Stefán Orri og Daníel Ernir efstir eftir þrjár umferðir á Meistaramóti Skákskólans í u 1600 stiga flokknum

Stefán Orri Davíðsson og Daníel Ernir Njarðarson eru efstir með fullt hús vinninga þegar tefldar hafa verið þrjár umferðir af átta á Meistaramóti Skákskóla Íslands sem hófst á föstudaginn. Þetta er fyrri hluti meistaramótsins þar sem tefla piltar og stúlkur sem eru undir 1600 alþjóðlegum elo stigum.

Stefán Orri vann óvæntan sigur þegar hann lagði Alec Sigurðarson að velli i 3. umferð. Keppendur eru  20 talsins og er mótið er reiknað til alþjóðlegra elo stiga. Mótinu lýkur á morgun en seinni hluti þess fer fram um næstu helgi en rétt til þátttöku þar hafa skákmenn sem eru yfir 1600 elo stigum. 

Mótstafla

Stórmeistararnir unnu í gær - verða í beinni í dag

Stórmeistararnir Hannes Hlífar Stefánsson (2581) og Héðinn Steingrímsson (2574) unnu báðir sínar skákir í áttundu umferð EM einstaklinga sem fram fór í gær í Gjakova í Kósovó. Hannes vann makedónska alþjóðlega meistarann Luka Draskovic (2454) í hörkuskák en sá síðarnefndi hafði hafnað jafnteflisboði Hannesar fyrr í skákinni. Héðinn yfirspilaði rússneska alþjóðlega meistaranum Vasily Korchmar (2437). 

Guðmundur náði sér ekki á strik gegn Alexander Beliavsky (2624) og tapaði. Björn Þorfinnsson (2410) varðist hetjulega gegn hvít-rússneska stórmeistaranum Aleksej Aleksandrov (2592) en laut í gras eftir langa baráttu.

Hannes og Héðinn hafa 5 vinninga og eyja smá von um sæti í heimsbikarmótinu í Batumi Georgíu í haust. Til þess þurfa þeir þó að fá 2½ vinning í lokaumferðunum þremur. Guðmundur hefur 4 vinninga en Björn hefur 3½ vinning.

Efstur með 7 vinninga er rússneski stórmeistarinn Ernesto Inarkiev (2686).

Í umferð dagsins tefla Hannes og Héðinn við sterka stórmeistara. Hannes við Englendinginn David Howell (2671) en Héðinn við hinn úkraínska Martyn Kravsiv (2641).

Skákir beggja verða í beinni útsendingu sem hefst kl. 13:45. 

 

• Heimasíða mótsins
• Beinar útsendingar (kl. 13:45)
• Chessbomb (beinar útsendingar)
• Chess-Results 

 

MótX-einvígið að hefjast: Nigel Short og Hjörvar Steinn glíma í Salnum

MótX-einvígi Hjörvars Steins Grétarssonar og Nigels Short hefst laugardaginn 21. maí kl. 14 í Salnum í Kópavogi og er búist við mjög spennandi og fjörugri viðureign. Þrjár skákir eru tefldar á laugardag og þrjár á sunnudag. Nigel Short er goðsögn í skákheiminum og hefur teflt um heimsmeistaratitilinn, en Hjörvar Steinn er yngsti stórmeistari Íslands og næststigahæsti skákmaður landsins.

 

Englendingurinn Nigel Short fæddist 1965 og var undrabarn í skák. Hann var lengi sterkasti skákmaður Vestur-Evrópu og mætti Kasparov í einvígi um heimsmeistaratitilinn 1993, sama ár og Hjörvar Steinn fæddist. Hjörvar vakti snemma athygli fyrir mikla hæfileika við skákborðið og hefur unnið til ótal verðlauna.

 

Nigel Short tefldi á föstudaginn fjöltefli í Smáralind gegn 14 skákmönnum á öllum aldri. Stórmeistarinn sigraði í þrettán skákum, en gerði jafntefli í hörkuskák við hinn 13 ára gamla Vigni Vatnar Stefánsson.

 

Skákfélagið Hrókurinn skipuleggur MótX-einvígið og meðal annarra bakhjarla eru Kópavogsbær, Heimilistæki og Reykjavík Residence Hotel. Skákhátíðinni lýkur á sunnudagskvöld þegar rokkhljómsveitin The Knight b4 kemur fram í fyrsta skipti á tónleikastaðnum Húrra. Hljómsveitina skipa Nigel Short, Arnljótur Sigurðsson, Hjörtur Ingvi Jóhannsson, Þorvaldur Ingveldarson og Viggó Einar Hilmarsson.

