Jón Þór sigurvegari fjórða móts Bikarsyrpunnar

Spennandi og vel skipuðu fjórða móti Bikarsyrpunnar lauk nú áðan með sigri Jóns Þórs Lemery sem hlaut 4,5 vinning úr skákunum fimm líkt og Daníel Ernir Njarðarson sem hlýtur annað sætið eftir stigaútreikning.  Alexander Oliver Mai og Stephan Briem höfnuðu í 3.-4. sæti með 4 vinninga þar sem Alexander varð ofar á stigum.

Í lokaumferðinni gerðu Alexander Oliver og Jón Þór jafntefli í háspennuskák þar sem allt var lagt í sölurnar.  Á sama tíma sigraði Daníel Ernir Birki Ísak Jóhannsson og náði þar með Jóni Þór að vinningum.  Það má geta þess að verðlaunahafarnir eru allir liðsmenn nýskipaðra Reykjavíkurmeistara úr Laugalækjarskóla.

Við þökkum keppendum fyrir þátttökuna og óskum verðlaunahöfum til hamingju.  Sjáumst á fimmta móti syrpunnar helgina 1.-3. apríl!

Myndskreytta frásögn má finna á heimasíðu TR.

• Chess-Results

 

Skákdagurinn á Suðurfjörðum

Þann 11.febrúar var haldið árlegt skákmót milli Patreksskóla og Tálknafjarðarskóla um Suðurfjarðabikarinn í skólaskák. Mótið hefur verið haldið um árabil í tengslum við Skákdag Íslands, en vegna ófærðar og veikinda þurfti að fresta því í ár.

Á mótinu tefldu 19 vaskir nemendur frá Patreksfirði og voru þeir yngstu í 3.bekk. Níu nemendur í 6. - 9. bekk mættu frá Tálknafirði og fóru leikar þannig að Tálknfirðingar unnu mótið með 18,5 - 17,5. Að venju var happdrætti og gáfu Landsbankinn, Verslunin Fjölval og Albína  vinninga. Um mótið sáu stórmeistarinn Henrik Danielsen og Áróra H. Skúladóttir kennari.

Minningarorð um Gísla Ellert Sigurhansson

 

Minningarorð

um Gísla Ellert Sigurhansson

21. des. 1934, látinn 7. febr. 2016

Gísli skákfélagi okkar og vinur er látinn eftir erfiða baráttu við ólæknandi sjúkdóm.

Gísli var lærður rennismiður og kennari og vann við það á sínum starfsárum.

Það var ekki í vinnunni sem ég kynntist Gísla, heldur í frítímunum.

Við héldum báðir við sömu gyðjuna þ.e.a.s skákgyðjuna.

Gísli var í forsvari fyrir skákfélag Breiðfirðinga ásamt fleiri góðum drengjum og þeir tefldu alltaf á fimmtudagskvöldum í gömlu Breiðfirðingabúð við Skólavörðustíg

Ég byrjaði að tefla með þeim á sjöunda áratug síðustu aldar og gerði það í nokkur ár.

Gísli var þá mjög sterkur skákmaður og þeir félagar hans margir, svo að mín uppskera eftir viðureignir við þá var oft ansi rýr, en þetta voru skemmtilegir og góðir félagar og gaman að tefla við þá.

Þessi klúbbur lagðist af þegar gamla Breiðfirðingabúð var rifin.

Leiðir okkar Gísla lágu svo aftur saman upp úr síðustu aldamótum þegar við vorum komnir á aldur eins og sagt er og við byrjuðum að tefla í skákfélagi eldri borgara.þ.e skákfélaginu Æsir.

Gísli var ennþá erfiður viðureignar og vann sínar skákir oft með snjöllum fórnum og fléttum, þó fór það að koma fyrir að maður gat snúið á hann og unnið af honum eina og eina skák og stundum gerðum við jafntefli og tókum þá oft tal saman á milli umferða um lífið og tilveruna og þjóðmálin.

Gísli hafði sterkar skoðanir á pólitík og málefnum líðandi stundar og það var alltaf gaman að ræða við hann um hin ýmsu mál.

Að leiðar lokum þökkum við skákfélagar Gísla honum kærlega fyrir allar skemmtilegar skákir og góðar stundir.

Við sendum eiginkonu hans og fjölskyldu hans okkar innilegustu samúðarkveðjur 

Finnur Kr Finnsson

Barna- og unglingameistaramót Reykjavíkur fer fram á sunnudag

Barna- og unglingameistaramót Reykjavíkur, sem og Stúlknameistaramót Reykjavíkur, fer fram sunnudaginn 21. febrúar í félagsheimili T.R. Faxafeni 12.

