Íslandsmót skákmanna í golfi 2012

Íslandsmót skákmanna í golfi 2012 verður haldið á Hvaleyrarvelli í Hafnarfirði laugardaginn 11.ágúst n.k.  Við eigum frátekna 24 rástíma á milli kl 13:00 og 13:50. Um leið og skákmenn taka þátt í Íslandsmótinu þá eru þeir þátttakendur í Opna Epli.is mótinu. Eftir að leik líkur verður boðið upp á kvöldverð í golfskálanum og að honum loknum verður 15 umferða hraðskákmót.
 
Keppt er í eftirfarandi flokkum:

Golf og skák, án forgjafar.

Sá sem nær bestum árangri í golfi og skák hlýtur nafnbótina Íslandsmeistari skákmanna í golfi 2012. Notuð er sérstök tafla sem umbreytir höggafjölda á Hvaleyrinni í skákstyrkleika (rating-performance). Skákstyrkleiki (rating-performance) í hraðskákmótinu er mældurog samanlagður árangur gildir.

Golf og skák, með forgjöf.

Árangur í golfinu er mældur í punktum á vanalegan hátt. Skákstyrkleiki umfram getur  (rating-performance mínus eigin skákstig) er mældur í hraðskákmótinu. Að tefla á eigin getu, gefur mönnum 32 punkta. Hver 25 stig umfram getu gefur einn punkt. Sá sem nær flestum punktum samanlagt hlýtur nafnbótina Punktameistari skákmanna í golfi 2012.

Dagskráin
12:30 - 13:20: Skákmenn mæta tímanlega í sinn rástíma
13:00 - 13:50: Rástímar
18:00 - 18:50: Golfleik líkur
19:00 - 20:00: Kvöldverður í golfskálanum
Lambasteik að hætti Brynju (nánar síðar)
20:00 - 23:00: 15.umferða hraðskákmót í golfskálanum
 
Við eigum frátekna 24 rástíma á milli kl 13:00 og 13:50
Þátttökurétt eiga allir golfarar með forgjöf og íslensk skákstig.
Þeir sem eru ekki með forgjöf eða treysta sér ekki á aðalvöllinn, geta spilað Sveinskotsvöllinn sem er 9 holu völlur við hliðina á aðalvellinum. Viðkomandi taka þátt í keppninni um Punktameistara skákmanna.

Þátttökugjald er 9500 kr og innifalið í því er mótsgjaldið og kvöldverðurinn. Þeir sem spila Sveinskotsvöllinn greiða 6500 kr.

Þátttökutilkynningar berist Halldór Grétari ( [e-mail] ) fyrir föstudaginn 29. júní nk.
 
Eftirtaldir skákmenn er vitað til að hafa forgjöf í golfi.
 (Íslensk skákstig 1.júní 2011, golf-forgjöf 1.júlí 2011):
Nafn  Skákstig  Félag   Forgjöf  
Þórleifur, Karlsson  2085  Mátar  4.5
Hrafn, Loftsson  2187  TR  6.8
Bergsteinn, Einarsson  2224  TR  8.2
Baldur, Hermannsson  1985  Víkingaklúbburinn  10.1
Sigurður Páll, Steindórsson  2220  KR  12.2
Ingimar, Jónsson  1915  KR  12.4
Helgi, Ólafsson  2535  TV  12.8
Sveinn, Arnarsson  1781  Goðinn  13.7
Unnsteinn, Sigurjónsson  1970  TB  14.7
Páll, Sigurðsson  1989  TG  16.2
Ögmundur, Kristinsson  2088  Hellir  16.5
Arnaldur, Loftsson  2085  Hellir  17.4
Karl, Þorsteins  2477  Hellir  17.5
Benedikt, Jónasson  2210  TR  17.6
Halldór Grétar, Einarsson  2194  TB  17.6
Ásgeir Þór, Árnason  2133  TG  18.7
Hilmar, Viggósson  1995  KR  18.8
Sigurbjörn, Björnsson  2360  Hellir  19.3
Páll L, Jónsson  2043  SSON  19.5
Jón G, Briem  2025  KR  23.6
Ingvar, Jóhannesson  2338  TV  23.9
Jón Loftur, Árnason  2514  TB  25.4
Gunnar, Björnsson  2087  Hellir  34.9
Þröstur, Þórhallsson  2401  Goðinn  36