 

Facebook-síða MótX-einvígisins

EM einstaklinga – pistill nr. 3

Það hefur ekkert gengið sértaklega hjá íslensku keppendunum í síðustu umferðum og eru allir þeirra rétt undir pari eins og er. Síðustu umferðirnar eru hins vegar þær mikilvægustu. Frídaginn nýtti hluti hópsins að fara til Pristina, höfuðborgar Kósovó. en Nysret Avdiu,forseti Skáksambands Kósovó, bauð okkur far þegar hann sé okkur umkomulausa á leiðinni í göngutúr fyrir utan hótelið okkar. Þáðum við það með þökkum.  Hann var á leiðinni að hitta forsætisráðherra Kósovó  – væntanlega að biðja um aukið fjármagn í mótið!

Þegar við komum til Pristina tók sonur forsetans á móti okkur og sýndi okkur nokkra af helstu stöðum miðbæjar Pristina. Meðal annars Newborn-minnismerkið fræga sem margir hafa lesið um. Ákaflega gaman að hafa náð að heimsækja eina yngstu höfuðborg heims. 

Samsetning keppenda mótsins er allt önnur en viðeigum að venjast á Íslandi. Aðeins ein kona tekur þátt og engir krakkar. Tveir yngstu keppendur mótsins eru Rúmenar fæddir 2001 og 2003. Yngstu keppendurnir frá Kósovó eru fæddir árið 2000. Massinn heimamanna er 50 ára og eldri. 

Spurði ég Kósvovómennina út í það. Skýringin er sú að meðan stríðið skall á datt allt skákstarf niður, og reyndar margvíslegt annað íþróttastarf, eðli málsins niður. Enginn reiknuð mót fóru fram í Kósovó og nánast einu Kósovómennirnir sem höfðu stig á þessum tíma voru þeir sem bjuggu erlendis. Að sjálfsögðu er unnið að breyta þessari stöðu. 

Við Björn skelltum okkur á kaffihús eftir umferð gærdagsins en hótelið okkar er rétt hjá aðalgöngugötunni.  Komu þar að okkur tveir Róma-strákar sem réttu út höndina og betluðu. Góðmennin ég og Björn réttum þeim einhver sent. Strákarnir ekki alveg sáttir og vildu meira. Skömmu síðar sáum við strákana hjá nokkrum heimamönnum á næsta kaffihúsi.

Skyndilega komu strákarnir til baka og réttu okkur miða sem heimamennirnir höfðu greinilega skrifað og réttu okkur!

Heimamennirnir horfðu á okkur skellihlæjandi. Ekki gátum við Björn orðið annað við þessu og réttum þeim evruna hvorum!

Rafkerfið í Gjakova er öðruvísi en á Íslandi.

Í dag gerðist það að rafmagnið datt öðru hverju. Hótel á skákstaðnum er hins vegar með eigið rafkerfi sem hrekkur þá í gang. Á milli liðu 1-2 ljóslausar sekúndur. Þetta gerðist 2-3 við byrjun umferðar. Sá ég á stressið færast yfir andlit Tomek Delega yfirdómara mótsins. Hættan virðist vera liðin hjá!

Nánast engin lýsing er á kvöldin og mikið myrkur. Gangstéttar eru ekki í forgangi í Gjakova og sömuleiðis er skortur á bílastæðum. Það verður til þess að hann gangandi maður á stundum í vandræðum! Við höfum séð traktor keyra um göturnar og í morgun sáum við mann á hestvagni!

Kósovó-búar eru hins vegar alltaf brosandi og ótrúlega þjónustulundaðir  - vilja allt fyrir mann gera. Þjónustan á hótelinu og á veitingastaðnum þar er hreinlega frábær. Og ekki skemmir fyrir að maturinn er stórgóður og vel útilátinn. Hannes segir t.d. að þetta sé besta EM einstaklinga sem hann hafi teflt á!

Áttunda umferð hófst fyrr í dag. Gúmmi teflir við goðsögnina Beliavsky og var mög sáttur með pörunina. Björn teflir við sterkan hvít-rússneskan stórmeistara en Hannes og Héðinn tefla við alþjóðlega meistara.  Ekki munaði mjög miklu að Guðmundur fengi annan hvorn íslensku stórmeistaranna.

