Gleðileg skák-jól!

Ritstjóri óskar skák- og skákáhugamönnum gleðilegra jóla og minnir skákmenn á öfluga jóladagskrá félaganna.

• 26. desember - Jólahraðskákmót TV
• 27. desember - Jólahraðskákmót SA
• 28. desember - Jólahraðskákmót TR
• 29. desember - Friðriksmót Landsbankans
• 30. desember - Íslandsmótið í netskák (ICC)

 

Kaupþing gefur Helli skákklukkur

Taflfélaginu Helli hafa borist að gjöf 20 skákklukkur. Þessi góða gjöf  sem kemur frá  Kaupþing í Mjódd  mun  nýtast félaginu vel í margþættri starfsemi þess. Segja má núna fyrst eigi félagið næg skákáhöld til að halda öll mót á þess vegum.

Kaupþing hefur ávallt verið félaginu góður bakhjarl og má þar nefna að bankinn hefur stutt dyggilega við Hjörvar Stein Grétarsson og þess fyrir utan hefur útibúið í Mjódd verið aðalstyrktaraðili alþjóðlegra móta félagsins bæði nú í ár sem og í fyrra.

Á myndinni er Baldvin Hrafnsson, útibússtjóri í Mjódd, að færa Gunnari Björnssyni, formanni Hellis, klukkurnar.   

Íslandsmótið í netskák fer fram á ICC 30. desember

Íslandsmótið í netskák fer fram sunnudaginn 30. desember á ICC og hefst kl. 20. Mótið er öllum opið og er teflt er einum flokki. Góð verðlauð að fjárhæð 75.000 kr., eru í boði Landsbankans.   Mótið er öllum opið og er teflt er einum flokki.  

Íslandsmótið í netskák er elsta landsmót í netskák í gervöllum heiminum en fyrsta Íslandsmótið fór fram 1996.   Tímamörk eru 4 2 (4 mínútur + 2 sekúndur á leik) og tefldar eru 9 umferðir.

Verðlaun:

1. kr. 30.000
2. kr. 20.000
3. kr. 10.000

Undir 2100 skákstigum (miðað við nýjustu íslensku skákstig):
1. kr. 5.000

Undir 1800 skákstigum (miðað við nýjustu íslensku skákstig):
1. kr. 5.000

Stigalausir:
1. kr. 5.000

Auk þess verða frímánuðir í boði frá ICC.

Mótið sjálft og  fyrirkomulag þess verður nánar kynnt þegar nær dregur.  

Unglinga- og stúlknameistaramót TR fer fram í dag

Unglinga- og Stúlknameistaramót T.R. hefst í dag kl. 17.00 í Skákhöllinni Faxafeni 12. Teflt verður í einum flokki og hlýtur efsti unglingurinn, sem er félagi í T.R., titilinn Unglingameistari T.R. 2007 og efsta stúlkan úr T.R. hlýtur titilinn Stúlknameistari T.R.

Mótið er opið öllum grunnskólabörnum.

Fischer-klukkumót fyrir norðan

Fimmtudagskvöldið 20. desember verður Skákfélag Akureyrar með Fischer klukkumót 3-2 (hraðskákmót). Keppnin hefst kl. 20.00 í Íþróttahöllinni.

Tómas Veigar hraðskákmeistari Goðans

Tómas Veigar Sigurðarson varð efstur á Hraðskákmóti skákfélagsins Goðans sem fram fór á Fosshóli í Þingeyjarsveit í kvöld og er því Hraðskákmeistari félagsins 2007.  Tómas fékk 12 vinninga af 13 mögulegum.  Baldur Daníelsson var sá eini sem náði að vinna Tómas.   Smári Sigurðsson, hraðskákmeistari Goðans frá því í fyrra, varð annar af félagsmönnum Goðans með 9 vinninga og Rúnar Ísleifsson varð þriðji með 8,5 vinninga.  Alls tóku 14 keppendur þátt í mótinu.  

 

 

 

 

Úrslit urðu eftirfarandi :

• 1.  Tómas Veigar Sigurðarson                      12 af 13 mögul.          gull
• 2.  Sigurður Eiríksson      (S.A.)                    11
• 3.  Sindri Guðjónsson      (T.G.)                     9,5
• 4.  Smári Sigurðsson                                   9                                silfur
• 5.  Rúnar Ísleifsson                                       8,5                            brons
• 6.  Jakob Sævar Sigurðsson                          8
• 7.  Baldur Daníelsson                                   7,5
• 8.  Sigurbjörn Ásmundsson                           6
• 9.  Hermann Aðalsteinsson                           5
• 10. Ármann Olgeirsson                                 4,5
• 11. Jóhann Sigurðsson                                 3,5
• 12. Heimir Bessason                                      3
• 13. Benedikt Þór Jóhannsson                        2                               gull
• 14. Ketill Tryggvason                                     1,5

Benedikt Þór sigraði í flokki 16 ára og yngri með 2 vinninga. Sigurður og Sindri kepptu sem gestir á mótinu þar sem þeir eru ekki félagsmenn í Goðanum

Friðriksmót Landsbankans fer fram 29. desember

Friðriksmót Landsbankans fer fram í aðalútibúi Landsbankans í Austurstræti laugardaginn 29. desember nk.og hefst kl. 14.00. Mótið er öllum opið meðan húsrúm leyfir, en þátttakendur eru hvattir til að skrá sig í tölvupósti á netfangið [e-mail] fyrir kl. 10 á laugardag. Húsrúm er miðað við 60 keppendur.    

Verðlaun eru sem hér segir:

• 1) 100.000 kr.
• 2) 60.000 kr.
• 3) 50.000 kr.
• 4) 30.000 kr.
• 5) 20.000 kr.