Heimasíða mótsins

Sumarnámskeiðin hafin

Það hefur verið glatt á hjalla í Kvennaskólanum þessa vikuna. Þar fara nú fram sumarnámskeið Skákakademíunnar. Þrjátíu krakkar hafa mætt til leiks þessa vikuna og von er á fleirum næstu vikurnar. Hægt er að byrja á námskeiði hvenær sem er en námskeiðin standa yfir til 17. ágúst. Helstu kennarar hafa verið Stefán Bergsson og Inga Birgisdóttir auk þess sem nafnarnir Björn Ívar Karlsson og Björn Þorfinnsson hafa kennt. Von er á góðum gestum í sumar; skákkennurum, stórmeisturum og landsliðsmönnum og konum.

Krakkarnir eru á öllum aldri og misreynd. Þannig hefur Inga kennt byrjendum mannganginn, hvernig best er að hefja taflið, gaffal, leppun og fleira. Hinir eldri og reyndari hafa lært ýmislegt um stök og bakstæð peð, og svo endataflsstöður eins og Philidor og Lucena. Í gær var svo fylkt liði í VIN á Sólstöðumótið 2012.

Skráning á sumarnámskeiðin er í [e-mail].

Góð aðstaða er fyrir skákiðkun í Kvennaskólanum og er salurinn sífellt að taka á sig skáklegri mynd. Opið hús er fyrir alla skákáhugamenn frá 15:00, mánudag til fimmtudags. Þingholtsstræti 37, gegnt breska og þýska sendiráðinu.

Myndaalbúm (HJ)

Oliver Aron Sólstöðumeistari

 

Það var frábær stemning á Sólstöðumótinu sem haldið var í Vin eftir hádegi í gær. 33 þátttakendur sem gerir mótið það næstfjölmennasta sem haldið hefur verið á Hverfisgötunni hingað til. Teflt var bæði inni og úti en rigningarskúrir voru aðeins að stríða keppendum, en allir þó í sólskinsskapi.

 

Oliver Aron Jóhannsson er í fantaformi þessa mánuðina og sigraði í sex umferða mótinu þar sem umhugsunartíminn var 7 mínútur. Gerði hann jafntefli við Gunnar Björnsson en vann rest. Oliver vann hinn þrettán ára Gauta Pál Jónsson í hreinni úrslitaskák en Gauti Páll átti frábært mót og lagði miklu stigahærri andstæðinga á leið sinni í úrslitaskákina. Við tapið féll hann í fjórða sætið en Vigfús Vigfússon varð annar með fimm vinninga sem og hin þýska Caroline Rieseler, Fide-meistari kvenna,  sem varð þriðja.

Vöfflukaffi var í hléi til að byggja upp orku fyrir lokaumferðirnar sem voru æsispennandi. Þau Stefán Bergsson og Ingibjörg Edda Birgisdóttir, frá Skákakademíu Reykjavíkur komu með ótrúlega flottan hóp ungmenna úr Sumarskákskólanum auk þess sem fjöldi efnilegustu unglinga okkar mætti á svæðið.  Gaman var að fá ferðalangana Caroline og hinn enska David Cook í heimsókn, en þau leituðu uppi mót til að taka þátt í á ferð sinni.  Frábærlega skipað mót og sérlega skemmtilegt.

Veitt voru bókaverðlaun fyrir efstu sætin auk þess sem Krummi Arnar Bang fékk verðlaun fyrir 6 ára og yngri, Hilmir Freyr Heimisson (4v.) í flokki 12 ára og yngri, Gauti Páll (4,5 v.) í 16 og yngri, Svandís Rós Ríkharðsdóttir fyrir bestan árangur stúlkna og auk þess voru happadrættisvinningar.

Hrannar Jónsson, fyrirliði Vinjarliðsins, stjórnaði mótinu af röggsemi og sleppti því að taka þátt að þessu sinni.

1.   5.5    Oliver Aron Jóhanneson

 2.   5.0   Vigfús Vigfússon    

 3.   5.0   Caroline Rieseler   

 4.   4.5   Gauti Páll Jónsson    

5.   4.5   Gunnar Björnsson    

 6.   4.0  Hilmir Freyr Heimisson

 7.   4.0  Jorge Fonseca       

 8.   4.0  Jón Trausti Harðarson

 9.   4.0   Sigurjón Haraldsson 

 10.  4.0   Stefán Bergsson     

 11.  3.5   Eiríkur K. Björnsson

 12.  3.5   Haukur Halldórsson 

Tíu voru með þrjá vinninga og aðrir með minna.