Kveðja frá Gjakova,
Gunnar

Meistaramót Skákskóla Íslands í flokki keppenda með minna en 1600 elo stig hefst í dag

Meistaramót  Skákskóla Íslands fyrir starfsárið 2015/2016 verður að þessu sinni haldi í tveim hlutum. Flokkur keppenda undir 1600 elo – stigum og stigalausum hefst um næstu helgi þ.e.  föstudaginn 20. maí og lýkur 22. maí. Þar er umhugsunartími er 30 30 og verður mótið reiknað til alþjóðlegra stiga.

Þátttökurétt hafa nemendur skólans og allir þeir sem tekið hafa þátt í námskeiðum á vegum skólans eða hlotið þjálfun á vegum skólans.  

Að öðru leyti áskilur skólastjóri/mótsnefnd sér rétt til að bjóða völdum einstaklingum til þátttöku.

 

Flokkur undir 1600–elo-stigum og stigalausir:

 

1. umferð: Föstudagurinn 20. maí kl. 18  
2. umferð: Föstudagurinn 20. maí kl. 20

 

3. umferð. Laugardagur 21. maí kl. 10-13.
4. umferð: Laugardagurinn 21. maí 13 –16
5. umferð: Laugaradagurinn 21. maí 16-19

 

6.. umferð: Sunnudagurinn 22. maí kl. 10-13.

7. umferð: Sunnudagurinn 22. maí kl. 13 –16
8. umferð: Sunnudagurinn 22. maí kl. 16-19

Tímamörk í öllum umferðunum 30 30.

 

Keppendur geta tekið ½ vinning yfirsetu í fyrstu fimm umferðunum en tilkynna verður um yfirsetuna fyrir umferð og áður en raðað er í þá næstu

 

Verðlaun í flokki 1600 elo og minna  og stigalausra:

 

1. verðlaun: *farmiði að verðmæti kr. 40 þús:
2. – 3. verðlaun: vandaðar skákbækur að eigin vali.

 

* Gert er ráð fyrir að farmiði verði notaðar til að mæta kostnaði vegna þátttöku á skákmóti erlendis 2016-2017.

 

Verðlaun fyrir keppendur sem eru með 1200 elo stig og minna:

1. verðlaun: vandaðar skákbækur.
2. verðlaun: Landsliðstreyja „tólfunnar“ vegna EM í knattspyrnu í  Frakklandi.
3. verðlaun:   Landsliðstreyja „tólfunnar“ vegna EM í knattspyrnu í  Frakklandi.

 

Mótsstig ráða verði keppendur jafnir að vinningum.

Æskilegt er að tilkynna má þátttöku á fyrirfram á vefinn [e-mail] í síma 5689141. Keppendur geta þó einnig verið með með mæti þeir rétt fyrir kl. 18  föstudaginn 20. maí. 

Róbert hraðskákmeistari öðlinga 2016

Róbert Lagerman sigraði á Hraðskákmóti öðlinga sem fram fór í gærkveldi en hann hlaut 5,5 vinning í skákunum sjö. Guðlaug Þorsteinsdóttir kom jöfn Róberti í mark en varð að láta sér annað sætið nægja eftir stigaútreikning og þriðja með 5 vinninga var Lenka Ptacnikova.

Góð stemning var í Skákhöll TR þar sem keppendur gæddu sér á ljúffengum veitingum á milli umferða og úr varð hið skemmtilegasta mót þar sem spennan var mikil. Að loknum fjórum umferðum voru þrír keppendur efstir og jafnir með 3,5 vinning en ásamt Róberti og Guðlaugu var þar á meðal Siguringi Sigurjónsson sem lætur sér fátt um finnast þó hann keyri frá suðurnesjum til að sækja mót félagsins.

Í fimmtu umferð vann svo Guðlaug góðan sigur á Róberti á meðan Siguringi gerði jafntefli við Ögmund Kristinsson. Á sama tíma lagði Lenka Einar Valdimarsson og því var staðan á toppnum orðin þannig að Guðlaug var efst með 4,5 vinning en Siguringi og Lenka fylgdu í humátt með 4 vinninga.

Sjötta og næstsíðasta umferð var síðan æsispennandi þar sem viðureign skákdrottninganna, Lenku og Guðlaugar, á efsta borði stóð uppúr. Æsileg barátta þeirra í milli í lokin endaði með því að Guðlaug féll á tíma í jafnteflislegri stöðu þar sem Lenka reyndi mikið að kreista fram sigur peði yfir. Við hlið þeirra knésetti Róbert Siguringa og skaust því í annað sætið ásamt Guðlaugu en Lenka leiddi með 5 vinninga.

