Skákævintýri í Stykkishólmi um næstu helgi. Stefnir í mikla páskaeggjaveislu á Skákmóti Árnamessu

Næsta barna-og unglingaskákmót verður Skákmót Árnamessu sem öllum áhugasömum grunnskólakrökkum er boðið að vera með á og verður haldið í 5. sinn í grunnskólanum Stykkishólmi laugardaginn 29. mars og hefst kl. 13:00. Farið verður með rútu frá BSÍ og N1 Ártúnsbrekku kl. 10:00 og komið heim um kvöldmatarleitið. Fararstjórar í rútunni. Verðlaunað verður í þremur flokkum; eldri flokk, yngri flokk og landsbyggðarflokk. Veitt verða stúlknaverðlaun og þeim skákkrakka sem kemur lengstan veg á mótið. 

Verðlaunaflóð: 

• 12 stk. páskaegg,
• Skemmtisigling um Breiðafjörð
• 5 bolir sem vinningshafar velja sýnar eigin ljósmyndir á
• 5 bollar sem vinningshafar velja sýnar eigin ljósmyndir á
• 5 pítsugjafabréf
• 5 bíómiðar Laugarásbíó
• Húfur frá 66°N ofl.

Spennandi spurningakeppni skákfélaga í skákhléi. Þriggja manna lið. Eignargripur í verðlaun.

Þátttökugjald, rútuferð og veitingar kostar 2000 kr og ber að greiða í upphafi ferðar. Þeir sem koma sér beint á mótsstað greiða 500 kr. Skákstjórar verða að venju þeir Helgi Árnason og Páll Sigurðsson.

Skráning er hafin á [e-mail] og í síma 568 9141. 

Hraðkvöld GM Hellis í kvöld

Skákfélagið GM Hellir heldur hraðkvöld mánudaginn 24. mars nk. og hefst taflið kl. 20:00. Tefldar verða 7 umferðir með sjö mínútna umhugsunartíma. Teflt er í félagsheimili GM Hellis í Álfabakka 14a í Mjóddinni.

Sigurvegarinn á hraðkvöldinu fær í verðlaun máltíð fyrir einn á Saffran. Einnig verður dreginn út af handahófi annar keppandi sem einnig fær máltíð fyrir einn á Saffran. Þar eiga allir jafna möguleika, án tillits til árangurs á mótinu.

Þátttökugjöld eru kr. 300 fyrir félagsmenn (kr. 200 fyrir 15 ára og yngri) og kr. 500 fyrir aðra (kr. 300 fyrir 15 ára og yngri).

Skákþáttur Morgunblaðsins: Ungu skákmennirnir bættu sig verulega á Reykjavíkurmótinu

Kínverjinn Li Chao er sigurvegari Reykjavíkurskákmótsins sem lauk í Hörpu á miðvikudaginn eftir spennandi lokaumferð. Li Chao hlaut 8 ½ vinning af 10 mögulegum. Kínverjar eru stórveldi í skákinni og að fulltrúi þeirra skuli vinna þetta mót kemur ekki á óvart. Sennilega hefur komið á óvart að greinarhöfundur sem lítið hefur teflt undanfarið skyldi eiga möguleika á efsta sætinu en í lokaumferðinni var efsta sætið undir í harðri baráttuskák við Kanadamanninn Eric Hansen. Taktík þeirrar viðureignar var að tefla frekar þurrt í þeirri von að andstæðingurinn myndi sprengja sig. En í skákinni var ákveðnu jafnvægi ekki raskað og úr varð einhverskonar störukeppni sem endaði með því að keppendur slíðruðu sverðin eftir mikil uppskipti. Undirritaður var því fyrir vikið í 2.-5. sæti ásamt Hollendingnum Robin Van Kampen, Eric Hansen og Litháanum Eduardas Rosentalis, allir með 8 vinninga. Í humátt á eftir komu m.a. Hjörvar Steinn Grétarsson og Hannes Hlífar Stefánsson með 7 ½ vinning.

Lokaúrslitin að öðru leyti bera með sér að margir af okkar ungu skákmönnum bættu sig verulega. Hinn 11 ára gamli Vignir Vatnar Stefánsson hækkaði mest allra eða um 55 elo-stig. Félagar hans í sigurliði Íslands á NM í skólaskák hækkuðu flestir heilmikið, Jón Kristinn Þorgeirsson, Oliver Jóhannesson, Dagur Ragnarsson, Hilmir Freyr Heimisson og Nökkvi Sverrisson og einnig ungir skákmenn á hraðri uppleið, Gauti Páll Jónsson, Símon Þórhallsson, Dagur Andri Friðgeirsson og Birkir Karl Sigurðsson svo nokkrir séu nefndir. Þá stóð Lenka Ptacnikova sig frábærlega.

