Liberec Open - pistill níundu umferðar

Afsakaði seinaganginn á pistlinum í dag en við skelltum okkur beint í sund eftir verðlaunaafhendinguna í dag.  Hrund hélt reyndar áfram að fara á kostum í sundinu þegar hún fór með þjálfaranum í mjög svo skemmtilega rennibraut þar sem maður geysist niður á miklum hraða og brautin endar síðan í eins konar klósettskál þar sem maður snýst í nokkra hringi áður en maður skolast niður um gat í skálinni.  Hrund fór sem sagt með mér upp á efsta pall og leyfði mér að fara á undan.  Ég skolaðist náttúrulega niður með tilheyrandi skvampi og látum, kom mér frá gatinu og beið nú eftir því að stelpunni skolaði nú niður.  Nokkru síðar kemur bara einhver kall niður og ég eitt spurningarmerki í framan þegar ég heyri hlátur fyrir aftan mig.  Hrund hafði semsagt lætt sér niður á næsta pall um leið og ég fór af stað og renndi sér niður hina mjög svo þægilegu barnabraut!  Þetta er geymt en ekki gleymt og mun ég örugglega fá tækifæri til að hefna mín síðar!

Jóhanna Björg Jóhannsdóttir (1803)  - Petr Benes (2089) 0-1
Jóhanna fékk enn einn mikið stigahærri andstæðing.  Hún átti kost á því að fá fína stöðu með því að vinna tvo menn fyrir hrók en missti af því og tapaði upp úr því drottningu fyrir hrók og mann.  Engin leið var að verja stöðuna eftir það og tap varð staðreynd í skák dagsins.  Jóhanna hlaut fimm vinninga af níu mögulegum sem er frábær árangur því hún tefldi allan tíman við mun stigahærri menn.  Til gamans má geta að sá andstæðingur Jóhönnu sem var næstur henni að stigum var aðeins 236 stigum hærri en hún!  Þrátt fyrir tap í síðustu umferð er Jóhanna að skila frammistöðu upp á 2175 stig sem er 372 stigum meira en hún hefur í dag.  Hún mun því hækka verulega á mótinu. 

Theo Gungl (1802) - Hallgerður Helga Þorsteinsdóttir (2023) 1-0
Hallgerður tefldi við enn einn guttann í dag.  Drengurinn var greinilega öllum hnútum kunnugur í Caro Kan og lét sér hvergi bregða þótt Hallgerður tefldi annað afbrgiði en hún er vön.  Hann fórnaði fljótlega manni fyrir fína stöðu og skömmu síðar þurfti Hallgerður að gefa mannin til baka og var þá peði undir með verri stöðu.  Drengurinn vann svo mjög vel úr yfirburðunum og vann örugglega.  Hallgerður hlaut fjóra vinninga í mótinu og lækkar því miður eitthvað á stigum.  Reyndar má segja að hún hafi verið afar óheppin með andstæðinga en hún fékk hvert tvo mjög unga og efnilega skákmenn í tveimur síðustu umferðunum sem báðir voru með frammistöðu upp á 200-250 stigum meira en stig þeirra segja til um.  Það hefði verið mun betra að fá eldri skákmenn sem ekki eru í svona mikilli framför í mótinu. 

Hrund Hauksdóttir (1592) - Frantisek Lasek (1862) 1-0
Hrund hélt áfram að tefla eins og engill í dag.  Hrund hlaut fjóra og hálfan vinning í mótinu sem er frábær árangur, sérstaklega þar sem hún tefldi allan tíman við stigahærri andstæðinga.  Hún tapaði reyndar fyrir stigalægsta keppandanum sem hún fékk en sá var með 1799 stig og er annar af ungu snillingunum sem Hallgerður tapaði líka fyrir.  Hrund er að skila frammistöðu á þessu móti upp á 1926 stig sem er 334 stigum meira en hún hefur í dag.  Hrund mun því hækka verulega á stigum fyrir þetta mót. 