Í lokaumferðinni sigraði síðan Róbert Lenku nokkuð þægilega og slíkt hið sama gerði Guðlaug gegn Einari. Lokastaðan því eins og áður segir og hafði Róbert á orði að aðalatriðið væri að vera efstur eftir síðustu umferð og að þarna hefði hann sannarlega bjargað heiðri karlpeningsins. Það var virkilega ánægjulegt að sjá þær stöllur saman á verðlaunapalli en sigurvegari mótsins virtist njóta sín einkar vel í myndatökunum.

Öðlingamótunum er því formlega lokið og óskum við verðlaunahöfum til hamingju og þökkum öllum keppendum fyrir þátttökuna. Sjáumst að ári!

Jafnframt fór fram verðlaunafhending frá sjálfu öðlingamótinu þar sem Stefán Arnalds kom sá og sigraði 

Myndskreytta frásögn má finna á heimasíðu TR.

Alþjóðlegu meistararnir unnu í dag - Gúmmi mætir goðsögn á morgun

Alþjóðlegu meistararnir Guðmundur Kjartansson (2457) og Björn Þorfinnsson (2410) sýndu báðir tennurnar í dag þegar þeir unnu kósovóska skákmeistara. Hannes Hlífar Stefánsson (2581) og Héðinn Steingrímsson (2574) gerðu báðir jafntefli. Héðinn í einni af lengstu skák umferðarinnar. 

Úrslit sjöundu umferðar

Hannes, Héðinn og Gummi hafa allir 4 vinninga en Björn er skammt undan með 3½ vinning. Því miður verður enginn íslensku keppendanna í beinni á morgun en Guðmundur teflir við goðsögnina Alexander Beliavsky (2624). Pörun íslensku keppendanna er sem hér segir:

Tveir keppendur eru efstir og jafnir með 6 vinninga. Það eru annars vegar Rússinn Ernesto Inarkiev (2686) og hins vegar Tékkinn viðkunnanlegi David Navara (2735).

David Navara, ein allra besta fyrirmynd skákmanna sem til er, fór í gær í skoðunarferð ásamt fjölda keppenda. Þar tefldi Navara fjöltefli við krakkanna - sjálfsögðu án þóknunar - og skemmti sér best allra - enda er skák skemmtileg!

Pistill væntanlegur á morgun - þar verður meðal annars sagt frá óvæntri bréfsendingu sem Gunnar Björnsson og Björn Þorfinnsson fengu.  

 

 

• Heimasíða mótsins
• Beinar útsendingar (kl. 13:45)
• Chessbomb (beinar útsendingar)
• Chess-Results 

 

Sjötta mót Bikarsyrpu TR fer fram helgina 27.-29. maí

Bikarsyrpa Taflfélags Reykjavíkur heldur áfram þegar sjötta og síðasta mót syrpunnar fer fram helgina 27.-29. maí og hefst fyrsta umferð föstudaginn 27. maí kl. 17.30. Mótum syrpunnar hefur verið fjölgað og telur hún alls sex kappskákmót sem eru ætluð börnum á grunnskólaaldri (fædd 2000 og síðar) sem ekki hafa náð 1600 skákstigum. Þar með gefst þeim tækifæri til að næla sér í alþjóðleg skákstig á skákmótum sem sérhönnuð eru fyrir þau.

Tefldar eru 5 umferðir eftir svissnesku kerfi. Tímamörk eru 30 mínútur + 30 sekúndur á hvern leik og geta skákirnar því varað í allt að tvær klukkustundir. Þó svo við leggjum ætíð áherslu á að krakkarnir vandi sig og noti tímann vel, þá má gera ráð fyrir að margar skákir taki mun styttri tíma.

Mótið er sérstaklega hugsað fyrir krakka sem hafa sótt skákæfingar TR (og/eða annarra taflfélaga) reglulega síðastliðinn vetur eða lengur. Það er gott að byrja sem fyrst að keppa á kappskákmótum, en hingað til hefur þeim krökkum sem vilja tefla á “alvöru mótum” mestmegnis staðið til boða að taka þátt í opnum mótum. Þar er styrkleikamunurinn oft mikill, mótin taka langan tíma, auk þess sem marga krakka óar við tilhugsuninni um að tefla við fullorðna á sínum fyrstu kappskákmótum. Bikarsyrpan er svarið við því.