Taflið hefst kl.14 og stendur til ca. kl. 18. Tefldar verða 7 umferðir eftir svissnesku kerfi með umhugsunartímanum 15 mín. á skák.

Teflt verður í tveimur flokkum: opnum flokki og stúlknaflokki.

Verðlaun verða veitt fyrir þrjú efstu sætin í mótinu og þar fyrir utan hlýtur sigurvegarinn titilinn Unglingameistari Reykjavíkur 2016, sé hann búsettur í Reykjavík eða félagi í reykvísku taflfélagi.

Einnig verða veitt verðlaun fyrir þrjár efstu stúlkurnar og þar fyrir utan hlýtur efsta stúlkan titilinn Stúlknameistari Reykjavíkur 2016, sé hún búsett í Reykjavík eða félagi í reykvísku taflfélagi.

Til viðbótar verða veitt verðlaun fyrir efsta sætið í árgöngum 2000-2001, 2002-2003, 2004-2005, 2006-2007 sem og 2008 og yngri í báðum flokkum (opna flokknum og stúlknaflokknum).

Mótið er opið öllum krökkum sem eru fædd 2000 og síðar.

Núverandi Reykjavíkurmeistarar eru Vignir Vatnar Stefánsson og Svava Þorsteinsdóttir.

Skákmótið hefst kl. 14 og er aðgangur ókeypis.

Við minnum á að mótið er hluti af stigakeppni félagsins sem er í gangi út febrúar þar sem litið er til ástundunar og árangurs. Hér má rifja upp fyrirkomulag stigakeppninnar.

Skráningarform

Skráðir keppendur

Vel heppnað fjöltefli í Smáralind

Fjölteflið í Smáralind í gær til styrktar Reykjadal tókst vel. Stórmeistararnir Helgi Ólafsson og Hjörvar Steinn Grétarsson tefldu linnulaust við gesti í þrjá klukkutíma og má ætla að heildarfjöldi skáka þeirra hafi verið vel á annað hundraðið. Fjölteflið rataði í fréttatíma Stöðvar tvö.

Friðrik Ólafsson Norðurlandameistari árið 1953 og Guðlaug Þorsteinsdóttir Norðurlandameistari kvenna árið 1976 mættu glaðbeitt til leiks. Friðrik og Hjörvar gerðu sannkallað stórmeistarajafntefli í um tíu leikjum.

Ólafur Darri Ólafsson, leikari, lét ekki góða færð úr hendi sleppa og mætti til leiks úlpulaus.

Nokkrir skákmenn náðu að gera stórmeisturunum skráveifu og má nefna Pál Sigurðsson, Guðmund G. Guðmundsson, Bjarna Jónasson, Gunnar Björnsson og Óskar Víking Davíðsson.

Nemendur Háskóla Íslands færa Helga og Hjörvari Steini sem og kynninum Þorsteini Guðmyndssyni sérstakar þakkir en þeir félagar gáfu allir vinnu sínu í þágu málstaðarins.

Jón Kristinn efstur fyrir lokaumferð Skákþings Akureyrar

Í dag sunnudag kl 13:00 verður tefld síðasta umferðin á Skákþingi Akureyrar. Úrlit í sjöttu og næstsíðustu umferð sl. fimmtudagu urðu

• Hreinn hrafnsson - Símon Þórhallsson  1 - 0 
• Sigurður Eiríksson -Haraldur Haraldsson 0 - 1
• Andri freyr Björgvinsson - Gabríel freyr  1 - 0

Staðan fyrir síðustu umferð:

1. Jón Kristinn Þorgeirsson   4 .vinninga
2. Sigurður Eiríksson         3    ----
3. Haraldur Haraldsson        3    -----
4. Símon Þórhallsson          3     ----
5. Andri Freyr Björgvinsson  2 1/2  ----
6. Hreinn Hrafnsson          2 1/2  ----
7. Gabríel Freyr               0    ---

Í  síðustu umferð tefla saman:

• Jón Kristinn - Andri Freyr
• Haraldur Har - Hreinn Hrafnsson
• Gabrél Freyr - Sigurður Eiríksson
• Símon situr yfir

Heimasíða SA

 