Jan Paldus (1540) - Tinna Kristín Finnbogadóttir (1803) ½-½
Tinna átti erfiðan dag í dag.  Hún var búin að vera veik í nótt og ekki nóg með það þá þurfti hún að fara tvisvar eða þrisvar á klósettið í umferðinni til að kasta upp.  Hún vildi samt ekki bjóða jafntefli strax sem hún hefði eflaust fengið því hún kunni ekki við annað en að reyna sitt besta.  Skákin leystis samt fljótlega upp í jafntefli þar sem Tinna treysti sér ekki til að flækja skákina mikið.  Tinna endaði með 4 vinninga og skilaði því að lokum árangri upp á 1763 stig sem er mjög nærri hennar stigum.  Hún mun þó varla lækka á stigum því hún gerði tvö jafntefli við menn sem ekki hafa FIDE stig en lág landsstig.  Tinna átti ágætis mót og sýndi að hún ætti að geta hækkað sig verulega á stigum.  Síðasta umferðin og uppákoman í sjöttu umferð settu þó strik í reikninginn.  Þessar tvær umferðir hafa þó ekki áhrif til hækkunar eða lækkunar þar sem hvorugur andstæðinganna var með FIDE stig.  Þess má þó geta að Tinna er öll að hressast og verður vonandi hin sprækasta í fyrramálið þegar við leggjum á stað heim. 

Sigríður Björg Helgadóttir (1716) - Willem Broekman (2054) 0-1
Sigríður Björg hafði fína stöðu lengi vel í dag og tefldi til sigurs.  Ónákvæm leikjaröð var því miður þess valdandi að hún fékk erfiða stöðu sem henni tókst ekki að verja.  Sigríður hlaut þrjá og hálfan vinning í mótinu og skilaði árangri upp á 1653 stig sem er aðeins undir hennar eigin stigum en hún mun örugglega ekki lækka á stigum því ein tapskákin hennar var á móti unga þýska drengnum sem ekki hefur FIDE stig.  Sigríður var að tefla mun betur á mótinu en stigalegur árangur hennar segir til um.  Ákveðið lánleysi á síðustu metrum nokkurra skáka urðu þess valdandi að hún fékk ekki fleiri vinninga.  Sigríður á samt mjög mikið inni og á örugglega eftir að hækka mikið á stigum fljótlega.  Smá reynsla og örlítið meiri yfirvegun í lok skáka mun skila henni langt. 

Elsa María Kristínardóttir (1708) - Pavel Haase (1503) 1-0
Elsa María mjög ákveðið til sigurs í dag.  Hún gjörsamlega valtaði yfir andstæðinginn og fékk á tímabili algjörlega ótrúlega stöðu.  Eftir 22. leik Elsu (með hvítt) var komin upp alveg ótrúleg staða.  Skipst hafði upp á drottningum og var kóngur andstæðingsins á c8.  Léttu menn Elsu stóðu á eftirfarandi reitum: Ra8, Rb7, Ba7 og Ba6 og Elsa komin með kolunnið tafl!  Ég man ekki eftir að hafa séð svona áður.  Elsa endaði með þrjá og hálfan vinning og árangur upp á 1715 stig sem er örlítið hærra en hennar eigin stig.  Elsa mun þó lækka eitthvað á stigum þar sem tveir og hálfur af þessum vinningum komu gegn mönnum sem ekki hafa FIDE stig.  Elsa leið nokkuð fyrir það í þessu móti að vera ekki í nægilega góðri kappskákþjálfun en hún teflir þeim mun meira af styttri skákum.  Ef Elsa eykur þátttöku sína í kappskákmótum mun hún örugglega hækka mikið á stigum því getan er klárlega fyrir hendi. Í heildina séð var ég frekar ánægður með útkomuna í mótinu enda árangurinn fínn.  Árangur Jóhönnu og Hrundar stendur algjörlega upp úr, en það hefði ekki þurft mikið til til að fleiri næðu svona árangri.  Einnig var ég mjög ánægður með stelpurnar í ferðinni því þær eru flestar búnar að tileinka sér mjög fagmannleg vinnubrögð á svona mótum.  Auk þess ná þær mjög vel saman sem hópur sem alltaf skilar sér í betri árangri.  Stelpurnar eru reynslunni ríkari eftir þetta mót og lögðu vel inn á reynslubankann í þessu móti. 