Einungis börn og unglingar á grunnskólaaldri sem ekki hafa náð 1600 alþjóðlegum skákstigum geta tekið þátt í mótum Bikarsyrpunnar. Þannig er styrkleikamunurinn minni en ella og krakkarnir njóta þess betur að tefla kappskákir. Tímamörkin eru líka styttri, og henta krökkunum betur en langar 90 mínútna skákir sem tíðkast á venjulegum kappskákmótum. Mótið uppfyllir öll skilyrði Alþjóða skáksambandsins FIDE og er reiknað til alþjóðlegra skákstiga sem gott er að byrja að safna snemma. Frítt er í mótin fyrir krakka í Taflfélagi Reykjavíkur en fyrir krakka í öðrum taflfélögum er þátttökugjaldið 1000 krónur fyrir hvert mót Bikarsyrpunnar.

Dagskrá:
1. umferð 17.30 á föstudegi (27. maí)
2. umferð 10.30 á laugardegi (28. maí)
3. umferð 14.00 á laugardegi (28. maí)
4. umferð 10.30 á sunnudegi (29. maí)
5. umferð 14.00 á sunnudegi (29. maí). (Lokaumferð + verðlaunaafhending).

Ein yfirseta (bye) er leyfð í umferðum 1-3 og fæst fyrir hana 1/2 vinningur. Tilkynna þarf skákstjóra um yfirsetu fyrir lok umferðarinnar á undan.

Vinsamlegast skráið þátttakendur sem fyrst, það hjálpar við undirbúning mótsins!

Skráningarform

Skráðir keppendur

Bikarsyrpan samanstendur af sex mótum í vetur. Bikarar og medalíur eru í verðlaun fyrir efstu sætin í hverju
 móti auk áskrifta á Chess.com eða Chesskid.com. Þá verða veitt sérstök verðlaun fyrir samanlagðan árangur á mótunum þar sem í boði verða 5 einkatímar hjá alþjóðlegum meistara fyrir fyrsta sætið, 3 tímar fyrir annað sætið og 2 tímar fyrir þriðja sætið.

Hlökkum til að sjá ykkur!

MótX-einvígið 2016, Salnum 21.-22. maí

Verið hjartanlega velkomin á setningu MótX-einvígisins í Salnum, Kópavogi, laugardaginn 21. maí kl. 14.

Stórmeistararnir Nigel Short og Hjörvar Steinn Grétarsson mætast í 6 skáka einvígi.

• Short hefur teflt um heimsmeistaratitilinn
• Hjörvar Steinn er yngsti stórmeistari Íslands!

Jóhann Arnar skákmeistari Rimaskóla annað árið í röð

 

Jóhann Arnar Finnsson í 10-bekk Rimaskóla sigraði á Skákmóti Rimaskóla 2016 eftir harða baráttu við systkinin Nansý og Joshua Davíðsbörn. Skákmótið var nú haldið í 23. skiptið og mættu 27 nemendur skólans til leiks. Tefldar voru sex umferðir og mótið var allan tímann jafnt og spennandi. Jóhann Arnar sem vann nú mótið annanð árið í röð hlaut 5,5 vinninga og varð virkilega að hafa fyrir jafnteflinu við Joshua sem stóð betur alla skákina.

Nansý Davíðsdóttir varð í öðru sæti með 5 vinninga og tapaði aðeins skákinni gegn Jóhanni Arnari i 4. umferð Nansý vann alla aðra andstæðinga sína örugglega. Joshua bróðir hennar sem er í 5. bekk varð 3. á mótinu eftir að vera jafn Jóhanni Arnari fyrstu fimm umferðirnar en tapaði fyrir systur sinni í lokaumferð. Arnór Gunnlaugsson 5. bekk kom í mark jafn Joshua að vinningum. Hanner einn af 10 efnilegum skákmönnum 5. bekkjar sem hafa verið í þjálfun hjá Birni Ívari og Helga Ólafs í vetur. Valgerður Jóhannsdóttir varð í örðu sæti stúlkna og Sigríður Steingrímsdóttir í 4. bekk varð þriðja. Alls tóku 9 stúlkur þátt í mótinu eða 33% þátttakenda.

Að vanda voru eftirsótt verðlaun í boði og hlutu 12 þátttakendur gjafabréf upp á Domino´s pítsu. Jóhann Arnar fékk afhenta tvo glæsilega verðlaunagripi í mótslok, annar þeirra er farandbikar með nöfnum allra skákmeistara Rimaskóla frá upphafi. Þar er nafn Hjörvars Steins Grétarssonar oftast ritað eða alls 7 sinnum og nafn Olivers Arons Jóhannessonar þrívegis.