Myndaalbúm (AV)

Jónsmessuskák á Akureyri á laugardag

Laugardaginn 23. júní heldur Skógræktarfélag Eyfirðinga sína árlegu Jónsmessuhátíð í Kjarnaskógi. Skákfélag Akureyrar mun nú, í fyrsta skipti, taka þátt í hátíðinni og blása til skákmóts í lerkilundi norðan við sólúrið í Kjarnaskógi kl. 20.30 (ath. breytt staðsetning). Allir skákáhugamenn eru hvattir til að mæta.

HM áhugamanna 2012 - Porto Carras á Grikklandi - pistill Olivers Arons

Allar styrktarþegar hjá SÍ eiga að skila pistli um þau mót sem þeir fá almenna styrki á.  Oliver Aron hefur skrifað pistil um þátttöku sína á HM áhugamanna sem fram fór í vor í Porto Carras á Grikklandi

HM áhugamanna 2012 - Porto Carras, Grikklandi
Saga mín í mótinu

1 umferð:
Eftir mjög langt og erfitt ferðalag sem tók yfir 30 klst, þá þurfti ég að tefla fyrstu umferðina aðeins 2 tímum eftir að við komumst loks á áfangastað. Andstæðingurinn var Torill Skytte(1963) frá Noregi Þetta var ekki vel tefld skák af minni hálfu enda var ég orðinn mjög þreyttur og lúinn eftir ferðalagið.

2 umferð: Andstæðingur minn í þessari umferð var Iliana Kokana sem er 10 ára stelpa frá Grikklandi, Ég var með hvítt og vann frekar auðveldlega.

3 umferð:  Ég tefldi við Marin-Dumitru Fantana(1892) frá Rúmeníu.  Í þessari skák tefldi ég Paulsen afbrigðið í Sikileyjarvörn þar sem að hann veikti sig of mikið á svörtu reitunum og ég vann skiptamun eftir um 15 leiki og restin reyndist auðveld.

4 umferð: Í fjórðu umferð tefldi ég við Bhave Kausik(1897) sem er 15 ára strákur frá Indlandi. Þetta var fimm tíma skák og mjög erfið en í endann náði ég að vinna.

5 umferð: Í fimmtu umferð tefldi ég við Sawas Maneledis(1915) með hvítt. Þessi skák byrjaði í spænska leiknum en þróaðist einhvernvegin út í Kóngindverska vörn. Þetta var fjörug skák en ég hafði sigur að lokum.

6 umferð:Í Þessari umferð tefldi ég við Ioannis Minas(1930) frá Grikklandi en hann er þekktur fyrir að vera nokkuð aggressívur skákmaður. Ég tefldi Winaver afbrigðið í franskri vörn, staðan var mjög dýnamisk en í jafnvægi þegar hann fórnaði peði sem ég tók og náði svo að vinna hann seinna í endatafli.

7 umferð: Í sjöundu umferð tefldi ég við Alexander Liberman (1988) frá Rússlandi. Þetta var spennandi skák sem að ég vann að lokum. Ég ætla að skýra hana hér á eftir.

8 umferð:  Í þessari umferð tefldi ég við Claus Riemann stigalausan Þjóðverja sem að var efstur í mótinu fyrir þessa umferð. Eftir minna en 10 leiki byrjaði hann að hrista hausinn og féll svo niður í gólfið. Keppendur á staðnum sem voru læknar byrjuðu strax að fremja hjartahnoð sem og starfsmenn sem voru þarna. Það var kallaður til sjúkrabíll sem að flutti hann svo á sjúkrahús. Eftir langa umhugsun dómaranna var klukkan sett í gang og tíminn rann út.

9 umferð: Í þessari umferð tefldi ég við Haralambos Tsakiris (1956) sem er 16 ára strákur frá Grikklandi. Ég tefldi slavneska vörn en tefldi kannski of passívt og lenti fljótt í erfiðri vörn. Það skiptist fljótt upp í endatafl þar sem að hann var með betri stöðu en samt smá jafnteflis sjénsar fyrir mig. Við lentum báðir í tímahraki þar sem að hann náði að klára skákina nokkurn veginn.

