/1:      Umferð 2: 10-15
• Föstudagur 8/1:      Umferð 3: 17-22
• Laugardagur 9/1:    Umferð 4: 10-15
• Laugardagur 9/1:    Umferð 5: 17-22
• Sunnudagur 10/1:    Umferð 6: 9.00-14

Keppendur eru minntir á að mæta tímanlega í skákirnar. Dagskráin getur tekið smávægilegum breytingum.

Lokahóf og verðlaunaafhendin hefjast strax og síðustu skák lýkur.

Skráðir keppendur eru núna:

• Mattis Dolk                               1987
• Harald Berggren Torell               1983
• Angelina Fransson                     1877
• Frans Dahlstedt                         1871
• Linda Astrom                            1786
• Axel Akerman 
• Nökkvi Sverrisson                     1784
• Mikael Johann Karlsson             1714
• Johanna Björg Jóhannsdóttir     1705
• Eiríkur Örn Brynjarsson             1653
• Jón Kristinn Þorgeirsson            1647
• Emil Sigurðarson                      1609
• Páll Andrason                           1587
• Dagur Kjartansson                   1485
• Birkir Karl Sigurðsson               1446
• Brynjar Steingrímsson              1437

Verðlaun í mótinu eru: 

• 1. verðlaun: 30.000 ISK
• 2^. verðlaun: 20.000 ISK
• 3. verðlaun: 10.000 ISK
• 4. verðlaun:   5.000 ISK
• 5. verðlaun:   5.000 ISK

Styrktaraðilar mótsins eru Skákstyrktarsjóður Kópavogs og Skáksamband Íslands.

Guðmundur tapaði í næstsíðustu umferð í Hastings

Alþjóðlegi meistarinn Guðmundur Kjartansson (2391) tapaði fyrir enska FIDE-meistarann Robert Eames (2276) í áttundu og næstsíðustu umferð Hastings-mótsins, sem fór í dag.  Guðmundur hefur 4½ vinning og er í 28.-46. sæti.

Í níundu og síðustu umferð, sem fram fer á morgun, teflir Guðmundur við enska FIDE-meistarann Dave Ledger (2227). 

Efstir með 6½ vinning er stórmeistararnir  Andrei Istratescu (2624), Rúmeníu, og Mark Hebden (2522), Englandi. 

111 skákmenn taka þátt í Masters-flokknum og þar 9 stórmeistarar og  12 alþjóðlegir meistarar.  Guðmundur er 15. stigahæsti keppandinn.

• Heimasíða mótsins
• Skákirnar í beinni

 

Stórmeistaramót T.R. í samstarfi við CCP og MP banka

Í tilefni af 110 ára afmælisárs Taflfélags Reykjavíkur stendur félagið, ásamt CCP og MP Banka, að veglegu stórmeistaramóti laugardaginn 9. janúar.

Átta af sterkustu skákmönnum þjóðarinnar taka þátt, sex stórmeistarar og tveir alþjóðlegir meistarar. Mótið fer fram í höfuðstöðvum CCP að Grandagarði 8 og hefst klukkan 13.

Nánari upplýsingar er að finna á heimasíðu mótsins.

Atkvöld hjá Helli í kvöld

Taflfélagið Hellir heldur atkvöld mánudaginn  4. janúar 2010 og hefst mótið kl. 20:00. Fyrst eru tefldar 3 hraðskákir þar sem hvor keppandi hefur 5 mínútur til að ljúka skákinni og síðan þrjár atskákir, með tuttugu mínútna umhugsun.

Sigurvegarinn fær í verðlaun pizzu frá Dominos Pizzum. Þá hefur einnig verið tekinn upp sá siður að draga út af handahófi annan keppanda, sem einnig fær pizzu hjá Dominos Pizzum. Þar eiga allir jafna möguleika, án tillits til árangurs á mótinu. Þátttökugjöld eru kr. 300 fyrir félagsmenn (kr. 200 fyrir 15 ára og yngri) og kr. 500 fyrir aðra (kr. 300 fyrir 15 ára og yngri).

