Íslandsmót drengja og telpna fer fram í Salaskóla

Íslandsmót drengja og telpna sem fram fer 5. og 6. nóvember nk. verður haldið í Salaskóla.  Nánar um mótið eftir helgi. 

Liberec Open - úrslit áttundu umferðar

Jan Bartos (2239) - Jóhanna Björg Jóhannsdóttir (1803) 1-0
Hallgerður Helga Þorsteinsdóttir (2023) – Kacper Grela (1799) 0-1
Jaroslav Kucera (2017) - Hrund Hauksdóttir (1592) 1-0

Tinna Kristín Finnbogadóttir (1803) – Flemming Haupt Hansen (2100) ½-½
Lubomir Novotny (2019) - Sigríður Björg Helgadóttir (1716) 1-0

Franz Keller (1383) - Elsa María Kristínardóttir (1708) ½-½

Slóðin á mótið er:  http://www.czechtour.net/liberec-open/
Slóðin á úrslit er: http://chess-results.com/tnr58314.aspx?art=2&rd=8&lan=1&fed=ISL&turdet=YES&flag=30 

Davíð Ólafsson

Skákæfingar í KR

Nýlega hófust skákæfingar fyrir börn og unglinga í KR-heimilinu Frostaskjóli. Skákakademía Reykjavíkur og Skákdeild KR standa fyrir æfingunum. Fjölmargir áhugasamir krakkar hafa látið sjá sig og eru þeir flestir nemendur 3. bekkjar í grunnskólum Vesturbæjar en skák er á stundatöflu í öllum þriðju bekkjum Vesturbæjar.  Mæting á æfingarnar hefur verið góð, 10-20 krakkar á hverri æfingu, og áhuginn og gleðin skín úr hverju andliti.

Áherslan í kennslunni er lögð á að byggja ofan á þá þekkingu sem krakkarnir fá í skólanum. Nokkrir af þeim sem sækja æfingarnar voru einnig á skákæfingum hjá KR á síðasta ári og kunna ýmislegt fyrir sér. Aðstaða til skákiðkunar hjá KR-ingum er til fyrirmyndar. Vönduð taflsett og fínn skáksalur gera skákæfingarnar bráðskemmtilegar.

Æfingarnar standa frá 17:30 - 18:45 á miðvikudögum. Umsjón með æfingunum hefur Stefán Bergsson en meðal kennara eru Björn Ívar Karlsson, Björn Þorfinnsson og Jóhannes Urbanic. Allir áhugasamir um skákiðkun í Vesturbænum eru hvattir til þess að mæta á næstu æfingu!

Róbert vann á afmælismóti Jóns Gauta

Skákfélag Vinjar hélt mót í húsnæði Kjósarsýsludeildar Rauða krossins í Mosfellsbæ í gær og voru ellefu þátttakendur.

Á leiðinni í Þverholtið var ljóst að þetta yrði afmælismót Jóns Gauta Magnússonar, félaga í Vinjargenginu.

Róbert Lagerman, skákstjóri, var í gríðargóðum fíling og vann allar sínar sjö skákir en umhugsunartíminn var sjö mínútur.

Allar nema eina afar sannfærandi. Ingi Tandri Traustason tók silfrið af öryggi með 5,5 vinninga og Haukur Halldórsson varð þriðji  á pallinum með fimm.

Næstur - og bestur heimamanna - kom Sigurjón Haraldsson með 4,5 en Þormar Jónsson og afmælisdrengurinn komu þar á eftir með fjóra.

Kaffi og kruðerí rann ofan í keppendur milli umferða enda vel hugsað um fólk í Þverholti 7.

Þormar Jónsson hefur vakið Skákfelag Mosfellsbæjar af blundi sínum og er félaginu óskað góðs gengis í framtíðinni, en það tekur nú þátt í fjórðu deildinni á Íslandsmótinu.