Af mótinu sjálfu var ég einnig mjög hrifinn.  Þetta mót hentar gríðalega vel fyrir einstaklinga á því stigabili sem stelpurnar eru.  Þetta mót ætti einnig að henta mjög ungum skákmönnum mjög vel.  Ekki skemmir staðurinn heldur fyrir.  Liberec er bær í u.þ.b. 100 km fjarlægð frá Prag og er bærinn allur hinn þægilegasti.  Hótel Liberec sem við gistum á og teflt var á er algjörlega í miðbænum og stutt ganga er í allt sem maður þarfnast.  Bærinn er mjög hreinlegur og snyrtilegur og hefur upp á margt að bjóða.  Hér er t.d. innisundlaug með mikið af vatnsrennibrautum, bíó, keila og ýmislegt sem hægt er að gera sér til dundurs.  Matur hér er frekar ódýr og verðlag almennt mjög gott.  Það er því ekkert því til fyrirstöðu að mæta á svæðið með alla fjölskylduna.  Einnig eru hér helstu verslanir sem allar konur (afsakið karlrembuna en almennt hafa konur meira gaman af verslunum en karlar) þarfnast, svo sem H&M, C&A auk fjölda annarra verslanna og verðið er miklu betra en við eigum að venjast. Ég vil svo að lokum nota tækifærið og þakka stelpunum fyrir mjög skemmtilega ferð, þær voru allar landi og þjóð til sóma. 

 

Slóðin á mótið er:  http://www.czechtour.net/liberec-open/
Slóðin á lokastöðuna er: http://chess-results.com/tnr58314.aspx?art=1&rd=9&lan=1&fed=ISL&turdet=YES&flag=30

 

Davíð Ólafsson

Lygarinn - ný bók eftir Óttar Norðfjörð kynnt á mánudag - EM-liðið mætir á staðinn

Í tilefni af útkomu skáldsögu Óttars Norðfjörð, LYGARINN, verður útgáfuhóf í Eymundsson Skólavörðustíg mánudaginn næsta, 31. október, kl. 17. 

Umfjöllunarefni bókarinnar er m.a. heimsmeistaraeinvígið í skák milli Fischers og Spasskys sem fram fór í Laugardalshöllinni árið 1972. Gamla einvígisborðinu, sem notað var '72, verður komið fyrir í Eymundsson ásamt upprunalegu taflmönnum og klukku, og þar mun Óttar tefla við gesti.

Íslenska skáklandsliðið mætir einnig í Eymundsson og hitar upp fyrir EM í  skák sem hefst í næstu viku. LYGARINN verður jafnframt á sérstöku útsöluverði.

Skákáhugamenn sérstaklega boðnir velkomnir.  

Liberec Open - Úrslit níundu umferðar

Jóhanna Björg Jóhannsdóttir (1803) – Petr Benes (2089) 0-1
Theo Gungl (1802) - Hallgerður Helga Þorsteinsdóttir (2023) 1-0
Hrund Hauksdóttir (1592) – Frantisek Lasek (1862) 1-0
Jan Paldus (1540) - Tinna Kristín Finnbogadóttir (1803) ½-½
Sigríður Björg Helgadóttir (1716) – Willem Broekman (2054) 0-1
Elsa María Kristínardóttir (1708) – Pavel Haase (1503) 1-0

Pistill síðar. 

Slóðin á mótið er:  http://www.czechtour.net/liberec-open/
Slóðin á úrslit er: http://chess-results.com/tnr58314.aspx?art=2&rd=9&lan=1&fed=ISL&turdet=YES&flag=30 

Davíð Ólafsson

 

Sigurður Daði efstur á Framsýnarmótinu

Sigurður Daði Sigfússon er efstur á Framsýnarmótinu sem fram fer á Húsavík um helgina.  Daði er með fullt hús eftir 4 umferðir. Einar Hjalti Jensson, Smári Sigurðsson og Jón Kristinn Þorgeirsson koma næstir með 3 vinninga.