Í endann var ég nokkuð sáttur við þriðja sætið.

Bestu kveðjur og þakkir fyrir stuðninginn
Oliver Aron Jóhannesson

Heimasíða mótsins

[Event "World Amateur Championship"] [Site "Neos Marmaras, Halkidiki"] [Date "2012.04.20"] [Round "7.2"] [White "Johannesson, Oliver"] [Black "Liberman, Alexander"] [Result "1-0"] [ECO "B01"] [WhiteElo "1677"] [BlackElo "1988"] [Annotator ",Lenovo"] [PlyCount "105"] [EventDate "2012.04.16"] [EventRounds "9"] [EventCountry "GRE"] 1. e4 d5 2. exd5 Qxd5 3. Nc3 Qa5 {Hann hafði alltaf teflt thetta afbrigði svo að ég hafði aðeins undirbúið mig.} 4. Bc4 Nf6 5. Nge2 Bg4 6. d3 c6 7. f3 Bh5 { Hérna ákvað ég að tefla agresívt} 8. h4 Bg6 9. Nf4 {Hérna var planið að leika g4 til að láta hann leika h peðinu sínu og drepa thá biskupinn hans.} Bf5 { Hann kom í veg fyrir thað} 10. Qe2 {Ég ætlaði bara að hrókera langt og halda svo áfram með sóknina á kóngsvæng.} Bd7 11. Bd2 Qc7 12. g4 e6 13. g5 Ng8 14. O-O-O {Hér var ég orðinn mjög ánægður með stöðuna mína} Bd6 15. Qe4 Ne7 16. h5 {Planið er að leika g6} b5 {Hann tharf að reyna að fá mótspil.} 17. Bb3 a5 18. a4 {Ég var að reyna að halda drottningarvængnum lokuðum} b4 (18... bxa4 19. Nxa4 {Ef hann hefði leikið thessu var ég ekki að sjá leið fyrir hann að halda einhverri sókn áfram.}) 19. Nce2 e5 20. Ng2 (20. g6 {var langbesti leikurinn t. d.} exf4 21. h6 gxh6 22. gxf7+ Kd8 23. Nxf4 Kc8 24. Rxh6 Kb7 25. Rh5 Rf8 {er tölvulína sem að tölvan metur unnið á hvítt}) 20... Na6 {Hérna var ég kominn með lítinn tíma og ákvað að leika g6 og sjá hvað gerist.} 21. g6 f5 $2 {betra var að} (21... fxg6 22. Qc4 Kd8 23. Bg5 Kc8 24. d4 exd4 25. Bxe7 Bxe7 26. hxg6 h5 {thar sem að hvítur stendur samt aðeins betur}) 22. Qc4 Nd5 23. h6 hxg6 24. hxg7 Rg8 25. d4 $1 {Ég ákvað að reyna að opna miðborðið thar sem að kóngurinn hans stendur illa thar} e4 26. Nef4 Rxg7 {Hérna var ég kominn í tímahrak og ákvað að leika einhverju öruggu.} 27. Nxd5 (27. Rh8+ $1 Bf8 28. fxe4 Nxf4 29. Bxf4 Qb6 30. exf5 Bxf5 31. Re1+ Kd7 32. Bh6 Rd8 33. Bxg7 Bxg7 34. Qf7+ {er varíantur sem að tölvan gefur, sem að var að sjálfsögðu gjörunnið}) 27... cxd5 28. Qxd5 O-O-O 29. fxe4 fxe4 30. Qa8+ {thessu lék ég bara til að fá auka tíma á klukkuna} Nb8 31. Qxe4 Re8 32. Qf3 Rf8 33. Qd3 Bf5 34. Qc4 {Ég ákvað að skipta uppá drottningum útaf tímapressunni} Qxc4 35. Bxc4 Rc7 36. b3 Be4 37. Rhg1 Bh2 38. Rh1 Bg3 39. Rh3 Bd6 40. Ne3 {Ég var bara að bæta stöðu kallanna} Nc6 41. Be6+ Kb8 42. Nc4 {Ég ákvað að fórna peði til baka} Nxd4 43. Rh4 Ne2+ 44. Kb2 Bf4 45. Bxf4 Nxf4 46. Rd4 g5 47. Rh6 Bf3 {thetta voru stór mistök sem að klúðruðu skákinni. Nú falla bæði peðin á dtrottningarvæng} 48. Nxa5 g4 49. Rxb4+ Ka8 50. Nc4 g3 {Hérna var ég orðinn mjög stressaður útaf peðinu hans en ég er samt kominn með gjörunnið} 51. Nb6+ Ka7 52. Nc8+ {Hérna tharf hann að drepa á c8 en hann tapar samt skiptamun á thvi} Ka8 53. Bd5+ {Hérna er hann óstöðvandi mát í nokkrum leikjum og hann féll á tíma hérna} 1-0

Skákhátíð á Ströndum: Hver hreppir silfurhring sigurvegarans?