 

Æskan og ellin á morgun 29. október

Ungir sem aldnir munið að skákmótið Æskan og Ellin verður haldið í 8. sinn á morgun í Strandbergi, Safnaðarheimili Hafnarfjarðarkirkju þar kynslóðabilið verður brúað á hvítum reitum og svörtum. Þátttaka er frí og miðast við ungmenni á grunnskólaaldri, 15 ára og yngri og öldunga, 60 ára og eldri.  Góð verðlaun og vinningahappdrætti. Ókeypis veitingar fyrir keppendur og fylgdarlið.   Mætið vel og tímanlega en mótið hefst  kl. 13

Skráning á netfanginu [e-mail] eða beint á slóðinni https://docs.google.com/spreadsheet/viewform?hl=en_US&formkey=dE0zOEc3ZEJTOTVVQTV1RUNfWEdQX0E6MQ#gid=0  

Liberec Open - pistill sjöundu umferðar og pörun áttundu umferðar

Vojtech Straka (2246) - Hallgerður Helga Þorsteinsdóttir (2023) 1-0
Hallgerður tefldi þessa skák mjög vel og var staðan lengst af í jafnvægi.  Hún lék af sér peði seint í skákinni en staðan á borðinu var enn jafntefli.  Hallgerður missti svo af örguggri jafnteflisleið í endataflinu og því fór sem fór.

 Jóhanna Björg Jóhannsdóttir (1803)  - Christian Brauer (2115) 1-0
Jóhanna var örugglega í eigin kroppi í dag!  Það er ekki beint hennar stíll að halda sér fast þó að hún sé að tefla við mikið stigahærri menn svo að hún blés bara til sóknar.  Sóknin átti svo sem alveg rétt á sér, jafnvel þó að hún tapaði einu peði.  Hún tapaði svo öðru peði þegar hún var farin að leggja of mikið á stöðuna og var klárlega komin með verra tafl.  Hún var þó ekki af baki dottin og hélt sókninni áfram með látum.  Hún skildi svo hrók eftir í dauðanum í 23. leik.  Andstæðingurinn hugsaði sig um í 20 mínútur og drap svo hrókinn!  Jóhanna lék af bragði og þjóðverjinn mátti gjöra svo vel að gefast upp, óverjandi mát í tveimur leikjum!  Það eru greinilega fleiri en Hrund sem geta farið illa með þjóðverja.  Flottur sigur hjá Jóhönnu þó að skákin hafi ekki verið alveg gallalaus. 

Hrund Hauksdóttir (1592) - Zdenek Cakl (2078) 0-1
Ég sem var farinn að halda að Hrund gæti ekki tapað.  Hún tefldi við sterkan andstæðing (rétt tæplega 500 stigum hærri en hún) sem tefldi vel í dag. Hrund lét plata illa af sér mann og þá varð ekki við neitt ráðið. 

Juliusz Pham (1705) - Tinna Kristín Finnbogadóttir (1803) ½-½
Við vissum nú fyrir þessa skák hjá Tinnu að það þýddi lítið að horfa á stigin hjá andstæðingnum.  Þetta er nefnilega tólf ára strákur sem er greinilega í mikilli framför.  Hann hækkaði t.d. um 100 stig á síðasta ári.  Drengurinn bar þó tilhlýðilega virðingu fyrir skákdrottningunni og tefldi stíft til jafnteflis.  Eftir uppskipti kom upp endatafl sem var algjörlega steindautt og þrátt fyrir að þau tefldu endataflið í 20 leiki, þá breyttist það ekkert. 

Elsa María Kristínardóttir (1708) - Lubos Jina (1811) 0-1
Elsa María er klárlega allt of góð við gamla fólkið!  Hún var enn stödd í 60+ mótinu í morgun og tefldi við roskinn mann sem Hallgerður tefldi við fyrr í mótinu.  Elsa tefldi mjög vel framan af og ég var farinn að bóka sigur hjá henni í dag.  Sá gamli er hins vegar heldur betur seigur og plataði Elsu í endatafli.  Hann hafði reyndar sýnt fyrr í mótinu gegn Hallgerði að hann er erfiður við að eiga í endatafli.  Gamlir tékkneskir skákmenn eru ekki lengur á góðgerðalista Elsu. 

Sigríður Björg Helgadóttir (1716) - Benny Christensen (1375) 1-0
Sigríður Björg fékk einn allra skemmtilegasta karakterinn á svæðinu í dag.  Hinn danski Benny (maður á ca. 50-60 ára) hefur farið á kostum hér.  Hann ræðir oft við okkur og var t.d. alveg viss um að Tinna væri dóttir Vigdísar Finnbogadóttur (Tinna er jú Finnbogadóttir) en fannst samt skrítið að hann hefði ekki heyrt um þessa aðra dóttur Vigdísar því hann vissi þó að hún átti mun eldri dóttur.  Þrátt fyrir lág stig hefur Benny verið að tefla ágætlega á mótinu og var með performance yfir 1700 stig fyrir skákina gegn Sigríði.  Honum voru engin grið gefin.  Sigríður tefldi mjög vel, vann fljótlega peð og landaði skákinni mjög örugglega.  Vel gert. 

