Heimasókn Skákskóla Íslands á Höfn í Hornafirði

Helgina 6.-8. mars heimsótti undirritaður fyrir hönd Skákskóla Íslands Grunnskóla Hornafjarðar.  Föstudagurinn fór í það að heimsækja alla bekki skólans sem var hin besta skemmtun því nemendur voru mjög líflegir og vel með á nótunum.  Ekki skemmdi fyrir að Mugison var einnig á ferðinni um skólabyggingarnar og flutti nokkur lög ásamt gríðarlega skemmtilegum sögum af sjálfum sér.  Tilgangur föstudagsins var sá að kynna öllum nemendum skáklistina og hvetja þá til að mæta á helgarnámskeiðið.

Laugardagurinn fór svo allur í kennslu og var mæting grunnskólanemenda til mikillar fyrirmyndar en það mættu 67 krakkar á námskeiðin á laugardeginum þrátt fyrir að allnokkrir þeirra sem mest tefla kæmust ekki vegna keppnisferðar í körfubolta.  Aldursdreifing krakkanna spannaði allan skólann en þeir yngstu voru úr 1. bekk og þeir elstu úr 10. bekk.  Allir krakkarnir fengu svo skákverkefni með sér heim til að rifja upp það sem kennt var um daginn.

Á sunnudeginum var svo haldið skákmót þar sem rétt rúmlega þrjátíu nemendur mættu til leiks þrátt fyrir að mótið hæfist klukkan 10 að morgni.  Eftir harða keppni stóð Helgi Pálmason (8. bekk) uppi sem sigurvegari í eldri flokki, Guðbjartur Freyr Gunnarsson (10. bekk) varð annar og Agnar Jökull Imsland (7. bekk) varð þriðji. 

Í yngri flokki bar Sverrir Ketill Gunnarsson (4. bekk) sigur úr býtum, Jóel Ingason (4. bekk) varð annar og Björn Ómar Egilsson (4.bekk) varð þriðji.  Þetta var því sérlega góður dagur hjá 4. bekk.

Hjá stelpunum varð Adisa Mesetovic (5. bekk) efst eftir stigaútreikning en á eftir henni komu jafnar í 2.-4. sæti þær Alrún Irine Aparnita (6. bekk), Ylfa Beatrix Nilenjana (7. bekk) og Sigrún Salka Hermannsdóttir (5. bekk). 

Allir þessir krakkar fengu skákbók í verðlaun, en auk þess voru nokkrir keppendur dregnir út í happadrætti og fengu eftirtaldir einnig skákbók í verðlaun:  Jóhann Klemens (7. bekk), Bjarney Anna Þórisdóttir (4. bekk), Agnes Jóhannsdóttir (4. bekk), Oddleifur Eiríksson (2. bekk), Dagur Freyr Sævarsson (2. bekk), Margrét Ásgeirsdóttir (3. bekk) og Lellí (3. bekk) en stúlkan sú sagðist alltaf vera kölluð Lellí og taldi það algjörlega óþarft að skrá sig í mótið undir fullu nafni líkt og aðrir keppendur.

Aðrir keppendur í mótinu voru Darri Snær Nökkvason (7. bekk), Marteinn Eiríksson (7. bekk), Guðjón Vilberg Sigurðarson (3. bekk), Auðunn Ingason (2. bekk), Björgvin Ingi Valdimarsson (2. bekk), Birkir Þór Hauksson (7. bekk), Júlíus Aron Larsson (1. bekk), Alexandra Vieslva ( 3. bekk), Malín Ingadóttir (2. bekk), Björgvin Freyr Larsson (1. bekk), Hafdís Ýr Sævarsdóttir (2. bekk), Hafþór Logi Heiðarsson (2. bekk), Salóme Morávek (3. bekk) og Helgi Steinarr Júlíusson (3. bekk).

Tveir mjög ungir þátttakendur, tvíburarnir Júlíus Aron og Björgvin Freyr úr 1. bekk náðu eftirtektarverðum árangri í mótinu en Júlíus fékk 2,5 vinninga en Björgvin fékk 2 vinninga af 5 mögulegum.

