Góðir gestir á N1 Reykjavíkurskákmótinu

Dirk Jan Ten Geuzendam, aðalritstjóri hins virta og vinsæla skáktímarits New in Chess kom til landsins á föstudag til að fylgjast með N1 Reykjavíkurskákmótinu.

Hann hefur um árabil verið sá blaðamaður sem mest og best fylgist með skáklífi heimsins, auk þess að vera höfundur fjölmargra bóka um skák og skákmeistara.

Dirk Jan Ten Geuzendam fylgdist með útsendingu Simon Williams og Braga Þorfinnssonar eftir 8. umferð, og hitti þá gamlan vin sinn, Össur Skarphéðinsson utanríkisráðherra, en báðir tóku þeir þátt í fyrstu skáklandnámsferð Hróksins til Grænlands árið 2003.

Gaman verður að fylgjast með umfjöllun New in Chess um N1 Reykjavíkurskákmótið, enda er Dirk Jan Ten Geuzendam sannkallaður ofurmeistari með skákblaðamanna.

Fleiri skákblaðamenn og bloggarar eru í Reykjavík vegna mótsins, enda mikið um það fjallað á erlendum skáksíðum.

Einar Hjalti fer á kostum á N1 Reykjavíkurmótinu: Taplaus eftir 8 umferðir

Einar Hjalti Jensson hefur farið á kostum á N1 Reykjavíkurskákmótinu í Hörpu. Einar Hjalti, sem er 31 árs og hefur 2245 skákstig er taplaus eftir 8 umferðir og hefur mikla möguleika á að ná áfanga að alþjóðlegum meistaratitli.

Einar Hjalti var einn af Ólympíumeisturum Íslands, 16 ára og yngri, í Las Palmas 1995. Aðrir í þeirri miklu sigursveit voru bræðurnir Björn og Bragi Þorfinnssynir, Jón Viktor Gunnarsson og Bergsteinn Einarsson.

Einar Hjalti hefur nálega ekkert teflt síðasta áratuginn, og því kemur árangur hans á N1 Reykjavíkurmótinu mörgum á óvart.  Hann hefur gert jafntefli við Héðin Steingrímsson stórmeistara, gert jafntefli við tvo erlenda stórmeistara, og sigraði í dag þýska alþjóðameistarann dr. Martin Zumsande.

Lykillinn að hinum glæsilega árangri Einars er sú staðreynd að hann hefur síðustu mánuðina helgað sig skákrannsóknum, 6 til 8 klukkustundir á dag. Slík vinnusemi, ásamt meðfæddum hæfileikum og metnaði er að skila sér.

Árangur Einars Hjalta á mótinu það sem af er jafngildir 2454 skákstigum.

Myndin er af Einari Hjalta og Gunnari Björnssyni, eftir að Einar sigraði alþjóðameistarann dr. Zumsande í 8. umferð N1 Reykjavíkurmótsins.

Líf og fjör í skákskýringum meistaranna

Jóhann Hjartarson stórmeistari annast skákskýringar í 8. umferð N1 Reykjavíkurskákmótsins og er óhætt að segja að það braki í heillasellum viðstaddra, þegar rýnt er í mest spennandi skákirnar.

Skák Hjörvars Steins og Papins var mál málanna á áttunda tímanum, enda tefldi Hjörvar af mikilli hugkvæmni og dirfsku.

Friðrik Ólafsson fyrsti stórmeistari Íslendinga og fv. forseti FIDE lagði orð í belg í skákskýringunum, en hann var meðal keppenda á fyrsta Reykjavíkurskákmótinu, sem fram fór árið 1964.

Síðasta umferð N1 Reykjavíkurskákmótsins hefst klukkan 13 á morgun og skákskýringar Helga Ólafssonar eru á dagskrá klukkan 15.