Aukaverðlaun:

• Efsti unglingurinn 16 ára og yngri: 10.000 kr.
• Efsta konan: 10.000 kr.
• Efsti maður með 2200 stig og minna: 10.000 kr.
• Efsti maður með 2000 stig og minna: 10.000 kr.

Tefldar verða 13 umferðir með 7 mínútna umhugsunartíma á mann og er reiknað með að mótinu ljúki um kl. 16.00.

Þetta er fjórða árið í röð sem Landsbanki Íslands og Skáksamband Íslands standa fyrir Friðriksmótinu í skák, en mótið er haldið til heiðurs Friðriki Ólafssyni, fyrsta stórmeistara Íslendinga. Margir af sterkustu stórmeisturum landsins hafa undanfarin ár teflt til heiðurs Friðriki og búist er við að ýmsir af mestu skákmeisturum landsins verði með á mótinu.    

Gunnar Freyr með gull í Vin

Hrókurinn og Skákfélag Vinjar héldu jólamót sitt mánudaginn 17. desember.  Tíu manns mættu og var mótið býsna sterkt enda glæsilegir vinningar í boði frá bóka- og tónlistarútgáfunni SÖGUR. 

Tefldar voru fimm umferðir og var umhugsunartími sjö mínútur. Talsverð spenna lá í loftinu enda mönnum meinilla við að tapa, eins og gengur.

Að loknum þremur umferðum var gerð kaffipása, enda bornar í keppnisfólkið smákökur og jólailmurinn sveif um í stofunni. 

Fyrir mót var ákveðið að verðlaunapeninga fengju þeir sem voru með undir 2000 Elo-stigum, þar sem von var á nokkrum fræknum kempum sem eiga fullt af medalíum. Flestir forfölluðust vegna mikillar vinnu eða hinnar alræmdu desemberflensu. Stórmeistarinn Henrik Danielsen, sem er einn þeirra sem hafa verið með æfingar í Vin undanfarin ár, keppti því sem heiðursgestur og hafði hann að lokum sigur í öllum sínum skákum en fékk þó veglega mótspyrnu.

Sigurvegari jólamótsins varð að lokum Gunnar Freyr Rúnarsson, fyrirliði hins alræmda Víkinga-og Kínaskákklúbbs, sem verið hefur í banastuði undanfarna mánuði. Fékk hann fjóra vinninga og gullið, sem að venju var sótt í smiðju eins af heiðursfélögum Hróksins, Árna Höskuldssonar, gullsmiðs.

Annar varð hinn öflugi Björn Sölvi Sigurjónsson með þrjá og hálfan og bronsið hlaut Rafn Jónsson, með tvo og hálfan. Sigurjón Þór Friðþjófsson varð í fjórða sæti, einnig með tvo og hálfan vinning.

Allir þátttakendur fengu nýútkomnar jólabækur í vinning frá úrgáfunni SÖGUR, m.a. Hníf Abrahams, eftir Óttar Norðfjörð, sem trónir hátt á metsölulistanum fyrir þessi jól og var norðurlandameistari í skólaskák með Æfingaskóla KHÍ á sínum tíma.  

Skákstjóri var Kristian Guttesen.

Sigurður Arnar sigraði á mótaröð TV

Nú er mótaröð byrjenda í Taflfélagi Vestmannaeyja lokið, en hún fer þannig fram að þátttakendur safna stigum á hverjum sunnudegi og hafa verið haldin 11 mót nú í haust.  Sigurvegari á hverjum sunnudegi hlýtur 50 stig, sá næsti 46 stig og svo framvegis.  Til stiga teljast 5 bestu mót hvers og eins.

Þátttakendur í haustmótaröðinni voru rétt yfir 30 talsins og mikil spenna á efstu sætum milli þeirra Sigurðar og Róberts, sem voru jafnir með 248 stig fyrir síðasta mótið, en Sigurði tókst að vinna sl. sunnudag.

Lokastaðan: 

• 1.       Sigurður Arnar Magnússon f. 99, 250 stig
• 2.       Róbert Aron Eysteinsson f. 99,  248 stig.
• 3.       Jörgen Freyr Ólafsson f. 99, 208 stig.
• 4.       Eyþór Daði Kjartansson f. 00, 199 stig.
• 5.       Guðlaugur G. Guðmundsson f. 00, 190 stig.
• 6.       Daníel Már Sigmarsson f. 00, 190 stig.
• 7.       Óliver Magnússon f. 99, 180 stig.
• 8.       Ágúst Már Þórðarson f. 00, 164 stig.
• 9.       Friðrik Egilsson f. 98, 143 stig.
• 10.   Lárus Garðar Long f. 99, 142 stig.

Bestu mætingu í mótaröðinni höfðu þeir Sigurður, Róbert og Daníel Már Sem mættu á 10 mót af 11.

Hraðskákmót Goðans fer fram í kvöld

Hraðskákmót Goðans verður haldið á Fosshóli þriðjudagskvöldið 18 desember og hefst það kl 20:00. Tefldar verða 9 - 11 umferðir eftir Monrad-kerfi. Umferðafjöldinn tekur þó mið af keppenda fjölda. Keppt verður í tveimur flokkum, 16 ára og yngir og 17 ára og eldri. Veitt verða verðlaun fyrir 3 efstu í báðum flokkum og sigurvegarinn fær farandbikar og nafnbótina, Hraðskákmeistari Goðans 2007. Núverandi hraðskákmeistari er Smári Sigurðsson. Í fyrra var slegið met í keppendafjölda (15), nú er stefnt að því að slá það met!!

Þátttaka tilkynnist til formanns í síma 4643187 eða með því að senda póst á  [e-mail]

Þátttökugjald er 500 kr á mann og er kaffi og húsgjaldið innifalið í því. Ókeypis er fyrir 16 ára og yngri.