Að lokum vil ég þakka krökkunum og kennurunum á Höfn fyrir stórskemmtilega helgi og vona ég skáklífið á Höfn eigi eftir að blómstra, því það er sannarlega nægur efniviður í krökkunum í bænum.  Að loku vil ég þakka Eygló Illugadóttur fyrir skipulagningu komu minnar og flutninga um bæinn.

Davíð Ólafsson

Rimaskóli Íslandsmeistari barnaskólasveita

Rimaskóli A sveit varð í dag Íslandsmeistari barnaskólasveita í skák. Í úrslitakeppninni hlaut sveit skólans 9 vinninga af 12 mögulegum og sigraði með yfirburðum.

 Í öðru sæti varð Grunnskóli Vestmannaeyja, Salaskóli í þriðja sæti og Glerárskóli í því fjórða.

Úrslitin urðu annars eftirfarandi:

Röð.	Team	1	2	3	4	Vinn.
1	Rimaskóli A	*	3	2	4	9,0
2	Grunnskóli Vestmannaeyja A	1	*	2½	3	6,5
3	Salaskóli A	2	1½	*	2	5,5
4	Glerárskóli Ak.	0	1	2	*	3,0

Greinilegt er, að skák er vinsæl í skólum landsins. Á síðasta ári tóku 17 sveitir þátt, en nú voru þær vel yfir 40. Jafnframt er ljóst, að efnilegir unglingar af báðum kynjum eru að koma upp í hrönnum.  Úrslit í undankeppninni má sjá á úrslitasíðunni, en þar sigraði Grunnskóli Vestmannaeyja.

Úrslitasveitirnar:

	Sigurlið a-sveitar Rimaskóla skipuðu þau: 1. Jón Trausti Harðarson, 2. Hrund Hauksdóttir, 3. Oliver Aron Johannesson, 4. Dagur Ragnarsson, 1v. Patrekur Þórsson.
	Í öðru sæti var harðsnúið lið Eyjapeyja úr Grunnskóla Vestmannaeyja sem varð efst í undankeppninni daginn áður. Liðið skipuðu: 1. Daði Steinn Jónsson, 2. Kristófer Gautason,  3. Ólafur Freyr Ólafsson, 4. Valur Marvin Pálsson.
	Í þriðja sæti varð svo Salaskóli, en fyrsta borðs maður skólans, Birkir Karl, sigraði allar skákir sínar, báða dagana!  Lið skólans skipuðu: 1. Birkir Karl Sigurðsson 2. Arnar Snæland,  3. Sindri Sigurður Jónsson,  4. Þormar Magnússon, 1v. Kára Stein Hlífarsson.
	Í fjórða sæti varð svo sveit Glerárskóla frá Akureyri.  Lið skólans skipuðu:  1. Hjörtur Snær Jónsson,  2. Hersteinn Heiðarsson,  3. Logi Rúnar Jónsson, 4. Birkir Freyr Hauksson.

Mótshaldarar veittu jafnframt borðaverðlaun fyrir bestan árangur í undankeppninni. Verðlaunahafar þar voru eftirfarandi:

1. borð. Birkir Karl Sigurðsson, Salaskóla A og Friðrik Þjálfi Stefánsson Grunnsk. Seltjarnarness. 7 af 7!
2. borð. Hrund Hauksdóttir, Rimaskóla A 7 af 7!
3. borð. Óliver Aron Jóhannesson, Rimaskóla og Ólafur Freyr Ólafsson Grunnsk. Vestmannaeyja 6 af 7.
4. borð Valur Marvin Pálsson, Grunnsk. Vestmannaeyja 7 af 7!