Guðmundur tapaði fyrir Hebden í Hastings

Alþjóðlegi meistarinn Guðmundur Kjartansson (2391) tapaði fyrir enska stórmeistaranum Mark Hebden (2522)í hörkuskák í sjöundu umferð Hastings-mótsins, sem fram fór í dag.   Guðmundur hefur 4½ vinning og er í 14.-24. sæti.

Töluvert er fjallað um skák Guðmundar í dag á Skákhorninu.  

Í áttundu og næstsíðustu umferð, sem fram fer á morgun, teflir Guðmundur við enska FIDE-meistarann Robert Eames (2276).  

Efstir með 5,5 vinning eru stórmeistararnir Yuri Drozdovskij (2625), Úkraínu, Zbnynek Hracek (2624), Tékklandi, Andri Istratescu (2624), Rúmeníu, Roman Eduuard (2620), Frakklandi, David Howell (2595) og Hebden, Englandi og enski alþjóðlegi meistarinn Simon Ansell (2387).  

111 skákmenn taka þátt í Masters-flokknum og þar 9 stórmeistarar og  12 alþjóðlegir meistarar.  Guðmundur er 15. stigahæsti keppandinn.

• Heimasíða mótsins
• Skákirnar í beinni

 

KORNAX mótið 2010 - Skákþing Reykjavíkur hefst 10. janúar

KORNAX mótið 2010 - Skákþing Reykjavíkur hefst sunnudaginn 10. janúar kl. 14. Tefldar verða 9 umferðir eftir svissnesku kerfi og eru tímamörk 1½ klst. á alla skákina auk 30 sek. á leik. Umferðir fara fram á miðvikudögum og föstudögum kl. 19.30 og á sunnudögum kl. 14.  Teflt er í húsnæði Taflfélags Reykjavíkur að Faxafeni 12. 

Skráning fer fram á heimasíðu TR og upplýsingar um þegar skráða keppendur má nálgast hér.  

Verðlaun:

• 1. sæti kr. 50.000
• 2. sæti kr. 30.000
• 3. sæti kr. 20.000
• Besti árangur undir 2000 skákstigum kr. 15.000 (íslensk stig gilda)
• Besti árangur undir 1800 skákstigum kr. 15.000 (íslensk stig gilda)

Sigurvegarinn hlýtur auk þess nafnbótina Skákmeistari Reykjavíkur 2010 og farandbikar til varðveislu í eitt ár.  Núverandi Skákmeistari Reykjavíkur er Hjörvar Steinn Grétarsson.

Þátttökugjöld:

• kr. 3.500 fyrir 16 ára og eldri
• kr. 2.000 fyrir 15 ára og yngri

 
Dagskrá:

 

• 1. umferð sunnudag   10. janúar  kl. 14
• 2. umferð miðvikudag 13. janúar  kl. 19.30
• 3. umferð föstudag     15. janúar  kl. 19.30
• 4. umferð sunnudag   17. janúar  kl. 14
• 5. umferð miðvikudag 20. janúar  kl. 19.30
• 6. umferð föstudag      22. janúar  kl. 19.30
• 7. umferð sunnudag    24. janúar  kl. 14
• 8. umferð miðvikudag 27. janúar  kl. 19.30
• 9. umferð föstudag      29. janúar  kl. 19.30

Skákþingið er reiknað til alþjóðlegra skákstiga.

Athugið að skráningu lýkur 15 mínútum fyrir auglýst upphaf móts, þ.e. kl. 13.45.

Hraðskákmót Reykjavíkur verður haldið sunnudaginn 31. janúar og hefst það kl. 14.00. Tefldar verða 2x7 umferðir eftir Monradkerfi.