Staðan eftir 4. ufmerðir:

Rk.		Name	FED	Rtg	Club/City	Pts.	TB1	TB2	TB3
1		Sigfússon Sigurður Daði	ISL	2346	Goðinn	4.0	9.0	4.5	9.00
2		Jensson Einar Hjalti	ISL	2219	Goðinn	3.0	12.0	6.0	8.00
3		Sigurðsson Smári	ISL	1640	Goðinn	3.0	8.0	4.0	5.00
4		Þorgeirsson Jón Kristinn	ISL	1609	SA	3.0	7.5	4.5	4.50
5		Sigurðsson Jakob Sævar	ISL	1713	Goðinn	2.5	9.5	4.5	4.50
6		Jablon Stephen	USA	1965	Goðinn	2.5	8.5	4.0	4.50
7		Heiðarsson Hersteinn Bjarki	ISL	1230	SA	2.5	6.0	2.5	2.75
8		Björgvinsson Andri Freyr	ISL	1301	SA	2.0	9.5	4.5	4.25
9		Arnarson Sigurður	ISL	1931	SA	2.0	9.0	4.0	2.00
10		Ægisson Sigurður	ISL	1722	Siglufjörður	2.0	7.0	3.5	3.25
11		Jónsson Logi Rúnar	ISL	1343	SA	2.0	6.5	3.5	1.00
12		Karlsson Sighvatur	ISL	1351	Goðinn	2.0	6.0	3.0	1.00
13		Aðalsteinsson Hermann	ISL	1391	Goðinn	1.5	11.0	5.0	3.25
14		Ákason Ævar	ISL	1525	Goðinn	1.0	8.0	4.5	1.00
15		Ásmundsson Sigurbjörn	ISL	1217	Goðinn	1.0	8.0	4.0	1.00
16		Hallgrímsson Snorri	ISL	1332	Goðinn	1.0	6.0	3.0	1.00
17		Helgason Árni Garðar	ISL	0	Goðinn	1.0	4.5	2.0	0.00
18		Viðarsson Hlynur Snær	ISL	1047	Goðinn	0.0	8.0	4.0	0.00

 

Fimmta umferð hefst kl. 11.  

• Heimasíða mótsins
• Chess-Results

Sigurjón Haraldsson sigraði á fimmtudagsmóti

Sigurjón Haraldsson sigraði á fimmtudagsmótinu þessa vikuna með því að vinna innbyrðis viðureign efstu manna og vera eini taplausi keppandinn. Í næstu sætum voru svo valinkunnir sómamenn en úrslit urðu annars sem hér segir:

  1-2  Sigurjón Haraldsson                4 

         Eiríkur K. Björnsson                 4   

  3   Jon Olav Fivelstad                     3.5 

  4   Jón Pétur Kristjánsson               2   

  5   Jóhann Bernhard                       1.5

  6   Héðinn Sveinn Baldursson         0   

Æskan og ellin - VIII Strandbergsmótið fer fram í dag

VIII Strandbergsmótið í skák  "Æskan og Ellin", verður haldið laugardaginn 29.  október í Strandbergi, safnaðarheimili Hafnarfjarðarkirkju.  Að mótinu stendur RIDDARINN, skákklúbbur  eldri borgara á höfuðborgarsvæðinu.

Fyrri mót af þessu tagi, þar sem kynslóðirnar mætast, hafa vakið verðskuldaða athygli, verið vel heppnuð  og til mikillar ánægju fyrir alla þátttakendur,  jafnt yngri sem eldri.  Á síðasta ári var 80 ára aldursmunur milli yngsta og elsta keppandans.

Vegleg peningaverðlaun í öllum flokkum, auk  verðlaunagripa  og  vinningahappdrættis!

100.000 kr. verðlaunasjóður: Aðalverðlaun :  25.000;  15.000;  10.000, Aldursflokkaverðlaun:  5.000; 3.000, 2.000

Þátttaka á Strandbergsmótum er ókeypis og miðast við börn og ungmenni á grunnskólaaldri, 15 ára og yngri og roskna skákmenn, 60 ára og eldri.

Sigurvegarar undanfarinna 3ja móta hafa verið þessir:

2010: Jóhann Örn Sigurjónsson (2. Guðmundur Kristinn Lee 15 )

2009: Jóhann Örn Sigurjónsson  (2. Dagur Andri Friðgeirsson )

2008  Hjörvar Steinn Grétarsson 15 ára (Rögvi E. Nielsen 15)

Strandbergmótið hefst kl. 13 laugardaginn 29. október í Hásölum Strandbergs  og stendur til   um kl. 17 

Tefldar verða 9 umferðir með 7 mínútna umhugsunartíma á skákina.