Skákhátíð á Ströndum 2012 verður haldin nú um helgina og er efnt til fjölteflis á Hólmavík og skákmóta í Djúpavík, Trékyllisvík og Norðurfirði. Von er á stórmeisturunum Helga Ólafssyni, Jóhanni Hjartarsyni og Þresti Þórhallssyni, auk skákáhugamanna víða að. Þá munu mörg af efnilegustu skákbörnum landsins taka þátt í hátíðinni, sem er öllum opin. Fjöldi viðurkenninga og verðlauna eru í boði, m.a. munir eftir tvo af kunnustu handverksmönnum Strandasýslu, flugfarseðlar, sérsmíðaðir silfurhringir, silki frá Samarkand, bækur og peningaverðlaun.

Hátíðin hefst með fjöltefli á Hólmavík klukkan 16 á föstudaginn, þegar Róbert Lagerman, heiðursgestur hátíðarinnar, teflir fjöltefli. Róbert sem verður fimmtugur nú í sumar er sá skákmeistari sem tekið hefur þátt í flestum skákviðburðum á Ströndum sl. ár. Á föstudagskvöld klukkan 20 verður tvískákarmót í Hótel Djúpavík og á laugardag klukkan 13 hefst Afmælismót Róberts Lagerman í samkomuhúsinu í Trékyllisvík. Heildarverðlaun á mótinu verða rúmlega 100 þúsund krónur, en að auki gefa fjölmörg fyrirtæki og einstaklingar verðlaun. Á sunnudag kl. 13 verður svo hraðskákmót í Kaffi Norðurfirði, sem markar lok Skákhátíðar á Ströndum 2012.

Til mikils er að vinna á hátíðinni. Sigurvegarar í Trékyllisvík og Norðurfirði fá muni eftir Guðjón Kristinsson frá Dröngum og Valgeir Benediktsson í Árnesi. Þá mun sigurvegarinn á Afmælismóti Róberts fá sérsmíðaðan silfurhring, smíðaðan af Úlfari Daníelssyni silfursmið. Á hringinn er greypt með rúnaletri kjörorð skákhreyfingarinnar: Við erum ein fjölskylda.

Útlit er fyrir góða þátttöku í hátíðinni, sem hefur unnið sér sess sem einhver skemmtilegasti skákviðburður ársins. Ýmsir kunnir skákáhugamenn hafa boðað komu sína, og má nefna Halldór Blöndal fv. forseta Alþingis, Magnús Matthíasson formann Vinafélagsins, Stefán Bergsson framkvæmdastjóra Skákakademíu Reykjavíkur, Ingibjörgu Eddu Birgisdóttur fv. Íslandsmeistara kvenna, Gunnar Finnsson fv. skólastjóra í Trékyllisvík og Gunnar Björnsson forseta Skáksambandsins. Þá munu heimamenn að vanda taka virkan þátt í skákhátíðinni.

Helstu bakhjarlar Skákhátíðar á Ströndum 2012 eru Brim hf. menntamálaráðuneytið, Skáksamband Íslands, Flugfélagið Ernir, Kaupfélag Steingrímsfjarðar, Sögur útgáfa, forlagið, Íslenskt grænmeti, Securitas, Jóhanna Travel o.fl.

Allir eru velkomnir, og verður efnt til ýmissa viðburða fyrir utan skákina, m.a. haldin grillveisla í Trékyllisvík og ,,landsleikur" í fótbolta milli gesta og heimamanna í UMF Leifi heppna. Það er von mótshaldara að sem flestir leggi leið sína á hátíðina um helgina, og komist í snertingu við stórbrotna náttúru og auðugt mannlíf Strandasýslu.