Skákþáttur Morgunblaðsins: Jón Viktor skákmeistari Reykjavíkur 2016

Jón Viktor Gunnarsson er skákmeistari Reykjavíkur eftir spennandi lokaumferð sem fram fór sl. sunnudag. Jón Viktor vann þá Björn Þorfinnsson og á sama tíma náði Stefán Kristjánsson að leggja Guðmund Kjartansson og varð jafn Jóni Viktor að vinningum en lægri á mótsstigum. Það var látið ráða. Dagur Ragnarsson var með hvítt gegn Guðmundi Gíslasyni í lokaumferðinni og með sigri hefði hann náð titlinum. En Guðmundur, sem kom akandi frá Ísafirði í flestar umferðirnar, hafði betur og náði 3. sæti. Lokaniðurstaðan hvað varðar efstu menn var þessi:

1. – 2. Jón Viktor Gunnarsson og Stefán Kristjánsson 7 ½ v. 3. Guðmundur Gíslason 7 v. 4.-6. Dagur Ragnarsson, Björn Þorfinnsson og Björgvin Víglundsson 6 ½ v. 7.-10. Vignir Vatnar Stefánsson, Örn Leó Jóhannsson, Gauti Páll Jónsson og Oliver Aron Jóhannesson 6 v.

Þetta er í sjöunda sinn sem Jón Viktor verður skákmeistari Reykjavíkur og var hann vel að sigrinum kominn. Frammistaða Stefáns er einnig góð. Dagur Ragnarsson bætti sig verulega á þessu móti þótt tap í lokaumferðinni hafi verið súrt í broti. Af efstu mönnum hækkaði Vignir Vatnar Stefánsson mest eða um 86 stig. Það var hinsvegar Hjörtur Kristjánsson sem sló öllum keppendum skákþingsins við í þeim efnum og hækkaði um 140 elo-stig.

Margir af keppendum þessa móts halda svo baráttunni áfram á Gestamóti Hugins og Breiðabliks en þar er Guðmundur Kjartansson efstur með 3 ½ vinning eftir fjórar umferðir. 

Magnús Carlsen sigraði í Wijk aan Zee

Magnús Carlsen bætti enn einni skrautfjöðrinni í hatt sinn þegar hann vann A-flokk stórmótsins í Wijk aan Zee um síðustu helgi. Magnús var vinningi fyrir ofan næstu menn en lokaniðurstaðan varð þessi:

1. Magnús Carlsen 9 v. (af 13) 2.-3. Caruana og Liren Ding 8 v. 4.-6. Wesley So, Giri og Eljanov 7 v. 7.-8. Wei Yi og Mamedyarov 6 ½ v. 9. Karjakin 6 v. 10.-11. Navara og Tomashevsky 5 ½ v. 12.-14. Hou Yifan, Adams og Van Wely 5 v.

Hollensku mótshaldararnir eru greinilega spenntir fyrir uppgangi kínverskra skákmanna og hinn 16 ára gamli Wei Yi var mikið í sviðsljósinu meðan á mótinu stóð en var fullvarkár og gerði ellefu jafntefli. Aðeins einu sinni náði hinn sókndjarfi stíll hans að skína:

WAZ 2016; 9. umferð:

Wei Yi – David Navara

Spænskur leikur

1. e4 e5 2. Rf3 Rc6 3. Bb5 Rf6 4. d3 Bc5 5. Bxc6 dxc6 6. Rbd2 O-O 7. Rc4 Rd7 8. De2 He8 9. Bd2

Það hefur gengið erfiðlega að tefla gegn Berlínar-afbrigðinu undanfarið en þetta er nýstárleg leikaðferð, hvítur vill hrókera langt og hefja síðan peðasókn á kóngsvængum.

9. ... Bd6 10. h4 c5 11. h5 h6 12. O-O-O Rb8?!

Hæpið. Hann hefði betur reynt að verja kónginn með 12. ... Rf8 og síðan 13. ... Re6.

13. Hdg1 Rc6 14. g4 f6

Upp er komið allt að því gamaldags umsátursástand fyrir framan hervirki svarta kóngsins. Hvítur hefur stillt liði sínu upp til árásar.

15. g5!

Wei Yi brýst í gegn!

15. ... fxg5 16. Rxg5 Rd4 17. Dd1 hxg5 18. Bxg5 Be7 19. Be3!

Dregur biskupinn til baka og hótar 20. h6. Þó að svartur sé manni yfir kemur hann engum vörnum við.

19. ... Bf6 20. h6 He7

Eða 20. ... g5 21. Bxg5! Bxg5+ 22. f4! exf4 23. Dh5! og vinnur.