Árangurinn í dag var svo sem alveg í lagi en miðað við stöðurnar í dag hefði ekki verið ósanngjarnt að stelpurnar fengju þrjá til fjóra vinninga út úr skákunum í dag.  Dagskráin hjá stelpunum er mjög stíf í lok móts og er áttunda umferðin þegar hafin.  Þar tefla stelpurnar við: 

Jan Bartos (2239) - Jóhanna Björg Jóhannsdóttir (1803)
Hallgerður Helga Þorsteinsdóttir (2023) – Kacper Grela (1799)Jaroslav Kucera (2017) - Hrund Hauksdóttir (1592)Tinna Kristín Finnbogadóttir (1803) – Flemming Haupt Hansen (2100)
Lubomir Novotny (2019) - Sigríður Björg Helgadóttir (1716)Franz Keller (1383) - Elsa María Kristínardóttir (1708) 

Slóðin á mótið er:  http://www.czechtour.net/liberec-open/
Slóðin á úrslit er: http://chess-results.com/tnr58314.aspx?art=2&rd=8&lan=1&fed=ISL&turdet=YES&flag=30 

Davíð Ólafsson

Liberec Open - úrslit sjöundu umferðar

Vojtech Straka (2246) - Hallgerður Helga Þorsteinsdóttir (2023) 1-0
Jóhanna Björg Jóhannsdóttir (1803) – Christian Brauer (2115) 1-0
Hrund Hauksdóttir (1592) – Zdenek Cakl (2078) 0-1
Juliusz Pham (1705) - Tinna Kristín Finnbogadóttir (1803) ½-½
Elsa María Kristínardóttir (1708) – Lubos Jina (1811) 0-1
Sigríður Björg Helgadóttir (1716) – Benny Christiansen (1375) 1-0

Pistill á eftir.  

Slóðin á mótið er:  http://www.czechtour.net/liberec-open/
Slóðin á úrslit er: http://chess-results.com/tnr58314.aspx?art=2&rd=8&lan=1&fed=ISL&turdet=YES&flag=30 

 

Davíð Ólafsson

Skákþing Garðabæjar hófst í gær - óvænt úrslit í fyrstu umferð

Skákþing Garðabæjar hófst í gær.kvöldi.  15 skákmenn tefla í aðalmótinu en auk þess tefla 6 skákmenn í b-flokki.  Nokkuð var um óvænt úrslit í fyrstu umferð.  Auðbergur Magnússon (1620) vann Jóhann Helga Sigurðsson (2013), Páll Andrason (1786) gerði jafntefli við stigahæsta keppendann, Þorvarð F. Ólafsson (2181) og Tjörvi Schöth (1573) gerði jafntefli við formanninn Pál Sigurðsson (2008).  Teflt er á fimmtudagskvöldum fram til 8. desember.

Úrslit og pörun má nálgast á Chess-Results.

• Heimasíða TG
• Chess-Results

Framsýnarmótið hefst í kvöld

Framsýnarmótið í skák 2011 verður haldið helgina 28.-30. október nk. í fundarsal stéttarfélagsins Framsýnar að Garðarsbraut 26 á Húsavík. Það er skákfélagið Goðinn í Þingeyjarsýslu og Framsýn-stéttarfélag, sem sjá um mótshaldið.

Mótið er öllum áhugasömum opið.

Dagskrá.

1. umf. föstudaginn 28 október kl 20:00   25 mín (atskák)
2. umf. föstudaginn 28 október kl 21:00       
3. umf. föstudaginn 28 október kl 22:00     
4. umf. föstudaginn 28 október kl 23:00     

5. umf. laugardaginn 29 október kl 11:00  90 mín + 30 sek/leik
6. umf. laugardaginn 29 október kl 19:30   
7. umf. sunnudaginn 30 október kl 11:00

Verðlaunaafhending í mótslok.

Verðlaun.