Mótinu lýkur síðan  með veglegu kaffisamsæti  og verðlaunaafhendingu.

Einar S. Einarsson er formaður mótsnefndar og Páll Sigurðsson, skákstjóri .

Sportvörubúðin JÓI ÚTHERJI gefur alla verðlaunagripi.

Aðalstuðningsaðili: POINT á Íslandi (snjallposar)

SKRÁNING :Ekkert þátttökugjald. Æskilegt er að skrá sig fyrirfram eða mæta tímanlega á mótsstað.

Hægt er að skrá sig til þátttöku með nafni og kt. á  netfanginu:  [e-mail]  (sími:  860 3120) eða á slóðinni:

https://docs.google.com/spreadsheet/viewform?hl=en_US&formkey=dE0zOEc3ZEJTOTVVQTV1RUNfWEdQX0E6MQ#gid=0

Flakkar um Evrópu í leit að meistaratitli í skák

Bæði Eyjan og Austurglugginn fjalla um skákævintýri Bjarni Jens Kristinssonar í Evrópu síðustu mánuði.    Eftirtektarverð framtak hjá Bjarna sem hefur m.a. skilað af sér skemmtilegum og fróðlegum pistlum á Skák.is

• Umfjöllun á Eyjunni
• Umgjöllun í Austurglugganum
• Pistill um Búlgaríumót
• Pistill um mót EM taflélaga og mót í Noregi

Liberec Open - pistill áttundu umferðar og pörun níundu umferðar

Jan Bartos (2239) - Jóhanna Björg Jóhannsdóttir (1803)  1-0
Jóhanna fékk fínustu stöðu úr byrjuninni og var komin með góða og þægilega stöðu.  Því miður valdi hún ranga áætlun sem leiddi til þess að kóngstaða hennar hrundi og tap varð óumflýjanlegt. 

Hallgerður Helga Þorsteinsdóttir (2023) - Kacper Grela (1799) 0-1
Hallgerður fékk fína stöðu út úr byrjuninni á móti drengnum sem er aðeins 10-11 ára.  Skákin varð þó hin furðulegasta því eftir ónákvæmni Hallgerðar fékk drengurinn mun betri stöðu.  Hallgerður tefldi vörnina vel að vanda og jafnaði taflið aftur.  Í tímahraki sínu vann Hallgerður mann og stóð klárlega til vinnings.  Andstæðingurinn hafði þó máthótanir uppi og í miklu tímahraki (lék þegar 1 sekúnda var eftir á klukkunni) lék Hallgerður manninum af sér til baka og sat uppi með verra endatafl.  Hún hefði átt að geta haldið endataflinu en eftir að hafa átt lengstu skákirnar í tveimur síðustu umferðum sagði þreytan til sín og skákin tapaðist á endanum. 

Jaroslav Kucera (2017) - Hrund Hauksdóttir (1592) 1-0
Hrund tefldi mjög vel í dag eins og hún er búin að gera allt mótið.  Skákin stefndi lengi vel í jafntefli en Hrund urðu á mistök í endatafli sem skrifa má á reynsluleysi.  Hún átti kost á því að komast út í mislita biskupaendatafl sem var steindautt jafntefli þó að hún yrði tveimur peðum undir í því.  Í stað þess lenti hún peði undir í endatafli með biskup á móti riddara.  Þá stöðu var hins vegar ekki hægt að verja og því fór sem fór.  Hrund lærir að sjálfsögðu af þessu, auk þess sem hún sýndi enn og aftur að hún er fullkomlega samkeppnisfær við miklu stigahærri menn. 

Tinna Kristín Finnbogadóttir (1803) - Flemming Haupt Hansen (2100) ½-½
Tinna átti verulega góða skák í áttundu umferð.  Hún tefldi við einn af dönunum frá Harlev og sýndi hvers hún er megnug.  Hún fórnaði skiptamun fyrir þægilega stöðu og eftir það var þetta aðeins spurning um það hvort að dananum tækist að halda jafntefli.  Hann tefldi vörnina vel og hélt jafnteflinu.  Engu að síður mjög góð skák hjá Tinnu. 