Nýjasti stórmeistari Íslendinga Hjörvar Steinn Grétarsson átti gott mót en lykilinn að árangrinum fann hann í 9. umferð er honum tókst að leggja að velli 2. borðs mann Englendinga frá síðasta Ólympíumóti:

Hjörvar Steinn Grétarsson - Gawain Jones

Pirc-vörn

1. d4 d6 2. e4 Rf6 3. Rc3 g6 4. Be3 a6 5. a4 Bg7 6. Dd2 O-O 7. Rf3 Bg4 8. Be2 Rc6 9. O-O e5 10. d5 Re7 11. g3

Sérstæður leikur en 11. a5 lá beinast við. Eftir 11. ... Rd7 á hvítur 12. Rg5.

11. ... Bd7 12. Dd3 h6 13. Rd2 Rg4 14. Bxg4 Bxg4 15. f4 Dd7 16. fxe5 dxe5 17. Rb3 Hab8 18. Rc5 Dd8 19. Rd1 Bh3 20. Hf3 Bg4 21. Hf1 Bh3 22. Hf3 a5

Jafntefli kemur ekki til greina.

23. Rf2 Bc8 24. Hd1 b6 25. Rb3 g5 26. h3 Rg6?!

Riddarinn er fremur óvirkur þarna. Mun betra var 26. ... f5 strax.

27. Rd2 Bd7 28. b3 h5 29. Rc4 Bh6 30. Bc1 Dc8 31. Re3!

Eftir að hvítur nær að hertaka f5-reitinn á svartur afar erfitt um vik. 31. ... Bxh3 strandar á 32. Rxh3 Dxh3 33. Rf5! Kh7 34. g4! Dxg4 Hg3 og drottningin á engan reit.

31. ... g4 32. hxg4 Bxe3 33. Dxe3 Bxg4

34. Dh6!

Þrumuleikur sem hótar 35. Bg5. Svartur er varnarlaus gagnvart þeirri hótun.

34. ... Bxf3 35. Bg5!

Sá kostur að láta drottninguna af hendi með 35. ... Dd8 var ekki fýsilegur.

35. ... f5 36. Dxg6+ Kh8 37. Dh6 Kg8 38. Dg6 Kh8 39. Bf6 Hxf6 40. Dxf6 Kg8 41. Hd3 fxe4 42. Dg6 Kf8 43. Hc3! c5 44. dxc6 Dc7 45. Rxe4 Bxe4 46. Dxe4 Hd8 47. Df3+ Ke7

Eða 47. ... Df7 48. Dxf7+ Kxf7 49. c7 Hc8 50. Kf2 og endataflið er auðunnið.

48. Dxh5 Dd6 49. Dh7+ Ke8 50. Dg8+ Ke7 51. Dg7+ Ke8 52. Hf3 Dc5+ 53. Kh2 Hd1 54. Dg8+ Ke7 55. Hf7+ Ke6 56. Dg6+ Kd5 57. Hd7+

- og loks gafst Gawain Jones upp.

Helgi Ólafsson [e-mail]

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Sunnudagsmogganum, 16. mars 2014