Skákhátíð á Ströndum hefur stofnað Facebook-síðu, en einnig er hægt að skrá sig hjá Hrafni [e-mail] , Róbert í [e-mail] Andreu [e-mail], sem einnig veita frekari upplýsingar um ævintýraferð á Strandir.

Sumarsólstöðumót hjá Vin í dag

Miðvikudaginn 20. júní verður sumarsólstöðumót í Vin, Hverfisgötu 47 og hefst það klukkan 13:00.

Treyst er á að það sé alltaf gott veður á Sumarsólstöðum! Ekki verra ef hægt væri að skella nokkrum borðum út í garð.

Tefldar verða sex umferðir með sjö  mínútna umhugsunarfresti og það er um að gera að líta á þetta sem hressandi undirbúning fyrir Strandir.

Bókavinningar fyrir efstu sætin og happadrætti. Glæstar kaffiveitingar í hléi og allir hjartanlega velkomnir í Vin.

Magnus Carlsen sigurvegari Tal Memorial

 

Magnus Carlsen (2835) sigraði á Tal Memorial sem lauk í dag í Moskvu.  Carlsen vann McShane (2706) í níundu og síðustu umferð.  Næststigahæsti skákmaður heims, Aronian (2825) gerði Carlsen mikinn greiða þegar hann vann Caruana (2770) sem var efstur fyrir lokaumferðina.  Caruana varð í 2.-3. sæti ásamt Radjabov (2784).   Fjörlega var teflt á mótinu rétt eins og ávallt á Tal Memorial.  

 

Úrslit 9. umferðar:

Levon Aronian	1-0	Fabiano Caruana
Hikaru Nakamura	½-½	Teimour Radjabov
Ev. Tomashevsky	½-½	Alexander Grischuk
Luke McShane	0-1	Magnus Carlsen
Vladimir Kramnik	½-½	Alex. Morozevich

Lokastaðan:

• 1. Carlsen (2835) 5,5 v.
• 2.-3. Caruana (2770) og Radjabov (2784) 5 v.
• 4.-7. Morozevich (2769), Aronian (2825), Kramnik (2801) og Grischuk (2761) 4,5 v.
• 8.-9. Nakamura (2775) og McShane (2706) 4 v.
• 10. Tomashevsky (2738) 3,5 v.

Mótið var ægisterkt en meðalstig eru 2776 skákstig. 

• Heimasíða mótsins
• Beinar útsendingar
• Beinar myndútsendingar
• ChessBomb

Sumarsólstöðumót í Vin

Miðvikudaginn 20. júní verður sumarsólstöðumót í Vin, Hverfisgötu 47 og hefst það klukkan 13:00.

Treyst er á að það sé alltaf gott veður á Sumarsólstöðum! Ekki verra ef hægt væri að skella nokkrum borðum út í garð.

Tefldar verða sex umferðir með sjö  mínútna umhugsunarfresti og það er um að gera að líta á þetta sem hressandi undirbúning fyrir Strandir.

Bókavinningar fyrir efstu sætin og happadrætti. Glæstar kaffiveitingar í hléi og allir hjartanlega velkomnir í Vin.

Skákhátíð á Ströndum um næstu helgi!

Fjórir stórmeistarar eru skráðir til leiks á Skákhátíð á Ströndum 2012: Helgi Ólafsson, Jóhann Hjartarson, Stefán Kristjánsson og Þröstur Þórhallsson. Að auki eru mörg af efnilegustu ungmennum landsins og skákáhugamönnum úr öllum fjórðungum á leið á Strandir.

Hátíðin hefst með fjöltefli á Hólmavík klukkan 16 á föstudaginn, þegar Róbert Lagerman, heiðursgestur hátíðarinnar, teflir fjöltefli. Á föstudagskvöld klukkan 20 verður tvískákarmót í Hótel Djúpavík og á laugardag klukkan 13 hefst Afmælismót Róberts Lagerman í samkomuhúsinu í Trékyllisvík. Heildarverðlaun á mótinu verða rúmlega 100 þúsund krónur, en að auki gefa fjölmörg fyrirtæki og einstaklingar verðlaun. Á sunnudag kl. 13 verður svo hraðskákmót í Kaffi Norðurfirði, sem markar endalok Skákhátíðar á Ströndum 2012.

Tveir af helstu handverksmönnum og listasmiðum Árneshrepps, Valgeir Benediktsson í Árnesi, og Guðjón Kristinsson frá Dröngum, leggja til verðlaunagripina á Skákhátíð á Ströndum 2012. Báðir hafa þeir, á undanförnum árum, lagt hátíðinni lið með margvíslegum hætti.