Nánari upplýsingar um gang mála má finna a heimasíðu SÍ

Listamenn leikskólanna sýna á Kjarvalsstöðum í dag

Skákakademía Reykjavíkur hefur unnið að skemmtilegu tilraunaverkefni með fjórum leikskólum á höfuðborgarsvæðinu ásamt barnaspítala Hringsins en skákfélagið Hrókurinn hefur verið með reglulegar kennsluheimsóknir þangað síðastliðin fjögur ár. Verkefnið gengur út á að kynna skák á frumlegan hátt gegnum skákkennslu og listsköpun. Verkefnið vakti mikla lukku og verður afrakstur margra mánaða vinnu nú sýndur í fundarsal Kjarvalsstaða sunnudaginn 8. mars kl. 13. Samkvæmt forsvarsmönnum verkefnisins hafa börnin fengið betri innsýn inn í hugmyndafræði skáklistarinnar og útrás fyrir sköpunargleðina og ímyndunaraflið með því að vinna sameiginlega að gerð skákborða í anda sýningarinnar Skáklist.

Leikskólarnir sem taka þátt í sýningunni eru Hlíðaborg, Lindarborg, Barónsborg og Njálsborg.

Grunnskóli Vestmannaeyja efstur í undanrásum

Í dag fór fram fyrri dagur Íslandsmóts barnaskólasveita.  A-sveit Grunnskóla Vestmannaeyja varð efst með 24,5 vinninga af 28 mögulegum.

Fjögur efstu liðin komast áfram í úrslit og keppa á morgun um einstök sæti og Íslandsmeristaratitilinn.

Þetta voru eftirtalin lið:

•   1. Grunnskóli Vestmannaeyja
•   2. Rimaskóli
•   3. Salaskóli
•   4. Glerárskóli, Akureyri.

Alls tóku 40 sveitir þátt sem verður að teljast afar góð þátttaka.

Sjá nánari fréttir um mótið á heimasíðu TV og heimasíðu Goðans. 

Íslandsmót barnaskólasveita hefst í dag

Íslandsmót barnaskólasveita 2009 fer fram í Rimaskóla í Reykjavík dagana 7. og 8. mars nk.  Fyrri daginn verða tefldar 7 umferðir eftir Monradkerfi - umhugsunartími 15 mín. á skák fyrir hvern keppenda.  Seinni daginn tefla fjórar efstu sveitirnar um Íslandsmeistaratitilinn - allir við alla.

Hver skóli getur sent fleiri en eina sveit - en hver sveit er skipuð fjórum nemendum 1. - 7. bekkjar grunnskóla (auk varamanna).  Keppendur skulu vera fæddir 1996 eða síðar.

Dagskrá:                    

• Laugardagur 7. mars  kl. 13.00          1.- 7. umferð
• Sunnudagur 8. mars  kl. 12.00          Úrslit

Sigurvegari mótsins hlýtur rétt til þátttöku á Norðurlandamóti barnaskólasveita sem fram fer á Íslandi í september næstkomandi. 

Skráning fer fram hjá Skáksambandi Íslands í síma 568 9141 virka daga kl. 10-13 og í tölvupósti: [e-mail]   Skráningu skal lokið í síðasta lagi 5. mars.

Athugið að það er mjög áríðandi að sveitirnar séu skráðar fyrirfram.

Skákmót á Árnamessu

Í tilefni af Árnamessu, ráðstefnu Lýðheilsustöðvar um forvarnarmál, í Stykkishólmi laugardaginn 14. mars, stendur stofnunin fyrir veglegu skákmóti fyrir grunnskólanemendur alls staðar af landinu.

Stefnt er að því að fá alla efnilegustu skákkrakka landsins til þátttöku á mótinu. Áhugasömum krökkum af Snæfellsnesi er sérstaklega boðið til mótsins.

• Keppt er um veglega eignarbikara og fjöldi verðlauna verður í boði.
• Teflt í þremur flokkum; fæddir 1993 - 1996, fæddir 1997 - 2002 og flokki Snæfellinga.
• Teflt verður í Grunnskólanum Stykkishólmi. Sex umferðir með 10 mínútna umhugsunarfresti. Mótstjórar verða þeir Helgi Árnason, form. Skákdeildar Fjölnis, og Páll Sigurðsson, form. Taflfélags Garðabæjar.