Skákþættir Morgunblaðsins

[Event "Reykjavik Open"] [Site "Reykjavik ISL"] [Date "2014.03.11"] [EventDate "2014.03.04"] [Round "9.5"] [Result "1-0"] [White "Hjorvar Steinn Gretarsson"] [Black "Gawain C B Jones"] [ECO "B07"] [WhiteElo "2511"] [BlackElo "2651"] [PlyCount "114"] 1. d4 d6 2. e4 Nf6 3. Nc3 g6 4. Be3 a6 5. a4 Bg7 6. Qd2 O-O 7. Nf3 Bg4 8. Be2 Nc6 9. O-O e5 10. d5 Ne7 11. g3 Bd7 12. Qd3 h6 13. Nd2 Ng4 14. Bxg4 Bxg4 15. f4 Qd7 16. fxe5 dxe5 17. Nb3 Rab8 18. Nc5 Qd8 19. Nd1 Bh3 20. Rf3 Bg4 21. Rf1 Bh3 22. Rf3 a5 23. Nf2 Bc8 24. Rd1 b6 25. Nb3 g5 26. h3 Ng6 27. Nd2 Bd7 28. b3 h5 29. Nc4 Bh6 30. Bc1 Qc8 31. Ne3 g4 32. hxg4 Bxe3 33. Qxe3 Bxg4 34. Qh6 Bxf3 35. Bg5 f5 36. Qxg6+ Kh8 37. Qh6+ Kg8 38. Qg6+ Kh8 39. Bf6+ Rxf6 40. Qxf6+ Kg8 41. Rd3 fxe4 42. Qg6+ Kf8 43. Rc3 c5 44. dxc6 Qc7 45. Nxe4 Bxe4 46. Qxe4 Rd8 47. Qf3+ Ke7 48. Qxh5 Qd6 49. Qh7+ Ke8 50. Qg8+ Ke7 51. Qg7+ Ke8 52. Rf3 Qc5+ 53. Kh2 Rd1 54. Qg8+ Ke7 55. Rf7+ Ke6 56. Qg6+ Kd5 57. Rd7+ 1-0

Álfhólsskóli varði Íslandsmeistaratitil barnaskólasveita

 

Eins og Morgunblaðið fjallar um í helgarblaði sínu hefur skákiðkun barna aukist mjög á síðustu árum. Það sást heldur betur á Íslandsmóti barnaskólasveita um helgina en 49 sveitir tóku þátt sem er næst mesta þátttaka frá upphafi. Þrátt fyrir það vantaði nokkrar sveitir og komst sveit Brekkuskóla frá Akureyri ekki á mótsstað sökum mikillar ófærðar. Fyrirfram mátti búast við nokkrum sveitum í toppbaráttunni. Það kom á daginn og eftir fyrri keppnisdag voru margar sveitir við toppinn en Íslandsmeistararnir í Álfhólfsskóla höfðu þó tveggja vinninga forskot á Hraunvallaskóla og Rimaskóla.

 

Í sjöttu umferð mættust Álfhólsskóli og Hraunvallaskóla. Álfhólsskóli vann þá viðureign 3-1 eftir þó nokkrar sviptingar. Í sjöundu umferð lögðu þeir svo aðra hönd á bikarinn með sannfærandi sigri á Rimaskóla 3-1. Hörðuvallaskóli hefur á að skipa harðskeyttri sveit leiddri áfram af Vigni Vatnari Stefánssyni. Sveit skólans náði einum og hálfum vinningi af Álfhólsskóla í áttundu og næst síðustu umferð og settu þar með mikla spennu í mótið þar sem Rimaskóli vann sína viðureign 4-0.

Fyrir lokaumferðina hafði því Álfhólsskóli einn og hálfan vinning í forskot á Rimaskóla. Erfitt verkefni beið Álfhólsskóla í síðustu umferðinni þegar sveitin tefldi við Ölduselsskóla sem hefur á að skipa sterkri sveit og sérstaklega eru efstu tvö borðin sterk með Mykael Kravchuk og Óskar Víking Davíðsson. Fór svo að Óskar vann sína skák og kom Ölduseli þannig yfir í viðureigninni. Taugar Álfhólsskólamanna héldu þó vel og höfðu þeir viðureignina 2.5-1.5 sem dugði til sigurs.

Álfhólsskóli er því Íslandsmeistari barnaskólasveita 2014 og það þriðja árið í röð! Sveit Rimaskóla varð í öðru sæti og vann sér þannig rétt til þátttöku á NM barnaskólasveita rétt eins og Álfhólsskóli en keppnin fer fram á Íslandi í haust. Hörðuvallaskóli tók svo bronsið eftir harða baráttu. Munar þar mikið um árangur Vignis Vatnars sem tapaði aðeins hálfum vinningi niður.

Álfhólsskóli er vel að sigrinum kominn. Gríðarlega gott utanumhald er um alla skákiðkun og kennslu í skólanum. Metnaðarfullir skákmenn, sterkur foreldrahópur og einstakur þjálfari í Lenku Ptacniková sem á mikinn heiður skilið fyrir framlag sitt til skákuppbyggingar í Kópavogi. Sveitin mun endurnýjast töluvert á næsta ári en Felix Steinþórsson og Guðmundur Agnar Bragason tefldu nú á sínu síðasta Íslandsmóti barnaskólasveita. Þeir kappar hafa heldur betur skilað sínu á síðustu árum.