Valgeir Benediktsson hefur ásamt fjölskyldu sinni í Árnesi byggt upp Minja- og handverkshúsið Kört í Trékyllisvík. Þar er hægt að kynnast sögu þessarar einstöku sveitar, og fólkinu sem þar bjó. Óhætt er að segja að Valgeir og fjölskylda hans hafi bjargað frá glötun ómetanlegum heimildum um búsetu við nyrsta haf. Þar fyrir utan er Valgeir einhver snjallasti handverksmaður landsins, og býr til stórkostlega muni úr rekaviði, m.a. hina rómuðu penna sem notaðir hafa verið í verðlaun á skákhátíðum undanfarinna ára.

Guðjón Kristinsson er Strandamaður í húð og hár, alinn upp á Seljanesi og Dröngum. Hann er eftirsóttur hönnuður og handverksmaður, enda hefur hann tileinkað sér hina merku list forfeðra okkar við húsbyggingar og hleðslu. Að auki smíðar Guðjón leiktæki og listmuni, og er tvímælalaust í hópi áhugaverðustu listmanna landsins.

Gripurinn frá Valgeiri verður handa sigurvegaranum á Afmælismóti Róberts Lagerman í samkomuhúsinu í Trékyllisvík laugardaginn 23. júní, en daginn eftir verður keppt um ,,Krumlu Strandamannsins", skúlptúr Guðjóns úr rekaviði, á mótinu í Kaffi Norðurfirði.

Fyrir utan listgripi á Ströndum munu keppendur á skákhátíðinni keppa um peningaverðlaun og marga aðra vinninga. Mikil áhersla er lögð á verðlaun fyrir börn, enda liggur fyrir að mörg efnilegustu skákbörn landsins mæta á Strandir, auk harðsnúins heimavarnarliðs af ungu kynslóðinni. Börnin sem taka þátt í hátíðinni munu öll fá verðlaun og viðurkenningar.

Meðal keppenda á Skákhátíð á Ströndum 2012 verða sumir af bestu og efnilegustu skákmönnum landsins. Í þeim hópi eru stórmeistararnir Jóhann Hjartarson, Helgi Ólafsson og Stefán Kristjánsson. Af öðrum kunnum köppum má nefna Róbert Lagerman, Sævar Bjarnason, Stefán Bergsson, Hrannar Jónsson, Magnús Matthíasson, Heimi Páll Ragnarsson, Hilmi Frey, Heimisson, Ingibjörgu Eddu Birgisdóttur, Vigni Vatnar Stefánsson og Gunnar Björnsson.

Einnig er von á góðum hópi úr Skákfélagi Vinjar, auk þess sem vonast er til að hinir öflugu skákmenn Akureyrar og nærsveita fjölmenni. Þá tefla Strandamenn að vanda fram öflugum fulltrúum

Margir gistimöguleikar eru í Árnheshreppi og skal sérstaklega vekja athygli á góðu tilboði sem Hótel Djúpavík gerir gestum skákhátíðarinnar.

Hótel Djúpavík gerir gestum Skákhátíðar á Ströndum gott boð: Gisting í 2 nætur í tveggja manna herbergi, tveir kvöldverðir og tveir morgunverðir fyrir 16.000 krónur. Netfang: [e-mail] Sími: 451 4037.

Gistiheimilið í Norðurfirði býður uppá svefnpokapláss eða uppábúin rúm í vistlegum húsakynnum. Netfang: [e-mail] Sími: 554 4089.

Gistiheimilið Bergistanga býður upp á svefnpokapláss fyrir einstaklinga og hópa, með eldunaraðstöðu. Einnig notaleg herbergi með uppábúnum rúmum. Sími: 451 4003.

Finnbogastaðaskóli. Svefnpokapláss fyrir einstaklinga og fjölskyldufólk. Mjög góð hreinlætis- og eldunaraðstaða. Fín aðstaða á tjaldstæðum við skólann.

Skákhátíð á Ströndum hefur stofnað Facebook-síðu, en einnig er hægt að skrá sig hjá Hrafni [e-mail] , Róbert í [e-mail] Andreu [e-mail], sem einnig veita frekari upplýsingar um ævintýraferð á Strandir.