Lubomir Novotny (2019) - Sigríður Björg Helgadóttir (1716) 1-0
Sigríður Björg hafði ágætis stöðu lengi vel í skákinni í dag.  Henni urðu þó á mistök í opinni stöðu þar sem hún drap peð með röngum manni og tapaði.  Hefði hún drepið með réttum manni var staðan að öllum líkindum jafntefli þó að hún væri aðeins verri á hana. 

Franz Keller (1383) - Elsa María Kristínardóttir (1708) ½-½
Elsa María tefldi við stigalága unglinginn sem Sigríður lenti í vandræðum með fyrr í mótinu.  Það sama var uppi á teningnum hjá Elsu.  Strákurinn varðist vel og stefndi leynt og ljóst að því að halda jafntefli.  Elsa hélt á tímabili að hún væri að vinna mann (strákurinn hélt það reyndar líka) en hann fann leið til að redda sér og halda algjörlega jafnri stöðu.  Minnug þess að Sigríður sprengdi sig á móti þessum sama strák, ákvað Elsa að taka ekki frekari áhættu og bauð jafntefli sem strákurinn þáði strax. 

Dagurinn í dag var mjög erfiður.  Tvær skákir, ein snemma í morgun og önnur seinnipartinn er frekar erfitt, sérstaklega þegar stelpurnar eru búnar að vera að tefla í erfiðu móti þar sem þær eru meira og minna að tefla við mikið stigahærri menn.  Áttunda umferðin er eina umferðin í mótinu sem þær ná ekki að skora meira en stigin spá fyrir um.  Það er því ekkert annað að gera en að blása til sóknar í níundu og síðustu umferðinni í fyrramálið (hefst klukkan sjö að íslenskum tíma).  Þá tefla stelpurnar við:

Jóhanna Björg Jóhannsdóttir (1803) – Petr Benes (2089)
Theo Gungi (1802) - Hallgerður Helga Þorsteinsdóttir (2023)
Hrund Hauksdóttir (1592) – Frantisek Lasek (1862)
Jan Paldus (1540) - Tinna Kristín Finnbogadóttir (1803)
Sigríður Björg Helgadóttir (1716) – Willem Broekman (2054)
Elsa María Kristínardóttir (1708) – Pavel Haase (1503) 

Slóðin á mótið er:  http://www.czechtour.net/liberec-open/
Slóðin á úrslit er: http://chess-results.com/tnr58314.aspx?art=2&rd=9&lan=1&fed=ISL&turdet=YES&flag=30 

Davíð Ólafsson

Helgi tekur sæti í EM-liði Íslands

Héðinn Steingrímsson hefur tilynnt forföll vegna persónulegra ástæðna á EM-landsliða sem byrjar á fimmtudaginn í næstu viku. Stjórn SÍ og landsliðsnefnd fór þess á leit við Helga Ólafsson landsliðsþjálfara að hann tæki sæti Héðins í landsliðinu. Helgi hefur fallist á beiðnina og mun taka sæti í landsliðinu sem teflandi liðstjóri.

Lið Íslands á EM-landsliða verður því:

• 1. borð: SM Henrik Danielsen (2543)
• 2. borð: SM Stefán Kristjánsson (2485)
• 3. borð: FM Hjörvar Steinn Grétarsson (2442)
• 4. borð: AM Bragi Þorfinnsson (2427)
• Varamaður og liðstjóri: SM Helgi Ólafsson (2523)

Heimasíða mótsins

Chess-Results (breytingar á íslensku liðinu ekki komnar í gegn)

 

Stórmeistaraáfangar Stefáns staðfestir

FIDE samþykkti á FIDE-þingi sem fram fór 15.-22. október í Kraká í Póllandi stórmeistaraáfanga Stefáns Kristjánssonar.  Titill Stefáns var þó samþykktur með fyrirvara um skákstig (kallað conditional GM).   Stefán verður með 2500 skákstig 1. nóvember og samkvæmt upplýsingum ritstjóra er líklegt að Stefán verði formlega orðinn stórmeistari upp úr miðjum desember.

Jafnframt var Gunnar Björnsson, útefndur alþjóðlegur mótshaldari (International organizer) og Róbert Lagerman formlega útnefndur FA-skákdómari (FIDE-arbiter) eftir að hafa tekið skákstjóranámskeið í Færeyjum í sumar.