Skákmótið er, líkt og forvarnaráðstefnan, haldið í minningu um Árna Helgason heiðursborgara og bindindisfrömuð í Stykkishólmi, sem hefði orðið 95 ára þennan dag, en Árni lést 27. febrúar 2008.                                                           

Innifalið í þátttöku á skákmótinu:

• Rútuferð frá Reykjavík kl. 9:00 og til baka frá Stykkishólmi kl. 17:30
• Hádegisverður á Hótel Stykkishólmi
• Veitingar á skákmótinu í boði Sæfells hf.
• Fjöldi verðlauna og happdrætti
• Áritað þátttökuskjal frá Lýðheilsustöð                                              

Vinsamlegast tilkynnið þátttakendur til Skáksambands Íslands s. 568 9141 eða í tölvupósti [e-mail], í síðasta lagi föstudaginn 6. mars n.k. Allar frekari upplýsingar veitir Helgi Árnason s. 664 8320.

Sjá auglýsingu í viðhengi.

Skrár tengdar þessari bloggfærslu:

• skakmot_arnamessa_0_0.doc

TV vann stúlknalið Skákskólans

Skáksveit TV eingöngu skipuð skákmönnum búsettum í Eyjum vann stúlknalið Skákskóla Íslands 7:5 sl. fimmtudagskvöld. Viðureignin fór fram á ICC - vefnum en teflt var á 6 borðum, tvöföld umferð. Í liði TV voru margir þrautreyndir meistarar. Tímamörkin voru 15 10. 

Nýbakaður Vestmannaeyjameistari Björn Ívar Karlsson vann Íslandsmeistara kvenna Hallgerði Helgu Þorsteinsdóttur á 1. borði, 1 ½ : ½. Hallgerður var  með yfirburðastöðu í fyrri skákinni og missti gjörunnið tafl niðurt í jafntefli í þeirri seinni. 

Á 2. borði vann Elsa María Kristínardóttir Sigurjón Þorkelsson 2:0 en Sigurjón er margfaldur  Vestmannaeyjameistara og var taflmennska Elsu María þróttmikil og örugg.

Á 3. borði vann Sverrir Unnarsson Geirþrúði Önnu Guðmundsdóttur 1 ½ : ½ v og á 4. borði vann Ólafur Týr Guðjónsson Tinnu Kristínu Finnbogadóttur 1 ½ : ½. Tinna var með unnið tafl í fyrri skákinni og gat mátað Ólaf sem fyrr hafði þó misst af öflugum hróksleik. Seinni skákinni lauk með jafntefli eftir harða baráttu.

Á 5. borði skildu þau jöfn Stefán Gíslason og Sigríður Björg Helgadóttir 1:1. Sigríður gat tryggt sér nær unnið tafl eftir byrjunina í fyrri skákinni en eftir að hafa misst tækifærið vann Stefán úr stöðuyfirburðum sínum af miklu öryggi. Seinni skákina vann Sigríður hinsvegar örugglega.

Á 6. borði gerði Hrund Hauksdóttir og Daði Steinn Jónsson jafntefli í fyrri skákinni en seinni skákina tefldi Kristófer Gautason og vann sannfærandi sigur með svörtu. Samanlagt unnu Eyjamenn því 7:5.  Stúlkurnar virtust í það heila betur  að sér í byrjunum en mikil reynsla og góð barátta Eyjamanna reyndist þung á metunum.

Forföll voru hjá báðum liðum. Nökkvi Sverrisson gat ekki teflt vegna veikinda  og Jóhanna Björg Jóhannsdóttir var í skíðaferðalagi á Akureyri. 

Sjá einnig umfjöllun á heimasíðu TV.

Myndaalbúm frá Helga Árnasyni.