21. hxg7 Hxg7 22. Dh5 Be6 23. Bh6! Bf7 24. Bxg7 Bxh5 25. Bxf6 Kf8 26. Bxd8 Re2 27. Kb1 Rxg1 28. Bxc7

- og Navara gafst upp.

Grein þessi birtist í Morgunblaðinu 6. febrúar 2016

Skákþættir Morgunblaðsins

[Event "Tata Steel"] [Site "Wijk aan Zee NED"] [Date "2016.01.26"] [EventDate "2016.01.15"] [Round "9"] [Result "1-0"] [White "Wei Yi"] [Black "David Navara"] [ECO "C65"] [WhiteElo "2706"] [BlackElo "2730"] [PlyCount "55"] 1. e4 e5 2. Nf3 Nc6 3. Bb5 Nf6 4. d3 Bc5 5. Bxc6 dxc6 6. Nbd2 O-O 7. Nc4 Nd7 8. Qe2 Re8 9. Bd2 Bd6 10. h4 c5 11. h5 h6 12. O-O-O Nb8 13. Rdg1 Nc6 14. g4 f6 15. g5 fxg5 16. Nxg5 Nd4 17. Qd1 hxg5 18. Bxg5 Be7 19. Be3 Bf6 20. h6 Re7 21. hxg7 Rxg7 22. Qh5 Be6 23. Bh6 Bf7 24. Bxg7 Bxh5 25. Bxf6+ Kf8 26. Bxd8 Ne2+ 27. Kb1 Nxg1 28. Bxc7 1-0

Skákakademían sigraði í Skákkeppni vinnustaða

Liðsmenn Skákakademíunnar komu, sáu og sigruðu í Skákkeppni vinnustaða sem fram fór í vikunni. Hlutu þeir 10,5 vinning úr tólf skákum en fimm lið tóku þátt og tefldu allir við alla. Landspítalinn var í öðru sæti með 8 vinninga og lið Verslunarskólans í því þriðja með 6 vinninga, hálfum vinningi á undan Myllunni.

Lið sigurvegaranna skipuðu þeir Björn Ívar Karlsson, Stefán Bergsson og Siguringi Sigurjónsson.

Taflfélag Reykjavíkur þakkar veittan stuðning með þátttökunni en heildarúrslit má sjá hér.

Myndskreytta frásögn má finna á heimasíðu TR.

Skákhátíð í Smáralind i dag: Tefldu við stórmeistara

Stórmeistararnir Helgi Ólafsson og Hjörvar Steinn Grétarsson tefla klukkufjöltefli í Smáralind á laugardaginn kemur frá tvö til fimm. Fjölteflið sem er skipulagt af nemendum Háskóla Íslands með stuðningi Skákakademíu Reykjavíkur er til styrktar Reykjadal sem rekur einu sumarbúðir landsins fyrir fötluð börn. Allir geta tekið þátt í fjölteflinu og er tekið á móti frjálsum framlögum á staðnum.

Helgi Ólafsson varð stórmeistari árið 1985 og var hluti af Fjórmenningaklíkunni svokölluðu sem náði eftirtektarverðum árangri fyrir Íslands hönd á 9. og 10 áratugnum. Sem dæmi um frábæran árangur má nefna að íslenska Ólympíuliðið varð í 5. sæti á Ólympíumótinu í Dubai 1986 og í 6. sæti á Ólympíumótinu í Manila árið 1992. Helgi er sexfaldur Íslandsmeistari í skák og margfaldur Íslandsmeistari í at- og hráðskák.

Helgi starfar nú sem skólastjóri Skákskóla Íslands.

Hjörvar Steinn Grétarsson er yngsti stórmeistari Íslands. Hann varð stórmeistari tvítugur að aldri árið 2013 og hefur þegar skipað sér á bekk meðal fremstu skákmanna Íslands. Hann er margfaldur Íslands- og Norðurlandameistari í yngri flokkunum í skák en á enn eftir að landa sjálfum Íslandsmeistaratitlinum í opnum flokki. Hjörvar stundar nám við lagadeild HÍ meðfram taflmennsku og ætlar sér stóra hluti á skáksviðinu á komandi árum.

Guðmundur Kjartansson og Snorri Þór Sigurðsson hlutskarpastir á Nóa Siríus mótinu

Nóa Siríus mótinu, gestamóti Hugins og Skákdeildar Breiðabliks 2016, lauk í gærkvöld. Í A-flokki sigraði alþjóðlegi meistarinn víðförli, Guðmundur Kjartansson, með 5 vinninga af 6. Í öðru til þriðja sæti með 4,5 vinninga urðu prófessorinn skeleggi, Magnús Örn Úlfarsson, og tæknifrömuðurinn að vestan, Halldór Grétar Einarsson, sem bætti við sig 40 elóskákstigum. Þá er óupptalin uppskera Vignis Vatnars Stefánssonar sem nældi sér í 41 skákstig.