Guðmundur sigraði í sjöttu umferð í Hastings

Alþjóðlegi meistarinn Guðmundur Kjartansson (2391) sigraði rússneska FIDE-meistarann Boris Furman (2223) í sjöttu umferð Hastings-mótsins sem fram fór í dag.  Guðmundur hefur 4½ vinning og er í 4.-11. sæti, hálfum vinningi á eftir efstu mönnum.  Guðmundur mætir enska stórmeistaranum Mark Hebden (2522) í sjöundu umferð sem fram fer á morgun.  Skákin verður sýnd beint á vefsíðu mótsins en hún hefst kl. 14:15.  

Töluvert er fjallað um skák Guðmundar í dag á Skákhorninu.  

Efstir með 5 vinninga eru stórmeistarnir Yuri Drozdovskij (2625), Úkraínu, Zbynek Hracek (2624), Tékklandi, og Andrei Istratescu (2624), Rúmeníu.

111 skákmenn taka þátt í Masters-flokknum og þar 9 stórmeistarar og  12 alþjóðlegir meistarar.  Guðmundur er 15. stigahæsti keppandinn.

• Heimasíða mótsins
• Skákirnar í beinni

 

Riddarinn: Öldungar heiðraðir

Í tengslum við nýársmót Riddarans, skákklúbbs eldri borgara á höfuðborgarsvæðinu, var ákveðið með fulltingi allra  klúbbfélaga sem eru yfir 30 að tölu að heiðra þá: Bjarna Linnet (82), Hauk Sveinsson( 86) og Sigurberg H. Elentínusson (82) með því að sæma þá stór- & heiðursriddaranafnbót í virðingar- og þakklætisskyni fyrir störf þeirra og þátttöku í klúbbnum allt frá stofnun hans fyrir meir en áratug síðan.

Þeir eru allir  í hópi stofnfélaga klúbbsins og hafa teflt í honum frá upphafi  sjálfum sér og öðrum til yndisauka og verið virkir í skákhreyfingunni um áratugaskeið.  Allir eru þeir öflugir og slyngir skákmenn og harðsnúnir á hvítum reitum og svörtum,  jafnframt því að vera traustir félagar og hvers manns hugljúfar í góðum skákvinahópi. Því voru þeir félagar með viðeigandi seramoníu að viðstöddum Sr. Gunnþór Ingasyni, verndara klúbbsins, slegnir til stór- og heiðursriddara af  virðingu og þakklæti fyrir:                        

> framlag þeirra  til klúbbsins

> drengskap þeirra og fórnfýsi

> hugkvæmni þeirra  og háttvísi

> og snilli þeirra   á skákborðinu

Því  til staðfestu var þeim síðan afhent riddarastytta með áletruðu nafni sínu, klúbbsins og ártali, ásamt  viðurkenningarskjali og ósk um að þeim megi ævinlega velfarnast innan og utan skákborðsins enn um langa hríð.

Því miður gat Bjarni ekki verið viðstaddur athöfnina en úr því verður bætt fljótlega.

Myndaalbúm

Atkvöld hjá Helli

Taflfélagið Hellir heldur atkvöld mánudaginn  4. janúar 2010 og hefst mótið kl. 20:00. Fyrst eru tefldar 3 hraðskákir þar sem hvor keppandi hefur 5 mínútur til að ljúka skákinni og síðan þrjár atskákir, með tuttugu mínútna umhugsun.

Sigurvegarinn fær í verðlaun pizzu frá Dominos Pizzum. Þá hefur einnig verið tekinn upp sá siður að draga út af handahófi annan keppanda, sem einnig fær pizzu hjá Dominos Pizzum. Þar eiga allir jafna möguleika, án tillits til árangurs á mótinu. Þátttökugjöld eru kr. 300 fyrir félagsmenn (kr. 200 fyrir 15 ára og yngri) og kr. 500 fyrir aðra (kr. 300 fyrir 15 ára og yngri).