Íslandsmót barnaskólasveita - skráningarfrestur rennur út í dag

Íslandsmót barnaskólasveita 2009 fer fram í Rimaskóla í Reykjavík dagana 7. og 8. mars nk.  Fyrri daginn verða tefldar 7 umferðir eftir Monradkerfi - umhugsunartími 15 mín. á skák fyrir hvern keppenda.  Seinni daginn tefla fjórar efstu sveitirnar um Íslandsmeistaratitilinn - allir við alla.

Hver skóli getur sent fleiri en eina sveit - en hver sveit er skipuð fjórum nemendum 1. - 7. bekkjar grunnskóla (auk varamanna).  Keppendur skulu vera fæddir 1996 eða síðar.

Dagskrá:                    

• Laugardagur 7. mars  kl. 13.00          1.- 7. umferð
• Sunnudagur 8. mars  kl. 12.00          Úrslit

Sigurvegari mótsins hlýtur rétt til þátttöku á Norðurlandamóti barnaskólasveita sem fram fer á Íslandi í september næstkomandi. 

Skráning fer fram hjá Skáksambandi Íslands í síma 568 9141 virka daga kl. 10-13 og í tölvupósti: [e-mail]   Skráningu skal lokið í síðasta lagi 5. mars.

Athugið að það er mjög áríðandi að sveitirnar séu skráðar fyrirfram.

Stúlknalið Skákskólans mætir TV á netinu

Stúlknalið Skákskóla Íslands skipað þeim Hallgerði Helgu Þorsteinsdóttur, Elsa Maríu Kristínardóttur, Tinnu Kristínu Finnbogadóttir, Sigríði Björgu Helgadóttur, Geirþrúði Önnu Guðmundsdóttur og Hrund Hauksdóttur mun í kvöld kl. 20 heyja keppni á sex borðum á netinu við sveit Taflfélags Vestmannaeyja.

Tefld verður tvöföld umferð á ICC-vefnum og verður umhugsunartími 15 10 þ.e. 15 mínútur á hverja skák að viðbættum 10 sekúndum fyrir hvern leik. Þessi viðureign er m.a. hugsuð sem æfing fyrir þær stúlkur sem tefla á Norðurlandamóti stúlkna í Stokkhólmi í næsta mánuði.

Sveit TV verður væntanlega skipuð þeim Birni Ívari Karlssyni, Sverri Unnarssyni, Sigurjóni Þorkelssyni, Nökkva Sverrissyni, Ólafi Tý Guðjónssyni,  Þórarni Ólafssyni og Kristófer Gautasyni.

Keppnin fer fram í tölvusal Rimaskóla og tölvusal Framhaldsskólans í Vestmannaeyjum.

Jóhann Hjartarson með fyrirlestur á skemmtikvöldi hjá Helli 3. mars nk.

Þriðjudaginn 3. mars nk. heldur Taflfélagið Helli skemmtikvöld fyrir skákmenn á aldrinum 14 - 20 ára. Þetta er fyrsta skemmtikvöldið  af nokkrum sem Hellir hefur í hyggju að halda fyrir skákmenn á þessum aldri og á þessu skemmtikvöldi mun stórmeistarinn Jóhann Hjartarsson halda fyrirlestur. Jóhann er einn af þeim sem Íslendingum sem náð hafa hvað lengst í skáklistinni og meðan Jóhann var atvinnumaður í skák tefldi  hann eftirminnileg einvígi í undankeppnum heimsmeistaramótsins í skák og var í ólympíuliðunum sem náðu mjög góðum árangri í Dubai og Manilla. Hvort Jóhann tekur einhvern af þessum viðburðum fyrir eða eitthvað annað kemur í ljós.

Vegna viðhalds á félagsheimili Hellis verður skemmtikvöldið haldið í sal Skákskólans í Faxafeni 12 og hefst kl. 20. Eftir fyrirlesturinn verður slegið upp léttu skákmóti og þátttakendur gæða sér á pizzum. Ókeypis er fyrir félagsmenn í Helli en aðrir greiða kr. 500 fyrir pizzurnar. Nokkur boðssæti er laus fyrir þá sem uppfylla ekki alveg aldursmörkin og geta áhugasamir haft samband við Vigfús í síma 866-0116.