Guðmundur hafði hvítt í skák sinni við stjörnulögfræðinginn Halldór Brynjar Halldórsson og kom upp Sikileyjarvörn. Guðmundur náði öruggri fótfestu á yfirvölduðum reit á d5 og kom sér þar fyrir eins og púkinn á fjósbitanum, guðræknum stjörnulögfræðingnum til sárrar skapraunar. Þrátt fyrir illt auga Halldórs og öflugar særingarþulur, kryddaðar hörmulegum lagatexta, varð Guðmundi ekki haggað. Halldór laut því í lægra haldið í þetta sinn en getur borið höfuðið hátt eftir góða frammistöðu á mótinu.

Gríðarlegur baráttuandi einkenndi skák Magnúsar Arnar og snarfarans úr Bolungarvík. Guðmundar Gíslasonar. Þessir atgervismenn til sálar og líkama gerðu allt til knýja fram sigur, höfnuðu jafnteflisleiðum þótt þeir væru í taphættu og á nippinu. Svo mikil var einbeitingin að þeir brögðuð hvorki vott né þurrt þetta kvöldið og stóðu ekki upp frá borðum fyrr en tilneyddir, sársoltnir og með sinn hálfa vinninginn hvor í rassvasanum.

Í skák Halldórs Grétars og hins grjótharða Þorsteins Þorteinssonar kom upp bogo-indversk vörn. StoneStone, sem gekk ekki heill til viðureignar þetta kvöld, yfirsást snjall millileikur með riddara á b4. Halldór nýtti sér ónákvæmnina, þandi út brjóskassann og fnæsti til framrásar á miðborðinu. Varð Þorsteini að orði að það mætti ekki rétta þessum vestfirska galdramanni litla fingurinn.

Í fjórðu toppviðureign kvöldsins áttust við snillingarnir Björn Þorfinnsson, alþjóðlegur meistari, og stórmeistarinn Stefán Kristjánsson sem beitti kóng-indverskri vörn. Framan af þreifuðu þeir hvor á öðrum eins og japanskir súmó-glímumenn en svo fór að Björn náði að loka drottingu Stefáns inni og varp öndinni léttar með sigurglott á vör. Honum svegldist þó allhressilega á kaffinu og Nóa-konfektinu þegar hin svarta hátign hófst skyndilega á loft af sjálfsdáðum eins og fyrir vúdúgaldur og sveif út úr prísundinni. Upptendraður af kraftaverkinu færðist Stefán í aukana og þjarmaði allógurlega að Birni sem varðist þó fimlega, enda afkomandi margra kappanna í Víðistaðabardaga í Skagafirði, einkum þó þeirra sem lifðu bardagann af.

Af óvæntum úrslitum í A-flokki má helst nefna sigur Arnar Leós Jóhannssonar sem lagði Andra Á. Grétarsson með svörtu. Örn Leó er á mikilli siglingu þessar vikurnar, var taplaus í mótinu og hækkar 45 elóstig.

• Mótstafla á Chess-Results.

 

B-flokkur

Í B-flokki varð hlutskarpastur prófessorinn og hugleiðslumeistarinn geðþekki, Snorri Þór Sigurðsson, með 5 vinninga. Jafn Snorra Þór en lægri að stigum eftir útreikninga varð ungstirnið knáa Dawid Kolka. Snorri Þór lagði Dag Andra Friðgeirsson en Dawid gerði jafntefli við Bárð Örn Birkisson. Snorri Þór hækkar um 37 stig fyrir frammistöðuna en Dawid um 38 stig. Báðir unnu sér keppnisrétt í A-flokki að ári. Í þriðju toppviðureign kvöldsins í B-flokki sigraði Birgir Karl Sigurðsson Jón Eggert Hallsson og náði fyrir bragðið þriðja sæti í mótinu.

Nokkrir ungir og upprennandi skákmenn bættu við sig heilli hrúgu af alþjóðlegum skákstigum. Það ber hæst Stephan Briem sem hesthúsaði 57 stig, Sindra Snæ Kristófersson sem týndi upp 40 stig og Stefán Orra Sigurðsson sem bætti 38 stigum í safnið.

• Nánar á Chess-Results.

Heimasíða mótsins og myndasafn - skakhuginn.is