Veittir verða glæsilegir eignarbikarar fyrir þrjá efstu í mótinu sem stéttarfélagið Framsýn gefur í tilefni af samvinnu Framsýnar og skákfélagsins Goðans í þingeyjarsýslu. Einnig hlýtur efsti utanfélagsmaðurinn eignarbikar.

Mótið verður reiknað til íslenskra skákstiga og til FIDE-skákstiga.
Ekkert þátttökugjald er í mótið.

Upplýsingar.

Allar nánari upplýsingar um Framsýnarskákmótið verða aðgengilegar á heimasíðu skákfélagins Goðans, ásamt skráningu, stöðu, skákir og svo loka-úrslit, verða birt á http://www.godinn.blog.is/  og á http://www.framsyn.is/

Skráning.

Skráning í mótið er hér í dálki til vinstri hér á heimasíðu Goðans á sérstöku skráningarformi. Einnig er hægt að skrái sig hjá Hermanni Aðalsteinssyni, formanni skákfélagins Goðans, í síma 4643187 og 8213187 og á [e-mail] 

Listi yfir skráða keppendur á mótið.
https://docs.google.com/spreadsheet/ccc?key=0AgWZ02GI9Ay_dG1LYWx6TXRsM3dDaUw2MU0tQnRSQ1E&hl=en_US

Liberec open - pistill sjöttu umferðar og pörun sjöundu umferðar

Hallgerður Helga Þorsteinsdóttir (2023) - Flemming Haupt Hansen (2100) 1-0
Hallgerður tefldi mjög skrautlega skák gegn einum af dönunum.  Fljótlega eftir byrjunina stóð hún með pálman í höndunum með tvo hróka og mann gegn drottningu.  Staðan var þó mjög flókin og hótaði sá danski skákum af öllum mögulegum gerðum í tilraunum sínum til að ná þráskák.  Í tímahraki Hallgerðar náði sá danski að plata af henni hrók og stóð nú uppi með unnið tafl með drottningu á móti hrók og riddara.  Hallgerður varðist vel og leit jafnvel út að skákin myndi hugsanlega enda með jafntefli eftir allt saman þegar sá danski misreiknaði sig illa, fórnaði drottningunni fyrir hrókinn og hélt að hann hefði tryggt sér sigur með því að vera með óstöðvandi frípeð.  Hallgerður gerði sér hins vegar lítið fyrir og stöðvaði peðið auðveldlega með riddaranum og sá danski neyddist til að gefast upp í koltöpuðu peðsendatafli.  Það tók Hallgerði langan tíma að ná áttum eftir þessa furðulegu skák og það að hafa verið í standandi tímahraki (undir þremur mínútum) í rúmlega 30 leiki.  Punkturinn er þó vel þeginn og er sannarlega eitthvað sem íslensku stelpurnar eiga skilið því þær hafa verið frekar óheppnar í mörgum skákum hér.

Pavel Postuba (2039) - Jóhanna Björg Jóhannsdóttir (1803) 1-0
Ég hélt á tímabili að einhvers konar líkamskipti hefðu átt sér stað í dag.  Á meðan allt var upp í loft hjá Hallgerði, þá tefldi Jóhanna mjög traust og yfirvegað.  Venjulega er þetta þó á hinn veginn hjá þeim vinkonum, allt upp í loft hjá Jóhönnu og skákir eiga það til að skipta reglulega um eigendur, en öllu rólegri og yfirvegaðri stöður hjá Hallgerði. Jóhanna fékk fljótlega betri stöðu upp úr byrjuninni og fataðist hvergi flugið í úrvinnslunni og vann mjög sannfærandi sigur í dag.
 
Tomasz Motil (2027) - Hrund Hauksdóttir (1592) ½-½
Hrund er að tefla gríðarlega vel á mótinu.  Í dag tefldi hún við pólverja sem er 435 stigum hærri en hún.  Það er skemmst frá því að segja að Hrund tefldi mjög yfirvegað og vandað, gaf hvergi færi á sér og landaði fínu jafntefli eins og að drekka vatn.  Frábærlega vel gert hjá henni.