Íslandsmeistarar Álfhólsskóla

1. Felix Steinþórsson

2.  Guðmundur Agnar Bragason

3. Halldór Atli Kristjánsson

4. Róbert Luu

Liðstjóri: Lenka Ptácníková

 

Silfursveit Rimaskóla

1. Nansý Davíðsdóttir

2. Kristófer Halldór Kjartansson

3. Joshúa Davíðsson

4. Mikel Maron Torfason

v. Róbert Orri Árnason 

Liðsstjóri: Hjörvar Steinn Grétarsson

 

Bronssveit Hörðuvallaskóla

1. Vignir Vatnar Stefánsson

2. Sverrir Hákonarson

3. Arnar M. Heiðarsson

4. Stephan Briem

v. Andri Harðarson

Liðsstjóri: Gunnar Finnsson

 

Besta B-sveitin: Salaskóli B

Besta C-sveitin: Rimaskóli C

Besta D-sveitin: Rimaskóli D

Besta E-sveitin: Salaskóli E

Besta F-sveitin: Salaskóli F

Besta G-sveitin: Salaskóli G

Efsta stúlknasveitin: Rimaskóli C

 

Efstu sveitir skipaðar nemendum í 1.-4. bekk

1. Rimaskóli D

2. Salaskóli E

3. Ingunnarskóli B

 

Borðaverðlaun:

1. borð: Vignir Vatnar Stefánsson Hörðuvallaskóla 8.5/9

2. borð: Guðmundur Agnar Bragason Álfhólsskóla, Árni Ólafsson Hlíðaskóla, Helgi Svanberg Jónsson Hraunvallaskóla og Óskar Víkingur Davíðsson Ölduselsskóla allir með 7/9

3. borð: Joshúa Davíðsson Rimaskóla 8/9

4. borð: Róbert Luu Álfhólsskóla 8.5/9

Mótið heppnaðist vel í alla staði. Rimaskóla eru færðar þakkir fyrir samstarfið en þar er starfsfólk og foreldrar orðið ansi vant að hjálpa til við skákmót og liðlegheitin í fyrirrúmi. Liðsstjórum sveitanna er sérstaklega þakkað fyrir frábær störf um helgina. Íslandsmót grunnskólasveita fer fram eftir tvær vikur að Stóru-Tjörnum í Þingeyjarsýslu.

Lokastöðu mótsins má nálgast á Chess-Results.

Fleiri myndir væntanlegar.

 

Anand með vinningsforskot eftir hörkuumferð

Anand (2770) er í hörkuformi á ákskorendamótinu sem nú er í gangi í Khanty Mansiesk í Síberíu. Í dag vann hann Topalov (2785). Það vantaði ekki óvæntu úrslitin því Mamedyarov (2757) vann Aronian (2830) og Karjakin hafði betur gegn Kramnik (2787). Anand hefur nú vinningsforskot á Aronian.

Kramnik, Karjakin og Mamedyarov eru í 3.-5. sæti. Frídagur er á morgun.

Staðan:

Rank		Name	Rtg	FED	Pts	Res.	vict	SB
1	GM	Anand Viswanathan	2770	IND	6	0	3	25,75
2	GM	Aronian Levon	2830	ARM	5	0	3	22,00
3	GM	Kramnik Vladimir	2787	RUS	4½	2	2	20,50
4	GM	Karjakin Sergey	2766	RUS	4½	1½	2	19,50
5	GM	Mamedyarov Shakhriyar	2757	AZE	4½	½	3	18,75
6	GM	Svidler Peter	2758	RUS	4	1½	2	17,00
7	GM	Andreikin Dmitry	2709	RUS	4	½	1	17,75
8	GM	Topalov Veselin	2785	BUL	3½	0	1	16,75

 

•  Heimasíða mótsins
• Beinar útsendingar

 

WOW air mótið: Úthlutun boðssæta

Farið hefur verið yfir fjölda umsókna um boðssæti á Wow air mótinu.  Valið var erfitt, enda fjölmargir mjög frambærilegir skákmenn sem sóttu um.  Við þökkum öllum þeim sem sóttu um sætin og hvetjum þá sem ekki komust að að þessu sinni eindregið til að sækja aftur um að ári, hafi þeir þá ekki þegar náð tilskyldum mörkum til þátttöku.