Tinna Kristín Finnbogadóttir (1803) - Rein Thierry (1672) ½-½
Ef það gekk mikið á í skákinni hjá Hallgerði, þá var það lítið miðað við það sem gekk á hjá Tinnu í dag.  Eftir rólega byrjun, lék hún skyndilega af sér manni.  Tinna gerði þá það sem hún gerir best, blés bara til sóknar manni undir og andstæðingurinn varð svo hræddur að hann gaf manninn til baka algjörlega að tilefnislausu.  Tinna tefldi framhaldið síðan mjög vel og var algjörlega að ganga frá andstæðingnum þegar sirkusinn hófst.  Í sinni unnu stöðu er Tinna að fara að leika en verður fyrir því óláni að reka putta (þumalinn) í mann sem hún var ekki að fara að leika.  Andstæðingurinn krefst þess þá að Tinna leiki manninum sem hún rakst í.  Tinna neitar að sjálfsögðu þar sem þetta var slys en ekki ásetningur að leika manninum og kallað er á skákstjóra.  Skákstjórinn fellir þann ótrúlega úrskurð að Tinnu beri að leika manninum og þar sem hann er alráður þá var ekkert annað að gera en að leika manninum og það kostaði hrók.  Tinna sat nú uppi með gjörtapað tafl en tefldi áfram nokkra leiki þar sem andstæðingurinn bætti stöðu sína ekkert.  Ekki veit ég hvort maðurinn skammaðist sín svona mikið eða hvort að hann var bara svona hræddur við leifarnar af sókn Tinnu, en allt í einu bauð hann jafntefli sem Tinna þáði eftir nokkra umhugsun – hún var það móðguð að hún var virkilega að spá í að hafna boðinu.  Ég er hræddur um að andstæðingur Tinnu á morgun fái að kenna á því.

Petr Simon (1782) - Elsa María Kristínardóttir (1708) ½-½

Elsa María tefldi í mögnuðum aðstæðum í dag.  Ég var að velta því fyrir mér hvort að Elsa hefði skipt um mót og væri komin í eitthvert öldungarmót því hún sat á borði út í horni þar sem andstæðingurinn og næstu skákmenn voru allir 65+.  Það setur reyndar skemmtilegan svip á mótið hér að mjög margir bæjarbúar yfir sextugt taka þátt í mótinu.  En ef við snúum okkur þá að skák Elsu, þá var hún ágætlega tefld af beggja hálfu þó ljóst væri að sá gamli stefndi leynt og ljóst að því að gera jafntefli við þessa íslensku skákdrottningu.  Það sást meðal annars á því að hann bauð Elsu jafntefli fimm sinnum í skákinni og í öllum tilfellum átti Elsa erfitt með að hafna því sökum þess að henni langar alls ekki að vera leiðinleg við gamla fólkið.  Semsagt jafntefli í ágætis skák.

Oldrich Suchomel (1659) - Sigríður Björg Helgadóttir (1716) 0-1
Sigríður Björg var búin að jafna sig á gærdeginum og mætti mjög einbeitt til leiks.  Hún tefldi mjög vel í dag og landaði mjög svo öruggum sigri.  Hún ætti að vera komin á beinu brautina núna.

Árangurinn í dag var gríðarlega góður, þrír sigrar og þrjú jafntefli sem verður að teljast mjög gott í ljósi þess að stelpurnar voru stigalægri í fjórum af sex skákum dagsins.  Uppákoman hjá Tinnu setti þó leiðinlegan blett á daginn en það þýðir ekkert að dvelja við það – við bara gleymum þessu (þó ég muni ræða þetta aðeins við skákstjórann á morgun til að svona endurtaki sig ekki) og einbeitum okkur að næstu skákum.  Morgundagurinn verður langur og strangur því það eru tefldar tvær umferðir.  Sú fyrri hefst klukkan sjö að morgni að íslenskum tíma og hin síðari klukkan tvö eins og fyrri umferðir.

Á morgun tefla stelpurnar við:

Vojtech Straka (2246) - Hallgerður Helga Þorsteinsdóttir (2023)
Jóhanna Björg Jóhannsdóttir (1803) – Christian Brauer (2115)
Hrund Hauksdóttir (1592) – Zdenek Cakl (2078)
Juliusz Pham (1705) - Tinna Kristín Finnbogadóttir (1803)
Elsa María Kristínardóttir (1708) – Lubos Jina (1811)
Sigríður Björg Helgadóttir (1716) – Benny Christiansen (1375)

Slóðin á mótið er:  http://www.czechtour.net/liberec-open/
Slóðin á úrslit er: http://chess-results.com/tnr58314.aspx?art=2&rd=7&lan=1&fed=ISL&turdet=YES&flag=30 

Davíð Ólafsson