Eftirtaldir skákmenn hafa verið valdir til að fylla boðssætin sex í Wow air mótinu:

1. Oliver Aron Jóhannesson (2115)

Það var ekki flókið að veita þessum pilti sæti í A flokk.  Oliver er einn af okkar allra efnilegustu skákmönnum og hefur þrátt fyrir ungan aldur náð eftirtektarverðum árangri við skákborðið.  Of langt mál yrði að rekja öll afrek hans en nefna má að Oliver var valinn íþróttamaður Fjölnis 2013, varð hraðskákmeistari Reykjavíkur 2013 og árið áður náði hann þriðja sæti á HM áhugamanna í Porto Carras.  Við bjóðum Oliver velkominn í A flokk Wow air mótsins.

2. Dagur Ragnarsson (2105)

Dagur líkt og Oliver er mikið efni.  Hann er margfaldur Norðurlandameistari í skólaskák með sveit Rimaskóla og varð Íslandsmeistari í skólaskák 2012. Dagur hefur sýnt það á síðustu misserum að hann á fullt erindi í A flokkinn, nú seinast með mjög góðri frammistöðu á Reykjavík Open.  Við bjóðum Dag velkominn í A flokk Wow air mótsins.

3. Vignir Vatnar Stefánsson (1844)

Vigni þarf vart að kynna. Þrátt fyrir mjög ungan aldur (11) er afrekalistinn orðinn mjög langur og trúlega er Vignir eitt mesta skákefni sem komið hefur fram á Íslandi.  Hann er margfaldur Íslandsmeistari og Reykjavíkurmeistari í sínum aldursflokki, Norðurlandameistari í fyrra, og hlaut silfurverðlaunin í ár.  Hann hefur verið að sýna styrk langt yfir 2000 stigin á mótum undanfarið og það var ekki erfið ákvörðun að veita honum sæti í B flokk Wow air mótsins. Við bjóðum hann velkominn þangað!

4. Gauti Páll Jónsson (1620)

Gauti Páll var í sveit TR sem varð Íslandsmeistari unglingasveita 2013 og hefur teflt mikið undanfarið.  Fáir eru jafnáhugasamir um skák og styrkur hans við skákborðið er á hraðri uppleið.  Hann tefldi afskaplega vel á Reykjavíkurmótinu þar sem hann var með stigaárangur upp á nær 2000 stig og 40 stig komu í hús.  Við bjóðum Gauta Pál velkominn í B flokk Wow air mótsins.

5. Björgvin Smári Guðmundsson (1960)

Björgvin hefur látið sig skákmál á suðurlandi miklu varða seinustu ár og er núverandi formaður og skákmeistari Skákfélags Selfoss og nágrenins.  Hann náði eftirtektarverðum árangri á Boðsmóti GM Hellis í ár (r.p. tæp 2200 stig) þar sem hann gerði m.a. jafntefli við Lenku og sigraði Eina Hjalta.  Við bjóðum Björgvin sérstaklega velkominn í B flokk Wow air mótsins.

6. Veronika Steinunn Magnúsdóttir (1600)

Veronika er stúlknameistari T.R. og Reykjavíkur, ásamt því að hafa teflt á 2. borði í sigursveit Taflfélagsins á Íslandsmóti unglingasveita.  Hún tefldi í ár á Gibraltar Open þar sem hún stóð sig feykilega vel og var með stigaárangur uppá yfir 2000 stig.  Veronika teflir mikið, er í augljósri framför og verður glæsilegur fulltrúi kvenþjóðarinnar í B flokki Wow air mótsins.

Álfhólsskóli efstur eftir fyrri hluta Íslandsmót barnaskólasveita

Íslands- og Norðurlandameistarar Álfhólsskóla eru efstir eftir fyrri hluta Íslandsmóts barnaskólasveita sem hófst í dag í Rimaskóla. Hraunvallaskóli og Rimaskóli eru í 2.-3. sæti, tveimur vinningum á eftir meisturunum. Gríðarleg barátta er um tvö efstu sætin sem gefa keppnisrétt á Norðurlandamótinu í haust sem fram fer í hérlendis en skammt erí næstu lið.

Gríðarleg þátttaka var á mótinu en 50 lið tóku þátt. Enn stendur því þátttökumetið frá 2009 þegar 51 lið tóku þátt en tæpt var það.

Rétt er að taka fram að lendi félög í jöfn í efsta eða næstefsta sæti verður teflt til úrslita um þau sæti síðar vegna þeirra réttinda sem þeim fylgir.

Staða efstu liða:

• 1. Álfhólsskóli 17,5 v.
• 2.-3. Hraunvallaskóli 15,5 og Rimaskóli 15,5 v.
• 4.-5. Laugarlækjaskóli og Ölduselsskóli 14,5 v.
• 6.-7. Hörðuvallaskóli og Salaskóli 14 v.
• 8. Kelduskóli 13,5 v.

Heildarstöðuna má finna á Chess-Results.

Mótinu verður framhaldið á morgun og hefst taflmennskan kl. 11.

Anand og Arionian efstir á áskorendamótinu

Anand (2770) og Aronian (2830) eru efstir með 5 vinninga að lokinni áttundu umferð áskorendamótsins sem fram fór í dag. Kramik (2787) er þriðji með 4,5 vinning en baráttan virðist vera á milli þessara þriggja.

 

Staðan:

Rank	SNo.		Name	Rtg	FED	Pts	Res.	vict	SB
1	6	GM	Anand Viswanathan	2770	IND	5	1½	2	20,25
2	7	GM	Aronian Levon	2830	ARM	5	½	3	18,75
3	4	GM	Kramnik Vladimir	2787	RUS	4½	0	2	17,25
4	5	GM	Mamedyarov Shakhriyar	2757	AZE	3½	3½	2	12,25
5	2	GM	Karjakin Sergey	2766	RUS	3½	3	1	13,00
6	3	GM	Svidler Peter	2758	RUS	3½	2½	2	13,50
7	1	GM	Andreikin Dmitry	2709	RUS	3½	1½	1	14,75
	8	GM	Topalov Veselin	2785	BUL	3½	1½	1	14,75

•  Heimasíða mótsins
• Beinar útsendingar

 

Stefnir í metþátttöku á Íslandsmóti barnaskólasveita í Rimaskóla í dag

Það stefnir í metþátttöku á Íslandsmóti barnaskólasveita sem fram fer í dag í Rimaskóla. Nú eru 53 sveitir skráðar til leiks en þátttökkumetið er frá 2010þegar 51 sveit tók þátt í Smáralindinni. Vegna þessa gífurlega áhuga á mótinu eru liðsstjórar beðnir um að vera mjög aktívir og aðstoða mótshaldara á allan mögulegan hátttil að mótið geti gengið sem best fyrir sig.

Búast má við gríðarlega spennandi keppni. Keppnin var einstaklega spennandi í fyrra en þá náði Álfhólsskóli forystunni af Rimaskóla í lokaumferðinni og tryggði sér þar með Íslandsmeistaratitilinn. Hörðuvallaskóli endaði í þriðja sæti. Gera má ráð fyrir að allir þessir skólar berjist um titilinn en svo má ekki gleyma sveitum Hraunvallaskóla og Ölduselsskóla sem eru til alls líklegir.

Keppnin hefst kl. 13 og þá verða tefldar fimm umferðir. Á morgun verða tefldar fjórar síðustu umferðirnar en þá hefst taflmennskan kl. 11.

Chess-Results

Einar Hjalti með fullt hús á hraðkvöldi

Einar Hjalti Jensson sigraði örugglega á hraðkvöldi GM Hellis sem fram fór 17.  mars sl. Einar Hjalti sigraði alla andstæðinga sín sjö að tölu og vann hraðkvöldið örugglega. Næst komu Elsa María Kristínardóttir og Kristinn Sævaldsson með 4,5v en Elsa María var hærri á stigum og hlaut því annað sætið og Kristinn það þriðja. Í lok hraðkvöldsins dró Einar Hjalti í happdrættinu og nú kom talan 8 sem Gunnar Nikulásson hafði og fengu þeir báðir gjafamiða á Saffran.

Næsta æfing í félagsheimili GM Hellis í Álfabakka 14a verður mánudaginn 24. mars kl. 20 og þá verður einnig hraðkvöld.

Lokastaðan á hraðkvöldinu:

Röð	Nafn	Vinn.	TB1
1	Einar Hjalti Jensson	7	25,5
2	Elsa Maria Kristínardóttir	4,5	15
3	Kristinn Sævaldsson	4,5	12,3
4	Eiríkur K. Bjornsson	4	16
5	Kristján Halldórsson	4	11,5
6	Vigfús Vigfússon	4	11
7	Hörður Jónasson	4	10
8	Gunnar Nikulásson	4	8
9	Jökull Jóhannsson	2,5	3,5
10	Jóhann Helgason	2,5	3,5
11	Björgvin Kristbergsson	1	0,5